Gu Gene gi Zegino re Nika Digo Ngbaha

“Oni adu nga bitimo yo, gu rago ka dusia roni wa iradĩ te re.”—1 TESA. 5:4.

ONI RENGBE KA SAKAROGOYO?

Gini kura apai nga gu ani ata bingoho ya i nafura tipaha rogo agi averesi re?

1 ATesaroniko 5:3

Yugoti 17:16

Daniere 2:44

1. Gini he nika undo rani ani naangera angera kindi na kini dibe aʹasada?

KERE iiriwoapai nika manga auru kpotosende barambeda. Gu gene gu sangbaanebi du rogo Ziazia Kekeapai adigisotihe ngbaha nasa rani ani idi kuti gipai re, sidu, si naida ani naangera angera kindi. Ginipai nika undo rani ani naangera angera kindi? Gu mokedi nangia Pauro angarasi rani nga si naida ani ‘naangera tipa agu ahe i abingo ho ya.’ Nirengo, si naida ani naatingidapa gaani mosoro nga ga nyenye unga atingida kindi singia auru kpotosende ane du watadu ngbangbaturũ yo. Ringbisihe kuti tonatona afugo Pauro, ko ake agi apai re tipa ka ngarasa agu aKristano naadu ti ragoko tipa i naamaa berãyo kindi tipa agu amaku i aandu ka gbiaha mbikopa nye yó niruruyo fu Mbori. Pa manga yó ho wo arengbe ka undo yó a i dibe aʹasada gbiati arungosi.—2 Kor. 4:8, 9, 16-18; 5:7.

2. (a) Ginipai si aida ani mangihe tipa ka ka nyanyaki kuti gaani maabangirise? (b) Gini apai ani nika wisigopai tipaha rogo gi kekeapai re na gu ngbefuoho?

² Gupai Pauro agumbaha re na nyanyakipa rugute rogoho. Tipa ani ka nyanyaki kuti gaani maabangirise, si aidanga ani moi berãrani gbua kina kuti agu ahe ani abihe awere te. Si naida ani moi berãrani kuti gu nyanyakipa apai nga gu ani arengbanga ka bihe awere nibangirani ya. (Eb. 11:1; 12:1, 2) Sidu tie, ani makianga pai awere tipa apai bawe nga gu du nikodikodihe kuti gu gaani maabangirise nga ga nyenye unga.a

GINIPAI NIKA MANGA MBATA FU DIGIDO ZEGINO?

3. (a) Ginipai nika manga kumbatayo gumbayo paha rogo 1 ATesaroniko 5:2, 3? (b) Ginipai abangbembatayo rogo birĩ-zogarago nika mangaha, na ada nika kodatiyo naayo ka manga gipai re?

³ Pauro agumba pai sa dagba agu apai nika manga rogo gako waraga yo fu aTesaroniko. (Oni gedi 1 ATesaroniko 5:2, 3.) Rogo gako waraga, ko afura tipa “rago Gbia.” Nibipa wai i namangisunge nani herẽ, “rago Gbia” naru kuba gu regbo nika tona na gbarasa zire pambori ki digisitihe na gu vura nga Aramegido. Ono tie, mbata fu gu regbo re tona, abazogo zegino nika gumba gupai nga “Ndikidi Zereda na Ngbabase!” I rengbe ka gumba gipai re mbiko pai sa watadu mbiko dungu apai. Aboro nika berã gupai nga i ima mbeda ka nyasa riipa gu kikindigi kpakaraapai nagbiayo. Na ginipai tigaha abarumbatayo rogo pambori nikaa gumbaha? Wa du yó nipapara gi zegino re, i nika kodatiyo akoda tigaha kuti agu abarumbatayo nga ga birĩ-zogarago yó kaa gumba gipai re. (Yugo. 17:1, 2) Agu abarumbatayo rogo pambori re nikaa mangapai wakina gu zire anebi naadu rogo gu Yuda nadumbata. Yekova agumba gupai tipa yó nga i nayaa, “‘zereda, zereda,’ ho adu nga zereda ni ya.”—Yere. 6:14; 23:16, 17.

