Oni Wirikipai Rogo Fugo Mbori Yo

Ginipai Nika Manga ti Rago Sapangbanga?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Gine nga Rago Sapangbanga?

A wa yuguyo ho rogo gu sura du ni kumbabee re, dungu aboro naberãha nga, ti Rago Sapangbanga, i nika ye na abirioni ambisimo aboro ku barabangiri Mbori ko sapungbanga yó tipa agu apai i amangihe, aguyo nikadu niruruyo gayo mosoro nga ka ga ku ngbangbaturũ yo, gu gbegberẽyo ki ndu ku we yo. Ono tie, Ziazia Kekeapai nayugo gupai nga Rago Sapangbanga tipa ka batasa aboro be iraira mangaapai. (Atambuahe 96:13) Mbori ima sia Yesu ko du nigu Basapungbanga nika sa rurupai si mangi fu aboro.—Oni gedi Yesaya 11:1-5; Amokedi 17:31.

2. Wai Rago Sapangbanga nika sa rurupai si mangi?

Ho Adamu asamungu ni kuti Mbori niwia, ko aye na ingapai, rungo, na kpio kurii awiriko dunduko. (ARomo 5:12) Tipa ka rugusa gu iraira mangapai re, Yesu nika zingisa agu abirioni aboro dunduko nakpiki bekpio. Gu kitabu nga Yugoti nayugo gupai nga gipai re nika manga vuru ga Yesu zogarago tipa agarã kutu.—Oni gedi Yugoti 20:4, 11, 12.

I asaranga ngbanga agu aboro i nika zingisayo bekpio rii mburu agu apai i amangihe mbata fu i kpiki te, ono i nika sapangbanga yó rii mburu agu apai i amangaha yuguyo paha rogo agu “akitabu” du rogo Yugoti kapita 20. (ARomo 6:7) Gu mokedi nangia Pauro ayaa: “Ruru aboro azinga be kpio na iraira yo a,” i nga agu aboro i nika zingisayo i gbia momu berewe tipa ka wirikapai tipa Mbori.—Oni gedi Amokedi 24:15.

3. Ginipai Rago Sapangbanga ka mangaha?

Agu aboro nakpiki zanga i inipai tipa Yekova Mbori na ki irisiko, i nika gbia momu berewe tipa ka manga ariapai rogo gayo raka tipa ka manga wenepai. Ka i mangi wenepai, gayo zingabekpio nikangia “gu zingabekpio nga ga unga.” Ono tie, kura aboro kinaho i nika zingisayo nikaa kpingo nyemu ka wirikapai tipa ga Yekova arugute ya. Gayo zingabekpio tigayo nikangia “gu zingabekpio nga ga sapangbanga.”—Oni gedi Yoane 5:28, 29; Yesaya 26:10; 65:20.

Ti digido agarã kutu nga ga Rago Sapangbanga, Yekova nika sa aboro giasangba i da berewe nirengberengbeyo kina wai ko aaida i du ti tonatonaha. (1 AKorindo 15:24-28) Nairiwo gu bawene maabangirise du fu aboro giasangba re! Ti regbo yangara asada, Mbori nika kusa Satana Bakitingbanga rogo gu due zanga mburuhe, nga gu i nika zio ko kurogoho tipa agarã akutu. Ti gu regbo re, Satana nika asada ka nanga aboro ti Yekova, ono agu aboro nika ká fuko, i nika gbia nyenye unga.—Oni gedi Yesaya 25:8; Yugoti 20:7-9.

4. Gini kura rago sapangbanga nika fu undo fu aboro?

Ziazia Kekeapai namangasunge a na gu fugo nga “rago sapangbanga” tipa ka yugo gupai nika nyasa riipa gi sino raka re kusayo. Gi rago sapangbanga re nika ye nitunguotunguoho kina wai Ime Akangbii aye ti rago Noa ki gbarasi gbegberẽ rikaaboro. Si nipa ngbarago nga, pa gbarasayo “azangasinombori” niipo nika zakagene tipa vovo zegino ye nga gu “ruru apai nikanye rogo ho.”—Oni gedi 2 Petero 3:6, 7, 13.

Ka oni aida ka ino kura apai tipa gipai re, oni bi kpewaraga 213-215 nga ga gi buku Gini Apai Nzunzu Ziazia Kekeapai Ayugoho?, aDezire Yekova akusaha re.

[Gu sura du ti kpewaraga 16]

“Yangara sapangbanga,” Gustave Doré, naake gi sura re rogo 1832-1883

[Credit Line]

Sabe Doré