‘Sunge ni Bakere He’

GERE nga regbo ima da tipa nyanyakipa dunguratise mangi Yerusarema yo. Bakindo Davide dungura gako abazogo, abanyaki, na gako aira nyaka dunduko. I na bakere ngbarago ka gia kparakpara tingidapai. Yekova fu gu sunge fu wiri Davide nga Soromo nga ko me gu iʹiriwo bambu nga gu ini ka kparaha tipa iriso ndikidi Mbori. Gu gbinza bakindo nga ga aYisaraere ko re ima gbia arugute rogo yuguyugupai yo na ki fuhe fu Soromo tipa wai si aida i me gu bambu re. Davide ya: ‘Sunge ni bakere he; bambiko gu bambu bakindo re si tipa aboro te ono si tipa Yekova Mbori.’—1 Peka 28:1, 2, 6, 11, 12; 29:1.

Tingbafuo gure, Davide sanahe nga: “Da fu tini tie, ka kpara tini fu Yekova areme?” (1 Peka 29:5) Ka si adu nga mo adu kina yo ni gu uru re, ka ga karagapai angia gine? Ya mo ka si afõngbaduroyo mo songodi gi bakere sunge re? AYisaraere aguari ki mangipai. Nirengo, “aboro ki ningi bambiko wa i afu he ni nyemuhe, bambiko i afu he fu Yekova na kpotoyo yo ziazia ni nyemuhe.”—1 Peka 29:9.

Akama agarã kusa, Yekova asigira gu kurahe paha anyaki kisusi gu yekaru re. Ko asigira gu bakere yekaru nga ga toro, nga gu mbakadapai du tipa aboro ni fu iriso fuko rii mburu gu motumo nga ga Yesu. (Eb. 9:11, 12) Wai du Yekova aundo aboro areme tipa i mbakadipai dagbatiyo na ko? Vurube gaani sunge sa aboro ni abawiriki. (Mt. 28: 19, 20) Ni sangbana gi sunge re, rogo garã yo sa, amirioni aboro na wisigo ziazia kekeapai, akutu abawiriki kini zi bapatiza, na akama vovo adungurati kini kuru.

Gi ngbatunga sonakumbatayo re, naida i kusi agu abuku du mburuhe rii ziazia kekeapai ni dunguhe, meka aBambu Kindo na kini ngere fuoho, na kini gbia aba tipa bakere adunguratise na akikindigihe. Ya mo mo aidanga kuti gupai nga gaani sunge gbataka wene pangbanga nga gu sunge naye na bakere amaku te?—Mt. 24:14.

Nyemuse tipa Mbori na akurase gbiakuti pa wai si aida i mangisunge tungusa pa Kindo ni ipiipihe nafõngbadu ga Mbori aboro yo i “fu [tiyo] tie, ka kpara [tiyo] fu Yekova” nifu yo gu gamahe naye kina boro ngbaduse yo. Nairiwo wai ngba ha ani “írisi Yekova na [gaani] ahe dũ” na ani ki bi wai i amangasunge na agu ahe re ngba ruru gene ka manga babakerepa sunge rogo ga aboro raka yo!—Snz. 3:9.

Gu Gene Aboro Asia Ka Fu Gamahe Ngbaha Tipa Gu Sunge Namanga Rogo Zegino Dunduko

Dungu aboro ‘naigo he’ watadu namaa bete marã areme tipa ka maaha ku rogo gu sanduki nga ga dungurati du tipa gu tungusapai namanga “Rogo Zegino Dunduko.” (1 Kor. 16:2) Rogo adiwi ni basasa, dungurati nakeda gu marã re fu gu be-basunge nga ga aDezire Yekova du rogo gayo ringara. Mo ima rengbe a keda gamo gamahe ku rogo gu basunge nga ga aDezire Yekova du rogo gamo ringara. Ka mo aida ka ino gu adresi nga ga gamahe aDezire Yekova amangasunge na ni rogo gamo ringara, mo sana gu be-basunge du rogo gamo ringara. Mo ima rengba ka gbia agu adresi nga ga abe-basunge rogo gaani bangiriba nga ga Internet nga www.jw.org. Agu angbatunga agamahe rengbe mo ka kedaha nga gere:

MARÃ

Oni rengbe ka fu marã watadu ka keda tieke nga ga marã. Rogo gu kura abe-basunge, si taata tipa aboro kedihe a rogo gaani bangiriba nga ga Internet nga jw.org watadu gu kura abangiriba nga ga Internet.
Oni ima rengba kafu nyanyakipa ahe wa kikiipa afongo, dagbangua, na gu kura ahe. Si naida oni kedihe na waraga nayugo gupai nga oni du fu gu he re ni gamahe.

