Tipagine Bagi Kpetambuahe Ambugene ti ni fu Arungo?
WA VURA duhe nga kura aboro nakpara akpara fu Mbori, agu akurayo aidanga kuti gupai nga Ko ti ni te. Tipagine du yó ti ni na atikö? Si rengbe kadu wo mbiko gu bakere rungo i abihe si nimangi rogo zegino. Ya mo oni abakinga bangironi tipa gupai nasa Mbori ko mbugene fu arungo si nimangi?
Ya mo Mbori ambakadi aboro nzunzu i du wai du yó awere nikpakpa yó na kini rungo? Kangia wo duhe, ka si mbu ambu furani ani irisi gu mbori nakusi aboro i nirungo. Oni kparianga gipai re: Ka si du nga oni bi wene tarambiri oni aida ka ngbehe, oni ki wisigihe na ki bi gupai nga he ima kutukpaha kubani, ya mo oni ya si amangi be gu boro nakusihe? Wa gu sa te! Oni bihe nga bakusihe aima mbakadaha “nibawenehe” ono gu kura boro kia si akutukpa beni watadu gu kurahe kia namangihe.
Teketeke a, ka si du nga rago nangba angba tirani ka bi wai Mbori ambakadi ahe ti genehe nibeedihe rogo zegino, ono kina baguzoro na gbegberẽ mangapai kini rungosi aboro rogoho, gini digisopai rengbe ani kada kutini? Ziazia Kekeapai nayugo gupai nga Mbori akusi bambata kumba na dee nirengberengbeyo ono kina yó nisayo nasia ka gbarasa tiyo. (Pa Fu Rugute ni Ue he 32:4, 5) Gu wene pangbanga duho nga Mbori ima kidohe tipa ka mbakada gupai nagberẽ re na ki karaga aboro giasangba i du berewe nirengberengbeyo. Ono tipagine tie ko ambu gipai re ti ni si di ngbanga regbo wa gere?
Tipagine Si Adia Gbanga Regbo Ti Ni?
Gu ndupai naasaha si di gbanga regbo nga pa gu sanahe nakuru nga, da duna rengo beni ka zoga aboro? Yekova akusanga aboro i nizogo tiyo te. Ko nga gayo bazogo. Ziazia Kekeapai nayaa: “Gu boro nata, pa ruga gani apai si rogo ni yo te.” (Yeremaya 10:23) Si nafu kina rungo nga gu bambata aboro asia ka samungu kuti ga Mbori zogarago. Gayo gbegberẽ mangapai asayo ni aboro ingapai. (1 Yoane 3:4) Nisangbana gipai re, i adunga berewe nirengbe rengbeyo te, na i aye na gbegberẽpai kutiyo na atitayo.
Tipa akutu agarã, Yekova ambugene fu aboro i zogotiyo, ono gu pangbanga nga ga aboro nayugu gupai nga aboro arengbanga ka zogatiyo nisayo te. Nirengo, gu zogarago nga ga aboro dunduko naye na kina arungo kuti aboro. Gu ho kandara sa nanyasingo riipa avura, kuondiko, iraira mangapai, watadu akaza te.
Wai gu Mbori Nika Dia gu Gbegberẽ Apai re Kusayo?
Ziazia Kekeapai nakidohe nga Mbori nika ye na vovo zegino awere. (2 Petero 3:13) Kina agu aboro namangasunge na gayo ranirii tipa ka yugo nyemuse fu akurayo na fu Mbori, i i nika mbugene fuyo tipa i raki rogoho.—Pa Fu Rugute ni Ue he 30:15, 16, 19, 20.
Ziazia Kekeapai nape gupai a nga ti “rago sapangbanga” nga gu naima mbeda kada, Mbori nika dia arungo kusayo gbiati agu aboro naye nani. (2 Petero 3:7) Fuo gure ngbutuko, gu boro Mbori nasia ko ni Bazogo nga Yesu Kristo, ko nika zoga aboro. (Daniere 7:13, 14) Ginipai ga Yesu zogarago nika mangaha? Ziazia Kekeapai nayaa: “Bayee aboro adía kumbo ringara, ki du na ngbarago tipa gu wenepia du kpaima.”—Atambuahe 37:11.
Nidu Yesu nigu Bakindo nga ga ngbangbaturũ ko, ko nika dia gu gbegberẽ apai bambata aboro aye nani kodihe na akaza, gbinza na kpio nga gu naye mbiko sa aboro mungu kuti Yekova duna “gugaabi unga” beko. (Atambuahe 36:9) Yesu nika husa agu aboro dunduko idi na gako wene zogarago. Tii gako zogarago, agi akidohe nga ga Ziazia Kekeapai re nika da nirengo.
◼ “A nga boro kporo sa ayá, ‘Mi nawoka’ te; agu aboro naraka rogo ho i avú yo avu ti gayo irairapai.”—Yesaya 33:24.
◼ “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”—Yugoti 21:4.
Ya mo rago angbanga tironi ka ino gupai nga barambeda kumbatayo, Mbori nika digiso gu gako kidohe du tipa dia arungo kusayo te? Wa du rago tie re, si naida ani du naa kido nga ko nagia gaani akpee agia ka si vura du nga ko mbugene tipa arungo nimangi rani vurũ.
Mbori kina ti ni. Ko rengbe arengba ka gia gaoni akpee, zavura agu akpee oni amangaha tipa agu apai nafuda roni. Na ko naida ka bi roni abi oni raki na ngbarago tigu regbo oni kaa dunga na igira watadu na atikö ya.