Oni Berẽpa Gini Ngbatunga Boro Oni Aida Kadu Nga Ní

1, 2. Si naida ani du ni gini ngbatunga boro ka si du nga ani naida Mbori idi na gaani pai?

DEDEDE, aboro naida aida ka ino gupai aboro aberãha tipa yó. Nidu ani ni aKristano, ya mo si aidanga ani bakibangirani tipa gu bipai du Yekova na ni tipa rani te? Nirengo, ko nga gu boro kiipa ní rogo zegino dunduko, na “gugaabi unga du be” ko.​—Tam. 36:9.

² Gu mokedi nangia Petero anyakasipa gu ngbatunga boro Yekova aida ani du nga ní ni ngarasa ko rani ani mangi “ziazia apai na sinombori.” (Oni gedi 2 Petero 3:11.) Tipa Mbori idi na gaani pai, si naida gaani mangaapai du ni ziaziaha, nga kadu gigiri, rogo mangaapai yo, berãraniyo, gbiati gaani idapase. Kurigure, ani mangi agu apai nga ga “sinombori” ni gunde ani tiko na ki zi tirani kutiko. Pa ida Mbori na gaani pai nakoda gaani mangapai gbiati agu apai du ngbaduraniyo. Wadu he nga Yekova na ‘wisigo kpoto aboro yo,’ ko ima ino singia gaani mangapai ziazia na singia ngbaduraniyo koyo du ko ni watadu si te.​—1 Peka 29:17.

3. Gini asanahe si aida ani sana tirani na ni nibipa gaani pagume na Mbori?

³ Vura rani nga Satana Bakitingbanga aidanga Mbori idi na gaani pai te. Nirengo, ko naida ka manga ngbatunga apai dunduko tipa ka gbarasa gaani pagume na Yekova. Satana agundenga tipa ka mangasunge na ziree gbiati biriki tipa ka gberani kusayo ti iriso Yekova te. (Yo. 8:44; 2 Kor. 11:13-15) Sidu, si naida ani sana tirani nga: ‘Satana na nanga aboro wai? Ginipai rengbe mi ka mangaha tipa ka banda gimi pagume na Yekova?’

SATANA NA NANGA ABORO WAI?

4. Ginihe Satana aida ka gbarasaha tipa ka gbarasa gaani pagume na Mbori, na tipagine?

⁴ Gu bawiriki nangia Yakoba aya: “Boro du ni asadiasadi ni, ho gu nyemuhe ata gbe ni ni nga ga borose ku sa yo, ki ninangi ni. Gu nyemuhe nga ga borose, fuo du he na mobara, si ki vungu ingapai, ingapai ho da ha ni ti sosonoho, si ki kusi kpio.” (Yak. 1:14, 15) Satana naida ka nyasa riipa ngbadurani tipa ka gbarasa gaani pagume na Mbori mbiko si nga mburu gaani pagume na ko.

5, 6. (a) Ginipai Satana amangasunge na ni tipa ka gbarasa ngbaduraniyo? (b) Gini ahe ko amangasunge na ni tipa ka gbarasa gu nyemupai du ngbaduraniyo, na ko di bagizo regbo wai kuti manga gipai re?

⁵ Ginipai Satana amangaha tipa ka gbarasa ngbaduraniyo? Ziazia Kekeapai naya: “Zegino dunduko du ni zogozogo ho be gbegberẽ ko.” (1 Yo. 5:19) Gu ũvura Satana amangasunge na ni nga “agu ahe du zegino.” (Oni gedi 1 Yoane 2:15, 16.) Bakitingbanga aima digo ni mangisunge na gi zegino re tipa dungu agarã tipa ka nanga rani. Wa duhe nga ani naraka rogo gi zegino re, si naida ani bandatirani ti gu gako rukutu abirĩ ko amangaha.​—Yo. 17:15.

⁶ Apai kinaho ko amangasunge na ni tipa ka gbarasa ngbaduraniyo. Gu mokedi nangia Yoane afura tipa apai biata Satana amangasunge na ni nga: (1) “gu nyemuhe nga ga borose,” (2) “gu nyemuhe nga ga bangirise,” na (3) “gu ũmosangi enda nga ga unga.” Agi ahe re du ko amangisunge na ni tipa ka asada Yesu ngbakungbo yo. Wa duhe nga Satana ima dia dungu agarã kuti mangasunge na agi agbina re, ko ima ino wai ka mangasunge na ni areme wenengai ringbisihe kina kuti gu nyemupai du ngbadu boro yo. Mbata fu ani wisigipai tipa agu apai rengbe ani ka mangaha tipa ka bandatirani, ani bingo wai ko adu na diabese ka nanga Eva ono tipa Wiri Mbori ko aadunga na diabese te.

