Mbori Nabi Adee na Kiki Gbiati Irisa
HO YESU adu ni auru kpotosende, ko ayugu asino Bako na gu gene Bako amangapai ngbaha. Ko ayaa: “Mi amanga nga pai ni tire a wa sa te, kina gu Buba ayugu fere, . . . mi namanga kina agu apai ngba ti ko waragoagira.” (Yoane 8:28, 29; AKorosaio 1:15) Sidu, pa wisigo ani gu gene Yesu anaamangapai ngbaha na adee na gako bipai tipa yó rengbe ka undo rani ani rugutirani na wai Mbori abi adee na gupai ko aidaha tipa yó.
Ga Yesu bipai tipa adee adu kia ti gu bipai aboro adu nani tipa yó ho i ake Kitabu Wene Pangbanga ni. Rogo gini gene gako bipai adu kia ngbaha? Ya mo gako yugopai rengbe ka fu ranirii fu adee areme?
Gu Gene Yesu Anaamanga Adee Ngbaha
◼ Yesu anaabingo adee ni agu aboro du tipa kina kodaba sa te. Ringbisihe kuti gu bipai nga ga agu abarumbatayo rogo pambori nangia aYudo, kodatise na adee anidu nigupai nandu na boro sa kodaba. Wa si adu nga aboro anaagunde adee agunde mbiko i adu nga mburu asada, i anaaidanga ha fu adee i fura na akumba dagba aboro watadu i ta zanga dada riyo te. Ono tipa Yesu tigako, ko arugu akumba nga ka i naabingo adee na kina nyemu kodaba naayo ya ono i mangi adee na kiki kuba gupai nga kaa kpara adee nisayo.—Matayo 5:28.
Yesu aya berewe wee: “Gu ni ka mbu diani, ki di kura de, ni mangi bari ki ingi pai kuti diani.” (Marako 10:11, 12) Ko aká gu yugopai nangia ga aYudo naaya, ruhe aru boro mbu diani “tipa apai dunduko.” (Matayo 19:3, 9) Badungu aYudo anaabihe nga ka kumba ndu fuo kura dee, ingapai ngaha kuti diani te. Gayo abarumbatayo anaayugo gupai nga ka kumba mangi bäri, ingapai ngaha te, ono ka dee mangihe si nga ingapai! Gu kura sangba Ziazia Kekeapai sa naya, “pa maa Yesu akumba na adee tii bangisa arugute sa nayugo pa wai ko abi adee na kiki.”
Gu maapai du ga Yesu yugopai nani kurii aboro areme: Rogo gu dungurati nga ga agu aKristano nga aDezire Yekova, adee nakodatiyo wa sa na akumba ba adunguratise yo. Ono tie, si aidanga i naabi adee pabangiriyo watadu kaa ba nyemuyo ku kpoto adee yo niwia te, bambiko si naida agu akumba nga aKristano mangi ‘gbinza ade wa anayo, paranga ade wa adawiriyo rogo wene sino.’—1 Timoteo 5:2.
◼ Yesu adi regbo adia ka yugopai fu adee. Agu abangbembatayo rogo gu pambori nangia ga aYudo yó anaayugonga pai fu adee te, ono Yesu tigako ayugupai ayugo fu adee na ki ngarasiyo i gumba agu apai du tipa yó. Pa yugo Yesu pai fu Maria, ayugu gupai nga anga sunge adee sa nga kina pasa riahe na ngerafuo kporo te. (Ruka 10:38-42) Wirina Maria nangia Marata, agbia undo a be gako yugopai a wa gari wene akaragapai fu Yesu tifuo kpio Razaro ayugoho.—Yoane 11:21-27.
Yesu aduadu a na nyemu ka inopai tipa ga adee berãpai. Ti gu regbo re, badungu agu adee nangia aYudo aidi kuti gupai nga si nipa ngbarago ka vunga gu gude nga kumbagude, gbe, ka u du nga nebi. Ho dee sa apoi ni kuari dagba rimbasa adee yo ki yaa: “Maku ti gu rukumbu nabatika ro.” Yesu abi gipai re nimomu tipa ka gumba wenepai furi. (Ruka 11:27, 28) Ho Yesu ayugu gupai ni furi nga agu apai nga ga toro nyakipaha kisusi, ko ayugu gu wenepai furi naima susa agu asino atitase i aamanga adee nani.—Yoane 8:32.
