Yekova Nafu Maku fu gu Boro du na Nyemu ka Mangapai

BAKUSIRANI ima fu bawene gamahe fu aboro nga ranirii. Kurigure, ko nafu maku ni bakere fu agu aboro namangasunge na gayo ranirii tipa ndikidi irisombori ndu ku mbatayo na namanga ome tipa ka ziasi ziazia rimoko na ka songoda gako ringbisapai. Yekova aidanga ani gisangba mbiko gupai gbua nga ndiko naida ani mangihe te. Kuba gure, gu boro nagiasangbako na du na bakere tambuahe mbiko nyemuse du fõngbaduniyo ni mangihe wo, ko nabi ni na nyanyaki pani.

Ni kpiapai, ho aYisaraere adu ni ngbakungbo Sinai yo, Yekova aruguyo nga i dua ba iriso. Ko aya: “Oni rógodi tumbatumba gamahe dagba gaoni ahe yo fu Yekova; gu ni kpotoni yo akpi nyemu he, ni yé na ni ni ga Yekova tumbatumba gamahe.” (Gate 35:5) AYisaraere ni basasa anaafu kina guhe narengbe na omeyo, na ka si avurangia bakio gu gamahe re adu wai vurũ, i anaamangasunge na ni ngba wene gene tipa ga Mbori sunge. Ga aboro karagapai angia gine?

“Agu yo kpotoyo yo awo ti yo, toroyo ki sa yo i kpi nyemu manga ha” aye na gamahe wa i ‘akpinyemuhe kpotoyo yo.’ Akumba na adee adu na nyemu ka gamahe tipa ga Yekova sunge nga: apengere, atongo õse, atongo wirinzaga, afongo gose, dahabu, gire ni gbanya ha, gire du ngungungu, zambaha, ndindii giri nzibi, mange meme, kpoto abaakandoro i azamasi he azamasa, kpoto wa ga agbodi, feda, ngua du wa mbegure, na nzeme. Ni yangaraha, “agu ahe nadu be yo si arengbe na manga sunge dunduko, si ki susi a.”—Gate 35:21-24, 27-29; 36:7.

Guhe naasa ngbarago ti Yekova aadunga nga agu ahe i aye na ni te, ono wai i adu na nyemu ka songoda sunge ndikidi irisombori. Gipai re afõngbaduyo yo tipa i di gayo regbo ka mangasunge ni beyo. Gu pangbanga re naya, “agu ade nadu na tatamana ki udi he ni beyo.” Nirengo, “agu ade dunduko toro tatamana awo ti yo, i audi mange meme.” Kurigure, Yekova afu “tatamana, na rugatinapai, na inahe, [fu Besarere] ko rengbe na ngbatunga asunge dunduko.” Nirengo, Mbori ahiisi Besarere na Oriaba na gu birĩ-sunge si aaidaha tipa i mangi gu sunge re.—Gate 35:25, 26, 30-35.

Ho Yekova asana aYisaraere ni i fu gamahe, ko adu na kido nga gu boro “kpotoni yo akpi nyemu he” ni nika songoda ndikidi irisombori asongoda. Fuo gure, ko afu maku fu agu aboro kpotoyo yo afõyo i gamuhe, ko kini ngbe fuyo ku mbatayo na kini fu ngbarago fuyo. Rogo gi gene re, Yekova ayuguhe nga ho ko afu maku ni fu gu gako amoyambu du na nyemu ka mangapai, ko namanga ome tipa ka zingohe mangingo yo ti manga gupai ko akpinyemuhe ya. (Tam. 34:9) Ka mo mangisunge fu Yekova na nyemuhe, ko nafu maku afu foro.

GU GENE ABORO ASIA KA FU GAMAHE NGBAHA TIPA GU SUNGE NAMANGA ROGO ZEGINO DUNDUKO

A wa si adu ti rago gu mokedi nangia Pauro, dungu aboro ‘naigo he’ watadu namaa bete marã areme tipa ka maaha ku rogo gu sanduki nga ga dungurati du tipa gu tungusapai namanga “Rogo Zegino Dunduko.” (1 Kor. 16:2) Rogo adiwi ni basasa, dungurati nakeda gu marã re fu gu be-basunge nga ga aDezire Yekova du rogo gayo ringara. Mo ima rengbe a keda gamo gamahe ku rogo gu basunge nga ga aDezire Yekova du rogo gamo ringara. Ka mo aida ka ino gu adresi nga ga gamahe i amangasunge na ni rogo gamo ringara, mo sana gu be-basunge du rogo gamo ringara. Mo ima rengba ka gbia agu adresi nga ga abe-basunge rogo gaani bangiriba nga ga Internet nga www.jw.org. Agu angbatunga agamahe rengbe mo ka kedaha nga gere:

MARÃ

Oni rengbe ka fu marã watadu ka keda tieke nga ga marã. Rogo gu kura abe-basunge, si taata tipa aboro kedihe a rogo gaani bangiriba nga ga Internet nga jw.org watadu gu kura abangiriba nga ga Internet.
Oni ima rengba kafu nyanyakipa ahe wa kikiipa afongo, dagbangua, na gu kura ahe. Si naida oni kedihe na waraga nayugo gupai nga oni du fu gu he re ni gamahe.

