Oni Wirikipai Rogo Fugo Mbori Yo

Agu Aboro Nga Atoro, Gini Ome du Yó Nani Kurirani?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Ada nga amaraika?

Amaraika nga agu aboro nga atoro naraka ngbangbaturũ yo. Gayo raka kuari susi ga aboro. Ndikidi Mbori nitiko nga toro, ko nakusi amaraika mbata fu ko kusi kpotosende. (Eyobo 38:4, 7; Matayo 18:10) Amirioni amaraika ke pati Yekova kirikiri.—Oni gedi Atambuahe 103:20, 21; Yugoti 5:11.

2. Ya mo amaraika naundo aboro?

Amaraika aundo gu ruru kumba nangia Roto. Ko aaraka rogo gu gbata Yekova aima diaberã ka gberesaha bambiko gu gbegberẽ mangaapai nangia ga agu aboro naaraka yo. Amaraika ue afu zahe fu Roto na gako aborokporo i kuru kusayo rogo gu gbata re. Kura aboro abi gu zahe re wakina pa mbaro zanga i mangipai kuti ni. Ono Roto na awiriko ue nga adegude abati bambiko i amangipai kuti gu zahe Mbori afuhe fuyo vurube gako amaraika.—Oni gedi Bambata Pai 19:1, 13-17, 26.

Ringbisihe kuti Ziazia Kekeapai, amaraika naundo aboro ni nungusayo gu sunge tungusa wene pangbanga nga ga ga Mbori Kindo aboro amangaha areme. (Matayo 24:14) Gu wene pangbanga re nakoda zahe. Anga gi zahe re nga kungbo pa mbaro te, si wakina gu zahe i afuhe fu Roto. Mbori nafuhe vurube gako amaraika.—Oni gedi Yugoti 1:1; 14:6, 7.

Mbori rengbe arengba ka mangasunge na amaraika i nyakasi rani ho ani agbiatirani ni na aˈasada. Ko amangisunge na amaraika i nyakasi Yesu.—Oni gedi Ruka 22:41-43.

Barambeda, Mbori nika mangasunge na amaraika ngba kura gene i di gu gbegberẽ aboro kusayo naye na arungo. Gipai re nika ye na zereda fu aboro.—Oni gedi 2 ATesaroniko 1:6-8.

3. Wai du adaimona na ome kurirani?

A wa badungu aboro auru kpotosende amangapai nigbegberẽhe nibasasangba Mbori, kinawo a badungu amaraika asamungu kuti Mbori ngbangbaturũ yo. (2 Petero 2:4) I nayamba agu amaraika nasamungu re nga adaimona. Bairayo nga Satana Bakitingbanga. Satana na gako adaimona naingisa aboro.—Oni gedi Yugoti 12:9

Satana namangasunge na gbegberẽ sunge-bagaahe, agu azogarago nga ga wiri aboro, na zire pambori tipa ka gbarasa ri aboro yo na ka sayo kusayo ti Mbori. Sidu, Satana nga mburu iraira mangaapai, zuũ, na gu rungo aboro agbiatiyo nani.—Oni gedi 1 Yoane 5:19.

4. Wai adaimona aingisa aboro?

Satana nangi badungu aboro na gu yugopai nga kpikpi aboro nasatiyo ni atoro na i rengbe arengba ka fura na aboro. Ono Ziazia Kekeapai naya, kpikpi aboro ainongo pai te. (Batungusipai 9:5) Ono adaimona nananga aboro ka fura wa gu agumeyo nakpiki. (Yesaya 8:19) Adaimona naingisa aboro vurube sangbaatoro, gumba agu apai nika manga kumbatayo, soroka gbiati birĩ soroka na akerekuru. Fugo Mbori naza rani ani ne gu ngbatunga mangaapai re dunduko. Si naida ani mbu agu ahe dunduko du berani nga gu kaa mbeda sa agu apai nga ga adaimona na sangbaatoro.—Oni gedi Pa Fu Rugute ni Ue he 18:10, 11; Amokedi 19:19.

Ka ani akpinyemu Yekova, si aidanga ani gunde be adaimona te. Ho ani awirika Fugo Mbori ni na kini mangi agu apai si agumbaha, ani naká fu Bakitingbanga na ki nimbedi na Mbori. Yekova na ome kisusi adaimona. Gako ruru amaraika rengbe arengba ka nyakasa rani ho du ani rogo kpakaraapai.—Oni gedi Atambuahe 34:7; Yakoba 4:7, 8.

Ka oni aida ka ino kura apai tipa gipai re, oni bi kapita 10 nga ga gu buku Gini Apai Nzunzu Ziazia Kekeapai Ayugoho?, aDezire Yekova akusaha re.