Oni Undo Aboro I “Zingi Rame Yo”
“Wa ini oni ragoho, ya ragoho da awere oni zingi rame yo.”—ROM. 13:11.
ONI RENGBE KA SAKAROGOYO?
Tipagine duhe ti ni ninyanyakipa pai ka aKristano ranga rogo toro yo ya?
Tipagine si aida ti ni agu abatungusipai nangera angera kindi degatuyo na kini kpariapai?
Tipagine si aida ani du ti ni na wene sino tingba sunge tungusapai?
1, 2. Ngba gini gene si aida dungu aboro zingi rame yo?
ROGO agarã dunduko, dungu kutu aboro nakpiko bambiko i nayukuro watadu i nati nirame ho i agbe tarambiri ni. I nambu aguyo ti sunge mbiko i azinganga ti regbo ka ndu ku basunge yo te, watadu i nara basunge yo. Ono yukuro watadu rame rogo toro yo ima rengba kadu na kere sangbanaha. Ziazia Kekeapai naza rani ti ngbatunga gu rame re niyaa: “Boro maku nga gu ni nangera” angera kindi.—Yugo. 16:14-16.
2 Wa ga Yekova bakere uru ambeda, badungu aboro nara rogo toro yo. Zavura abangbembatayo rogo agu akanisa i aya tipaha wee si nga ga aKristano, i naya tipa gayo aboropambori wee i naraara. Gini he nga ra rogo toro yo? Tipagine du he ti ni ninyanyakipa pai fu ndikidi aKristano i naangera angera kindi? Wai rengbe ani ka undo kura aboro i zingi rame yo?
GINI HE NGA RA ROGO TORO YO?
3. Wai rengbe oni ka ringbisapa gu boro nara rogo toro yo?
3 Agu aboro nara, i nidu ti aregbo dũ kporokonyo. Ono tipa agu aboro nara rogo toro yo, i kporokonyo te, i namanga sunge ti aregbo dũ, ono angianga agu apai nga ga toro ya. I rengbe kaa berãpa agu apai du tipa raka watadu kaa manga ai pai tipa ka gbia ngbarago, wene sunge, watadu kumuko. I nadia gayo regbo kina kupati agi apai re gbe susi agu apai nga ga toro. Ono tie, agu aboro aranga rogo toro yo ya, i ini gupai nga ani naraka “ti yangara arame,” na i namanga asadatise a wa rengbe omeyo nani tipa kaa manga gupai Mbori akpinyemuhe.—2 Pet. 3:3, 4; Rk. 21:34-36.
4. Ginipai naadu berã Pauro yo ho ko ayani wee: ‘Ka oni ranga wa aguyo ya’?
4 Oni gedi 1 ATesaroniko 5:4-8. Rogo gi veresi re, gu mokedi nangia Pauro arugu aKristano ki yaa: ‘Ka oni ranga wa aguyo ya.’ Rogo gi gako rugahe yo re nga gine? Gene sa rengbe ani kaa ra ngbaha nga ka basa ga Yekova arugute tipa ruru mangaapai. Gu kura gene rengbe ani kaa ra ngbaha nga ka zanga gbe berãrani kuti gupai nga regbo ima mbeda fu Yekova tipa ko gbarasi azangasinombori. Si aidanga ani mbu ngbatunga agu aboro re gayo gene mangapai na gayo aberã duna maapai kurirani te.
5. Gini iraira bipai watadu kungbo aberã du badungu aboro nani?
5 Kura aboro naberã gupai nga Mbori ti ni nika sapangbanga yó tipa agu apai i amangaha te. (Tam. 53:1) Aguyo nabihe nga Mbori na nyemu aboro te, sidu, si aidanga ani inipai tipa ko a te. Agu akurayo naberã gupai nga ka i du ni aboro kanisa, si nika sayo i du ni abakurea Mbori. Ngbatunga agi aboro re dunduko nara rogo toro yo. Si naida i zingi rame yo. Wai gu rengbe ani ka undo yó i zingi rame yo?