GU GAMAHE MO AFUHE NI BAPE

Si nga marã mo afuhe tipa riigbu mangisunge na ni, ono mo ima rengba ka sanahe tipa i karagaha foro ka mo aidaha.
Mo nakedaha na waraga nika yugo gupai nga gi gamahe re nga bape.

GU GAMAHE MO AFUHE NI UNDO

Kupati gu gamahe nga ga marã na gu kura nyanyakipa ahe, gu kura agene kinaho rengbe oni ka fu gamahe tipa ka undo gu sunge tungusapa Kindo namanga rogo zegino dunduko. Agu agene re gudu kusende re. Kangia gini ngbatungaha oni aida ka mangasunge na ni, oni sana gu be-basunge du rogo gaoni ringara tipa ka ino gini gu rengbe oni ka mangaha. Wa duhe nga gu ndiko du tipa ngbatunga agi apai re gbiati marã-ngbeti ni bakiakia, si adu ni wenepai ka oni sana gu boro inipai wenengai tipa ngbatunga agi apai re ni undo roni.

Basunge-igo-marã: Si nga gu basunge-igo-marã nga gu nangerafuo boro ti regbo kerepai. Boro ima rengba ka fu gu marã re fu gu riigbu nga ga aDezire Yekova watadu gu marã basunge afuhe fu boro fuo mbu ni sunge.

Gu Marã du Beenge yo: Boro ima rengba ka keda gu waraga nayugo pa gani marã beenge yo fu gu riigbu nga ga aDezire Yekova watadu gu marã ni nadihe fuo mbu ni sunge watadu rengbe beenge ka fuhe fuo kpio ni ringbisihe kuti agu andiko beenge du rogo gaoni dagbarago.

Gu Marã Ababagaahe Afuhe fu Boro: Boro ima rengba kafu gamahe fu gu riigbu nga ga aDezire Yekova nga gu marã ababagaahe afuhe funi, watadu ni ima rengba ka ke waraga nga i fuhe fu riigbu fuo kpio ni.

Mekemeke Abambu: Boro ima rengba kafu gu mekemeke abambu du beni ni gamahe fu gu riigbu nga ga aDezire Yekova, na ki pe gupai nga i rengbe ka diaha kina fuo kpio ni.

Gu Basunge Nabanda Marã fu Boro: Boro ima rengba ka fu gu marã fu gu riigbu nga ga aDezire Yekova basunge abandaha tipa ka fuhe funi ti digido garã. Si rengbe kadu nga basunge naigo kura marã funi tipa ka fuhe funi ti digido garã.

Ke Waraga na pa Gupai mo Aidaha: Boro ima rengba kafu marã watadu dagbangua fu gu riigbu nga ga aDezire Yekova ni ke ni waraga ku bangiri agbia ngbii nga ni ima fu guhe re fu riigbu watadu ka pehe nga i fuhe fu riigbu fuo kpio ni. Gipai re naundo boro ka ni ni tumongo marã-ngbeti ya.

A wa gi fugo nga ‘gu gamahe mo afuhe ni undo’ ayugoho, si naida boro berẽ aberã wenengai mbata fu ni fu gu gamahe re. Tipa ka undo agu aboro naida ka undo gu sunge tungusapai du rogo zegino dunduko nga ga aDezire Yekova, burosua kinaho i nakusihe nga Charitable Planning to Benefit Kingdom Service Worldwide rogo pa-Ingirisi na pa-Sepania. I akusi gu burosua re tipa ka undo aboro i rugutiyo na pa agu aundo rengbe yo ka fuhe awere na gu rengbe yo ka fuhe ono i ki dihe fuo kpio yo. Si rengbe kadu nga agu apai du yo amanganga sunge rogo gaoni ringara te. Sidu, fuo geda mo gu burosua re, mo sana gu boro du rogo gamo dagbarago inipai wenengai tipa ngbatunga apai wa gure. Dungu aboro niima mangasunge na ngbatunga agu aundo re tipa ka songoda gu sunge ani amangaha rogo zegino dunduko. Kangia ngbatunga agu aundo re kina rogo gaoni ringara, oni ima rengba ka sanahe tipa gu burosua re be gaoni bakeapai nga ga dungurati tipa i kedihe furoni.

Ka oni aida ka ino dungu pai tipa gipai re, oni sana gu be-basunge du rogo gaoni ringara.