Oni Wirikipai Rogo Fugo Mbori Yo

Ya mo Mbori Aye na Bangisa Zogarago?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Tipagine aboro aida bangisa zogarago ti ni?

Areme, gu kpakarapai aboro agbiatiyo na ni namanga rogo zagino dunduko. Rogo kura aringara, dungu aboro nga airarungo na i namanga yó gbegberẽ. Rogo agu akuraha, aboro na ahe beyo susi gu si aida i du nani. Ka si nidu nga bangisa zogarago du auru kpotosende, ka aboro dunduko duna ahe beyo kina sa.—Oni gedi Batungusipai 4:1; 8:9.

2. Da rengbe ka zoga gi zegino re dunduko?

Gu berãpai nga bangisa boro zogo zagino dunduko ima kpara bangiri aboro bambiko boro ho rengbe ka manga gu sunge re wenengai te. Boro ho rengbe ka manga gupai ngba ti aboro dunduko te. Gu gberẽ agberã berewe nga, ka boro duna pagbia beni, ní natona ka manga agu apai duni irairaha. Pa berã aboro pa gu gbegberẽ zogarago nga ga aboro naba kina gunde tiyo tipa boro sa zogo zegino dunduko.—Oni gedi Asanza 29:2; Yeremaya 10:23.

Yekova Mbori ima sia wiriko nga Yesu tipa ko zogo aboro nyeanye kindi. (Ruka 1:32, 33) Yesu ima ino wai du raka auru kpotosende. Ho ko aduni auru kpotosende, ko ahusi aborokaza, kini yugupai fu bayee aboro, na kini di regbo na rukutu agude. (Marako 1:40-42; 6:34; 10:13-16) Sidu, Yesu nga gu boro rẽ tipa zoga gi zagino re.—Oni gedi Yoane 1:14.

3. Ya mo bangisa zogarago rengbe ka manga nzunzu?

Mbori ima sia Wiriko tipa ko zogorago ngbangbaturũ yo ku auru kpotosende. (Daniere 7:13, 14) A wa si naaidanga bazogo du rogo agu agbata dunduko nga ga gu ringara ni azogaha ya, kinawo a duhe tipa Yesu, si aidanga ko du mbata kina auru kpotosende tipa ka zoga aboro te.—Oni gedi Matayo 8:5-9, 13.

Ya mo aboro dunduko nika ida Yesu nigayo bazogo? Oó. Kina agu aboro naida na rurupai nika ida naako. Yekova nika dia agu aboro kusayo aidanga na gu bakindo nga boro nyemuse na rurupai re ya.—Oni gedi Matayo 25:31-33, 46.

4. Ginipai gu Bakindo re nika mangaha?

A wa babanda akandoro nadungura gaani akandoro, Yesu nadungura bayee aboro awere rogo ngbatunga aboro dunduko na kini yugupai fuyo tipa ga Mbori nyemuse. (Yoane 10:16; 13:34) Ngbatunga agu aboro re na nyemu ka songoda Yesu na gako zogarago. (Atambuahe 72:8; Matayo 4:19, 20) Rogo zagino dunduko, ruru apefuo Yesu kodi tiyo ka takapande padu ko ni Bakindo.—Oni gedi Matayo 24:14.

Barambeda, Yesu nika mangapai na gu ome du beko tipa ka batasa aboro be iraira zogarago. Ko ima sia bete aboro dagba ruru apefuoko yo tipa i zogorago naako ngbangbaturũ yo. (Daniere 2:44; 7:27) Ga Yesu zogarago nika hiiso zegino dunduko na inohe tipa Yekova na ki ye na gu paradizo naingi ti tonatona raka nga ga aboro.—Oni gedi Yesaya 11:3, 9; Matayo 19:28.

Ka oni aida ka ino kura apai tipa gipai re, oni bi kapita 8 nga ga gi buku re Gini Apai Nzunzu Ziazia Kekeapai Ayugoho?, aDezire Yekova nakusihe.