Da Nyaki Pani Foro Gbe Rogo Ga Raka?

“[Mo] nga Bahe ki susi auru kpotosende dunduko.”​—TAM. 83:18.

1, 2. Nibipa gaani bata, tipagine adunga pa ino rimo Yekova ti ni nga gu yangarapai ya?

ISOKE gu bambata regbo oni abi rimo Yekova nga gu regbo i ayuguhe furoni rogo Atambuahe 83:18. Isoke kina ngbaroni nazere ho oni agedihe ni nga: “I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.” Tona ti gu regbo re kada ku awere, si nawira gupai nirengo nga, oni ima mangasunge na kina gu bangisa veresi re ka undo kura aboro i ini Mbori nyemuse nga Yekova.​—Yoe. 2:32.

² Wa vura duhe nga si ninyanyakipa pai boro ini rimo Yekova, anga ino gu rimo re nga gu yangarapai si aidaha te. Oni bingo gu kurapai bake Atambuahe agumbapaha nga gu rengbe ka sa rani ani gbia bata. Ko ayaa: “[Yekova] nga Bahe ki susi auru kpotosende dunduko.” Nirengo, Yekova nga gu nyanyakipa boro gbe rogo haurago dunduko. Wangia ko Bakusiahe dunduko, ko na rengo beko ka ya agu aboro ko akusiyo dũ ra fuko. (Yugo. 4:11) Sidu tie, si naida ani sana tirani nga, ‘Da nyaki pani fere gbe rogo gi raka?’ Si ninyanyakipa pai ani wisigi gaani karagapai kuti gu sanahe re!

Gu Ngbanga Nakuru Ati Edene Yo

3, 4. Satana awiripa nanga Eva wai?

³ Si ninyanyakipa pai ani ini gu boro nyaki pani furani gbe. Ani bingo gupai namangi ati Edene yo. Gu maraika nasamungu naye kada kusa nga Satana Bakitingbanga asosodi gu bambata dee nangia Eva ri moi gari nyemupai mbatayo fu ga Mbori ndiko nga gu ko aya ka i ringa zuzu gu ngua nadu bebere ati yo ya. (Bam. P. 2:17; 2 Kor. 11:3) Ri amangipai kuti gi ga Satana sosodahe re zanga yugo irisa tipa ga Yekova bakere pagbia. Eva aabingo Yekova wa gu Boro pani anyaki gbe furi rogo gari raka te. Ono Satana awiripa nanga Eva wai?

⁴ Satana amangisunge na dungu abirĩ rogo gako fugo yo na Eva. (Oni gedi Bambata Pai 3:1-5.) Bambatapai nga, Satana aayambanga ndikidi rimo Mbori nga Yekova te. Ko aya gbua “Mbori.” Ono tipa gu boro nake Bambata Pai, ní amangisunge na kina boro ndikidi rimo Yekova rogo bambata veresi nga ga gu kapita re. Uepai nga, kuba gupai nga Satana fura tipa ga Mbori ‘rugute,’ ko asanahe gbua tipa gupai Mbori ‘apehe.’ (Bam. P. 2:15-18) Ngba gi gene re, Satana aumbasipa nyakapa gu rugute Mbori afuhe. Biatapai nga, wa ko avura kaa fura sa fu kina Eva, ko aya “oni.” Ko amangihe wo ka asada ka sari ri bi tiri kuari, na ninyanyakipa boro si aida kina ri fura kuba kumbaari na kuba ri a. Sangbanaha angia gine? Eva adiberã ka fura kuba yó ue dũ na kumbaari niya ri fu wo wee: ‘Gu zuzu angua du atiyo ka ani rihe ari.’

5. (a) Ginipai Satana asa Eva ri gbe berãri kuriihe? (b) Ginipai Eva ayuguhe niri ri zuzu gu ngua Mbori aya ka i ringa ha ya?