4. Ginipai ani narugu tirani nani nga gu dungu aboro aruganga tiyo nani ya?

⁴ Ka si vura du nga kina gini boro naya “Ndikidi Zereda na Ngbabase!” vurũ, ho i nika gumbaha ni, si nika yugo gupai nga ga Yekova uru ima tona. Si du Pauro akepai ti ni ki yaa: “Awirina, oni adu nga bitimo yo, gu rago ka dusia roni wa iradĩ te re. Bambiko oni nga awiri imarago dunduko, nga awiri haha rago. Ani nga ga yuru yo te, nga ga bitimo yo te.” (1 Tesa. 5:4, 5) Ani wa gu kura aboro te, ani ima giarogo gupai yo Ziazia Kekeapai agumbaha tipa agu apai namanga areme. Boro wai gu nzunzu gi sangbaanebi nafura tipa gupai aboro nikaa gumbaha kini ya “Ndikidi Zereda na Ngbabase!” re nika digiso tihe? Ani sungudi ka bihe. Sidu, si naida ani diberã kaa ‘kparia rago ki nirugu tirani.’—1 Tesa. 5:6; Zef. 3:8.

ZIRE PAMBORI AINONGO GUPAI NGA I NIKA GBARASAHA TE

5. (a) Wai gu “bakere gberãngbi” nika tona? (b) Da duwa kina gu “nakindo” naberã gupai nga gbegberẽpai ho nika manga ri te?

⁵ Gini kurapai berewe ani abingo ho awere ya nika manga? Pauro ayaa: “Ho i ka ya ni, ‘Zereda, ngba barani angba,’ gberãngbi ki ye ku ri yo ni ba sa.” Bambata papara gi ‘gberãngbi’ re nikangia vura kuti ‘Babera Duna Bakere Ome Ti Ni,’ nga bariwara ngbii zire pambori nga gu Ziazia Kekeapai ayambaha a nga ‘debäri.’ (Yugo. 17:5, 6, 15) Gi zubohe kuti zire apambori naabaha re, kodihe kuti agu akanisa i aya tipaha wee si nga ga aKristano nikangia tonatona “bakere gberãngbi.” (Mt. 24:21; 2 Tesa. 2:8) Dungu aboro gipai re nika tunguo yó atunguo. Tipagine? Bambiko dakuti gu regbo re, debäri nikaa bi tiri kindi wa gu “nakindo” nikaa ‘bingo rungo ya.’ Ono ri nikaye ka inoho wakina ikpirogumba nga ri abatanga te. I nika gbarasa ri niipo wa ka i ya “rogo uru sa” gbua.—Yugo. 18:7, 8.

6. Da nika gbarasa zire pambori?

⁶ Fugo Mbori nagumba gupai nga gu “nyarinde” du ‘agbangaru bawe’ du nika zubo debäri. Ka ani wisigi gu buku nga Yugoti, ani nika bi gupai yo nga gu nyarinde re naru kuba Yu-eni (UN). Agu agbanga du bawe re naru kuba agu azogarago areme dunduko nasongoda gu “zamba nyarinde” re.b (Yugo. 17:3, 5, 11, 12) Wai gu gi zubohe re nika gbarasapa debäri? Agu azogarago du kutiibe Yu-eni nika roga gari aũkumuko dunduko beri, ki kusi pa wai gberẽ ri kuyangura, ki gbarasi pari, na “ki zokodi ri ni we dunduko.”—Oni gedi Yugoti 17:16.

