Bambata Sanahe: Ya Mo Gimi Raka na Rogoyo Ti Ni?

ROSALIND nasono ku ringara aNgirisi yo aima duna bakere nyemu ka gbia inohe. Ri adu a na nyemu ka undo aboro. Fuo nyasa ri sukuru, ri agbia bawene sunge nangia ngerafuo agu aboro adunga akporo tiyo ya, na ri aundo gbarigbari aboro gbiati aguyo arengbanga ka wirikapai ya. Wa ri avura gbia wene sunge na kini raki wene raka, ri ayaa: “Mi aima bakabangire tipa dungu agarã nga, ‘Tipagine du ani ti ni ane?’ na ‘Tipagine Mbori akusi aboro ti ni?’”

Tipagine aboro asana gu sanahe re ti ni? Aboro wa anya aberãnga ya te. Mbori akusi rani na gu tandu tirani nga ka wirikapai ti agu apai naima manga, ka mbakada tirani tipa gupai du kumbatayo, na ka ino ndu gupai ani araka ti ni.

Ginipai kura aboro aberãha ya si nga karagapai? Badungu aboro naberãha nga gu banguapai boro araka ti ni nga ka gbia aũkumuko watadu worimo tipa wa ka ní gbia ngbarago.

Ginipai gu karagapai re ayugoho? Si nayugo gupai nga, ani peresi kina pa agu apai ngba tirani nibambatapai rogo raka yo. Agu apai ani akpinyemuhe nyakipaha kisusi gu Mbori akpinyemuhe.

Ginipai Ziazia Kekeapai ayugoho? Bakindo Soromo adungura zegino aũkumuko na ki asadi ka manga agu apai naaye na ngbarago fuko ono ko abi gupai nga agu ahe re dunduko, si asanga ga boro raka si duna rogoyo ti ni te. Ko ayugu gupai nasa ga boro raka si duna ndikidi rogoyo ti ni ki yaa: “Yangara pai du re; i ima gia ha dunduko. Oni gúnde ti Mbori, ki ka kuti gako arugute; bambiko gere nga gu pai dunduko nga ga boro.” (Batungusipai 12:13) Iriso ga Yekova andiko nakoda gini apai?

Papara ga Mbori ringbisapai tipa rani nga ani duna ngbarago rogo raka yo. Soromo ayaa: “A nga he ho ngba fu boro susi gu pai nga ni ta ri he ni mbiri he, te, rago ki ningba angba ti ni mbiko gani sunge. Mi abi gere a, ya si aye be Mbori.”—Batungusipai 2:24.

Mbori naida ani kpinyemu gaani aborokporo na kini ngerefuo yó. Oni bingo gu wene taata arugute du fu aborokporo nibasasa.

“Kina wo ka akumba kpí nyemu adiayo a wa boroyo. Gu ni nakpi nyemu diani ni nakpi nyemu tini.”—AEfeso 5:28.

“Dia boro nigunde agunde ti kumbani.”—AEfeso 5:33.

“Agude, oni gí sangba avunguroni.”—AEfeso 6:1.

Ka ani mangipai kuti agi arugute nga ga Ziazia Kekeapai re, ani duadu na bete ngbarago. Ono tie, gu nyanyakipa pai rengbe ani ka mangaha nga ka wirikapai tipa Bakusirani na ki mbedi koyo du ko ni wa bakurearani. Nirengo, Ziazia Kekeapai nayamba rani ani “mbédi na Mbori.” Si nakidohe nga: “Ko ki mbedi na oni.” (Yakoba 4:8) Ka ani di gi yambahe re kugume, ani nika sa gaani raka si duna ndikidi rogoyo ti ni.

Rosalind ani nifura tipa ri mbata, ri nabi tiri awere nga gari raka na ndikidi rogoyo ti ni. Oni ima rengba ka geda fugori ti kpewaraga 10 nga ga gi magazini re tipa ka bi gupai naundo ri tipa ri aria gari bipai.

Ka oni aida ka ino gu kura apai tipa wai rengbe oni ka raka gu raka nasa ngbarago ti Mbori, oni bi kapita 12 nga ga gu buku nga Gini Apai Nzunzu Ziazia Kekeapai Ayugoho? Oni ima rengba ka kusaha rogo gu bangiriba nga ga Internet nga www.jw.org

[Gu Sanduki du ti kpewaraga 5]

Ginipai Yesu Apehe Tipa Ndu Gupai Aboro Araka Ti Ni?

Yesu atikönga ndu gupai aboro araka ti ni te. Ko ayaa: “Gi pai i avungu re sa ni re, gi pai mi aye sa ni re ku zegino, nga ka du ni dezire rengo.” (Yoane 18:37) Yesu amangisunge na gako raka naabaha tipa ka yugo rengo fu aboro tipa Mbori gbiati gako ringbisapai.

Gaani raka rengbe kadu na ndikidi rogoyo ti ni kina gu ka ani pekefuo ga Yesu kpiapai. Nirengo, Yesu nayamba rani ani wirikapai beko. (Matayo 11:29) Ani kparianga agu agene ue rengbe ani ka wirika ko ngbaha.

Yesu ayugu gupai nga, ka ani aida ka duna ngbarago, ani duwa ka ani “inipa gu [gaani] azingo nga ga toro.” (Matayo 5:3, NW) Ani rengbe arengba ka mbisa gu gaani azingo nga ga toro kina gu ka ani di gu inohe du tipa “bangisa ndikidi Mbori, na gu ko [ko] akedi ko, nga Yesu Kristo.”—Yoane 17:3.

Yesu azinahe fu apefuoko nga i yugu agu apai i awirikihe fu kura aboro. Ko ayaa: “Oni ndú tie, ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na Wiri na Ziazia Toro; ki nirugu yo a i niká kuti agu apai dunduko mi arugu roni kuti ni.”—Matayo 28:19, 20.

Agu aboro naambiisa gu gayo azingo nga ga toro niwirika yó Ziazia Kekeapai na kini mangi agu apai i awirikaha, gayo raka naʹariatihe kidu niwenehe. Na ho i atona ka undo kura aboro ni tipa i wirikipai tipa Mbori, i nada kuti gupai nga gayo raka na ndikidi rogoyo ti ni.