SI NAIDA ANI NAANGERA ANGERA KINDI
6. Tipagine si aida aKristano mangi asadatise ti ni tipa kaa ngera angera kindi rogo toro yo?
6 Ani rengbe sa ka undo kura aboro i zingi rame yo ka ani aangera angera kindi. Ginipai rengbe ani ka mangaha tipa kaa ngera angera kindi? Ani rengbe ka mangaha wo nizanga ani rimiso tirani kurogo gu mangaapai nga ga agu aboro nara rogo toro yo. Ziazia Kekeapai nagumba gupai nga agu aboro nara rogo toro yo, i namanga ‘gu mangaapai nga ga bitimo.’ Agi amangapai re nakoda pumbo, kpibuda, wasiwasi kodaba, gu mangapai nga ga wasiro, kpata, gbiati kpihe. (Oni gedi ARomo 13:11-14.) Ne ngbatunga agi apai re nimbumbuhe. Si naida ani ningere angera kindi. Si naida gu boro nagbe tarambiri tingidi gupai nga ka ní ti nirame ho ni agbehe ni, ní ima rengba ka kpi. Nairiwo wai nyakipa gupai nga Kristano rugutini na gupai nga ka ní ta ra kindi rogo toro yo, si ima rengba ka ye na kpio funi!
7. Ginipai rengbe ka manga rani ka si du nga ani na iraira bipai tipa agu aboro du rogo gaani dagbarago?
7 Nikpiapai, Kristano rengbe ka tona ti nirame rogo toro yo ka ní tona kaa berã gupai nga agu aboro du rogo gaani dagbarago aidanga na gu wene pangbanga ní atungusaha te, na ka i mangingo ariapai te. (Snz. 6:10, 11) Ani rengbe ka berã nga, “ka si du nga aboro adianga gu wene pangbanga kugume ani atungusaha te, tipagine si aida ani naamanga nyanyaki asadatise ti ni kindi tipa ka undo aboro?” Rengo nga ha nga, badungu aboro adeganga tuyo awere te, ono ariapai ima rengba ka manga rogo gayo raka yo na si ki sayo i tona kaa berã kia. Beteyo nazinga rameyo ki di wene pangbanga kugume. Na ani rengbe ka undoyo ka si du nga ani aranga te. Ani rengbe ka mangaha wo ni asada ani vovo agene yugopai ka ba nyemu gu pangbanga nga ga Kindo ti aboro. Gu he rengbe ka undo rani ani naangera angera kindi nga pa tingida ani gupai nga sunge tungusapai na nyanyakipaha.
GINIPAI NASA GAANI SUNGE TUNGUSAPAI SI DU NA NYANYAKIPAHA?
8. Tipagine du gaani sunge tungusapai ti ni na nyanyaki paha?
8 Si naida ani tingidi gupai ti aregbo dunduko nga ka aboro avuranga kaa degatuyo ya, gaani sunge tungusapai nafu taarimo afu fu Yekova. Na ko namangasunge na sunge tungusapai tipa ka digiso gako ringbisapai. Barambeda, Mbori nika sapangbanga agu aboro adianga wene pangbanga kugume ya. Mbori nika sapangbanga yó ringbisihe kina kuti gu gene i amangapai ngbaha sa wene pangbanga. (2 Tesa. 1:8, 9) Kurigure, si adu ni ingahe ka Kristano berẽ gupai nga si aidanga ní tungusipai awere kakaka te, bambiko ‘Mbori nika zingisa ruru aboro be kpio na iraira yó a.’ (Amo. 24:15) Ani ima rugatirani nani rogo Fugo Mbori yo nga i nika sapangbanga agu aboro duwa “ameme” ‘ku rogo nyenye we.’ Mbori nayugo gako inapai vurube gu sunge ani amangaha nga ga tungusapai tipa si zaki gene fu aboro i mangi ariapai na tipa i gbia “nyenye unga.” (Mt. 25:32, 41, 46; Rom. 10:13-15) Ka ani atungusanga pai fu aboro ya, wai rengbe yó ka gbia momu ka gia gu pangbanga rengbe ka batasa gayo raka?
9. Wai tungusa wene pangbanga aundo roni na kura aboro?
9 Ani nagbia undo agbia a ti sunge tungusapai. (Oni gedi 1 Timoteo 4:16.) Ya mo oni abingo ho nga fura tipa Yekova na gu maabangirise du tipa Kindo nanyakasa gaoni idapase na gaoni nyemuse tipa Ko te? Ya mo oni agbianga undo ti sonosa oni agu asino nga ga aKristano te? Ya mo pa fu oni tironi ka mangasunge tungusapai ayengo na ngbarago furoni te? Gu badungu aboro naadu na gu momu beyo nga ga yugo rengo fu kura aboro aima gbia gu ngbarago nga ga bi ga Mbori toro si niundo agu aboro re i mangi ariapai rogo gayo raka.