7. Gine nika sa gupai nga “nyarinde” zubo debäri?

⁷ Gu sangbaanebi du rogo Ziazia Kekeapai nagumba gupai agumba a nika enga gipai re. Ngba kura gene, Yekova nika sa abangbembatayo rogo birĩ-zogarago i mangi “sangbako,” watadu i mangi gupai ko aida i mangihe nga ka gbarasa debäri. (Yugo. 17:17) Pambori nazingisa avura areme na kini ye na badungu kpakaraapai kurogo zegino. Sidu, aboro nika berã gupai nga ka i gbarasi debäri kusayo, si nikadu niwenepai fuyo. Nirengo, ho agu abazogo re nika zubo gu debäri re ni, i nika berã gupai nga i namangapai kuti ‘gayo berã du sa.’ Ono tie, boro i nikaa mangasunge niga Yekova ũsunge tipa ka dia zire pambori kusayo. Sidu, papara ga Satana riigbu sa nika zubo gu kuraha ka gene adunga be Satana ko rugusihe ya.—Mt. 12:25, 26.

VURA KUTI GA MBORI ABORO

8. Gine nga gu zubohe ‘Gogo du rogo gu ringara nga ga Magogo’ nika zuboho?

⁸ Fuo gbarasa yó zire pambori, ga Mbori amoyambu nikadu kindi kini raki “zezeredi.” (Yeze. 38:11, 14) Ginipai nika manga tipa agi aboro si nikadu wa ka i ya i nibandabanda yó te re? Si nawira wa “dungu aboro” nika zubo yó. Fugo Mbori nafura tipa gi zubohe re ki ya si nikangia gu zubohe ‘Gogo du rogo gu ringara nga ga Magogo’ nika mangaha. (Oni gedi Yezekere 38:2, 15, 16.) Gini bipai si aida ani du nani tipa gu zubohe re?

9. (a) Ginipai si aida Kristano naabaka bangirini naapaha? (b) Gini apai si aida ani mangihe awere tipa ka nyakasa gaani idapase?

⁹ Pa ino ani pai tipa wai i nika zubo ga Mbori aboro re asanga rani awere ani naabaka bangirani te. Kuba gure, gupai ani abaka bangirani naapaha nga pa ziasihe rimo Yekova naapa dia gbarasarimo kusayo ti gako bakere pagbia angianga kina pa gaani bata ya. Nirengo, rogo gu buku nga Yezekere, Yekova agumba gupai bara dunguhe naima susa 60 nga: “Oni ki ini he ya mi nga Yekova.” (Yeze. 6:7) Ani na bakere nyemu ka bi wai gu nyanyakipa papara ga Yezekere sangbaanebi re nika digisotihe. Ani naa kido nga Yekova “ini pa batasa aidipambori be asada.” (2 Pet. 2:9) Wa du rago re tie, gupai si aida ani mangihe nga ka mangasunge na agu amomu dunduko du ho tipa ka nyakasa gaani idapase wa ka ani nye niruru rani fu Yekova ka kina ginipai vura manga amanga wai vurũ. Ginipai si aida ani mangihe? Si naida ani naakpara kpee, kini wisigi Fugo Mbori na kini berẽkuriihe, na kini tungusi wene pangbanga fu kura aboro. Nimanga ani he wo, ani nika banda gaani maabangirise nga ga nyenye unga nyanyaki wakina “ũzada” he.—Eb. 6:19; Tam. 25:21.

ABORO DUWA KA I INI GU BORO NZUNZU NGA YEKOVA

10, 11. Wai Aramegido nika tona, na ginipai nika manga ti gu regbo re?

¹⁰ Pa zubo yó ga Yekova amoyambu nika sa gupai nga gini kere iiriwoapai mangi? Yekova nika mangapai vurube Yesu na gu gako riivura du ngbangbaturũ yo tipa ka banda Gako aboro. (Yugo. 19:11-16) Gure gu nika ngia Aramegido nga “gu vura nga ga gu bakere rago nga ga Mbori, nga gu ko du na tandu apai dũ.”—Yugo. 16:14, 16.

