Ya Mo Oni Rengbe Ka Inido Tironi Na Gu Badiarogatise Angianga Boro Ndikidi Idapase Ya?
1. Tipagine duhe ti ni nga anga kina agu abatungusipai sa adunga gayó abadiarogatise ni aidipase ya du na gu nyemupai nga gayó abadiarogatise ini rengo?
1 Ya mo kura awirina rogo gaoni dungurati adunga gayó abadiarogatise ni aidipase ya? Kangia wo duhe, Zanga kapa, agu awirina re na nyemu gupai nga gu gayó abadiarogatise re koditiyo naayó ka manga ndikidi irisombori. Ono anga kina yó sa duna gu nyemupai ga gayó badiarogatise gi rengo te. Dungurati naabaha du na kina gu nyemupai du ti Mbori nga “aboro bati dunduko, ki ye sa gu inahe nga ga rengo.” (1 Tim. 2:4) Wai gu rengbe ani ka inido tirani na agu abadiarogatise nga ga agu abatungusipai du rogo gaani dungurati angianga aidipase ya?
2. Wai rugatinapai narengbe ka undo rani ani undo gu badiarogatise angianga idipase ya?
2 Gu bambatapai si aida ani mangihe nga, ka asada kadu na gu bipai du gu boro re nani. Dungu agu abadiarogatise angianga aidipase ya na kpinyemu gayó aborokporo na ki asadi kadu niwene badiarogatise, na niwene avunguagude. Isoke gayó aida kinaho nga ga pambori du kia ti gaani aida. Si rengbe kadu nga i ini betepai gbua tooni tipa aDezire Yekova nga gu a kina agu aboro aidanga na aDezire Yekova ya agumbaha fuyó. Agu akurayó kinaho nakpi gupai kuti gayó badiarogatise nga gu regbo i anaadiaha mbata na gayó aborokporo, i nadiaha awere tipa kaa ndu tipa adunguratise. Rugatinapai nika undo rani ani mangipai naayó rogo irisa na ngba wene gene ho du ani ni pati yó.—Snz. 16:20-23.
3. Gini wenepai rengbe ka undo rani ani zomia gu badiarogatise angianga idipase ya tipa ní ye kurogo rengo?
3 Ndikidi Nyemupai: Gu bambata wene gene rengbe ani ka undo ní ngbaha tipa ní gi rengo, si nga gaani mangaapai koyo du ní ni, angianga tonaha na kina wisigo Ziazia Kekeapai kindi ya. (1 Pet. 3:1, 2) Tipa ka manga gipai re, gu nyanyakipa pai si aida ani mangihe nga ka yugoho nga ani na ndikidi nyemupai tirani. Agu awirina nga adee rengbe ka yugo gayó nyemupai fu agu azanga idapase nga adee, agu awirina nga akumba ki mangi kina gu bangisapai re fu aguyo nga akumba. Wai gu rengbe yó ka manga gipai re?
4. Wai gu rengbe ani ka yugo gupai nga ani na nyemupai?
4 Ka si du nga oni aabingo ní mbata te, oni rengbe ka mbakada pa bi ní na gu gani badiarogatise du nga idipase re tipa ka bi ní. Ka ní akaraganga pai furani wenengai ya, ka rago gberanga tirani ya. Pa sota ani ka yugo dawedawe pagume naapa yugo ani gupai nga ani na nyemu ní rengbe arengba ka sa ní ní tona kaa bi aDezire Yekova niwene aboro. (Rom. 12:20) Gu kura aKristano nga aguyo naima nyaka rogo toro yo ninaamanga gupai nga ka yamba gu badiarogatise angianga idipase ya na gani aborokporo ku kpuyo yo tipa riahe, i naamanga gipai re tipa ka inido tiyo na ní na ki di gu gbegberẽ berã kadu rini yo tipa aDezire Yekova kusayo. I naafura na ní tipa kina agu apai ngba tiní zanga tona fugo na ní tipa rengo ngbaome. Kusa fuo i bi gupai nga ní ima inido tiní naayó, i ki asadi ka tona fugo na ní riipa rengo. Watadu ní rengbe ka ida ka ndu tipa adunguratise tipa ka ino gupai gani badiarogatise awirikaha wa duhe a nga ní ima inido tiní na bete aboro rogo dungurati. Ka si vura du nga ní atonanga ka sanahe tipa rengo te vurũ, oni rengbe arengba ka tambua ní tipa wai ní aundo gu gani badiarogatise nga Kristano re.
5. Ginipai rengbe abaakumba ka mangaha fu gu badiarogatise angianga ndikidi idipase ya?
5 Abaakumba gbe nga agu aboro si aida i inidi tiyo na agu abadiarogatise angianga aidipase ya na ki gbata mamu manga dezirepai fuyó. Gu ní aidanga ka ye tipa adunguratise ya, oni rengbe arengba ka fu gu nyakasaro funi du rogo Ziazia Kekeapai ti gu regbo ka ní du bambungua yo na kaza watadu ti gu regbo ka fudifudiapai amanga ní. Ka si du nga kerepai gbia ní na gani aborokporo wa gu nga kpio, abaakumba rengbe ka manga mbakadapai tipa ní duadu kinaho ti gu regbo ka i ape afugo ngara fu gaani aborokporo.
6. Gini apai nasa rani ani undo agu abadiarogatise angianga aidipase ya i ye kurogo rengo?
6 Oni makianga pa gu ngbarago ka wirinarani nga gu ní du na ani rogo dungurati du nani ka gani badiarogatise ye kurogo rengo! Gipai re yeaye a na ngbarago fu Yekova, amaraika, gbiati agu aboro dunduko du rogo dungurati. (Ruka 15:7, 10) Ono tie, ka si vura du nga gani karagapai wenengai ti tonatonaha te, ani duadu kindi na ngbarago mbiko rago nangba angba ti Yekova na agu asadatise ani amangaha, ko “akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.”—2 Pet. 3:9.
[Gu sura du ti kpewaraga 6]
Gu bambata wene gene rengbe ani ka undo ní ngbaha tipa ní gi rengo, si nga gaani mangaapai koyo du ní ni, angianga tonaha na kina wisigo Ziazia Kekeapai kindi ya