“GU NYEMUHE NGA GA BOROSE”

7. Satana amangisunge na “gu nyemuhe nga ga borose” wai tipa ka nanga Eva?

⁷ Aboro na nyemu kaa ri riahe tipa si niundo kpotoyo. Bakusirani aima mbakada gi zegino re nga si nikusi riahe wenengai. Satana ima rengba ka mangasunge na gu nyemu riahe du tirani tipa ka sarani ani mbu manga gupai Mbori akpinyemuhe. Ani bingo gupai ko amangi Eva na ni. (Oni gedi Bambata Pai 3:1-6.) Ko aya fu Eva wee ri rengbe arengba ka ri gu zuzu ngua nangia “ngua ina wenepai na gbegberẽpai.” (Bam. P. 2:9) Ni manga ko ho wo, ko ayugu gupai furi nga, si aidanga ri gisangba Mbori tipa ka raka te. Nairiwo gu ngbatunga ziree re! Fuo rimiso Satana gipai re kurii Eva yo, ri adu na asiapai beri ue nga: Ri ima rengba ka ká gu gako berãpai re, watadu ka maaha ku ngbaduriyo daho ka nyemuhe asono ni ni bakerehe. Wa si avura du nga ri aima rengba ka ri agu angua dunduko naadu ati yo, ri asia ka degaturi kuti gupai Satana apehe tipa gu ngua naadu bebere ati yo na ri “ki kati zuzuhe ki ri he.” Rogo gi gene re, Satana arimisi gupai ku ngbaduriyo nga gu Yekova aima zahe tipaha.

8. Waigu Satana aˈasadi ka nanga Yesu ni manga ko sunge na “gu nyemuhe nga ga borose,” na tipagine ko aadunga ti ni na diabese ya?

⁸ Kina gu bangisa birĩ re ko amangisunge na ni ti gu regbo ko aˈasadi Yesu ngbakungbo yo. Fuo Yesu gino riahe tipa auru na ayuru 40, Satana aˈasadi ko tipa gu gomoro ko adu na ni. Ko aya: “Si ngia Wiri Mbori nga mo, mo yá nga fu gi mbia re si du ni riahe.” (Rk. 4:1-3) Yesu adu na asiapai ue nga: Ka mangasunge na gu ome ko adu na ni tipa ka mbisa tiko, watadu ka zanga mangasunge na ni. Yesu aima inoho nga si aidanga ko mangisunge na gu ome naadu tiko tipa kina agu apai nangba tiko te. Wa ko avura du na gomoro, pa mbisa ko tiko anyakanga bangiriko kisusi gako pagume na Yekova te. Yesu akaragapai fuko ki ya: “Si ni keke he ya, ‘Boro anye nga ni ungani mbiko kina riahe te.’”​—Rk. 4:4.

“GU NYEMUHE NGA GA BANGIRISE”

9. Gu fugo nga “gu nyemuhe nga ga bangirise” nayugo gine, na wai Satana amangisunge na Eva?

⁹ Yoane afura a tipa gu kura he Satana amangasunge na ni nga “gu nyemuhe nga ga bangirise.” Gipai re nayugo gupai nga kungbo bi he ima rengba ka sa boro ni tona ka kpinyemuhe. Nibi gupai namangi Eva, Satana amangisunge na gari nyemupai nga ga bangirise ni ya ko furi wee: “Bangironi azá aza.” Fuo Eva tona ka ngana gi ngua re ni gbangaha, nyemuhe azi ri. Ri abi gupai nga gi ngua re “si wenengaĩ bangirise.”