¹¹ Nibipa gu vura re, Yekova agumba gupai vurube gu nebi yo nangia Yezekere nga: “‘Mi ayámba ngbatunga agbudagbuda dũ kuti Gogo, wo poi Gbia Mbori; ga aboro abasape adú kuti kina awirinayo ni ba sa sa.’” Bambiko wa i nikaa manga amanga mbangirimbangiri, agu aboro nangbe na Satana nika tumba aũvura kina kuti gayo aboro na kini imi yó. Ono tie, gipai re adigongo na kina yó te, si adaada a ti Satana. Yekova agumba gupai nga: “Mi ki kedi mai ku ri ko nga bavungumo mai na morogumba, na we na baruti, na ku ri gako bakere rimbasa vura na gu badungu yo du na ko a.” (Yeze. 38:21, 22) Ginipai nikangia sangbana gi ga Mbori mangaapai re?

12. Ginipai aboro nika inoho ngbaome?

¹² Aboro aino gupai aino nga i nagbarasa yó bambiko gupai nga Yekova du gumba gupai nga si mangi wo. Fuo gure, kina wai gu ga aEzipeto aboro vura namere fuo aYisaraere agumbaha, kinawo agi aboro re nika gumbaha ki yaa: “Yekova naso vura tipa yo.” (Gate 14:25) Nirengo, aboro duwa ka i ini gu boro nzunzu nga Yekova. (Oni gedi Yezekere 38:23.) Wai gu mbedi ani na agu apai re?

GU KURA RINGARA HO NIKA KURA NIKADU NA BAKERE OME TI NI KISUSI TE

13. Ginipai ini ani he tipa gu bisue papara gu kpiahe Daniere afura tipaha?

¹³ Sangbaanebi gu du kinaho rogo gu buku nga Daniere nga gu naundo rani ani inipa wai mbedi ani na regbo bakere gberãngbi. Daniere fura yo tipa bakere kpiahe duwa kina boro, nga gu du na apaparaha rogo ngbatunga amarã nibakiakia. (Dan. 2:28, 31-33) Si naru kuba agu aringara naadu na bakere ome ti ni kisusi rogo zegino na kidu na maapai kurii ga Mbori aboro kusayo na awere. Agu aringara re nga Babera, aMadio na aParaso, ringara aGiriki, Roma na gu yangaraha du ti gi gaani regbo re, nga gu du na ome kisusi rogo zegino dunduko. Rogo gu sangbaanebi nga ga Daniere, ani nawirika gupai nga kpetenduhe na wirianduhe naru kuba gi ringara du na ome ti ni kisusi re. Ti regbo gu Bambata Vura Nga ga Zegino, ringara aNgirisi gbiati Amerika atona kaa mangasunge wa sa. Sidu, gu bisue papara gu kpiahe du rogo ga Daniere sangbaanebi nga ga Angirisi-na-Amerika Ome Zegino. Kpetendu gu kpiahe re nga yangara paparaha, nayugo gupai nga gu kura ringara ho nika kura berewe nga gu nikadu na ome ti ni kisusi te. Kpetendu gu kpiahe re rogo marã na rogo pere. Gipai re nayugo gupai nga ga Angirisi-na-Amerika Ome Zegino nirurungburaha.

14. Gini ringara nikadu na ome ti ni rogo zegino kisusi ho Aramegido nika da ni?

¹⁴ Rogo gi sangbaanebi re, i ringbisi ga Mbori Kindo kuti mbia nga gu nasari rii bagangara yo rogo gu garã nangia 1914. Gu bagangara re naru kuba ga Yekova pagbia, watadu gu rengo du ko nani tipa ka zoga aboro. Barambeda, gu mbia re nika fõ kpetendu gu kpiahe re. Ti regbo Aramegido, kpetendu gu kpiahe re na gu kura abarapaha nika gburuwa. (Oni gedi Daniere 2:44, 45.) Sidu tie, gipai re nayugo gupai nga ga Angirisi-na-Amerika Ome Zegino du nikadu na ome rogo zegino kisusi ho Aramegido nika dani. Nairiwo wai si nika ngba ka duho ka bi wai gu sangbaanebi re nika digisotihe!c Ono ginipai tie Yekova aberãpa manga Satana nani?