⁵ Satana aʹaria rengo a. Satana ayawee, gupai Mbori amangaha fu Adamu na Eva nga ‘ka i ringa agu angua du ati yo dunduko ya,’ runga ha te. Berewe a, Satana asa Eva ri berẽpa tiri, na wai rengbe ri ka sa gari raka si ngba berewe kisusi, kidu “wa kina Mbori.” Niyangaraha, ko asari ri tona ka berãpa gu ngua re na zuzuhe kuba gupai nga ri berẽpa gari pagume na gu Boro nafu ahe dunduko furi. (Oni gedi Bambata Pai 3:6.) Si nafu kina gberarago nga, pa ri Eva gu zuzu ngua re ayugu gupai nga, anga Yekova nangia gu Boro pani anyaki gbe furi rogo gari raka te.

Gu Ngbanga Nakuru ti Rago Eyobo

6. Wai Satana atikango naapa ga Eyobo rurupai, na gini momu i afuhe fu Eyobo?

⁶ Fuo dungu akama agarã kusa, gu ruru kumba nangia Eyobo agbia momu ka yugo da pani anyaki gbe fuko rogo gako raka. Ho Yekova apepa ga Eyobo rurupai ni fu Satana, Satana ayaa: “Eyobo nagunde ti Mbori gbua?” (Oni gedi Eyobo 1:7-10.) Satana aatinga kango na gupai nga Eyobo aagiasangba Mbori agia te. Ono ko akapa kuti gupai nasa Eyobo ko nigisangba Mbori. Ko akitingbaanga Eyobo nibirĩ nga, anga nyemuse du nasako ko niirisi Mbori te, ono ko nairisoko tipa kina gu weneapai ko agbiaha beko. Kina Eyobo sa narengbe ka karagapai kuti gi zire kitangbaangase re na i aima fu momu fuko ko mangihe wo.

7, 8. Gini aʹasada Eyobo agbiatiko nani, na ginipai ko ayuguhe nihi ko pai ki nye niruruko?

⁷ Yekova ambu gene fu Satana ko ye na agberãngbi kurii Eyobo, gu tifuo kuraha. (Eyo. 1:12-19) Wai Eyobo amangipai sa gi ariapai namangi ko re? Ko “amanga nga ingapai te, ko agumba nga gbegberẽpai kuti Mbori a te.” (Eyo. 1:22) Ono Satana andu kindi na gako soapai. Ko ayaa: “Kpoto tipa kpoto! Agu ahe dunduko du be boro ni afu kina ha tipa ungani.”a (Eyo. 2:4) Satana aya berewe wee ka kina boro Eyobo nitiko gbia rungosiro, ko rengbe arengba ka diaberã ki zanga ka bi Yekova wa gu boro pani nanyaki gbe rogo gako raka.

⁸ Kpoto Eyobo agberẽ dunduko be kere kaza na diako kini sosodi ko ko gberẽ ngbakoyo fu Mbori ki kpi. Fuo gure, abakureako biata namangi tiyo nga i naye ka fu wasa fuko agumba kina gbegberẽpai kutiko ki yawee ko aingipai kuti Mbori. (Eyo. 2:11-13; 8:2-6; 22:2, 3) Ono tie, rogo agu arungosiro dunduko nagbia Eyobo, ko aambunga gako rurupai te. (Oni gedi Eyobo 2:9, 10.) Pa hi Eyobo pai ki nye niruruko ayugu gupai nga Yekova nangia gu Boro pani anyaki gbe fuko rogo gako raka. Eyobo ayugu gupai a nga kpakpa boro rengbe arengba ka karagapai sa ga Bakitingbanga zire akitangbaangase.​—Oni ringbisinga ha na Asanza 27:11.

Ga Yesu Rengberengbe Karagapai

9. (a) Wai Satana amangi ome tipa ka asada Yesu nibipa gu nyemupai ko adu nani? (b) Wai Yesu amangipai sa gu asada re?

⁹ Ngbutuko fuo zio Yesu bapatiza, Satana aʹasadi ka sosoda ko ko merefuo gu nyemuhe nga ga borose kuba gupai nga ko berẽpa Yekova nigu boro nyaki pani gbe rogo gako raka. Bakitingbanga aye na aʹasada kuti Yesu biata. Bambatapai nga, ko aʹasadi ga Yesu nyemupai niyako fuko wee ko sa ambia ni kpakuto. (Mt. 4:2, 3) Yesu agina riahe tipa aʹuru 40 gomoro kini mangiko amanga gbe. Bakitingbanga aya fuko ko ingi mangasunge na tandu nadu tiko tipa ka mbiisa gako gomoro. Wai Yesu amangipai sa gipai re? Yesu aadunga wa Eva te, ko aberẽkurii Fugo Yekova na ki ká gu asada Satana aye nani sako nikina ipo.​—Oni gedi Matayo 4:4; Pa Fu Rugute ni Ue he 8:3.

