Yekova Nadungura Gako Aborokporo

‘Si du mi akpara ti ni furoni, nga oni kakuti gu du sa nga ga Toro zikazika.’—EF. 4:1, 3.

GAONI KARAGAPAI NGA GINE?

Gini ringbisapai du tipa ga Mbori mbakadapai?

Wai ani ‘aka kuti gu du sa nga ga Toro zikazika’?

Gini he rengbe ka undo rani ‘ringirani ngbaangba fu akuarani’?

1, 2. Ga Yekova ringbisipai nga gine tipa kpotosende na aboro?

ABOROKPORO. Ginipai oni aberãha tipa gu fugo re? Du zaaza na aboro? Ngbarago? Mangasunge sa tipa kada ti gupai oni akpinyemuhe? Gu wene ba rengbe boro ka sona rogoho, ka wirikapai, na kini pekepa agu apai du riniyo fu akurani? Si ima rengba ka du wo, ka si du nga oni rogo gu kporo aboro aberãpa akurayo aberã rogoho. Yekova nga Baenge mburu ramukporo. (Ef. 3:14, 15) Gako ringbisapai nga ko naida gu gako kusikusiahe du ngbangbaturũ yo na gu du auru kpotosende ane dunduko, baha ngbaangba, na si ki du naakido dagba tihe, gbiati ndikidi kodatise.

² Fuo Adamu na Eva ingipai, aboro aadunga berewe nipapara ga Mbori aborokporo te, ono pa ga Yekova ringbisapai agberãnga te. Ko duwa ka ko bi gupai nga atita Adamu na Eva hiisi Paradizo kpotosende na kini raki rogoho. (Bam. P. 1:28; Yes. 45:18) Ko ima manga mbakadapai tipa gi gako ringbisapai re digisitihe. Gu kitabu nga ga Ziazia Kekeapai nga AEfeso nafura tipa agu ambakadapai re, na gaha bangua riipai nga kodatise. Ani wisigingo bete averesi rogo gu kitabu re na ki bingo wai rengbe ani ka mangapai kina kubani sa na gu ga Yekova ringbisapai du tipa koda gako kusikusiahe.

GU PAI YEKOVA ADIGI NIMANGIHE TIPA KA DIGISO GAKO RINGBISAPAI

3. Nibi AEfeso 1:10, ginipai Mbori atona ka mangaha ti ringbisiringbisi rago, na bambata paparaha atona ti gini regbo?

³ Moize aya fu aYisaraere wee: “Yekova gaoni Mbori nga kina Yekova sa.” (Pa Rug. 6:4) Ga Yekova mangapai na ringbisapai atagbaganga tihe te. Sidu, ho ‘gu ringbisiringbisi rago adigi ni,’ Mbori atona ka mbakada tiko tipa ka koda gu gako kusikusiahe nga aboro na amaraika. (Oni gedi AEfeso 1:8-10.) Ko ambakadipai nga gi gako ringbisipai re mangi apai ue. Gu bambataha nambakada gu dungurati nga ga mbedimbedi aKristano i ga ku ngbangbaturũ yo kadu kutiibe ga Yesu Kristo pagbia. Gi mbakadapai re atona ti rago Pendekote F.B.K. ho Yekova atona ka dungura agu aboro ni nika zogarago na Kristo ngbangbaturũ yo. (Amo. 2:1-4) Wa du he nga Mbori natakapande mbedimbedi aKristano niruruyo mbiko gu motumo tumorii nga ga Kristo, i ima ida kuti gupai nga Mbori ima dia yó ni ‘awiriko.’—Rom. 3:23, 24; 5:1; 8:15-17.

4, 5. Ga Mbori ue mbakadapai nga gine?