GUPAI I NIKA MANGA BAKERE VURA MBORI NANI

15. Tifuo Aramegido, ginipai nika manga tipa Satana na gako adaimona?

¹⁵ Nibambatapai, Satana nikadu kinaho ka bi wai i nika gbarasa gako riigbu ti tonatonaha ki dakuti digidoho. Fuo gure tie, i kini da ti Satana. Gu mokedi nangia Yoane agumba gupai nika manga. (Oni gedi Yugoti 20:1-3.) Yesu Kristo nga gu ‘maraika du gu wiri rifungura beko nga ga gu due zanga mburuhe’ nika zio Satana gbiati gako adaimona ki ba yó kurogo gu due zanga mburuhe, na i kidu nikisi kisi yó koyo tipa agarã nga kutu. (Rk. 8:30, 31; 1 Yo. 3:8) Ngba gi gene re, i nika tona mbura ri wo.d—Bam. P. 3:15.

16. Satana nikadu wai rogo “gu due zanga mburuhe” ti ni?

¹⁶ Gini he du nga “gu due zanga mburuhe” ti ni nga gu i nika ba Satana gbiati gako adaimona kurogoho re? Gu fugo Giriki Yoane amangisunge nani tipa gu due re, si nafura tipa gu due naima dunguro nikerehe. Sidu tie, si nga gu ba ka kura boro adanga rogoho ya kparakusayo sa kina ti Yekova gbiati gu maraika du na gu “wiri rifungura nga ga gu due zanga mburuhe” re beko. Rogo gu due re, Satana nikadu wakina kangba, ka gene adunga beko tipa ka “nanga arikaaboro” berewe ya. Nirengo, gu boro nata “wa bahu nata ki nipoi” re, i aongosa ko aongosa!—1 Pet. 5:8.

AGU APAI NIKA MANGA MBATA FU ZEREDA DA

17, 18. (a) Gini apai nga gu i abingo ho ya ani nafura tipaha? (b) Ginipai nika tona tifuo agi apai re mangi?

¹⁷ Kere nyanyakipa apai na iiriwoapai nika manga barambeda. Ani napido ka bi wai aboro nika tona gumba gupai nga “Ndikidi Zereda na Ngbabase!” Fuo gure, ani nika bi wai i nika gbarasa Babera Duna Bakere Ome Ti Ni, wai Gogo boro Magogo nika zubo aboro, gu vura nga ga Aramegido, gbiati wai i nika ba Satana gbiati gako adaimona kurogo gu due zanga mburuhe ti ni. Tifuo agi apai re dunduko, i nadi gbegberẽ apai dunduko kusayo, ani nika tona vovo raka. Ani nika rimo kutii ga Kristo Zogarago Tipa Agarã Kutu, nga gu nika ye “na ngbarago tipa gu wenepia du kpaima.”—Tam. 37:10, 11.

¹⁸ Kodihe kuti agu apai bisue fura ani tipaha rogo gi kekeapai re, gu kura apai kinaho i ‘abingo ho’ ya si aida ani ‘naangera’ tipaha. Ani nika fura tipa agu apai re rogo gu kekeapai naye fuo gere.

[Footnotes]

[Sanduki/​Sura du ti kpewaraga 9]

APAI BISUE NIKA MANGA:

1 Aboro nika gumba gupai nga “Ndikidi Zereda na Ngbabase!”

2 Aringara nika zubo ‘Babera Duna Bakere Ome Ti Ni’ na ki gbarasihe

3 I nika zubo ga Yekova aboro

4 Gu vura nga Aramegido nika manga

5 I nika ba Satana na gako adaimona kurogo gu due zanga mburuhe ti ni