10. Tipagine Satana aya ti ni fu Yesu wee ko ru ri ngbaõ yekaru yo ka gito ku sende yo?

¹⁰ Satana amangi ome a berewe tipa ka asada Yesu ko mangipai nigbangbati. Ko aʹasadi Yesu niyako fuko wee ko ru ri ngbaõ yekaru yo ka gito ku sendeyo. (Mt. 4:5, 6) Satana ayawee ka Yesu atinga pai ki mangiko ya, si nika yugo gupai nga ‘Wiri Mbori nga ko.’ Si tie ziazia nga, Bakitingbanga aaida Yesu berẽ kina pa worimoko, ki yugu tiko a gbaiga nga Wiri Mbori nga ko. Satana aima ino gupai nga boro rengbe arengba ka ida ka manga kpakarakpakarapai mbiko rukö na pani andu kadu taata gbua bangiri aboro. Satana aingi mangasunge na Ziazia Kekeapai, ono Yesu ayugu gupai nga Ko aima rugatiko wenengai na Fugo Yekova. (Oni gedi Matayo 4:7; Pa Fu Rugute ni Ue he 6:16.) Niká Yesu gupai re, ko ayuguhe berewe a nga kina Yekova sa nga gu boro pani anyaki gbe rogo gako raka.

11. Tipagine Yesu aká angbii ti ni zegino dũ nga gu Satana afuhe fuko?

¹¹ Rogo ga Satana biata asada, ko ayugu angbii fu Yesu zegino dũ. (Mt. 4:8, 9) Yesu aima ká gu gamunihe re nikina ipo. Yesu aima rugatiko na gupai nga, pa ida ko nani rengbe kadu nga ko ima ká ga Yekova bakere pagbia, nga gu Mbori nga Bahe Kisusi. (Oni gedi Matayo 4:10; Pa Fu Rugute ni Ue he 10:20.) Rogo agu aʹasada re dunduko, Yesu adi apai rogo Ziazia Kekeapai ka karagaha fu Satana nga gu nadu na ndikidi rimo Mbori rogo yo nga Yekova.

12. Gini nyanyaki diaberã si aidi Yesu dihe ho ko ambedi ni ka digiso gako raka auru kpotosende, na ginipai ani awirikaha ti gu gene Yesu amangipai ngbaha kuti gi nyanyaki diaberã re?

¹² Ho Yesu ambedi ni ka digiso gako raka auru kpotosende, nyanyakipai aduho si aidi ko diberã tipaha. Rogo gako sunge naabaha dũ, ko aima yugo gupai nga ko aima ida ka fu gako unga nimotumo. (Mt. 20:17-19, 28; Rk. 12:50; Yo. 16:28) Ono tie, Yesu aima ino gupai nga i nandu ka kitangbaanga ko nibiriki na ki saringbanga ko sa kpio wa boro gberãngbayo ringbisihe kuti gu ndiko nangia ga aYuda. Pa kpiko aima fuda ko gbe. Ko akpari ki yaa: “Ako Buba, ka si du wo, gi inga guari pati re re.” Ono ko andu kumbatayo na fugo ki yaa: “Ono, ka si du nga wa mi akpi nyemu he ya, wa kina mo akpi nyemu he.” (Mt. 26:39) Nirengo, pa nye Yesu niruruko dati kpio aima yugo gupai ziazia nga, Yekova pako anyaki fuko gbe rogo gako raka!