ANI NIKPARIA ABORO AKPARIA
10, 11. (a) Wai gu aYesu na Pauro ayugu gupai nga i anaakparia pa agu apai naadu tipa aboro? (b) Wai rengbe ani kaa ngera angera kindi basunge tungusapai yo?
10 Badungu agene rengbe ani ka sa nyemu wene pangbanga ngbaha ti aboro. Si naida ani naangera angera kindi tingba sunge tungusapai. Yesu nga kpiapai furani. Padu Yesu nirengberengbeko nasa gupai nga ko rengbe ka ino gu berã naadu kpoto Farusi yo, ko inipa ga gu dee saberã naadu na kere ingapai tiri, na pa gu sino gamahe naadu ti gu rungorungo dekurugbo naba gu marã dunduko naadu beri. (Rk. 7:37-50; 21:1-4) Yesu arengbe ka undo aboro bambiko ko aima ino gayo azingo nga ga toro. Ono tie, si aidanga ga Mbori amoyambu du nikina rengberengbeyo mbata tipa ka kpariapa agu apai du tipa aboro te. Gu mokedi nangia Pauro angia wene kpiapai rogo gipai re. Ko anaamangasunge tungusapai rogo dungu agene tipa ka undo aboro.—Amo. 17:22, 23, 34; 1 Kor. 9:19-23.
11 Ka ani angera angera kindi na kini kpariapa ga aboro azingo nga ga toro wa Yesu na Pauro, ani ini wai aino rengbe ani ka undo aboro. Nikpiapai, ho ani andu ni ka tungusapai fu aboro, si naida ani kpariapa gayo sino mangapai, gayo nyemuapai, watadu agu apai du tipa gayo aborokporo. Singia ani rengbe ka kparia gupai i amangaha ti gu regbo da ani re na ki tambua yó tipaha tipa ka tona fugo.
12. Ho du ani ni gene tungusapai yo, tipagine si aida ani du ti ni na rubangirise nibipa fugo?
12 Gu boro nangera angera kindi na kini kparia agu apai du tipa aboro nane agu apai ane rengbe ka gbe berãni. Zavura ho ani apeka kina agu apai ni nga ga ngarasaro na gu boro kuru ani nani batungusapai yo, si naida ani tingidi gupai nga gaani memepai nga ka tungusapai fu aboro. (Batu. 3:1, 7) Si naida ani du na rubangirise ka kina agu apai ani apekaha gbenga berãrani ti sunge tungusapai ya. Gu wenepai rengbe ka sa rani ani naaberã kina kuriipa tungusapai nga kaa fura riipa agu apai ani aida ka gumbaha fu agu aboro duna nyemupai. Wa vura duhe nga fura rogo terefuni naundo aundo ti ngba sunge tungusapai, ka ani mbunga ha si gberesipa fugo dagbarani na irakporo ya.
ANI BERẼPA GA AKUARANI APAI
13, 14. (a) Wai rengbe ani ka ino gupai ngba ti boro? (b) Gini agene rengbe ani ka tona fugo ngbaha na aboro batungusapai yo?
13 Agu abamangisunge aranga ya, i nangera angera kindi na kini degatuyo na rubangirise fu agu aboro i agbiayo batungusapai yo. Gini asanahe rengbe oni ka sana agu aboro nani oni agbiayo rogo gaoni dagbarago tipa i gumba gayo abipai furoni? Ya mo i nabakabangiriyo tipa pa wai akanisa ange kina kumbatayo, gu zuũ namanga rogo dagbarago, watadu wai gu asadatise nga ga abazogo ati kina ku ime yo? Ya mo oni rengbe ka undo kura aboro i wirikipai tipa Mbori nigumba oni pa gu wene kusikusiahe nga ga Mbori watadu agu aundo du ti mangasunge na agu arugute nga Ziazia Kekeapai? Kpee nga gupai niima ngba ti dungu aboro zavura agu aboro naya Mbori ti ni te. Badungu aboro nabaka kina bangiriyo singia boro ho nzunzu nagia gayo kpee. Kura aboro rengbe arengba ka ida ka ino karagapai kuti gu sanahe nga: Ya mo Mbori nadegatuko sa akpee dũ? Ka si du nga ko adeganga tuko sa gaani akpee te, ginipai si aida ani mangihe tipa ko degetuko sani?
