Gu Ziga Du Tipa Gu Kpakaraapai du Rogo Zegino

ARUNGO ima maapai rogo arago dunduko, na si naba kina nunga ti dungu agu aboro nabihe na agi aboro re kini idi ka undo aguyo narungo re. Nikpiapai, agu aboro namangasunge bambungua yo, i namangasunge kakaka tipa gbanga regbo ka undo agu aboro duna akaza watadu ka undo aguyo oko. Ababisiwe, aborisi, abarũndiko, gbiati agu aboro nabatasa agu akurayó du rogo kerepai, i namanga asadatise ka undo agu aboro du rogo arungo watadu ka batasa yó. Ngbatunga gu asadatise re naundo aboro nibasasa, ono boro ho watadu riigbu rengbe ka dia arungo kusayo auru kpotosende te. Nigupai dukia ti gure, kina Mbori sa rengbe ka ye na gu ziga du tipa arungo.

Ani nagbia ngarasahe rogo Ziazia Kekeapai. si nayaa: “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.” (Yugoti 21:4) Ani makianga pa wai du gu kidohe re na ome ti ni kurii aboro. Si nagumbapa ga Mbori ringbisapai tipa ka digiso arungo dunduko. Ko nika mangaha nidiako avura, akaza, na gomoro, gbiati iraira sarangbanga kodihe na gbegberẽ aboro kusayo auru kpotosende. Boro ho rengbe ka manga gupai re te.

Gupai ga Mbori Kindo Nika Mangaha

Yekova nika digiso gako akidohe vurube Yesu Kristo. Regbo nika yeaye ho Yesu nika zogarago ni nibakindo rogo ga Mbori Kindo auru kpotosende dunduko zanga boro duho natikango naako. Aboro adunga berewe tiibe agu azogarago nga ga aboro te, kina Yesu sa nikangia gu bangisa Bakindo nikaa zogarago auru kpotosende.

Gu Kindo re nika dia gu zogarago kusayo nga ga aboro. Ziazia Kekeapai aima fura tipa gipai re kumbatayo ki yaa: “Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.” (Daniere 2:44) Aboro dunduko nikadu nikodikodiyo tiibe gi ruru zogarago re.

Ho Yesu aduni auru kpotosende niboro, ko anaafura tipa gu Kindo re ti dungu aregbo. Ko afura tipaha rogo gu kpia kparakpee ko ayuguhe fu gako abawiriki kini rugu yó i naakparakpee tipaha kini yaa: “Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.” (Matayo 6:10) Ani kparianga gupai nga, Yesu akodi gu Kindo re kuti gupai Mbori akpinyemuhe. Ginipai du Mbori akpinyemuhe re? Gupai ko akpinyemuhe nga ka dia arungo kusayo auru kpotosende.

Ga Mbori ruru zogarago nika ye na amaku ku auru kpotosende, nga agu amaku gu zogarago nga ga aboro arengbenga ka ye nani ya. Ani tingidinga gupai nga, Yekova afu Wiriko nimotumo tipa wa ka aboro ruho ka gbia nyenye unga. Tiibe gu bawene zogarago nga ga Kindo re, aboro akaragatiyó ki da nirengberengbeyo. Gini kurapai berewe gu Kindo re nika mangaha? Ziazia Kekeapai nayawee Mbori ‘adigiso pakpio nyeanye kindi, ko awéga aume ti bangiri aboro dunduko kusayo.’—Yesaya 25:8.

Kura aboro rengbe ka sanahe ki yaa: ‘Tipagine Mbori aaimanga mangapai ti ni tipaha bakuru kusayo ya? Gine ko apidoho?’ Mbori arengbe arengba ka mangapai tipa ka digiso arungo bakuru kusayo. Kuba gure, ko ambugene fu arungo si naamanga na wene nduhe. Ko aambunga ha tipa agu anduhe nabi kinako te, ko ambuhe tipa awiriko gbia nyenye undo auru kpotosende. Gu baagude duna nyemuse koyo du wirini ni, ní rengbe ka mbu gu gude re u susi rogo arungo ka ní ini gupai nga, undo kinaho gu gude re nika gbiaha wa ní nika susa rogo gu rungo re. Teketeke a, wene nduapai kinaho Yekova ambu arungo ti ni si naamanga aboro tipa bete regbo. Ziazia Kekeapai ima fura tipa gi nduapai re. Si nakoda ingapai, agu apai duwa ranirii ka siapai, na gu ngbanga du tipa ga Yekova pagbia gbiati gbegberẽ sino boro nitoro. Mbori aidi gupai nga, gi gbegberẽ sino boro re zogo zegino tipa bete regbo.a

Wa vura duhe nga ba berani ane tipa ka fura tipa gipai re na afutufutuhe te, apai kinaho ue nga rengo nafu maabangirise furani na kini ngarasi rani ani nafura tipaha kusende re. Bambataha nga: Yekova amanga wene apai amanga furani bakere gbe bangirani ki go ti agu arungo namanga rani awere re. Kurigure, ko nakido rani niyaa: “[Aboro] atíngida nga pa . . . bambata apai te si ayé nga ku berãyo yo a te.” (Yesaya 65:17) Mbori nika ye aye na nyenye ziga tipa agu apai dunduko aboro arungo behe na ki nyasi riipaha.

Ue pai nga: Mbori ima maa gu regbo ko nika nyasa na arungo ti ni. Oni tingidi gupai nga, gu nebi nangia Abakuku asana Yekova tipa gu regbo Yekova nika digiso arungo ti ni. Yekova akaragapai fuko ki yaa: “Yuguyugupai nasunguda ragoho kindi; . . . si aíma nga te.” (Abakuka 2:3) A wa ani ka bihe rogo gu kekepai naye fuo gere, “ragoho” ima mbeda kada.

[Gu rukutu kekeapai du bandu kpewaraga yo]

[Gu kpiahe du ti kpewaraga 7]

Agu Averesi Nafura Tipa gu Wene Apai Nika Manga Kumbatayo

AVURA ADUNGA BEREWE TE:

“Oni yé ka bi agu apai Yekova amangi, nga gu kere gbarasahe ko amangi auru kpotosende no. Ko namanga pai, vura nyasi digida kpotosende no.”​—Atambuahe 46:​8, 9.

ABADIANGBARANI AZINGA AZINGA BEKPIO:

“Ruru aboro azinga be kpio na iraira yo a.”​—Amokedi 24:15.

ARIAHE ADUKA SEKPESE FU ABORO DUNDUKO:

“Zende ahe zúku rogo ringara kpaima; si wó ri abaagangara yo.”​—Atambuahe 72:16.

AKAZA ADUNGA BEREWE TE:

“A nga boro kporo sa ayá, ‘Mi nawoka’ te.”​—Yesaya 33:24.

GBEGBERẼ ABORO ADUNGA BEREWE TE:

“I aróga gbegberẽ aboro ku sa yo zegino, agu yo namanga pai ni biriki i amófa yo amofa zegino.”​—Asanza 2:​22.

KINA RURUAPAI NIKAA MANGA:

“Oni ngére, bakindo azóga rago na rurupai, abazogo ki nizogo rago na ruru sarangbanga.”​—Yesaya 32:1.

[Gu kpiahe du ti kpewaraga 7]

Ga Mbori Kindo nika mbakada agu apai dunduko nagberẽ