Sunge Abazakigene Nanyakasa Gaani Pagume Na Mbori

1, 2. (a) Ginipai rengbe ka manga ka si du nga ani naafura tipa gu boro ani akpinyemu ní na kini berẽ pani? (Oni bi gu sura du ti tonatonaha.) (b) Gini asanahe ani nika wisigopai tipaha?

HO ANI aberã ni tipa gu boro ani akpinyemu ní na kini fura tipa ní, si nanyakasa gaani pagume na ní. Kina gu bangisapai re du tipa gaani pagume na Mbori. Ho Davide anaangera ni fuo akandoro, ko anaadia regbo tipa kaa berãkurii pa akerekuru na Bakusiko. Ko aya: “Ho mi nangana gamo angbangbaturũ ni, nga gu mangaapai nga ga wirinzagaro, na gu diwi mo amoi ru na akerekuru; gini he nga boro, mo naaberã pa ni? na wiri boro, mo naandu ka bi ni?” (Tam. 8:3, 4) Fuo Pauro bi gu gene Yekova asa gako ringbisapai si da ti rengo nibipa agu aYisaraere nga ga toro yo, ko akepai ki ya: “Ako gu dungura nga ga gu ũkumuko nga ga Mbori tatamana na inahe!”​—Rom. 11:17-26, 33.

² Ho ani atungusapai ni, ani naaberãpa Yekova na kini fura tipa ko. Gipai re nanyakasa gaani pagume na ko. Gu badungu aboro tungusapai ti aregbo dunduko bi gupai nga gu maku tungusapai ti aregbo dunduko aye na ni fuyo nga kiiso gayo nyemuse tipa Mbori. Singia mo natungusapai ti regbo dunduko watadu si nga gu sásá mo aida ka da ti ni, mo makianga gipai re: Wai rengbe tungusapai ti aregbo dunduko ka nyakasa gamu pagume na Yekova? Kangia bazakigene nga mo, mo sana tiro nga, ‘Ginihe rengbe ka undo re tipa mi naamanga gi sunge re amanga kindi?’ Kangia mo ata danga ni bazakigene te, mo sana tiro nga, ‘Gini ariapai si aida mi mangihe tipa ka tonaha?’ Ani wisigingo agu agene rengbe sunge abazakigene ka nyakasa gaani pagume ngbaha na Mbori.

SUNGE ABAZAKIGENE GBIATI GAANI PAGUME NA MBORI

3. Fura tipa agu amaku nika du rogo ga Mbori Ngbi na gini ome kurirani?

³ Fura na aboro tipa agu amaku ga Mbori Ngbi ka ye na ni nanyakasa gaani pagume na ko. Gini veresi mo naaida kaa mangasunge na ni ho mo atungusapai ni kporo na kporo? Ya mo si rengbe kadu nga Atambuahe 37:10, 11; Daniere 2:44; Yoane 5:28, 29; watadu Yugoti 21:3, 4? Agu aregbo dunduko ani asakapai tipa agi akidohe re na kura aboro, si na tingida rani na gupai nga Mbori nga gu boro nagama “wene gamahe dunduko, na ziazia ũgamahe.” Gipai re nambedisa rani koyo du ko ni.​—Yak. 1:17.

4. Tipagine gaani tambuahe tipa ga Mbori wene sino asona ti ni ti gu regbo ani abi gu zingo du kura aboro na ni rogo toro yo?

⁴ Pa bi ani wai du agu aboro ani atungusapai fuyo azingo tipa agu apai nga ga Mbori nasarani ani du na bakere tambuahe tipa rengo. Agu aboro du rogo zegino, he ho nangbe fuyo kumbatayo sa diabese gbiati ngbarago te. Dunguyo na bakabangiriyo tipa agu apai du kumbatayo na i na maabangirise te. I nagbata ka ino ndu gupai aboro araka ti ni. Zavura kina aguyo naya i nga aboro pambori, i na wiri inohe rogo Ziazia Kekeapai yo te. I wakina agu aboro naadu Nineve yo. (Oni gedi Yona 4:11.) Ho ani atungusapai ni ni bakerehe, si nasarani ani bi gu kparakparapai du dagba agu aboro ani atungusapai fuyo na ga Yekova aboro rogo toro yo. (Yes. 65:13) Si natingida rani na pa ga Yekova wene sino nga ko nafu gu riahe furani nga ga toro na kini yambu aboro dunduko tipa i ye ka rihe wa ka i du na maabangirise.​—Yugo. 22:17.