14 Ani rengbe ka wirika wai ka tona fugo na aboro ka ani kparia wai agu abatungusipai niima du na inohe atungusapai. Si naida ani kparia wai i asasana aboro rogo wene gene yo. Wai du tiiworo fugoyo na gupai agu apai i agumbaha ayugoho tipa gupai i aida ka inoho tipa ga irakporo bipai.—Snz. 15:13.
WENE SINO NA TATAMANA
15. Tipagine si aida ani du ti ni na wene sino ho ani amangasunge tungusapai ni?
15 Ya mo oni naaida boro zingisi roni rogo gaoni dudunguro rame? Badungu aboro rago naangbanga tiyo ho i azingisa yó ni gbakirigbakiri rogo gayo rame ya. Dunguyo naaida i zingisi yó ngba wene gene. Kina gu bangisapai re a du tipa zingisa boro rogo toro yo. Nikpiapai, ka boro zingi kuti roni gene tungusapai yo, ginipai ka oni mangihe? Si naida oni duna tambuahe tipa pa duni gbayaga furani na ki guari. (Snz. 15:1; 17:14; 2 Tim. 2:24) Ka oni mangi funi ngba wene gene awere, ní ima rengba ka gia rengo kumbatayo ka aDezire Yekova ndu berewe fuoni.
16, 17. Wai rengbe ani ka mangasunge na rugatinapai gene sunge tungusapai yo?
16 Ti kura aregbo, oni rengbe arengba ka fura kindi na gu boro ka ya ní na nyemupai te watadu ní na kina gani pambori ti ni. Ní rengbe ka pehe wo bambiko si nga gu taata gene rengbe ní ka mbu fugo na oni ngbaha. Ono oni rengbe ka mangapai nitatamana na wene sino, oni rengbe ka sana ní na gu sanahe rengbe ka undo ní ní du na nyemu gu pangbanga nga ga Ziazia Kekeapai tiní.—Oni gedi AKorosaio 4:6.
17 Ti kura regbo ho ani agbia agu aboro ni nabihe nga regbo beyo ka gia gaani wene pangbanga te, si niwenepai ani mbu regbo fuyo. Ti kura aregbo, ani rengbe ka bihe nga oni rengbe arengba ka fura naayo niwiri guruhe. Nikpiapai, bete awirina rengbe ka gumba gu pangbanga nga ga Ziazia Kekeapai vuru wiri guru regbo yo mbata fu si da ti miniti. I nageda Ziazia Kekeapai fu irakporo, na ki sana ní na gu sanahe nika sa gupai nga i ye berewe ti kura regbo ka karagapai sani. Ngbatunga fugo niguruhe wa gure ima rengba ka sa irakporo nifu wiri bete regbo furani ani fura na ní. Oni rengbe ka asada manga gipai re ti kura regbo ka oni gbia momu.
18. Ginipai rengbe ani ka mangaha kadu niwene abatungusipai zavura ho ani asonga gimaha aso ni ya?
18 Ka ani mbakaditirani ka manga dezirepai nga gu ani asonga gimaha aso ya, ani ima rengba ka undo agu aboro ani agbiayo naʹuru dunduko i duna nyemu Mbori tiyo. Dungu awirina naroga awaraga ku mangu yó yo watadu kurogo gayo mangu bee. I rengbe a kadu na averesi riyo yo tipa ka fura na aboro riipaha ka momu du beyo ka mangaha wo.
ONI ZINGISI AGUMERONI RAMEYO NGBA WENE GENE
19. Tipagine si aidanga ani mbu manga asadatise ka undo agumerani ti ni ya?
19 Ani dunduko naida ka undo agumerani i gi rengo. (Yos. 2:13; Amo. 10:24, 48; 16:31, 32) Ka si du nga oni tungusipai fuyo ti bambataha i ki ká aká, si aidanga si zeresi roni ti manga oni asadatise tipa ka undoyo te. Oni rengbe ka maa gupai ku berãroni yo nga oni rengbe arengbe ka manga wiri tooni pai gbua watadu ka gumba gu fugo nika aria gayo berãpai. Pai rengbe arengba ka manga nga gu nika sa ga gumeroni raka si ariatihe watadu gani bipai. Watadu oni ima ino yugopai awere wenengai na si ima rengba ka ye na wene sangbanaha.