⁴ Gu ue paparaha re nambakada agu boro nika raka rogo Paradizo auru kpotosende tii gu Kindo nga ga Masiya. “Bakere rimbasa aboro” nikangia gu bambata badona gi mbakadapai re ka tona naayo. (Yugo. 7:9, 13-17; 21:1-5) Ti regbo Zogarago Tipa Agarã Kutu, agu abirioni aboro i nika zingisayo bekpio nika kodatiyo naayo. (Yugo. 20:12, 13) Oni berẽnga pa wai zingisa aboro bekpio nika sa gupai nga ani yugupa gaani kodatise! Ti digido kutu agarã zogarago, “agu ahe du ti kpotosende” nika gbiatihe na yangara asada. Agu aboro nikadu niruruyo, i nikadu ni “awiri Mbori” auru kpotosende ane.—Rom. 8:21; Yugo. 20:7, 8.

⁵ Gu ga Mbori ambakadapai du ue re dunduko namangasunge ti gi gaani regbo re, gu du tipa aboro ngbangbaturũ, na ga Kpotosende yó. Ono wadu ani nibasasa, wai du ani amangapai kina kubani sa sa gi ga Mbori mbakadapai re?

“KA KUTI GU DU SA NGA GA TORO ZIKAZIKA”

6. Wai gu Ziazia Kekeapai ayugo gupai nga si naida aKristano koditiyo akoda na akurayo?

⁶ Ziazia Kekeapai nayugo gupai nga si naida aKristano naadungura tiyo adungura kurogo ba sa. (1 Kor. 14:23; Eb. 10:24, 25) Anga gure gbua nga kungbo dunguratise kurogo bangisa ba sa tipa kaa fura wa agu aboro ninaasungo babagaahe yo watadu aguyo nisungu ka bi abatakandi i ningi kandi te. Ndikidi kodatise ima susa gure. Ani nagbia gu ngbatunga kodatise re ho ani amanga ga Yekova arugute ni na ki mbugene fu gako ziazia toro si me rani.

7. Gine nga ka “ka kuti gu du sa nga ga Toro zikazika”?

⁷ Wa vura duhe nga Yekova natakapande gako mbedimbedi aboro ni awiriko na kura akandoro ni abakureako rii mburu gu motumo tumorii nga ga Kristo, wiri azanga giatise tigaha nikaa kura akura wa ani araka kindi rogo zegino rogo gi yangara areme re. (Rom. 5:9; Yak. 2:23) Ka si naadunga wo ya, ka ndupai dunga ho tipa agu arugute ga Mbori toro adu kugiipa kehe naya, “oni hi pai fu akuaroni” te. Wai rengbe kodatise kadu dagba tirani na akuarani aidipase? Si naida ani sonosi gu sino nga ga “umbasiti na zera.” Kurigure, Pauro agumba gupai nga si naida ani asadi ka “ka kuti gu du sa nga ga Toro zikazika, ni gu ũkpamiatise nga zereda.” (Oni gedi AEfeso 4:1-3.) Mangapai kuti agi arugute re nakoda ra nigorani fu gu maapai kurii nga ga ga Mbori toro na ki mbugene fuhe tipa si kusi azuzuhe tirani. Gu zuzu toro re nadia kparakaro dagba aboro kusayo, nga agu apai gu mangapai nga ga borose arengbanga namangaha ya, gaha sunge nga kparaka aboro dedede.

8. Rogo gini gene agu apai borose amangaha aye na kparakaro?

⁸ Oni kparianga wai “agu apai borose amangaha” aye na kparakaro. (Oni gedi AGaratio 5:19-21.) Meteka nakpara gu boro namangaha ti Yekova na ti dungurati na bäri rengbe ka kpara agude ti avungura gbiati ga boro badiarogatise. Wasiro nagbarasapa ga boro pagume na Mbori gbiati agu aboro nakpinyemu ní. Kangia boro naida ka diko he na dada, ní nagiriso kpakpu gu he ní aida ka dikoho re gbiati gu he ní aida ka dikoho nani tipa wa ka si zi tihe nyanyaki. Ka boro rimisi tiní kurogo wasiwasi mangapai, si yuguhe nga ní na irisa kuti ga Mbori arugute berewe te. Agu amangaapai nga ga borose re nibasasa nakpara boro ti akurani na ti Mbori. Ngbatunga gu mangapai re andunga sa na asino Yekova te.