5. Undo kura aboro nasarani ani bi gaani akpakarapai wai?

⁵ Tungusapai fu kura aboro nasarani ka ani dunga na bakere bakabangirise tipa gaani akpakarapai ya. Gipai re namangi tipa gu nazakigene nga Trisha ho avunguri ambutiyo ni. Ri aya: “Si nga gu gbegberẽpai namangi rogo gimi raka yo.” Rogo uru sa, ri adu na gberarago ka ri aidanga ka guari kporo ya, ono ri andu andu ki wirikipai na agude biata naadu na fudifudiapai. Bayo ambuyo na kporo, na unvura yó kini mangiyo gbegberẽ. Trisha aya: “Gu kpakarapai mi adu rogoho aadunga wa gayo te, gayo aima iiriwo. Wa ani aawirikapai, i adu na ngbarago kini mamu. Agu agude re adu fere wa gamahe be Yekova rogo gu uru re.”

6, 7. (a) Wai ani anyakasa gaani idapase ho ani atungusa gu rengo ni nga ga Ziazia Kekeapai? (b) Ani nidu wai ho ani abi agu arugute nga ga Ziazia Kekeapai si nimangi ariapai rogo gu raka nga ga agu aboro ani wirikapai nayo?

⁶ Yugo gu rengo nga ga Ziazia Kekeapai nanyakasa gaani idapase. Gu mokedi nangia Pauro afura tipa agu aYudo naadu ragoko naamanganga gupai i atungusaha ya ki ya: ‘Wa mo niyugupai fu kura boro, mo naayugonga pai fu tiro te?’ (Rom. 2:21) Anga wo duhe tipa abazakigene areme te. I na dungu amomu beyo tipa ka yugo rengo fu kura aboro. I nambakada gupai i andu ka yugoho na ki nimangi wetekapai ka si aidaha wo tipa wa ka i karagapai sa asanahe. Bazakigene nga Janeen aya: “Aregbo dunduko mi nidu na momu bere tipa ka yugo rengo fu kura aboro, si nasa re mi nibi tire nga rengo narimo dudunguro ku ngbadure yo. Ni sangbanaha, gimi idapase nasona angianga ka kanda ya.”

⁷ Pa bi ani wai Ziazia Kekeapai asa agu aboro ani awisigopai nayo i nimangi ariapai rogo gayo raka nakiiso gaani tambuahe tipa ga Mbori tatamana. (Yes. 48:17, 18) Gipai re nasarani ani nye kuti manga agu arugute nga ga Ziazia Kekeapai rogo gaani raka. Adrianna nga nazakigene aya: “Ka aboro akido kuti gayo tatamana si rengbe ka sayo i gbarasi gayo raka. Ono ho i atona ka kido ni kuti ga Yekova tatamana, i nagbia undo nibasa.” Wa kina gure a, Phil aya: “Ho aboro aasada ka manga ariapai ni rogo gayo raka, Yekova rengbe arengba ka undo yó i du na diabese.”

8. Wai tungusapai na awirinarani aundo rani?

⁸ Tungusapai na awirinarani nanyakasa gaani idapase anyakasa. (Snz. 13:20) Badungu abazakigene nadia bakere regbo tipa kaa tungusapai na akurayo abatungusipai. Gipai re nafu momu furani tipa ‘ani wasa dagbarani.’ (Rom. 1:12; oni gedi Asanza 27:17.) Nazakigene du rimo ri nga Lisa aya: “Basunge yo, aboro naberã kina pa tiyo na kini kpi akurayo. Gbegberẽ afugo gbiati perimo ima hi yo. Aboro naida kadu mbatayo fu akurayo. Ti gu kura aregbo, gu mo nga Kristano, i nasawia ro asawia tipa manga agu asino nga ga aKristano. Ono tie, tungusapai na akuarani aKristano nga wenepai. Ho mi akaraga tire ni ku kporo yo nyemu, ka mi vura mbu ambu wai vurũ, mi nadu na ngbarago.”

9. Wai mangasunge abazakigene na gaani abadiarogatise anyakasa gaani ramukporo?

⁹ Mangasunge abazakigene na gaani abadiarogatise nanyakasa gaani ramukporo. (Batu. 4:12) Madeline nga nazakigene na kumbari aya: “Ho ani atungusapai ni, si nafu momu furani na kumbami ani fura tipa agu apai ani naamangaha gene tungusapai yo watadu gupai ani nigedihe rogo Ziazia Kekeapai nga gu si aida ani mangisunge na ni ba tungusapai yo. Ho ani amangasunge abazakigene ni rogo agarã ni basasa, si nasarani ani kpinyemu tirani ni bakerehe.” Teketeke a, Trisha aya: “Si naundo rani tipa ka ani rimisingo tirani kurogo abape ya, na ani asonga vura dagbarani tipa marã te. Ani naandu ku gene tungusapai yo kina sa, na kini karaga tirani kina sa ka bi agu aboro ani afura nayo, agi apai re nasa gupai nga ani du ni kodikodi rani rogo nyemuse na rogo toro yo.”