20. Wai rengbe ani ka yugo irisa tipa ga agumerani abiapai watadu aberãpai ho ani afura ni naayo?
20 Si naida ani irisi ga agumerani abipai na aberãpai airisa. (Rom. 2:4) Ya mo si aidanga ani fura fuyo ngba wene gene kina wai ani afura na agu aboro ani agbiayo gene tungusapai yo te? Ani fura fuyo nizera na rogo irisa yo. Zanga kaa tungusapai atungusa kindi fuyo, oni undo yó i bi wai rengo aundo roni ngba wene gene. (Ef. 4:23, 24) Oni saha fuyo taata i bi gupai nga oni naraka wene raka mbiko Yekova nayugupai furoni. (Yes. 48:17) Oni yugu wai fu agumeroni rogo kpiapai yo si aida aKristano raki gayo raka.
21, 22. Oni funga kpiapai nayugo wai nyakipa manga asadatise ka undo agumerani i wirikipai tipa Yekova.
21 Wirina sa akepai ki ya ri aima digo ni aʹasadi tiri ti aregbo dũ ka manga dezirepai fu awirinari du 13 rogo gari afugo yo na mangaapai. Ri naake awaraga fuyo rogo agarã yo dunduko. Tipa agarã 30, kina ri sa nadu rogo rengo rogo gayo ngbadimo kporo.
22 Rogo kura uru sa, gi wirina re ayambu kura wirinari sa naraka tuturũ. Gu wirinari re aya furi wee ri asana gari batungusipai tipa ko yugu Ziazia Kekeapai furi, ono ko ayugongo ho te. Ho ri ayani fu gi wirinarani re wee, ri adu na ngbarago ka undo ri ri wiriki Ziazia Kekeapai, ri ayaa: “Ii, ono mi nape gupai foro awere nga: Mi kaa danga nidezire Yekova ya.” Fuo ri kedi gu buku nga What Does the Bible Really Teach? furi, ri anaayamba ri dedede, ono kini bi gupai nga ri ata zakanga ha te. Sangba gi wirinarani re nga: “Niyangaraha, mi aya furi ri zara gari buku, ani ki wirikipai naari tipa aminiti 15 rogo terefuni, ani agedihe na ki sakipai tipa agu averesi i nakeke paha. Tifuo manga ani he tipa bete aregbo, ri aidi kaa wirikapai susi aminiti 15. Tifuoho, ri atona kaa yamba re tipa gari wirikapai, ti kura aregbo mbata fu mi guari ri ba wiso. Gu kura aregbo kinaho ani animangihe amanga bara ue rogo uru sa. Gu garã nangbe fuoho, ri azi bapatiza, na gu kura garã nangbe fuo gure, ri ki tona sunge abazakigene.”
23. Tipagine si aidanga ani mbu manga asadatise ti ni tipa kaa undo aboro i zingi rameyo ya?
23 Si naida ani mangisunge na birĩ na ki asadi ka undo aboro i zingi rame yo. Badungu aboro kindi nadia wene pangbanga kugume. Bange agu aboro nazio bapatiza rogo adiwi dunduko kini da ni aDezire Yekova ima susa 20,000. Si naida ani di ga Pauro arugute kugume nga gu ko afuhe fu gu wirina naadu rogo bambata sa kama agarã nangia Arukipo ki yaa: “Mo bérẽ pa gu sunge mo adi he be Gbia, mo dígisi he.” (Koro. 4:17) Gu kekeapai naye fuo gere nika undo rani ani ini gu he mangasunge tungusapai niʹipiʹipihe akodaha.
[Box on page 13]
AGU APAI RENGBE KA UNDO RANI ANI NAANGERA ANGERA KINDI
▪ Ani naamanga gupai Mbori akpinyemuhe ti aregbo dũ
▪ Ani ne gu mangaapai nga ga bitimo
▪ Ani du na rugatise ani andu ka ra rogo toro yo
▪ Ani du na wene bipai tipa agu aboro ani agbiayo rogo gaani dagbarago
▪ Ani asadi vovo gene nga ga yugopai tipa ka yugopai fu kura aboro
▪ Ani tingidi nyakapa gaani sunge nga ga tungusapai dedede