Ya mo Mo Naafura na Mbori?

Wene abakure naafura dagbayo dedede ho i agbiatiyo ni, rogo keka awaraga, na rogo terefuni na rogo Internet. Sidu, ka ani aida ka mbeda na Mbori, si naida ani nifura na ko dedede. Wai tie rengbe ani ka manga gipai re?

Ani rengbe ka fura na Yekova rogo kparakpee yo. Ono tie, kpara fu Mbori wa kungbo fugo na kuarani te. Si naida ani ini gupai nga ho ani akpara ni, ani nafura na Bakusirani nga Bahe Kisusi auru kpotosende. Gipai re nafõngbaduraniyo ani fura fuko na dudunguro irisa gbiati gunde ti. Tipa Mbori gi gaani kpee, si naida ani mangipai kuti gako arugute. Agi arugute re gi du biata re.

Bambataha nga, si naida ani kpari fu kina Yekova Mbori sa, angianga fu Yesu, “asanto,” watadu kpiahe ya. (Gate 20:4, 5) Ziazia Kekeapai naya: ‘Oni yúgu gaoni sanahe fu Mbori dunduko rogo kpe na zungaditise ni tambuahe.’ (AFiripoio 4:6) Uehe nga, si naida ani kpari fu Mbori ni rimo wiriko nga Yesu Kristo. Yesu asakirogo gipai re ki ya: ‘Anga boro sa ka ye koyo du Buba ni gbua te, kina mbiko re.’ (Yoane 14:6) Biataha nga, si naida gaani kparakpee du na ngbanya na gupai Mbori akpinyemuhe. Ziazia Kekeapai naya: ‘Ka ani ho gu he ku sangba gako nyemuhe yo, ko gipa rani agia.’a​—1 Yoane 5:14.

Rengo ngaha nga, aboro arengbanga kadu na wene pagume te ka si du nga kina bangisa boro nafura na kurani dedede. Kina wai wene abakure nidu na ngbarago kaa fura dagbatiyo dedede, si naida ani mbu Mbori ko nifura furani na ani kini degeturani ho ko afura ni. Ya mo mo ini wai Mbori naafura furani?

Areme, Yekova Mbori “nafura” furani rogo Fugoko nga Ziazia Kekeapai. (2 Timoteo 3:16, 17) Tipagine pe ani he ti ni wo? Ni kpiapai: Ani ya wene bakureamo ke waraga foro. Fuo geda mo ho, mo ima rengba ka pe paha fu kura aboro na ngbarago nga, “Mi gedi waraga ageda awere ye be bakureami!” Ono wa vura duhe wo, anga kina boro fugo ni mo nigihe te, ono keke waraga du nidu. Wakina gure a, ho mo ageda Ziazia Kekeapai ni, gure wa mo mbu Yekova ko nifura foro. Sidu, Gina fugori nidu rogo bambata kekeapai aya, “Mi naberãha nga ka mi aida Mbori ni bire wa bakureako, si naida mi nigedi gu ‘waraga’ ko akehe furani nga Ziazia Kekeapai.” Ri agbia kurapai kutini nga, “Geda Ziazia Kekeapai na aˈauru dunduko ima mbedisa re koyo du Mbori ni.” Ya mo mo nambu Yekova ko nifura foro na aˈauru dunduko ni geda mo Fugoko nga Ziazia Kekeapai? Ka mo amangaha wo si nika sa ro mo mbedi na ko.