Agu Asanahe Ziazia Kekepai Akaragapai Kutini

Ginihe nga Uru Sapangbanga?

Ti gu regbo i ake Ziazia Kekeapai ti ni, Mbori amangisunge na abasapungbanga tipa i batasi gako aboro be iraira mangaapai. (Abasapungbanga 2:18) Ziazia Kekeapai nasakapai tipa gu Uru Sapangbanga du ku mbatayo ya si nga wene regboho, mbiko Yekova nga Basapungbanga zegino dunduko nika batasa aboro be iraira mangapai.—Mo gedi Atambuahe 96:12, 13; Yesaya 26:9.

Yekova ima sia Yesu tipa ko ye na ruru sarangbanga fu unga aboro na kpikpiyo. (Amokedi 10:42; 17:31) Dungu aboro aima kpiko zanga i inipai tipa Mbori. Ti regbo Uru Sapangbanga, Yesu nika zingisa ngbatunga agu aboro re be kpio tipa wa ka i ini ndikidi Mbori na ki kpinyemuko.—Mo gedi Amokedi 24:15.

Tipagine Uru Sapangbanga nika dia agarã kutu ti ni?

I nika zingisa aboro be kpio vuru gu regbo nika ngia agarã kutu re. (Yugoti 20:4, 12) Si nika ida i wirikipai tipa ga Mbori agene na kini gisangbako. Gi yugopai re adunga wa gu bipai du aboro na ni te, Ziazia Kekeapai nayugo gupai nga i nika sapangbanga agu aboro re ringbisihe kuti gupai i nika mangaha fuo i zingisi yo be kpio.—Mo gedi ARomo 6:7.

Ziazia Kekeapai nafura a tipa gu uru sapangbanga nga gu nika manga wa ikpirogumba mbata fu agarã kutu tona. I nayamba gi uru re a nga digido zegino, a wa duhe ti kpoto gi magazini re. Rogo gu uru re, Mbori nika nyasariipa azangasinombori, na gbegberẽ aboro dunduko kusayo. (2 Petero 3:7) Sidu tie, si naida ani yugu gaani nyemuse tipa Mbori.—Mo gedi 2 Petero 3:9, 13.