Gu ome du ga Yesu yugopai nani kurii aboro areme: Agu abayugupai du rogo gu dungurati nga ga aKristano nadia gu karagapai kugume adee afuhe ba agu adunguratise yo nga ga dungurati. I nafu irisa fu sosono adee wa du yó ni “ayugu gu pai ngba angba,” rogo kpiapai yo na ho du yó ni nisayo. (Tito 2:3) I nakido akido a kuti adee tipa gu sunge nga ga tungusa gu wene pangbanga nga ga ga Mbori Kindo gbaiga.—Atambuahe 68:11; oni bi gu sanduki nga “Ya mo gu Mokedi Nangia Pauro Aká na Adee ti Fugo?” ti kpewaraga 9.
◼ Yesu anaabaka bangiriko abaka tipa adee. Ti agu aregbo i ake Ziazia Kekeapai ti ni, i anaabingo pa adegude na nyanyakipayo wa akumbagude te. Gu kitabu andiko nangia ga aYudo naya wee: “Maku du fu guni du awirini nga akumbagude, na rungo du fu guni du awirini nga adegude.” Kura avunguagude anaabi vunga degude wa bakere tindiro, mbiko si aniidi i gbata kumba funi na ki fu marã fuoni, na i arengbanga kadu naa kido nga gu degude re angerafuoyo ho i nika gbinza ni te.
Yesu ayugu gupai nga pa unga wiri tooni degude na nyanyakipaha kina wai du ga kumbagude, na ko azingisi wiri Yairo nangia degude a kina wai ko azingisi gu kumbagude nangia wiri gu dekurugbo naadu Naina yo. (Marako 5:35, 41, 42; Ruka 7:11-15) Tifuo Yesu husi gu dee naadu “nakaza garã ki du 18,” ko ayambu ri nga, “tita Abarayama,” nga fugo naadunga nikekehe rogo ga aYudo kekeapai yo ya. (Ruka 13:10-16) Ko abi ri na nyanyakipa ri a kina wai ko abi gu kura aboro na ko aima inoho ya ri adu na bakere idapase tiri.—Ruka 19:9; AGaratio 3:7.
Gu ome du ga Yesu yugopai nani kurii aboro areme: Fugo sanza gudu ho aboro Asia naagumbaha nga: “Mbu ti degude wakina tuda ga amurakporo ati na ime.” Si aidanga gi bipai re du na ome kurii agu abaagude nga aKristano te, ono si naida i ngerefuo awiriyo dunduko kina sa singia akumbagude watadu adegude. Si naida agu aKristano nga avunguagude mangi ome tipa awiriyo dunduko wirikipai wenengai na kini ngerefuo yó wenengai rogo apai yo.
◼ Yesu aduadu naa kido kuti adee. Rogo gu ba ngbanga nangia ga aYudo, i anaabi gupai dee anigumba wakina gupai ka kanga gumbaha. Yozefasi, nangia bakeke kuru apangbanga rogo bambata sa kama agarã arugu pai ki yaa: “S aidanga i kido kuti adee te mbiko wai du yó.”
Ono tipa Yesu tigako ko, ko asia adee i du ni adezire pa zingako bekpio. (Matayo 28:1, 8-10) Wa si avura du nga agi adee re adu ni adezire ho i asaringbanga Yesu ni sa kpio na ki kpisidi ko, si aima mbu fu amokedi i idi kuti gupai i agumbaha. (Matayo 27:55, 56, 61; Ruka 24:10, 11) Ono tie, pa yugo Kristo tiko mbata fu adee ho ko azingi ni bekpio ayugu gupai nga ko aabi adee nga i ima rẽ kadu ni adezire kina wai gu kura abawiriki adu a.—Amokedi 1:8, 14.
Gu ome du ga Yesu yugopai nani kurii aboro areme: Rogo gu dungurati nga ga aDezire Yekova, agu akumba du na atindiro beyo naberã pa adee aberã kini fu irisa fuyo. Agu akumbakuadee nga aKristano ‘nafu irisa’ fu adiayo nidega yó tuyo wenengai ka gia gupai adiayo agumbaha.—1 Petero 3:7; Bambata Pai 21:12.