9. Wai rengbe ani ka wisigo tirani singia ani naʹasada ka “ka kuti gu du sa nga ga Toro zikazika”?

⁹ Sidu, ani dunduko nibasasa si aida ani sana tirani nga: ‘Boro wai du nzunzu mi amanga ome tipa ka “ka kuti gu du sa nga ga Toro zikazika, ni gu ũkpamiatise nga zereda”? Ho pai akura ni, gimi mangapai nidu wai kutini? Ya mo mi naʹasada ka yugoho fu aboro dunduko nga rago ima gberã tire, tipa wa ka kura abakureami ngbe nami? Ya mo mi niidi abaakumba rimisi tiyo kurogo gupai re kuba gupai nga mi mangi ome ka ye na pazereda? Ya mo mi nakpara tire ti aboro mbiko mi aidanga ka tingidayo na gu gbegberẽpai mangiyo re nani te, na ki nimangi ome nga ka wiripai kodinga re naayo ya?’ Ya mo ngbatunga gu mangaapai re rengbe ka yugo gupai nga ani namangapai ringbisihe kuti gu ga Yekova mbakadapai du tipa ka koda ahe dunduko rogo Kristo yo?

10, 11. (a) Wai nyakipa du ani na pazereda na akuarani? (b) Gini mangapai rengbe ka ye pazereda dagba tirani na akuarani na Yekova ki fu maku furani?

¹⁰ Yesu ayaa: “Were ka mo agama ga gamahe bamotumo yo, mo ki tingidi he si ngia pai dagba roni na wirinamo, mo ki he ga gamahe barangba bamotumo yo, ki guari, mo ki mbakadi pai dagba roni na wirinamo mbata, mo nikaye ka gama ga gamahe. Mo ídi pai fu vuraro ni ipo.” (Mt. 5:23-25) Yakobo akepai ki yaa: “Zuzu rurupai du ni rũrũ he rogo zereda fu agu yo namanga zereda.” (Yak. 3:17, 18) Sidu, ani arengbanga ka bandapa ruru mangapai ka zereda adunga dagbarani ya te.

¹¹ Nikpiapai, rogo agu aba vura amangi rogoho, i bihe nga aboro ima rengba ka sopa bakere bino ka si du nga i agundenga be agu abundu i akpisidoho kusendeyo tipa aboro te. Ho gu bundu re asu ni, abasopobino nambu gayo abino, agu ahe du atiyo, na agu aboro du gbatayo ki tona ka rungo be zingo riahe. Wakina gure a, ka si du nga ani na kpakaraapai dagba tirani na awirinarani, si rengbe ka ká na ani ti sona kumbatayo rogo agu apai nga ga toro. Ka ani ambupai fu akuarani niipo na kini mangi weneapai fuyo, si rengbe ka sa rani ani du na pazereda naayo na Yekova ki fu maku furani.

12. Wai rengbe abaakumba ka undo rani ani du nikodikodi rani?

¹² Kurigure, “agamahe rogo aboro yo” rengbe kangia bakere ome tipa kodatise. I furani tipa ka undo rani tipa “da ani ti gu du sa nga ga idapase.” (Ef. 4:8, 13 NW) Ka ani amanga agu asunge nga ga toro sa na abaakumba na i ki fu arugute furani rogo Fugo Mbori yo tipa agu apai i nabihe, i naundo rani ani mangi sonakumbatayo tipa wa ka ani ukadi vovo borose. (Ef. 4:22-24) Ya mo oni naabi agu arugute i afuhe furoni nga Yekova du nambakada roni tipa oni rẽ ka raka rogo vovo zegino tii gu zogarago nga ga Wiriko? Abaakumba, ya mo gure nga gu bipai oni nidu nani ti gu regbo oni afu arugute?—Gara. 6:1.

