Ue Sanahe: Ginihe Nika Manga re ho Mi Nika Kpi Ni?

ROMAN adu nigude ho bawene bakureako akpi ni be gu béno nga ga tarambiri. Ko ayaa: “Pa zanga mi bakureami aima fuda re nikerehe. Tipa dungu agarã fuo kpio bakureami be gu béno re, mi abakibangire tipa gupai ninaamanga ho ani akpi ni.”

Tipagine aboro asana gu sanahe re ti ni? Mbiko si arẽnga boro kpi te. Ka ani vura duna kina gini garã vuru, boro ho naida ka kpi te. Badungu aboro nagunde be gupai namanga fuo kpio boro.

Ginipai kura aboro aberãha ya si nga karagapai? Badungu aboro idi kuti gupai nga ho boro akpi ni, papara ní kinaho naraka araka. I idi kuti gupai nga wene aboro nika gbia mosoro ngbangbaturũ yo, ono aguyo namanga gbegberẽ apai nika gbia nyenye mbusa tipa gayo ingapai. Kura aboro naberã gupai nga ho boro akpi ni ní arakanga berewe te, na berã pani nago ti aboro kusayo niyangaraha.

Ginipai agu akaragapai re ayugoho? Gu bambata karagapai naida ka yugo gupai nga, boro akpingo akpi nzunzu te. Gu uehe nayugo gupai nga ndupai ho tipa raka te. Agu aboro duna gi ue berãpai re riyo yo, i na gu bipai nga: “Ani rí he ki nimbiri he, bambiko gba ani akpí akpi.”—1 AKorindo 15:32.

Ginipai Ziazia Kekeapai ayugoho? Ziazia Kekeapai ayugongo gupai nga ho boro akpi ni, papara ní ho naraka fuo kpio te. Ga Mbori toro adu kugii Bakindo Soromo ko kepai ki yaa: “Bambiko agu yo du ni ungayo i ini he ya i akpí akpi, ono kpikpi aboro aina nga pai te.” (Batungusipai 9:5) Ono agu aboro “aina nga pai” re ya, i aruganga tiyo na agu apai namanga patiyo te. Ka i berẽnga watadu ka mangapai te. Sidu, ka kpikpi aboro undongo unga aboro watadu ka imisa yó te.

Ga Mbori ringbisapai tipa aboro aadunga nga i kpiki te, gako bipai kia tigu du dungu aboro nani. Ko akusi gu bambata boro nangia Adamu na gu maabangirise nga ko raki nyeanye kindi auru kpotosende. Mbori agumbapa kpio fu Adamu sa kina tigu regbo ko agumbapa gu mbusa ka i agbiaha ka si dunga i basasangba. Ko aya fu Adamu ka ko ringa gu zuzu ngua naadu bebere atiyo ya, na ki za ko nga ka ko rihe ko “akpí akpi ni rengo.” (Bambata Pai 2:17) Wa ka Adamu na Eva agisangba, i gbiati awiriyo dunduko ka du niruruyo fu Mbori na ki raki nyeanye kindi auru kpotosende.

Adamu abasasangba Mbori. Ko aingipai ho ko abasasangba Mbori ni, si du ko akpi ti ni. (ARomo 6:23) Papara Adamu ho nabati fuo kpioko te. Kuba gure, ho Adamu akpi ni, ko arakanga berewe te. Mbori aya fu Adamu: “Mo arí riahe mbiko kina gu randimo nikakura kpakpuro yo daho mo ka káraga tiro ni ku sende yo, bambiko mi adi ro kina rogo ho; mbiko mo nga kina nvutu, kina ku nvutu yo mo ka karaga tiro ku ho ni.” (Bambata Pai 3:19) Wa duhe nga aboro dunduko naenge ti Adamu, ani dunduko naadi ingapai na kpio beko.—ARomo 5:12.

Wa vura duhe nga Adamu abasasangba Mbori, Mbori duwa ka ko digisi gako ringbisapai nga ka hiiso gi kpotosende re na atita Adamu. (Bambata Pai 1:28; Yesaya 55:11) Barambeda, Mbori nika zingisa gu badungu aboro dunduko nakpiki. Gu mokedi nangia Pauro afura tipa gu regbo re ki yaa: “Ruru aboro azinga be kpio na iraira yo a.”—Amokedi 24:15.

Roman, i nigumba pako mbata, ko awisigi Ziazia Kekeapai na ki wiriki agu apai si ayugoho tipa kpio gbiati Yekova Mbori. Agu apai ko awirikihe adu na bakere ome kuriko. Oni gedi gu pangbanga du tipa ko ti kpewaraga 11 nga ga gi magazini re.

Ka oni aida ka ino gu kura apai tipa gupai ninaamanga ho boro akpi ni, oni bi kapita 6 nga ga gu buku nga Gini Apai Nzunzu Ziazia Kekeapai Ayugoho? Oni ima rengba ka kusaha rogo gu bangiriba nga ga Internet nga www.jw.org

[Box on page 7]

Ginipai Yesu Agumbaha Tipa Kpio?

Yesu aaidanga kuti gupai agu abarumbatayo rogo pambori agumbaha naadu ti ragoko nga, zinga bekpio ho tipa kpikpi aboro te te. (Ruka 20:27) Ko aayugongo gupai a nga papara boro ho naraka fuo kpio ní te. Kuba gure, ko ayugu agi apai re.

Kpio wakina rame. Ho bakureako akpi ni nangia Razaro, ko ayaa: “Badiangbarani ti ni rame nga Razaro, mi nandu ka zingisa ko rame yo.” Gako abawiriki aaruganga tiyo na gupai ko agumbaha re te. I akaragapai ki yaa: “Gbia, si ngia ko ti ati ni rame, ko abáta abata.” Ziazia Kekeapai nasakarogoyo nga: “Were Yesu agumba ha tipa kpioko; ono i aya ti gu ko nagumba ha tipa ongoda rame yo. Yesu ki nimo ka ya fu yo nzunzu, ‘Razaro kpi.’”—Yoane 11:11-14.

Kpikpi aboro azinga azinga bekpio. Ho Yesu adani rogo gu gbata Razaro adu rogoho, ko angarasi Marata nangia dawiri Razaro ki yaa: “Kawiro azínga azinga berewe.” Yesu kini mo ka kidohe nga: “Mi nga zingabekpio, nga unga. Gu ni ka idi pa re, ka ni vura kpi akpi ni du adu ni ungani.” Anga gi ga Yesu kidohe re nga kungbo fugo ngbayo te. Yesu azingisi Razaro ku bangiri dungu adezire, wa ko avura ra ku mura yo tipa rame biama vurũ. —Yoane 11:23, 25, 38-45.

Rogo gu yugoti Yesu ayuguhe fu gu mokedi nangia Yoane, ko akidohe berewe nga kpikpi aboro azinga azinga bekpio. Ka pepai nisanza, ko afura tipa gu regbo kumbatayo ho kpio nika gasa agu aboro ni dunduko si nazi yó.—Yugoti 20:13.