Iraira Bipai Tipa Kura Aboro, Gini Regbo si Nika Go Ti Ni?

“MI RARI musumo.” Gere nga agu afugo gu kumba nangia Martin Luther King, Jr., apehe agarã bisue bawe kusayo rogo Banzinga 28, 1963 ti regbo gako gumbapai fu ndurumo aboro Amerika yo. Rogo gi gako gumbapai re, ko afura tipa gako musumo watadu gu maabangirise ko adu nani nga uru adu kinaho sa aboro nikadu na ngbarago ka akurayo adunga na iraira bipai tipa yó ya. Wa ko avura kaa ape gipai re fu aboro Amerika, badungu aboro aima dia gi gako musumo re kugume.

Adiwi biata fuo gi gako gumbapai re, rogo Ngbangba 20, 1963, aringara naima susa 100 ada kuti nyanyaki diaberã Yu-eni adihe tipa ka nyasa riipa agu asogote nga ga angbatunga dunduko kusayo. Gu kura adiaberã amangi nibipa zegino dunduko fuo bawe agarã kusa. Gi wene aʹasadatise re dunduko nakusa gu sanahe nga, Sangbana manga gi ome re nga gine?

Rogo Marungu 21, 2012, gu ga aYu-eni Bangerekurii Sunge nga Ban Ki-moon ayaa: “Badungu nyanyakipa agiatise gudu ho i amangihe kodihe na agu apai nabipa zegino dunduko tipa ka banda aboro na ka dia agu asogote nga ga angbatunga, sogote aboro kura aringara, na mbugene fu kura aboro i nimangi gbegberẽ apai kusayo. Wa vura duhe wo, amirioni aboro narungo kindi be agu asogote nga ga angbatunga rogo zegino dunduko.”

Zavura rogo agu aringara naima manga sonakumbatayo tipa ka diabe asogote gbiati kura iraira bipai tipa kura aboro, gu sanahe duho kindi nga: Ya mo gu sonakumbatayo re di gupai re kusayo kpoto aboro yo watadu si yugu kina gupai gbua fu aboro nga ka i du nga na iraira bipai tipa akurayo ya? Kura aboro nabihe nga ngbatunga gu sonakumbatayo re naundo ka banda aboro gbua be agu asogote nga ga angbatunga ono si arengbanga ka dia iraira bipai tipa kura aboro kusayo te. Wai duhe wo? Si wo mbiko aboro nabi agu asogote nga ga angbatunga abi, na gu boro namangaha ndiko nafu mbusa afu funi, ono iraira bipai tipa kura aboro nga gupai du kpoto aboro yo, si taata tipa ka rugaha te.

Sidu, kangia aboro naida ka dia iraira bipai tipa kura aboro kusayo, si aidanga i digi kina ti agu asogote nga ga angbatunga te, ono si naida i aria gu bipai du aboro nani tipa akurayo. Ya mo gipai re rengbe ka manga nzunzu? Wai rengbehe ka manga? Ani wisigingo bete ndikidi mangimangi akpiapai nga gu naundo rani ani bi gupai nga, anga si taata aboro mangi kina ariapai te ono gu kurahe kinaho rengbe ka undo yó i mangi gu ariapai re a.

ZIAZIA KEKEAPAI NAUNDO YÓ I DIBE IRAIRA BIPAI TIPA AKURAYO

Linda: I abatika re South Africa yo. Mi anaabi agu aboro angianga pusi-aboro ya wa sunge tiyo te, i awirikanga pai te, ka boro kidongo kutiyo te, na ni akanga fu pusi-aboro. Mi adu nizizi re fu gu gbina nga ga iraira bipai tipa kura aboro zanga mi inihe. Ono tie, gi bipai re atona ka ariatihe tigu regbo mi atona ka wirika Ziazia Kekeapai. Mi aye ka ino gupai nga, “Mbori akpara nga aboro te” na kpotoboroyo nyakipaha kisusi rangi kpotoni watadu gu fugo ní apehe. (Amokedi 10:34, 35; Asanza 17:3) Gu veresi du rogo AFiripoio 2:3 aundo re mi bi gupai nga, ka mi abi kura aboro nga i ngba kisusi re, mi dunga na iraira bipai tipa yó te. Raka mi kuti ngbatunga gu bangua arugute nga ga Ziazia Kekeapai re ima undo re tipa mi duna nyemu kura aboro ka rangi kpotoyo vura du wai vurũ. Awere, mi nabi tire nga mi ima kura tii gu sunge kanga nga ga iraira bipai tipa kura aboro.

Michael: Mi asono rogo gu dagbarago dungu pusi-aboro adu rogoho nga aboro Australia, na mi ki duna iraira bipai tipa kura aboro gbe agu aboro Asia nga aboro China. Ho mi anaagbe tarambiri ni, ka mi bi boro Asia mi nazogo bitirobi tarambiri na ki ta ngbare kurini nga “Mo ga ku kpuroniyo boro Asia!” Kusa, ho mi atona wirika Ziazia Kekeapai ni, mi atona ka ino wai Mbori abi aboro. Ka i vura ka raka kina wari na ka rangi kpotoyo vura du kina wai, ko nakpinyemuyo akpi. Gi gako nyemuse re aima zio ngbadureyo na ki sa gu sogote naadu kpoto re yo ninyemuse. Kina ngbare nazere ka bi gi riko ariapai re. Awere, mi nagbia ngbarago rogo koda mi tire na aboro dunduko rogo aringara nibakiakia. Gipai re ima aria gimi bipai tipa unga na ki fu bakere ngbarago fere.