“RINGIRONI NGBÁ ANGBA FU AKUARONI”

13. Ka ani amanganga agu arugute du rogo AEfeso 4:25-32 ya, sangbanaha nikangia gine?

¹³ AEfeso 4:25-29 nayugo agu asino si aida ani mbuhe. Gure nakoda mbu pe ziree, zinga, nyomoro, pe gbegberẽ afugo kuba agu apai rengbe ka nyakasa boro. Kangia boro amanganga sunge kuti agi arugute re te, ní narungosi ga Mbori toro, mbiko ziazia toro nga gu ome naye nazereda. (Ef. 4:30) Ka ani aida kadu na kodatise gbiati zereda, si naida ani mangi gupai Pauro agumbaha berewe nga: “Iimi fugo dunduko, na zinga, na erã, na paa, gbegberẽ fugo, oni bá ha ku sa yo ti roni na sogote dunduko. Ringironi ngbá angba fu akuaroni, yee kpotoroni yo, oni nivú akuaroni avu, a wa Mbori avu roni rogo Kristo yo a.”—Ef. 4:31, 32.

14. (a) Ginipai gu fugo nga “ringironi ngbá angba” ayugoho? (b) Gini he rengbe ka undo rani tipa sinorani ngbaangba?

¹⁴ Gupai Pauro agumbaha nga “ringironi ngbá angba” re, si nayugo gupai nga aregbo kinaho sinorani arengbanga ka ngba fu akuarani ya na si ki idi ani mbakadihe. Nairiwo wai si aida ani wirikipai tipa ka bi agu aberãpai nga ga kura aboro nga si nyakipaha kisusi gaani. (Frp. 2:4) Ti kura aregbo, gupai gumba anihe ima rengba ka ba mongo ti aboro watadu ka sayo i bi rani nga ani ima du na inohe, ono ya mo ngbaha angba? Ka ani ima berãkurii gipai re mbata fu ani gumbaha, si rengbe ka undo rani tipa ‘ringirani ngbaangba.’

ONI YUGU NYEMUSE NA IRISA DAGBA GAONI ABOROKPORO

15. Gini ga Kristo mangapai na kanisa Pauro afura tipaha rogo AEfeso 5:28?

¹⁵ Ziazia Kekeapai naringbisapa gu ngbanya du dagba Kristo na dungurati kuti gu du dagba kumbakudee na diako. Gipai re nasa rani ani inipai tipa agu arugute si aida kumba fu he na wai si aida ko yugu nyemuse na kini ngerefuo diako gbiati gu ranigose si aida diakumba du nani rogo ramukporo. (Ef. 5:22-33) Ho Pauro akepai ni ki yaa: “Kina wo ka akumba kpí nyemu adiayo a wa boroyo,” ginipai ko aida ka gumbaha? (Ef. 5:28) Agu afugoko ye mbata fu gure, si nagbeberase kuti wai “Kristo akpi nyemu kanisa a, ki fu tiko tipa ha. . . . Ko nagirisi he ni gu zundahe nga ga ime na pai.” Nirengo, ka kumba aida ka mangasunge ringbisihe kuti gu ga Yekova mbakadapai du tipa dungura ahe berewe rogo Kristo yo, ko duwa ka ko angera fuo gako aborokporo rogo toro yo.

