Gupai si Aida mo Wiriki Ziazia Kekeapai Ti Ni

Ya mo mo asananga tiro ngbatunga asanahe wa gure? Kangia wo duhe, anga kina ro sa naberã tipaha te. Aboro rogo zegino dunduko nabakabangiriyo tipa gi nyanyakipa asanahe re. Ya mo mo rengbe ka gbia akaragapai?

Amirioni aboro rengbe ka idaha nga “Ii!” Tipagine? Bambiko i ima gbia wene akaragapai kuti gayo asanahe vuru Ziazia Kekeapai yo. Ya mo mo naida ka ino gupai Ziazia Kekeapai apehe? Sidu, si adu wenengai ka mo idi ka gbia undo ti gu mbakadapai nga ga wirika Ziazia Kekeapai aDezire Yekova amangaha.a

Nirengo, ho daha ni tipa ngera ku rogo Ziazia Kekeapai yo, kura aboro naya: “Regbo bere te.” “Si ima nyaka.” “Mi aidanga ka fu tire tipaha te.” Ono agu akurayo na gu kura bipai kia. I nabihe ni momu tipa ka wirika gupai Ziazia Kekeapai ayugoho. Mo bingo bete akpiapai du re nga:

• Gill du England yo aya: “Mi anaandu tipa gu irisombori nga ga Akatoriko, Agarasisi, gu yekaru nga ga agu aboro pambori nga Sikh, na aBuda, na mi ki wirikipai rogo gu yunivasiti nga ga pambori. Wa si avura du wo, mi agbianga karagapai kuti agu asanahe naadu ngbare tipa Mbori te. Dezire Yekova sa aye ku kpure yo. Ri akaragapai fere kuti gimi asanahe rogo Ziazia Kekeapai, na si ki sare mi tona wirika Ziazia Kekeapai.”

• Koffi du Benin yo aya: “Mi adu na dungu asanahe ngbare tipa raka, ono pasita aarengbanga ka karagapai fere kuti ni te. Ono tie, Dezire Yekova sa akaragapai fere kutini rogo Ziazia Kekeapai yo. Ho ko asana re ni singia mi naida ka wirikapai ni bakerehe, mi aidihe nibasa.”

• José du Brazil yo aya: “Mi anidu na nyemu ka ino gupai du tipa kpikpi aboro. Mi aidi kuti gupai nga kpikpi aboro namanga gbegberẽ fu unga aboro, ono mi aidi ka ino gupai Ziazia Kekeapai apehe tipaha. Sidu, mi atona ka wirika Ziazia Kekeapai na bakureami nangia Dezire Yekova.”

• Dennize du Mexico yo aya: “Mi aˈasadi ka geda Ziazia Kekeapai zanga mi girogoyo. ADezire Yekova aye fuo re na ki sakirogo dungu agu sangbaanebi du rogo Ziazia Kekeapai yo fere. Mi aida ka bihe singia kurapai kinaho mi ata wirikanga ha ya.”

• Anju du Nepal yo aya: “Mi anaabaka bangire singia Mbori naberãpa aboro nzunzu. Sidu, mi adiberã tipa ka kpara fu gu Mbori nga ga Ziazia Kekeapai ko. Fuo giro rago, Dezire Yekova angoka gimi ngbadimo, na mi ki idi ka wirika Ziazia Kekeapai na ni.”

Ngbatunga agu apangbanga re natingida rani na pa agu afugo Yesu naya: “Aboro ngbarago nga agu aboro inipa gu gayo azingo nga ga toro.” (Matayo 5:3, NW) Nirengo, i avungu aboro na nyemu agu apai tiyo nga ga toro. Kina Mbori sa rengbe ka mbisa gu zingo re, na ko namangaha amanga vurube Fugoko nga Ziazia Kekeapai.

Wirika Ziazia Kekeapai nakoda ginihe tie? Wai rengbehe ka undo ro? Ani nika gbia akaragapai kuti agi asanahe re rogo gu kekeapai naye fuo gere.