Sandra: Nina angia boro Umunede rogo gu papara Nigeria nga Delta State. Ono tie, buba angia boro Edo State tigako na kini pepa aboro Esa. Mbiko gi kparakaro re, wo nina anaagbia tiri na iraira bipai be agume buba daho ri akpi ni. Mi azunga tire nga sunge tire na gu boro nape pa-Esa te watadu ka dia kumba dagba aboro Edo State a te. Ono ho mi atona ka wirika Ziazia Kekeapai ni, mi atona kaa bi apai kia. Wa duhe nga Ziazia Kekeapai naya Mbori akparanga aboro te na gu boro nagunde tiko ní ngbatiko, mi abihe nga da nga mi ka soga aboro tipa angbatungayo watadu afugoyo? Mi arugu gimi bipai na ki mbakadi gimi pagume na agume buba. Manga mi agu arugute nga ga Ziazia Kekeapai aima sa re mi duna ngbarago na mi duna zereda berã re yo. Si aima undo re a tipa mi nisungu na kura aboro zanga bipa rangi kpotoyo, fugoyo, watadu angbatungayo. Na, oni iningo kumbaami nga da? Ko nga boro Edo State nape fugo aboro Esa!

Tipagine Ziazia Kekeapai aundo agi aboro re na gu kura dungu aboro tipa i di sogote na iraira bipai tipa kura aboro rogoyo yo kusayo? Si wo mbiko Ziazia Kekeapai nga Fugo Mbori. Si na ome ti ni tipa ka aria gu gene boro aberã na kini bi akurani ngbaha. Kurigure, Ziazia Kekeapai nayugo gu kurapai rengbe ka nyasa riipa iraira bipai tipa kura aboro dunduko kusayo.

GA MBORI KINDO NIKA NYASA RIIPA IRAIRA BIPAI TIPA KURA ABORO KUSAYO

Baraho duhe ni nga gu inohe nga ga Ziazia Kekeapai rengbe arengba ka dia gupai re kusayo rogo boro yo, gu kura ahe kinaho ue si aida i dihe kusayo mbata fu i nyasi riipa iraira bipai tipa kura aboro kusayo. Bambataha nga, ingapai gbiati gu zangarengba nga ga aboro. Ziazia Kekeapai nayaa: “Boro ho sa zanga manga ingapai te.” (1 Abakindo 8:46) Ka ani vura manga ome kina wai vurũ, ani nasovura na bangisapai sa wa si adu tipa Pauro nayaa: “Wa mi nikpi nyemu manga wenepai, gbegberẽpai nimbedi na mi.” (ARomo 7:21) Sidu, dedede, gu ngbaduraniyo nga ga zangarengba na kina ‘gbegberẽ aberã’ rogoho, na si nasa boro ní duna iraira bipai tipa kura aboro.—Marako 7:21.

Uehe nga, gu maapai nga ga Satana Bakitingbanga. Ziazia Kekeapai nafura tipa ko ya ko nga “banangi aboro kpotosende yo dunduko.” (Yoane 8:44; Yugoti 12:9) Si nasaka ndu gupai gbandaka iraira bipai ti ni na ndu gupai adunga gene ti ni be aboro ka nyasa riipa asogote, imo tunga aboro kusayo kpäkäyä, na gu kura apai nabipa angbatunga, apambori, gbiati mbugene fu kura aboro i nimangi gbegberẽ apai ya.

Sidu, mbata fu i nyasi riipa iraira bipai kusayo, si naida i nyasi riipa ingapai na zangarengba gbiati gu maapai nga ga Satana Bakitingbanga. Ziazia Kekeapai nape gupai nga ga Mbori Kindo nika mangaha.

Yesu aya fu apefuoko i nikpari fu Mbori wa gere: “Ga ngbi yé, Ani mángi rogo kpotosende wa mo akpi nyemu he, wa du he ngbangbaturũ yo.” (Matayo 6:10) Ga Mbori Kindo nga guhe nika nyasa riipa iraira mangapai dũ kodihe na ngbatunga gu gbegberẽ apai dunduko aboro amangaha na iraira bipai tipa akurayo.

Ho ga Mbori Kindo ka ye ni ka nyasa riipa agu apai nga ga zegino dunduko, i nika “vo” Satana, watadu ka ká naako ka “ko ananga nga arikaaboro berewe wa sa ya.” (Yugoti 20:2, 3) Tigu regbo re, “vovo zegino” nikadu na vovo aboro rogoho nga gu “ruru apai nikanye rogo ho.”a—2 Petero 3:13.

Agu aboro nika raka dagba gu ruru rikaaboro re, i nika da nirengberengbe yo zanga ingapai. (ARomo 8:21) Nidu yó ni avuru ga Mbori Kindo, “i aímisa nga aboro watadu gbarasa yo” te. Tipagine? “Bambiko kpotosende ahí be ina pa Yekova.” (Yesaya 11:9) Tigu regbo re, aboro dunduko nika wirika ga Yekova agene na kini wiriki agu asinoko nga ga nyemuse. Gere nayugo gupai nga si nikangia digido iraira bipai tipa kura aboro, “bambiko aboro bangiri Mbori sa.”—ARomo 2:11.