“Mo Ima Rengba Kadu Niwene Bazakigene!”
1. Gini bipai wirinarani sa adu nani tipa sunge abazakigene?
1 Kathe B. Palm ayaa: “Mi arengbanga ka gbia gu kura sunge berewe narengbe ka ye na ngbarago fere watadu ka sa re mi nyaki rogo toro yo te.” Ri amangisunge ni nazaki gene tipa dungu agarã rogo gu ringara nga Chile du America ku sudiyo yo, na gu kura arago. Isoke, boro ima rengba ka berã pa gu wene raka agu aboro namanga sunge tungusapai ti aregbo dũ agbiaha na ki ya furoni wee: “Mo ima rengba kadu niwene bazakigene!”
2. Oni sakingo ndu gupai ndikidi ngbarago aye ti ni mbiko manga boro agu asunge nga ga toro
2 Wene Gene Raka: Yesu nga wene kpiapai furani, ko aima gbia ndikidi ngbarago rogo mangako gupai Bako akpinyemuhe. (Yo. 4:34) Sidu, kina boro rengo du Yesu ayuguhe fu gako abawiriki nga ndikidi ngbarago naye mbiko manga agu asunge du tipa iriso Yekova. Ani nagbia ngbarago ho ani amanga gu sunge ni nasa Yekova ko idi na gaani pai. Kurigure, ho ani amangasunge ni na gaani asa, omerani gbiati agu ahe du berani tipa ka undo kura aboro, gaani ngbarago nakio kina kumbatayo.—Amo. 20:31, 35.
3. Gini ngbatunga ngbarago rengbe ani ka gbiaha ti kiiso ani gaani sunge tungusapai?
3 Ho ani adia bakere regbo ni kutingba tungusapai, si nafu dungu amomu furani ani gbia ngbarago mbiko sakapai na aboro na kini wisigi Ziazia Kekeapai naayó. Zavura rogo agu aba du aboro rogoho kpasiaka kuti gupai ani atungusaha fuyó, gu bipai ani adu nani mbata tipa gu dagbarago re ima rengba ka ariatihe mbiko gu inohe gbiati birĩ ani nagbiaha rogo sunge tungusapai yo. Abazakigene ima rengbe ka mangasunge na gu bakere inohe i agbiaha ti regbo Gu Sukuru Du Tipa Yugopai fu Abazakigene nga gu i naamangaha fu agu abazakigene mangisunge ni abazakigene tipa garã sa. (2 Tim. 2:15) A wa ani kaa kpatagara kuti sunge tungusapai, ani rengbe ka rũ gu tunga nga ga rengo nga gu nika tona kusa azuzuhe kusa.—Batu. 11:6.
4. Ginipai si aida agu aparanga nambeda ka nyasa sukuru makiapai tipaha?
4 Paranga Aboro: Kangia oni ima mbeda ka nyasa gaoni bambata wirikapai sukuru yo, ya mo oni wisigingo gupai du tipa gaoni raka kumbatayo? Ka da ku ane, wirikapai nadia gaoni bakere regbo. Ginihe oni nika mangaha tipa ka karaga gu zegino asa oni adihe kutingba wirikapai sukuru yo? Kuba gupai nga oni gbata kina gu sunge marã oni kaa mangaha ti aregbo dũ, tipagine ka oni akparanga ti ni fu Yekova ko undo roni oni moi gu sásá nga mangasunge ni abazakigene ya? Gu inohe oni nika gbiaha ti manga oni dezirepai fu aboro nibakiakia, diabe agu akpakarapai oni agbiatironi nani, du na zatise, gbiati asada oni tironi kadu na tandu yugopai nika undo roni rogo gaoni raka yo bakere gbe.
5. Rogo gini gene rengbe avunguagude gbiati dungurati ka ngarasa aboro kuti sunge abazakigene?
5 Avunguagude, ya mo oni naasada ka undo awironi tipa i moi agu asásá nga ga mangasunge tungusapai ti aregbo dunduko? Agu apai oni agumbaha gbiati gu wene kpiapai oni amaaha fuyó rengba arengba ka undo yó tipa i moi agu apai nga ga Kindo mbatayo. (Mt. 6:33) Ray natona sunge abazakigene fuo nyasa ko sukuru ayaa: “Wo nina anaagumba gupai fere nga sunge abazakigene nga gu sunge naye na ngbarago rogo raka yo.” Agu aboro dunduko du rogo dungurati si aida i naangarasi aboro kuti sunge abazakigene rogo gayó afugoyo gbiati undo. Jose du Sepania yo ayaa: “Gu dungurati du mi rogoho nabi gu sunge nga ga abazakigene nigu wene sunge si aida paranga aboro naamangaha. Agu apai i agumbaha gbiati wai i abi sunge abazakigene na nyanyakipaha kodihe na gu undo i afuhe nga agu apai naasa re mi tona mangasunge nibazakigene.”