Gaani Karagapai Sa gu Sanahe Re

13. Gini apai wiriki ani he ti gu kpiapai nga ga Eva, Eyobo, na Yesu Kristo?

¹³ Ginipai ani nawirikihe? Nibipa gupai nadu tipa Eva, ani nawirika gupai nga agu aboro nakpi kina nyemu tiyo watadu nabi tiyo nga i nyaki payo, i nayugo gupai nga Yekova nga gu boro nyaki pani gbe rogo gayó raka te. Ono tipa Eyobo, ani nawirika gupai ti gako rurupai nga, kpakpa aboro rengbe arengba ka yugo gupai nga i peresipa Yekova mbatayo nihi yó pai ki nye niruruyo tii arungosiro, ka si vura du nga i aruganga tiyo nzunzu na gupai naye na arungosiro fuyó te vurũ. (Yak. 5:11) Niyangaraha, ga Yesu kpiapai nayugopai furani ani idi aida zee zi rani na ka ani berẽnga kina pa rimorani susi ya. (Eb. 12:2) Ono wai rengbe ani ka maa agi apai ani nawirikihe re kurogo mangapai yo?

14, 15. Wai ga Yesu mangapai nibipa asada adu kia ti ga Eva, na wai rengbe ani ka mangapai wa ko? (Oni fura tipa gu sura du kusende.)

¹⁴ Ka asada sanga roni bangironi go ti Yekova wagusa ya. Eva ambu berãri si sari ri ti kurogo gu asada nadu barabangiiri. Ri abihe ya gu ngua re “wene riahe du, si wenengaĩ bangirise, nyemuhe ti boro.” (Bam. P. 3:6) Nairiwo gu bakparakparapai du ti ga Eva mangaapai na ga Yesu mangapai sa agu aʹasada biata ko agbiatiko nani! Ko ambunga gene fu asada si sako bangiriko go ti agu apai rengbe gako mangapai ka ye nani kuriko te. Ko amangisunge na Fugo Mbori na ki kusi agu averesi nadu na rimo Yekova rogoho.

¹⁵ Ho ani agbiatirani ni na asada ka manga gupai nafu gberarago fu Yekova, ginipai si aida ani berẽkuriihe? Ka ani aberã gbe kuriipa gu asada re, gu nyemu gbegberẽpai re nika kio kina kumbatayo. (Yak. 1:14, 15) Si naida ani mangipai nikina boro wiri ipo tipa ka dia gu nyemu gbegberẽpai re kusayo, ka si vura du nikpakarakpakara wa ka i ya ani namo kina barapa rani vurũ. (Mt. 5:29, 30) Wakina Yesu, si naida ani berẽpa gu sangbanapai gaani mangapai narengbe ka ye nani​—wai si nikadu na ome kurii gaani pagume dagbarani na Yekova. Si naida ani tingidi gupai Fugo Mbori nga Ziazia Kekeapai agumbaha. Ka ani mangipai ngba gi gine re, ani nika yugo gupai nga Yekova nga gu Boro nyaki pani gbe rogo gaani raka.

16-18. (a) Ginipai rengbe ka sa kpotoraniyo si zere? (b) Ginipai nika undo rani ani sovura kuti arungosiro?

¹⁶ Ka oni mbunga gene fu arungo si saroni oni zingi kuti Yekova ya. (Snz. 19:3) Wa ani ambeda gbe na digido zegino, kinawo a badungu ga Yekova aboro agbiatiyo gbe na arungo. Ani aberãnga gupai nga si naida Yekova mangi iiriwopai tipa ka banda rani te. Ono kpotoraniyo ima rengba ka zera ho ani azanga gu boro ni ani akpinyemu ní gbe watadu ho pai afuda rani ni nitirani, a wa si adu tipa Eyobo.

¹⁷ Eyobo aaruganga tiko na ndu gupai Yekova ambu gene ti ni fu agi apai re si niimangi ko te, na ani a ti kura aregbo, ani arengbanga ka rugatirani na ndu gupai gbegberẽ apai amanga rani ti ni te. Isoke ani avura giapa kura ruru awirinarani nakpiki be bazigizo, wa aguyo nadu Haiti yo, watadu be kura gberango a. Watadu ani rengbe a ka ino pa gu boro i aimi ní nizuũ mbiko ní akakuti gani ruru mangaapai, watadu guni nakpi be kere béno. Watadu ani nagbiatirani na arungosiro watadu na iraira sarangbanga. Padu ani rogo kere egerã rengbe arengba ka sarani ani berẽ nga: ‘Tipagine Yekova nambu re ti ni mi nirungo? Ginipai mi amangihe nigbegberẽhe?’ (Abak. 1:2, 3) Ginipai rengbe ka undo rani ti ngbatunga agu aregbo re?