10. Rogo gini gene Satana amangisunge na “gu nyemuhe nga ga bangirise” tipa ka asada Yesu, na ginipai Yesu amangihe?

¹⁰ Na ginipai nadu tipa Yesu tigako? Satana “ki yugu angbi zegino dunduko fu ko ni ba sa. Bakitingbanga ki ya fu ko, ‘Mi afú gi tandu foro dunduko re na gaha taarimo.’” (Rk. 4:5, 6) Yesu arengbanga ka bi agu angbi nga ga zegino dunduko ni bangiriko te, ono ko abihe rogo yuguyugupai yo, na Satana abihe nga nyemuhe nika zio Yesu azio. Ko aya: “Ka mo irisi re tie, si du adu ni gamo dunduko.” (Rk. 4:7) Yesu aaidanga kadu ni gu ngbatunga boro Satana aida ko du nga ní te. Yesu akaragapai fuko nibasa ki ya: “Si ni keke he ya, ‘Mo irisi Gbia nga gamo Mbori, mo ra fu kina ko sa.’”​—Rk. 4:8.

“GU ŨMOSANGI ENDA NGA GA UNGA”

11. Waigu Eva azi ti ga Satana gbina?

¹¹ Yoane afura tipa agu aũzegino Satana amangasunge na ni nga “gu ũmosangi enda nga ga unga.” Ho kina Adamu na Eva adu ni ue auru kpotosende, kura aboro aadunga ho ka i amangi tiyo fuyo na “gu ũmosangi enda nga ga unga” te. Ono rukö du tiyo. Ho ko aasadi Eva ni, ko aya furi wee Mbori aima ká na wenepai beri. Bakitingbanga ape gupai furi nga gu uru ri nika ri “gu ngua nga ngua ina wenepai na gbegberẽpai,” ri nika du “wa kina Mbori, niini wenepai na gbegberẽpai.” (Bam. P. 2:17; 3:5) Satana ape gupai furi nga ri ima rengba kadu na ranirii ti Yekova. Si nawira wa rukö nga gu he naasa ri ri idi na gipai re. Ri ari gu ngua Mbori aya ka i ringa ha ya, na kini berẽhe nga ri akpingo te. Nairiwo gu ingahe ri amangihe re!

12. Gini kua gene Satana aida ka asada Yesu ngbaha, na ga Yesu karagapai adu wai?

¹² Gu kparakparapai naadu dagba aEva na Yesu nga, ko angia boro umbasitise tigako. Satana aasadi ko ngba kura agene, ono Yesu aima ká manga gupai narengbe ka ngba ti aboro ono ki moi Mbori ngba asada. Ka ko amangihe wo, ka gure angia rukö! Kuba gure, Yesu akaragapai fuko ki ya: “I agumba ha ya, ‘Ka mo ásadi nga Gbia nga gamo Mbori ya.’”​—Oni gedi Ruka 4:9-12.

WAI RENGBE ANI KA BANDA GAANI PAGUME NA YEKOVA?

13, 14. Oni sakingo wai Satana amangasunge na gu kura ahe tipa ka zio rani.

¹³ Areme, Satana namangasunge na kina gu ngbatunga abirĩ ko amangi Eva gbiati Yesu na ni. Ko namangasunge na “gu nyemuhe nga ga borose” rogo gi zegino re tipa ka sa aboro i nimangi wasiwasi mangapai na i du na bakere nyemu riahe na mbirahe. Ko na mangasunge na agu ahe nazingisa nyemu kodaba ti aboro gbe rogo Internet tipa ka zio agu aboro ngba “gu nyemuhe nga ga bangirise” tiyo. Ko namangasunge na “gu ũmosangi enda nga ga unga” tipa ka zio aboro ti aũzegino, pagbia, na worimo.

¹⁴ Aũzegino wakina guhe bazi atĩo namangasunge na ni tipa ka zio atĩo. Atĩo nabi gu he re ni wenehe, ono kombe gudu ti ni. Satana namangasunge na agu ahe aboro abihe nga si agberãnga te tipa wa ka i ru ho ka kuo ga Mbori andiko. Ono wa vura duhe wo, ngbatunga gu rukutu asada re tipa gbarasa ngbaduraniyo. Ko naida ka sarani ani bi gupai nga ngerafuo gu gaani azingo nga ga borose nyakipaha ti manga gupai Mbori akpinyemuhe. Ya mo si naida ani mbu tirani fuko ko nangi rani?

