Iraira Bipai Tipa Kura Aboro Namanga Rogo Zegino Dunduko

JONATHAN, nga boro Korea i avunguko Amerika yo, ko aima mbu be iraira bipai tipa ko ho ko aduni nigude. Ho ko asono ni, ko agbata gu ba aboro nika dunga na iraira bipai tipa rangi kpotoko watadu ngbatungako ya. Ko adani munganga rogo gu gbata nga Alaska Amerika yo, nga gu ba rangi kpotoko adu wakina ga agu aborokaza ko angerafuoyo. Ko aberẽ gupai nga, wa ko nada dagba agu aboro naraka rogo gu rago duna bakere zere re, ko ima bata be gu iraira bipai aboro adu nani tipa ko.

Gi gako maabangirise re adigi ho ko aangera ni fuo gu degude naakaza garãri adu nga 25. Fuo ri zingi rogo rame kpio yo, ri angana ko na ki pe gbegberẽ fugo fuko nibi gu gbegberẽ sogote nanye ku ngbaduri yo kuti aboro Korea. Gipai re aima ima nikerehe tiko nga wa ko avura manga ome ka ga kurogo gu ba re, si abatasanga ko be gu iraira bipai du aboro nani tipa akurayo te.

Gipai namangiko re nayugopa wai gberẽ gupai re. Iraira bipai tipa kura aboro ima rengba na arago dunduko. Gupai namanga nga, agu aba dũ du aboro rogoho, iraira bipai tipa kura aboro duwa ka si du ho.

Ono tie, wa vura duhe nga gipai re ima maapai, badungu aboro naya si angbanga te. Nirengo gipai re natagbaga tihe atagbaga. Wai rengbe gupai aboro aidanga ha ya kadu nigupai rengbe na arago dunduko? Si tie ziazia nga, gu badungu aboro nasoga iraira bipai tipa kura aboro i ainongo gupai nga gu sino re kina tiyo te. Ya mo kina gu bangisapai re du tipa ro? Wai rengbe mo ka karagapai kuti gi sanahe re?

GUPAI NABI KINA BORO NITINI

Singia ani inihe watadu ani ainongo ho te, si ima kpakara ka ino singia ani na gu sino nga ga iraira bipai tipa kura aboro ngbaduraniyo. Ziazia Kekeapai nasakarogo ndu gupai yo duhe ti ni wo niyaa: ‘Kpotoboro yo nangihe kisusi ahe dunduko.’ (Yeremaya 17:9) Sidu, ani ima rengba ka nanga tirani nga ani nangba na ngbatunga aboro dunduko. Watadu ani rengbe ka bihe nga ani na kina wene ndupai tipa kadu na iraira bipai tipa kura ngbatunga aboro.

Tipa ka yugo ndu gupai kpakara pa ino ani gupai nga iraira bipai tipa kura aboro ngbaduroniyo, oni kparianga gi kpiapai naye re: Mo nandu gene nisaro yuru. Paranga akumba ue mo abingo yó mbata ya naye fuoro. I nangera wa aboro ome, na si nawira wa guni sa na he beni.

Ya mo mo bingoho nga i naida ka manga ro na gbegberẽpai te? Nirengo, nibi agu apai namangi ro mbata kusayo, mo rengbe ka bihe nga si naida mo duna rubangirise, ono ya mo si rengbe ka sa ro mo dakuti gu digisopai nga agi akumba ue re nga kere aboro? Mo rengbe ka wakana gupai riro yo nga, Gini ngbatunga aboro du nga agi akumba re? Ga karagapai kuti gi sanahe re gbaiga. Si rengbe ka yugo gupai nga mo na kina iraira bipai tipa kura aboro.

Kangia si naida ani pe rengo tipa tirani, ani idihe aida nga, iraira bipai tipa kura aboro kina ngbaduraniyo zanga ani inihe. Zavura Ziazia Kekeapai, si gumbapa gu iraira bipai tipa kura aboro du badungu aboro nani niyaa: “Aboro nabi kina gu tama boro du ti kpotoni.” (1 Samuere 16:7) Wa duhe tie nga ani dunduko duna gi sino re tirani, na asangbanaha nigbegberẽhe, ya mo maabangirise ho nga ani rengbe ka diabe gi sino re watadu ka diaha kusayo rogo gaani raka yo? Na ya mo regbo adu ho zegino naabaha nikaa dunga na iraira bipai tipa kura aboro ya?