6. Ginipai rengbe ani ka mangaha ka si dunga ani na nyemu mangasunge ni abazakigene awere te?
6 Diabe Akpakarapai: Ono ginipai rengbe ka manga ka oni ape gupai nga, ‘Nyemu mangasunge nibazakigene ti re te.’ Kangia wo gaoni bipai adumbata, oni kpari fu Yekova tipa gu bipai du oni nani re na ki ya fuko, ‘Mi ainongo te singia mi rengbe ka manga sunge nibazakigene, ono gupai mi aida ka mangaha nga, ka manga gupai ngba tiro.’ (Tam. 62:8; Snz. 23:26) Fuani, oni ki ngere tipa arugute rogo Fugoko gbiati gako riigbu. Badungu abazakigene ‘ahia’ sunge zakagene ho i mangi gu nga ga amoundo abazakigene ni, gu ngbarago i agbiaha ti gu regbo re nafõngbaduyo yó i di gu sunge kubeyo nga ga tungusapai ti aregbo dunduko.—Tam. 34:8.
7. Wai rengbe oni ka diabe gu gunde ka oni du nani nga, oni arengbanga ka gasa asa 70 rogo diwi sa te?
7 Ono ginipai rengbe ka manga ka si du nga oni bi tironi nga oni arengbanga ka fu agu asa i aidaha be abazakigene nga 70 te? Tipagine ka oni agumba gupai nafuda roni re fu kura abazakigene ti ni ya? (Snz. 15:22) Fuani, oni ki keke agu aringbisa regbo mangapai daada tipa ka ndu kutini. Oni nika bihe nga, si taata tipa ka banda gaoni asa ti kungboapai tipa ka tungusapai tigu bipai oni adu nani mbata.—Ef. 5:15, 16.
8. Tipagine si aida ani naawisigo agu apai du tipa rani ti ni naʹaregbo dũ?
8 Oni Wisigi Agu Apai Du Tipa Roni Berewe: Agu apai du tipa aboro naʹaria tihe ti aregbo dũ. Si niwenepai tipa kaa wisigo agu apai du tipa tironi naa aregbo dunduko. Nikpiapai, ya mo oni nambeda i zogo roni ti sunge marã? Randy nga gu wirina zoro ti sunge barambeda ayaa: “Gi diaberã re aundo rani na diare tipa ani mangisunge ni abazakigene, na si ima fu momu furani tipa ani ndu ka mangasunge tungusapai rogo agu aba duna zingo abatungusapai rogoho nibakerehe. Mi ima gbia bakere amaku mbiko gu gimi diaberã mi amangihe re, ono gu susi dagbayó dunduko nga wene sangbakpotoseyo.”
9. Ginipai si aida arogotise makiapai tipaha?
9 Gu kura arogotise wisigi agu apai du tipa yó na ki bi gupai nga, si aidanga i dunduko naamangasunge marã ti aregbo dunduko te. Nirengo, gi ngbatunga ariapai re naida gupai nga aborokporo naaraka gu raka du taata, mangayó ho wo nika ye na badungu amaku fuyó. John nga gu wirina diako nambu mangasunge marã ti aregbo dunduko tipa ka kiiso gari sunge tungusapai ayaa: “Pai ho ngba tire wa gu nga ka bi diare ri nimangisunge fu Yekova vuru agi aregbo re te.”
10. Ginihe nafõngbadu aKristano yo i makia pa gu sunge nga ga abazakigene?
10 Oni Yugu Gaoni Nyemuse gbiati Idapase: Yekova sa sunge tungusapai ni gu nyanyakipa sunge si aida aboro dunduko mangihe. I nika gbarasa gi gbegberẽ zegino re barambeda, kina agu aboro nayamba rimo Yekova nika bata. (Rom. 10:13) Gu nyemuse du ani nani tipa Yekova gbiati gu tambuahe du ani nani tipa gupai ko namangihe furani nika fõngbaduraniyo ani mangi gu sunge wiriko afuhe furani nga ga tungusapai kakaka. (Mt. 28:19, 20; 1 Yo. 5:3) Kurigure, pa ida ani kuti gupai nga ani naraka ti yangara arame rengbe arengba ka fõngbaduraniyo ani mangi ome kakaka rogo gi yangara aregbo nye koyo re tipa ka tungusapai, angianga ka ká kuti gi zegino re ya.—1 Kor. 7:29-31.
11. Gini bipai si aida ani du nani ka boro ya furani wee, ani rengbe arengba kadu niwene abazakigene?
11 Anga sunge abazakigene nga kina gasa dungu asa te, si a nga yugo gaani ranigose fu Mbori. Ka boro ya furoni wee, oni rengbe arengba kadu niwene bazakigene, si naida oni bihe nikina wenepai. Oni berẽ kuriihe na ki kpari fu Mbori tipa ko undo roni oni koditironi na agu aboro nagbia ngbarago ti namanga gi sunge re.
[Gu sura du ti kpewaraga 4]
Avunguagude, ya mo oni naasada ka undo awironi tipa i asadi ka maa agu asásá nga ga mangasunge tungusapai ti aregbo dunduko?
[Gu sura du ti kpewaraga 5]
Yekova sa sunge tungusapai ni gu nyanyakipa sunge si aida aboro dunduko mangihe.