AGU ASANAHE ZIAZIA KEKEPAI AKARAGAPAI KUTINI
Ya mo amaraika rengbe ka undo rani?
A wa amaraika aundo gu ga Mbori ruru moyambu nangia Daniere bakuruyo, kinawo i aundo aboro areme a tipa i gbia undo ti wene pangbanga
Yekova Mbori akusi dungu amirioni amaraika mbata fu ko kusi aboro. (Eyobo 38:4, 7) Agi amaraika re nga atoro du na bakere ome tiyo namangasunge fu Yekova, ti gu kura aregbo, ko naakeda yo tipa i ngbembatayo na kini banda gako amoyambu auru kpotosende. (Atambuahe 91:10, 11) Areme, amaraika naundo aboro i gbia undo ti gu wene pangbanga apefuo Yesu atungusaha.—Oni gedi Yugoti 14:6, 7.
Ya mo si naida ani kpari fu amaraika tipa undo? Oó. Kparakpee nga irisombori, na si nga gupai si aida ani mangihe fu kina Mbori sa. (Yugoti 19:10) Wa duhe nga amaraika nga ga Mbori amoyambu, i nadegatuyo kuti gupai ko apehe angianga gu aboro apehe ya. Sidu tie, si naida ani kpari fu kina Mbori vurube Yesu.—Oni gedi Atambuahe 103:20, 21; Matayo 26:53.
Ya mo gbegberẽ amaraika ti ni?
Wakina aboro, Mbori akusi amaraika na ranirii, na i ima rengba ka sia ka manga gupai du ni ruruhe watadu irairaha. Si nafu kina gberãrago nga, dungu amaraika asia ka samungu kuti Mbori. (2 Petero 2:4) Gu bambata maraika nasamungu nangia Satana; na agu akurayo asamungu ki da ni adaimona. I ado Satana na gako adaimona ngbangbaturũ yo ki ba yo ku sende no.—Oni gedi Yugoti 12:7-9.
Natona rogo gu garã nangia 1914, gu dungu gbegberẽ apai namanga nayugo gupai nga Mbori nika nyasariipa Satana na gako adaimona barambeda. Fuo gure, Mbori nika karaga kpotosende kuti wai ko aida si du ti tonatonaha.—Oni gedi Yugoti 12:12; 21:3, 4.