Gu Bangua Arugute du Rogo Ziazia Kekeapai yo Naye na Ngbarago fu Adee.
Ho akumba awirika ga Kristo kpiapai ni, i nafu gu irisa na ranirii fu adee Mbori aringbisipaha ti tonatonaha. (Bambata Pai 1:27, 28) Kuba gupai nga agu aKristano nga kumbakuadee naasongoda gi gbegberẽ bipai nga akumba nyakipa yó ti adee re, i nambutiyo gu bangua arugute nga Ziazia Kekeapai nungusi yó nga gupai naye na ngbarago fu gayo abadiarogatise.—AEfeso 5:28, 29.
Ho Yelena atona wirika Ziazia Kekeapai ni, wo kumbaari anaarungosi ri ri ni hihe. Ko asono rogo gu ba nga ga zuũ i adia adee ngbaome na kini mangiyo gbegberẽ. Yelena nayaa: “Gupai mi awirikihe rogo Ziazia Kekeapai naafu ome fere. Mi arugu tire na gupai nga boro kinaho nakpinyemu re nibakerehe na kini bire na kikii pare na kini bakibangirini tipa re. Mi aye ka rugatire a na gupai nga ka kumbaami wiriki Ziazia Kekeapai, si rengbe ka aria gako bipai koyo du mi ni.” Gupai ri aidaha ada nirengo ho kumbaari atona wirika Ziazia Kekeapai ni ki zi bapatiza na ki da niboro sa dagba aDezire Yekova. Ri nayaa: “Ko aye kada niwene kpiapai rogo zatise yo. Ani awiriki gu sino nga ka mbupai dagbarani.” Gini yangarapai ri ada kuti ni? “Gu bangua arugute nga ga Ziazia Kekeapai naundo re mi du na wene bipai tipa tire rogo gi rogatise yo.”—AKorosaio 3:13, 18, 19.
Anga kina Yelena sa pai amangi tipa ri wagu re te. Agu amirioni adee nga aKristano na ngbarago bambiko i gbiati akumbayo naʹasadatiyo ka mangapai ringbisihe kuti gu bangua arugute nga ga Ziazia Kekeapai rogo gayo ramukporo yo. I nagbia irisa, wasa, na ranirii ho i akodatiyo ni na akurayo aKristano.—Yoane 13:34, 35.
Agu aKristano nga akumba na adee ini gupai nga wangia yó aboro ingapai na nikpakpa aboro, i nga papara ga Mbori kusikusiahe du “tii kungba pai.” Wa vura duhe wo, padu yó na wene pagume na gu Bayo nga boro nyemuse nga Yekova Mbori re, nasa gupai nga i du na maabangirise tipa ka ‘bata be du ni ga zirã kanga’ na ki gbia gu “taarimo nga ga awiri Mbori.” Nairiwo wai ngba gu maabangirise Mbori nafuhe fu akumba na adee re!—ARomo 8:20, 21.
[Sanduki du ti kpewaraga 9]
Ya mo gu Mokedi Nangia Pauro Aká na Adee ti Fugo?
Gu mokedi nangia Pauro akepai ki yaa: ‘Ade ongo aonga rago ga akanisa dungurati yo.’ (1 AKorindo 14:34) Ginipai naadu berãko yo? Ya mo ko abisirapa adee nga i na inohe te? Oó. Nirengo, wo ko anaafura tipa gu yugopai nga ga adee. (2 Timoteo 1:5; Tito 2:3-5) Rogo gu ga Pauro waraga ko akehe fu aKorindo, ko aruganga kina adee sa te, ono ko arugu agu aboro dunduko naadu na gu gamunihe nga ga gumbapai nisangbanebi nga i “ongo” ho kurayo idipase afura ni. (1 AKorindo 14:26-30, 33) Si nawira wa gu kura adee nangia aKristano aima du na bakere ngbarago tipa gi gayo vovo idapase re na si ki sa gupai nga i naadefugo ade ngba bagumbapai ho ní amanga gumbapai ni na asasanahe a wa sino aboro adu rogo gu papara zegino re. Tipa ka ne gi baguzoro re, ko angarasiyo nga i “sana kina akumbayo kporo yo.”—1 AKorindo 14:35.