¹⁸ Si naida ani duna rugatise ani ka berã gupai ho ani agbiatirani ni na ngbatunga apai wa gure nga, Yekova aidanga na ani te. Yesu ayugu gi rengo re rogo gupai ko apehe tipa agberango ue namangi ti ragoko. (Oni gedi Ruka 13:1-5.) Badungu agberãngbi nagbia aboro mbiko “rago gbia kuti mamu,” nga kadu rogo gbegberẽ ba ti gbegberẽ regbo. (Batu. 9:11) Ono ka si vura du nga ani ainongo ndu gupai naye na arungo furani te, ani ima rengba ka sovura kuti ni ka ani ngere koyo du “Mbori wasa” ni tipa undo. Ko nika fu gu ome afu furani si aidaha tipa ani nye niruru rani.​—2 Kor. 1:3-6.

19, 20. Ginipai naundo Yesu ko hi agu apai ahi naye na pazee fuko, na ginipai rengbe ka undo rani ani mangihe wa ko?

¹⁹ Ka oni mbunga gene fu rukö watadu gunde be zee si du nigu bambatapai oni aberãkuriihe ya. Pa umbasi Yesu patiko naundo ko ‘ko uka pa tiko ki du wa kina kanga.’ (Frp. 2:5-8) Ko arengbe ka hi gu dungu apai naye na pazee mbiko pa kidoko kuti Yekova. (1 Pet. 2:23, 24) Nimanga Yesu he wo, ko aperesipa gupai Yekova akpinyemuhe kumbatayo, na sangbana gipai re adu nga Mbori akiisi pako kuari gbe. (Frp. 2:9) Yesu anyakasi kina pa gu bangisa raka re a fu gako abawiriki.​—Mt. 23:11, 12; Rk. 9:26.

²⁰ Ti kura aregbo, ani rengbe ka gbiatirani na aʹasada tipa gaani idapase nga gu rengbe arengba ka ye na zee furani. Ka si vura du wo, si naida ani duna kido wa gu gu mokedi nangia Pauro adu nani nga guko nayaa: “Mbiko gu pai re mi nahi agi apai re a, ono zee amanga nga re te; bambiko mi ini gu ko idi mi pa ko, mi ini he aina ni rengo ya ko rengbe na banda gu he mi afu fu ko kuti gu rago re.”​—2 Tim. 1:12.

21. Wa vura duhe nga dungu aboro naberã kina patiyo rogo gi zegino re, gaoni diaberã nga gine?

²¹ Ziazia Kekeapai aima gumbaha ki ya ti gaani regbo, “aboro akpi kina nyemu tiyo.” (2 Tim. 3:2) Si du ani abi dungu aboro ti ni i niberẽ kina pa tiyo mbata, angianga pa Yekova ya. Ka ani ya mbunga tirani fu gu sino nga ga gbangbati ya! Kuba gure, singia ani nagbiatirani na asada, arungo, watadu zee, ani nibasasa dinga berã adia ka yugo gupai nga Yekova nga gu Boro nyaki pani furani gbe rogo gaani raka!

[Gu rukutu kekeapai du bandu kpewaraga yo]

Ginipai Rengbe Ani ka Wirikaha ti . . .

• gu gene Satana anangi Eva ngbaha?

• ga Eyobo mangapai kuti agu arungo nati kuriko?

• gupai Yesu anaaberãpaha gbe?

[Gu sura du ti kpewaraga 21]

Yesu aima ká ga Satana aʹasada na ko agbeberãko gbe kuriipa manga gupai Yekova akpinyemuhe

[Gu sura du ti kpewaraga 22]

Manga dezirepai tii abamburokoo Haiti yo tifuo bazigizo

Ho ani agbiatirani ni na arungo, si naida ani ngere koyo du “Mbori wasa” tipa undo