10. Ho ani amaa agu apai ni nga ga Kindo kumbatayo na kini bi gupai nga Mbori naundo rani, ginipai si amangaha na gaani kido kutiko?

¹⁰ Ka ani peresipa agu apai nga ga Kindo mbatayo, gaani kido kuti Yekova nika kio, na ko nika undo rani na ki karagapai kuti gaani akpee. Agu aKristano du ni ruru yo ima inopai tipa gipai re. Agu aboro natungusapai ti aregbo dunduko ima inoho nga kido kuti Yekova naundo yó tipa i nimangisunge abazakigene. (Oni gedi Matayo 6:30-34.) Ni kpiapai, i asana Curt nga bazakigene na ni badukuba gu babiapai ninaata ata ko ndu ka bi gu dungurati nadia ko na asaa ue na bebere na tarambiri tipa ko da yo. Ime we aadunga rogo gako tarambiri tipa ka ndu koyo te, na regbo aadanga tipa ko gbia gu wiri marã i naundo ko na ni te. Ko aya, “Mi atona ka berã singia gu diaberã mi amangihe si adu ni ruruhe.” Fuo ko na diako mangi kparakpee, i adiberã ka ndu, na kidu na maabangirise nga Mbori nika ngera angerafuo yó. Ho i aambeda ni ka guari, wirina ayambuyo ki ya gamahe gu du beri ri aida ka fuhe fuyo. Gu marã ri afuhe fuyo angia kina boro gu marã i aidaha tipa ka ndu kurogo gi ba re. Curt aya, “Ho ngbatungapai wa gere amanga ni foro dedede, mo naino aino nga Yekova du naundo ro.”

11. Gini ngbatunga amaku abazakigene naagbiaha?

¹¹ Nirengo, abazakigene ima bi gupai nga ho i dia bakere regbo ni kuti ga Yekova sunge na kini asadi kadu na wene pagume na ko, i nabi agu amaku abi ‘nadusia yó’ ni bakerehe. (Pa Rug. 28:2) Wa vura duhe wo, sunge abazakigene na kina gaha akpakarapai ti ni. Sangbana ga Adamu samungu na ome kurii ga Mbori amoyambu dunduko. Wa vura duhe nga kura akpakarapai kinaho rengbe ka sa abazakigene i bi gupai nga si naida i mbuhe, i rengbe arengba ka sovura kuti agu akpakarapai re watadu ka nehe. Ginihe rengbe ka undo abazakigene tipa i nigbia ngbarago kindi rogo gi gayo sunge re?

ONI NYE KUTI SUNGE TUNGUSAPAI TI AREGBO DŨ

12, 13. (a) Ginipai si aida bazakigene mangihe ka si du nga ní arengbanga kada ti agu asaa si aidaha beni te? (b) Tipagine duhe ti ni ni nyanyakipa pai fu bazakigene ní nigedi Ziazia Kekeapai, wisigopai nisase, na berãkurii pai dedede?

¹² Abazakigene naatungusapai ti aregbo dũ. Si ima kpakara fuyo tipa ka manga apai dunduko, si naida na wene mbakadatise. (1 Kor. 14:33, 40) Kangia bazakigene na kpakarapai tipa ka da ti agu asa si aida ní da ti ni, si adu ni wenehe ní wisigi wai ní amangasunge na gani regbo. (Ef. 5:15, 16) Ní rengbe ka sana tiní nga: ‘Bakio regbo wai mi adiaha kuti aũngbarago na mbaro? Ya mo si naida mi rugutire rogo gi bangiriba re? Ya mo mi rengbe ka manga ariapai ti regbo gimi sunge?’ AKristano dunduko ni ima inoho nga si taata boro mangi agu apai ní natangaraha te, ono tipa abazakigene, si naida i niwisigi agu apai du tipa yó dedede tipa ka dia agu apai adunga sunge ti ni ya kusayo rogo gayo mbakadapai nga ga sunge.

¹³ Geda Ziazia Kekeapai dedede, wisigopai nisase, na berãkuriipai nga agu apai si aida si du rogo gu mbakadapai nga ga abazakigene. Sidu, si naida bazakigene rugutini aruga tipa ka rogoda agu apai kusayo adunga sunge ti ni ya rogo gaani regbo mangapai tipa kadu na regbo beni tipa gi nyanyakipa apai re. (Frp. 1:10) Ni kpiapai, oni berẽnga pa bazakigene nga ní gu karaga tiní akaraga awere re wa ní nitona mangasunge areme. Kurii gipai re, ní naida ka mangasunge na gu regbo dube ní nyemu tipa ka mbakada dunguratise. Ono mbata fu ní mangihe, ní zaki radio tipa ka gia apangbanga. Wa ní adegatuni kuti apangbanga, ní gii pai yo gbeberã ní ti mbakada dunguratise. Gu regbo ní naida ka mbakada dunguratise ti ni ima nyasa zanga ní inihe. Ginipai ye na gipai re? Agu aboro ninaaida ka ngi mbaro abaangira, si ni idi i ngere angerafuo kpotoyo wenengai ka si du nga i naida ka saha ni sinoyo. Teketeke a, si naida abazakigene du na wene mbakadapai beyo tipa wisigopai nisase tipa ka nyakasa gayo idapase wa ka i ruho ka tungusapai ti aregbo dunduko wenengai.​—1 Tim. 4:16.