16. Ginipai rengbe ka manga ka si du nga avunguagude namanga agu asunge Mbori nafuhe fuyo kporo?

¹⁶ Si naida avunguagude tingidi gupai nga gu sunge i amangaha, Yekova du fuhe fuyo. Si nafu kina gberarago nga, dungu aboro rogo zegino areme nga “airasakparakpa.” (2 Tim. 3:1, 3) Badungu abaagude areme naora be gayo atindiro, na gipai re naye na gbegberẽ sangbanaha kurii awiriyo na kini sa agude i du na kina gberarago. Ono Pauro afu arugute fu agu abaagude nga aKristano ki yaa: “Ka oni wí nga ngba awironi i zingi ya, kina mbu ti yo ni ga Gbia rabahe na rugahe.” (Ef. 6:4) Wari rengbe agude ni ka wirikapai tipa nyemuse na pagbia? Agu avunguagude nayugopai wenengai fu awiriyo tipa agi apai re, i namangapai ringbisihe kuti ga Yekova mbakadapai. Ka ani sa kpurani niba nyemuse na ki mbu zinga na gbegberẽ afugo, gure nga ani nayugo nyanyakipa pai fu awirani tipa wai rengbeyo ka yugo nyemuse na wai rengbeyo ka irisa pagbia. Gure nika mbakada yó tipa raka rogo vovo zegino.

17. Ginipai si aida ani mangihe tipa ka sovura kuti Bakitingbanga?

¹⁷ Si naida ani kparia gupai nga, Bakitingbanga nga gu boro naagbarasipa gu zereda nga ga zegino, ko nika manga ome amanga tipa ka gbarasapa gu asadatise ani amangaha tipa ka manga gupai Mbori akpinyemuhe. Zanga kapa, ho aramukporo agburuwa ni kina kumbatayo, na ho aboro azio badia ni zanga i rogotiyo ngba wene gene, watadu ho kumba na kumba watadu dee na dee arogatiyo ni, i namanga gu ringbisapai nga ga Satana. Si aidanga ani koditirani kurogo gu mangapai watadu gu bipai du areme rogo zegino re te. Kristo nga gaani kpiapai. (Ef. 4:17-21) Sidu, i nazungodi rani nga, “oni úkadi ga Mbori ũvura dunduko” tipa wa ka ani sovura na diabese kuti Bakitingbanga na gako adaimona.—Oni gedi AEfeso 6:10-13.

“ONI KI NITA ROGO NYEMUSE YO”

18. Gu banguapai nakoda rani nga gine?

¹⁸ Gu banguapai nakoda rani nga aKristano nga nyemuse. Mbiko gu bakere nyemuse du ngbaduraniyo tipa “Gbia sa,” “Mbori sa” na tipa akuarani, ani dinga berã adia tipa ka “ka kuti gu du sa nga ga Toro zikazika, ni gu ũkpamiatise nga zereda.” (Ef. 4:3-6) Yesu akpari tipa ngbatunga gu nyemuse re ki yaa: “‘Mi akpara nga tipa kina agi yo sa te re, ono tipa agu yo a nikaida pa re mbiko gayo pai; i du adu sa dunduko; wa kina ro, Buba, du rogo re yo, mi ki du rogo ro yo, i du rogo rani yo a; . . . Mi yugu rimoro fu yo, mi ayúgo ho ayugo; ya gu nyemuse mo nakpi nyemu re na ni, si du rogo yo yo, mi ki du rogo yo yo.’”—Yo. 17:20, 21, 26.

19. Ginipai di oni berã tipa ka mangaha?

¹⁹ Ka si du nga ani bi gupai nga wiri akpakarapai kina dagba tirani mbiko gaani zangarengba, nyemuse fõnga ngbaduraniyo afõ ani kpari wa bake papara Atambuahe akpari ki yaa: “Mo kpámia kpotore yo si gunde ti rimoro.” (Tam. 86:11) Ani dinga berã adia tipa ka sovura kuti gu asadatise Bakitingbanga amangaha tipa ka turuso rani ti gu Barani nga boro nyemuse na agu aboro ko naidi na payo. Ani mangi ome nyanyaki tipa ‘ka wirika Mbori, wa du ani ni awiri manguse na ani ki nita kina rogo nyemuse yo’ dagba gaani aborokporo, gene sunge tungusapai, na rogo dungurati.—Ef. 5:1, 2.

[Gu sura du ti kpewaraga 29]

Ní nambu gani gamahe bamotumo yo na ki ndu ka manga zereda dagba tiní na wirinani

[Gu sura du ti kpewaraga 31]

Avunguagude oni yugupai fu awironi i du na irisa