15. Wai rengbe ani ka wirika Yesu tipa ka sovura kuti ga Satana aˈasada?

¹⁵ Wa vura duhe nga Eva ambu tiri fu ga Satana asada, Yesu aima káha tigako. Ko anaakaragapai fuko dedede ni ya: “Si ni keke he ya,” watadu “I agumba ha ya.” Kangia wene abawisigi Ziazia Kekeapai nga ani, ani ima rengba ka ino Ziazia Kekeapai wenengai kini tingidi bara agu averesi rengbe ka undo rani ani banda gaani berãpai ti regbo asada. (Tam. 1:1, 2) Pa tingida ani agu akpiapai nga ga Ziazia Kekeapai du tipa agu aboro naadu ni ruruyo fu Mbori rengbe ka undo rani ani wiriki yó. (Rom. 15:4) Ka ani du na bakere gunde ti Yekova, kpinyemu gupai ko akpinyemuhe na kini sogo gupai ko asogaha, ani du adu ni bandabanda rani.​—Tam. 97:10.

16, 17. Wai rengbe gaani ‘ome nga ga berãpai’ kadu na ome kurii gu ngbatunga boro ani aida kadu nga ní?

¹⁶ Pauro aya ani mangisunge na gaani ‘ome nga ga berãpai’ tipa wa ka ani du ni gu ngbatunga aboro Mbori aruga gayo berãpai, angianga wa aguyo nga ga zegino yó ya. (Rom. 12:1, 2) Pauro aya si naida ani bandatirani ti agu ahe ani aberãpaha, niya: “Ani nabafa aberã, na gu irisiirisi apai dunduko i nakiisa ha kuti gu inahe nga ga Mbori, ki nizozogo aberã dunduko ni zizi he fu giasangba Kristo.” (2 Kor. 10:5) Gaani berãpai na bakere ome kurii rani nibi gu ngbatunga boro ani aida kadu nga ní, sidu, si naida ani “berẽ pa” gupai rengbe ka sonosa rani.​—Frp. 4:8.

¹⁷ Ka ani aida kadu ni gigiri rani ani duwa ka sogo agu apai du ni gbegberẽhe. Si naida ani kpinyemu Yekova na “gigiri ngbaduse yo.” (1 Tim. 1:5) Kpotoboro yo nangihe ni kerehe, na si taata tipa ani ini gu ome du ‘agu ahe nga ga zegino’ na ni kurirani te. (Yere. 17:9) Sidu, ya mo si aidanga ani gedi Ziazia Kekeapai tipa ka ‘wísigo tirani singia ani rogo idapase yo’ wenengai te?​—2 Kor. 13:5.

18, 19. Tipagine si aida ani diberã ti ni tipa kadu ni gu ngbatunga aboro Yekova aida ani du nga yó?

¹⁸ Gu kurapai berewe rengbe ka undo rani tipa ani sovura kuti ‘agu ahe nga ga zegino’ nga maa ani agu afugo Yoane kurirani yo naya: “Zegino napaya apaya, na gaha nyemuhe: ono gu ni ka amanga gu pai Mbori akpi nyemu he ni nye anye kindi.” (1 Yo. 2:17) Si nangera wa gi ga Satana zegino re nika nyeanye kindi. Wa vura duhe wo, uru adu kinaho si nika dunga ti ni ya. Agu ahe dunduko gi ga Satana zegino re afuhe furani, si anyenga anye kindi te. Pa tingida ani gupai rengbe ka undo rani ka ani mbunga tirani fu ga Bakitingbanga apai ya.

¹⁹ Petero azungodi rani tipa ani du ni gu ngbatunga aboro Mbori na idi na gayo pai wa ‘ani angera tipa ye gu uru nga ga Mbori ki niipisi he, nga gu angbangbaturũ agbandaka mbiko ho wa si nagbi be we, na agu ahe nga ga ngbangbaturũ si aźaraga be faarago.’ (2 Pet. 3:12) Gu uru re nika da barambeda, na Yekova nika gbarasa ga Satana zegino naabaha. Satana nikaa mangasunge amanga kindi na ‘agu ahe nga ga zegino’ tipa ka aˈasada rani kina wai ko aˈasadi Eva na Yesu daho gu uru re kada ni. Si aidanga ani duwa Eva naambisi gari nyemupai te. Ka ani mangihe wo, gure wa ani naya Satana nga gaani mbori. Si naida ani duwa Yesu ka sovura kuti ga Satana abirĩ, ka si vura du vurũ nga si ima ngba gbe. Ani dunduko mangingo ome amanga tipa kadu ni gu ngbatunga aboro Yekova aida ani du nga yó.