14, 15. (a) Tipagine si aida abazakigene raki taata raka ti ni? (b) Kangia abazakigene nagbiatiyo na akpakarapai, ginipai si aida i mangihe?

¹⁴ Abazakigene namanga ome tipa kaa raka taata raka. Yesu angarasi gako abawiriki tipa bangiriyo du ni ruruhe. (Mt. 6:22) Ko araki taata raka wa ka ko nyasi gu tungusapai ko aamangaha zanga kurapai fudi berãko. Ko aya: “Ayaro be anya, agu azire du ari yo bambu be ra; ono Wiri boro adu nga ba be ko ka maa riko ku auru he te.” (Mt. 8:20) Ka bazakigene aida ka wirika ga Yesu kpiapai, si naida ní moi gupai ku berani yo nga ka ní du na dungu aũkumuko beni, si nika ida ní di regbo adia tipa ka ngera fuani na kini bandaha.

¹⁵ I ima inoho nga gu diabese du yó na ni gene tungusapai yo, si ayengo be gayo ome te. Kuba gure, agu amomu sunge du berani, si mbiko ga Yekova weneringise. Sidu, ka boro aida ka nye ni bazakigene, si naida ní kido kuti Yekova. (Frp. 4:13) Akpakarapai tigaha nikaa kura akura kindi. (Tam. 34:19) Ka i akido kuti Yekova, gure nga i nangera kubeko tipa ko fu arugute fuyo na ki mbugene fuko tipa ko undo yó, kuba gupai nga i mbu sunge abazakigene. (Oni gedi Atambuahe 37:5.) Wa i kaa bi wai Yekova angerafuo yó, gayo pagume na ko nika sona.​—Yes. 41:10.

YA MO MO RENGBE KA MANGAHA?

16. Kangia mo naida ka mangasunge abazakigene, ginipai si aida mo mangihe?

¹⁶ Kangia mo naida kadu na amaku wa gu abazakigene agbiaha, mo yugu gu nyemupai du mo na ni fu Yekova rogo kpee yo. (1 Yo. 5:14, 15) Mo fura na agu aboro namangasunge abazakigene awere. Mo mangi agu asasa rengbe ka undo ro tipa mo da ni bazakigene. Gere nga gupai Keith na Erika amangihe. I aima digo nimangisunge marã tipa gbanga regbo na ki ngbe kporo na vovo tarambiri fuo i rogotiyo kina wai akurayo amangaha. I aya: “Ani berẽhe nga agi ahe re nika ye na ngbarago furani, ono ngbarago ho ani agbiaha te.” Fuo i mbu Keith ti sunge, ko atona ka mangasunge moundo abazakigene. Ko aya: “Sunge abazakigene natingida rani na pa gu ngbarago boro agbiaha ti tungusapai.” I azi bakure na gu kura arogotise nangia abazakigene naundo yó tipa i gbia ngbarago rogo mangasunge abazakigene ni raka yó taata raka. Ginipai aKeith amangihe na Erika? “Ani atangara agu asásá nga ga toro ani aida ka mangaha na kini wisigihe dedede ka bi gu mangi anihe na gu nakpa koyo.” Fuo bete regbo, i atona ka mangasunge ni abazakigene.

17. Tipagine si aida mo mangi ariapai ti ni rogo gamo raka tipa ka mangasunge abazakigene?

¹⁷ Ya mo mo rengbe ka mangasunge abazakigene? Kangia gene awere bero tipa ka mangaha te, mo mangi ome tipa ka mbakada gamu pagume na Yekova ni tungusa mo pai ni bakerehe. Mo kpari fu Mbori na ki bi singia mo rengbe ka manga ariapai rogo gamo regbo mangapai tipa si mbugene foro wa ka mo mangisunge abazakigene. Ka mo mangisunge abazakigene, mo nika gbia bakere ngbarago. Mo nika gbia gu bakere ngbarago naye be maa agu apai nga ga Kindo kumbatayo. (Mt. 6:33) Mo nika gbia gu ngbarago naye be gamahe fu kura aboro. Kurigure, mo nika du na bakere momu bero ka berãpa Yekova na kini fura tipa ko, na kini kiisi gamu nyemuse tipa ko na ngbarago.