Gini Regbo Gu Vura Nga Ga Aramegido Nika Manga Ti Ni?

“Oni ngére, mi ki bi bakere rimbasa aboro, ka boro ageda nga yo wa sa ya, dagba rika aboro dunduko, na angbatunga yo, na aboro, na angbatunga afugo dunduko, . . . naakuru rogo bakere gberãngbii.”—YUGOTI 7:9, 14.

ABORO ima mbakadatiyo tipa gu vura nga ga Aramegido. Rogo gini gene?

Aboro kinaho awere nga aguyo koditiyo rogo zegino dunduko tipa ka iriso Yekova na kini raki kuti agu arugute nga ga Ziazia Kekeapai du tipa ruru mangapai. Mbiko gu undohe nga ga Mbori, rikaaboro rogo zegino dunduko, na angbatunga afugoyo dunduko dunguratiyo kurogo bangisa ba sa tipa ka du nikodikodiyo rogo nyemuse yo. Gu nyemuse nga ga awirina re du du ti aDezire Yekova.—Yoane 13:35.

Barambeda kumbatayo, Satana nika dungura gako abanzengere tipa i so bakere vura kuti gu bayee aboro si awira wa boro tiyo re te. (Yezekere 38:8-12; Yugoti 16:13, 14, 16) Gine nayugo nani nga rengo du? Ziazia Kekeapai nafura tipa agu agopai rengbe ka undo rani ani ini gu regbo gu vura nga ga Aramegido re nika manga ti ni. Badungu agu agopai re ima du niyuguyuguhe na nidigisitihe.

Agu Apai Oni Abihe Si Nidigisitihe

Ga Yesu abawiriki asanako nga aboro nika ru wai ka ino singia “digida rago” da. (Matayo 24:3) Yesu akaragapai fuyo na ki fura tipa gu regbo re nga, “rika aboro azínga kuti gu rika aboro, ngbi ki zingi kuti gu ngbi; angbongi nikadu na abazigizo rogo agu arago.” Fuani ko ayaa: “Ono tonatona rungo nga agi apai dunduko re.” (Matayo 24:7, 8) Gu mokedi nangia Pauro afura tipa gu bangisa regbo re ki ya si nga “kusa rago,” na ki pe gupai nga gu regbo re nikangia “gbegberẽ rago.” (2 Timoteo 3:1) Ya mo oni nabihe nga gu sangbaanebi re nafura tipa agu apai namanga ti gi gaani regbo re?

Tipagine gu regbo re nikadu ti ni nikpakarakpakaraha? Gu mokedi nangia Yoane agumba ndu gupai si nika du ti ni wo. Ko afura tipa gupai re kumbatayo nga si nikangia “bete rago” nga gu Satana gbiati gako adaimona nikaa mangapai auru kpotosende ane. I fura tipa Satana nga ko nikadu “na bakere zinga” ti gu regbo re. (Yugoti 12:7-12) Ya mo oni abingo ho tigaoni nga aboro areme nizingizingiyo na kini mangiapai na kina zuũ dagbatiyo, angianga rogo bangisa ba sa ya ono rogo zegino dunduko te?

Yesu agumbapa pa gu kura nyanyakipa sunge sa si adu nga si nika manga ti gu regbo nga ga kpakaraapai re. Ko yaa: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.” (Matayo 24:14) Areme, aDezire Yekova natungusa gu wene pangbanga nga ga Kindo rogo aringara naima susa 235 na rogo fugo-aboro naima susa 500. Agu awaraga ue i akusaha nga Ngbaõbambu Sinziri na Awake!, waraga ho aboro akpakara ha rogo zegino wa gi gayo amagazini re te. I ima sa Ziazia Kekeapai kurogo bete fugo-aboro bangehe nambedi kada ti 100. Gu sunge nga ga aDezire Yekova, abaundosunge du namangaha na agu agamahe aboro agamaha nasongoda gi gayo sunge re. Ya mo gi iiriwo tua nga ga sunge tungusapai re arengbanga kadu nga digisidigisi ga Yesu sangbaanebi te?

Ziazia Kekeapai ima fura a tipa gu memeapai nga gu nika kusa vura dagba Yekova Mbori na agu aboro nasoga ko. Oni kparianga sangbaanebi biata nga gu oni ka bihe si nidigisitihe.

Agu Apai Nika Manga Barambeda Kumbatayo

Bambata Sangbanebi. Ziazia Kekeapai nagumba gupai nga rikaaboro nika ya “zereda, ngba barani angba.” I nika berãha tigayo nga i ima mbeda ka nyasa riipa akparapai. Ono tie, agu apai nika ngbefuo gu pangbanga re ayugongo pazereda te.—1 ATesaroniko 5:1-3.

Ue Sangbanebi. Fuo gure, azogarago nibakiakia nika zinga kuti agu ariigbu pambori nga ga zegino. Rogo Ziazia Kekeapai, i ringbisipa agu azogarago re kuti nyarinde; na agu aziree pambori nga ga zegino kuti gu dee naora rii nyarinde. (Yugoti 17:15-18) Gu nyarinde narukuba azogarago re nika manga gupai Mbori aida u mangihe nga ka gbarasa agu apambori dunduko nananga tihe nga si nayugopai fu aboro tipa Mbori.

Gu mokedi nangia Yoane afura tipa gupai re ki yaa: “Gu gbangaru mo nibi he bawe, na nyarinde a, si nikasoga debari, ki gbarasi ri ni kundiriri, ki riti pasiori, ki zokodi ri ni we dunduko. Bambiko Mbori amai sangbako ku kpotoyo yo i mangi he.”—Yugoti 17:16, 17.

Biata Sangbanebi. Fuo gi vura re nyasi riipa aziree pambori, Satana nika dungura rikaaboro i so nyanyakipa vura kuti agu aboro nairiso Yekova Mbori. Gi vura re nikangia tonatona gu vura i ayambaha nga Aramegido.—Yugoti 7:14; Matayo 24:21.

Gini Ome Si Nikadu Nani Kurii Roni?

Kangia oni ata gbianga momu tipa ka wisigo Ziazia Kekeapai sirisiri te, si rengbe kadu furoni nikpakarapai oni idi kuti agu apai saki yó pai tipaha kuari re nga si nika manga amanga. Ono wene ndupai kinaho tipa ka du naa kido nga gu futufutuapai dunduko saki yó pai tipaha re nika da ada ti rengo na si ima mbeda ka manga. Gu badungu sangbaanebi nga ga Ziazia Kekeapai naima digo nidigisitihe nasa rani ani du naa kido nga kina boro rengo du.a

Si adu niwenepai ka oni di regbo ka wisigo ndu gupai aDezire Yekova naidi ti ni kuti gupai nga “gu vura nga ga gu bakere rago nga ga Mbori, nga gu ko du na tandu apai dũ” ima mbeda kada na ndu gupai si aidanga ti ni oni gunde behe ya. Oni sana yó i sakipai furoni tipa gupai Ziazia Kekeapai agumbaha nga si naida oni mangihe tipa wa ka oni ruho kadu dagba agu aboro Yekova nika bandayo. (Yugoti 16:14) Gupai oni nika wirikaha, si rengbe ka undo roni oni du na wene bipai tipa raka kumbatayo.

[Footnote]

[Blurb on page 8]

Ya mo gu sunge tungusapai nga ga aDezire Yekova rengbe kadu nga digisidigisi sangbaanebi nga ga Ziazia Kekeapai?