Oni Wirikipai Rogo Fugo Mbori Yo

Wai si Aida Ani Tingidi Pakpio Yesu?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Wai si aida i naamanga tingida pakpio Yesu?

Yesu aya fu apefuoko wee i niitingidi pakpioko na gu riahe narukubaha, nimangayo sunge na kpakuto na imekakue. Kpakuto narukuba kpoto Yesu na imekakue kini rukuba kureko.—Oni gedi Ruka 22:19, 20.

Gu kpakuto Yesu amangisunge nani, si aadunga na agbooro rogoyo te. Rogo Ziazia Kekeapai, i mangisunge na agbooro dedede tipa ingapai. Si du gu kpakuto re arẽarẽ ti ni ka rukuba rengberengbe kpoto Yesu. Ko afu kpotoko nimotumo, nga gu nadiba gu motumo nangia ga anya aboro anaafuhe tii ga Moize aNdiko. (AEbere 10:5, 9, 10) Gu imekakue re aarukuba gu kikiipa kure Yesu nga gu nauka nimotumo tipa gaani ingapai.—Oni gedi 1 Petero 1:19; 2:24; 3:18.

2. Gini regbo si aida ani tingidi pakpio Yesu ti ni?

Yesu akpi rago Pumbo Susiri, rogo gu diwi nga Nisana 14. Ga aYudo uru ninaatona ho uru ati ni. Rogo gu nyemu naadu mbata fu kpio Yesu, ko ari gu riahe nga ga Pumbo Susiri na gako amokedi, gu regbo re du ko asigira pa tingida pakpioko ti ni.—Oni gedi Ruka 22:14, 15.

Areme, ga Mbori aboro natingida gupai Mbori amangihe vurube Yesu tipa ka kusa goro aboro tii ingapai na kpio. (Gate 12:5-7, 13, 17) A wa i anaamanga Pumbo Susiri bara sa rogo garã, sidu, i namanga Tingida Pakpio Yesu a bara sa rogo garã yo tingbafuo ti uru rogo Nisana 14 ringbisihe kuti gu karendaria nga ga Ziazia Kekeapai.—Oni gedi Yoane 1:29.

3. Ada rengbe ka ri gu kpakuto re na ki mburi gu imekakue re?

Ho Yesu afu imekakue ni fu apefuoko, ko ayaa: “Gi inga re nga vovo ndika.” (1 AKorindo 11:25) Gu vovo ndika re adi ba aNdiko mozunga nangia ga Moize, nga gu Mbori akido aYisaraere rogoho ki ya ka i gisangbako nirengo, i duadu nigako aboro. (Gate 19:5, 6) Ono tie, aYisaraere agianga sangba Yekova te. Si du Yekova amangi kura vovo mozunga ti ni.—Oni gedi Yeremaya 31:31.

Vurube gu vovo mozunga re, Yekova nafu amaku kpaima fu badungu aboro vurube bete aboro yo. Agu aboro du rogo gu vovo mozunga re, bangeyo gbua nga 144,000. Vurube yó, amirioni aboro dagba rikaaboro yo nika gbia gu maku nga ka raka nyeanye kindi rogo paradizo auru kpotosende. Gu kura bete aboro du rogo gu vovo mozunga re na mangasunge fu Yekova auru kpotosende ane areme. I nga agu aboro nari gu kpakuto re na kini mbiri gu imekakue re, bambiko gu inga re, “si nga vovo ndika.”—Oni gedi Ruka 12:32; Yugoti 14:1, 3.

4. Wai gu ani agbia undo be Tingida Pakpio Yesu?

Gu pumbo du tipa Tingida Pakpio Yesu nakiiso gaani tambuahe tipa gu bakere nyemuse nga ga Yekova. Ko akedi Wiriko ko ye ka kpi tipa gaani ingapai. Ho ani ayeni kupati Tingida Pakpio Yesu, si naida ani berẽ kuriipa wai du pakpio Yesu na nyanyakipaha furani. Si naida ani makiapa wai rengbe ani ka yugo gaani tambuahe tipa gupai Yekova na Yesu amangihe furani re.—Oni gedi Yoane 3:16; 2 Akorindo 5:14, 15.

Ka oni aida ka ino kura apai tipa gipai re, oni bi akpewaraga 206-208 nga ga gi buku re, si nga gu buku What Does the Bible Really Teach?, aDezire Yekova akusaha.