GU GAMAHE MO AFUHE NI BAPE

Si nga marã mo afuhe tipa riigbu mangisunge na ni, ono mo ima rengba ka sanahe tipa i karagaha foro ka mo aidaha.
Mo nakedaha na gu waraga nika yugo gupai nga gi gamahe re nga bape.

GU GAMAHE MO AFUHE NI UNDO

Kupati gu gamahe nga ga marã na gu kura nyanyakipa ahe, gu kura agene kinaho rengbe oni ka fu gamahe tipa ka undo gu sunge tungusapa Kindo namanga rogo zegino dunduko. Agu agene re gudu kusende re. Kangia gini ngbatungaha oni aida ka mangasunge na ni, oni sana gu be-basunge du rogo gaoni ringara tipa ka ino gini gu rengbe oni ka mangaha. Wa duhe nga gu ndiko du tipa ngbatunga agi apai re gbiati marã-ngbeti ni bakiakia, si adu ni wenepai ka oni sana gu boro inipai wenengai tipa ngbatunga agi apai re ni undo roni.

Basunge-igo-marã: Si nga gu basunge-igo-marã nga gu nangerafuo boro ti regbo kerepai. Boro ima rengba ka fu gu marã re fu gu riigbu nga ga aDezire Yekova watadu gu marã basunge afuhe fu boro fuo mbu ni sunge.

Gu Marã du Beenge yo: Boro ima rengba ka keda gu waraga nayugo pa gani marã beenge yo fu gu riigbu nga ga aDezire Yekova watadu gu marã ni nadihe fuo mbu ni sunge watadu rengbe beenge ka fuhe fuo kpio ni ringbisihe kuti agu andiko beenge du rogo gaoni dagbarago.

Gu Marã Ababagaahe Afuhe fu Boro: Boro ima rengba kafu gamahe fu gu riigbu nga ga aDezire Yekova nga gu marã ababagaahe afuhe funi, watadu ni ima rengba ka ke waraga nga i fuhe fu riigbu fuo kpio ni.

Mekemeke Abambu: Boro ima rengba kafu gu mekemeke abambu du beni ni gamahe fu gu riigbu nga ga aDezire Yekova, na ki pe gupai nga i rengbe ka diaha kina fuo kpio ni.

Gu Basunge Nabanda Marã fu Boro: Boro ima rengba ka fu gu marã fu gu riigbu nga ga aDezire Yekova basunge abandaha tipa ka fuhe funi ti digido garã. Si rengbe kadu nga basunge naigo kura marã funi tipa ka fuhe funi ti digido garã.

Ke Waraga na pa Gupai Mo Aidaha: Boro ima rengba kafu marã watadu dagbangua fu gu riigbu nga ga aDezire Yekova ni ke ni waraga ku bangiri agbia ngbii nga ni ima fu guhe re fu riigbu watadu ka pehe nga i fuhe fu riigbu fuo kpio ni. Gipai re naundo boro ka ni nitumongo marã-ngbeti ya.

A wa gi fugo nga ‘gu gamahe mo afuhe ni undo’ ayugoho, si naida boro berẽ aberã wenengai mbata fu ni fu gu gamahe re. Tipa ka undo agu aboro naida ka undo gu sunge tungusapai du rogo zegino dunduko nga ga aDezire Yekova, burosua kinaho i nakusihe nga Charitable Planning to Benefit Kingdom Service Worldwide rogo pa-Ingirisi na pa-Sepania. I akusi gu burosua re tipa ka undo aboro i rugutiyo na pa agu aundo rengbe yo ka fuhe awere na gu rengbe yo ka fuhe ono i ki dihe fuo kpio yo. Si rengbe kadu nga agu apai du yo amanganga sunge rogo gaoni ringara te. Dungu aboro niima mangasunge na ngbatunga agu aundo re tipa ka songoda gu sunge ani amangaha rogo zegino dunduko. Kangia ngbatunga agu aundo re kina rogo gaoni ringara, oni ima rengba ka sanahe tipa gu burosua re be gaoni bakeapai nga ga dungurati tipa i kedihe furoni.

Ka oni aida ka ino dungu apai tipa gipai re, oni noro gu kekeapai du kusende nga “Mo Fu Gamahe Si Undo Gaani Sunge” rogo gaani bangiriba nga ga Internet nga jw.org watadu mo ke waraga fu gaani be basunge.