AGU APAI NANDU NA GUPAI DU TI KPOTOHO | YA MO MO NAIDA KA WIRIKA ZIAZIA KEKEAPAI?

Gu Mbakadapai Du Tipa Wirika Ziazia Kekeapai Fu Aboro Dunduko

Aboro ima ino aDezire Yekova tipa gayo sunge tungusapai. Ya mo mo ini gupai nga ani na wisigo Ziazia Kekeapai na aboro rogo zegino dunduko?

A man having a Bible study at his place of employment

Rogo 2014, aDezire Yekova bangeyo naima susa 8,000,000 awisigi Ziazia Kekeapai na aboro rogo aringara nga 240 bangeyo ambeda kuti 9,500,000 rogo adiwi dũ.a Nirengo, bange agu aboro nawisigo Ziazia Kekeapai na ani ima susa bange agu aboro du rogo aringara ni basasa nga 140!

Tipa ka manga gi sunge yugopai re, aDezire Yekova nakusa aZiazia Kekeapai, abuku, amagazini, na gu kura awaraga du tipa wisigo Ziazia Kekeapai bangehe ambeda kuti birioni sa na beberehe na agarã dũ rogo afugo nga 700! Gi bakere sunge kusa awaraga re naundo aboro i wiriki Ziazia Kekeapai rogo afugoyo yo.

Katlego, du South Africa yo aya: “Mi anaaida nga ka wirikapai ho mi adu ni sukuru yo te, ono gi wirikapai re ima ngba tire. Na agu apai mi awirikihe aima fu wasa fere!”

Bertha, du Mexico yo aya: “Gu wirikapai re aima karagapai kuti gimi asanahe dunduko na agu akuraha.”

Eziquiel, du Brazil yo aya: “Ani amanga gu wirikapai re kina kpure yo na ti gu regbo nangba tire. Gini kurapai berewe ka mi aidaha!”

Viniana, du Australia yo aya: “Ani anaamanga gu wirikapai re tipa aminiti 15 kuti 30 ti gu kura aregbo ni gbanga ti gu re, kina gupai na ni ngba tire.”

Aimé, du Benin yo aya: “Mi atumongo tipa gu wirikapai re te, kina ngbare nazere!”

Karen, du Northern Ireland yo aya: “Gu boro nawiriki Ziazia Kekeapai na mi adu na zerangbaduse na wenesino. Ani asonosi wene pabakure dagbarani.”

Denton, du England yo aya: “Badungu aboro na wirika Ziazia Kekeapai zanga i da ni aDezire Yekova.”

AKARAGAPAI KUTI AGU ASANAHE ABORO NAASANAHA DEDEDE TIPA GU MBAKADAPAI NGA GA WIRIKA ZIAZIA KEKEAPAI

Wai du i amanga gi wirikapai re?

Ani nadia riiapai ni bakiakia nga ga Ziazia Kekeapai na ki wisigi agu averesi nandu na agu riiapai re. Ni kpiapai, Ziazia Kekeapai nafu akaragapai kuti agu asanahe du wa gere: Da nga Mbori? Gini asino du ti Mbori? Ya mo rimoko ti ni? Wari du ko ni? Ya mo ani rengbe ka mbeda na Mbori? Gu kpakarapai duho nga ka ino bara wari du agu akaragapai re ni rogo Ziazia Kekeapai.

Tipa ka undo aboro i gbia karagapai, ani namangasunge dedede na gu buku nga Gini Apai Nzunzu Ziazia Kekeapai Ayugoho?b I akusi gi buku re tipa ka undo aboro i girogo gu bangua ayugopai nga ga Ziazia Kekeapai. Si nakoda wirikapai tipa Mbori, Yesu Kristo, rungo nga ga aboro, zinga be kpio, kparakpee, na kura dungu riiapai.

Ti gini regbo na wari rengbe oni ka manga gi wirikapai re ni?

Oni rengbe ka manga gi wirikapai re ti gu regbo na rogo gu ba ngba tiro.

Bange asaa wai gi wirikapai re adiaha?

Badungu aboro namaa saa sa watadu susi gure rogo aposo dũ tipa ka wirika Ziazia Kekeapai. Ono gu bagizo regbo nga ga gi wirikapai re ima rengba ka du kusende ti gure. Ani rengbe ka mangaha kina kuti gu regbo mo aidaha. Kura aboro naawirikapai tipa aminiti 10 watadu 15 rogo aposo dũ.

Bakio marã wai i adiaha tipa gu wirikapai re?

Gu wirikapai re na agu awaraga oni awirikapai rogoho i atumongo tipaha te. Gipai re nandu sa na gu rugapai Yesu apehe fu gako abawiriki nga: “Oni adihe gbua, oni fúku he tigaoni kina wo gbua.”—Matayo 10:8, NW.

Bagizo regbo wai gi wirikapai re nika diaha dunduko?

Bagizo regbo nga ga gu wirikapai re nabi kina ro. Gu buku nga Gini Apai Nzunzu Ziazia Kekeapai Ayugoho? na riiapai rogoho nga 19. Mo ima rengba ka sia kapita sa ki wirikihe watadu gu buku re dũ tipa gu bagizo regbo mo aidaha.

Ya mo si nika ida mi daada ni Dezire Yekova?

Oó. Ani ima ino gupai nga si naida ani irisi ga aboro rengo nga ga sia gupai i aida ka ida kutini. Ono tie, agu aboro gbia gu bangua inohe nga ga Ziazia Kekeapai, ima rengba ka manga gu siapai i naima inopai tipaha wenengai.

Wari rengbe mi ka gbia kura apai ni?

Gu bangiriba nga ga Internet nga jw.org/zne nafura tipa agu aida na mangaapai nga ga aDezire Yekova.

Wai rengbe mi ka sanahe tipa wirika Ziazia Kekeapai?

a Ani na wisigo Ziazia Kekeapai na aboro ni basasa watadu na umba badona nga ga aboro.

b ADezire Yekova du nakusaha. I ima kusa gi buku re bangehe naima susa amirioni 230 rogo afugo naima susa 260.

Undo Fu Aborokporo

Eziquiel aya: “Ho diare atona wirika Ziazia Kekeapai ni, mi aima bi bakere ariapai rogo ri yo. Gaani ramukporo aima ye ka ngba. Mi adu na nyemu ka ino gupai ri aawirikaha, mi ki tona ka wirika Ziazia Kekeapai a. Gupai mi awirikihe asa re mi du ni wene boro. Wirika Ziazia Kekeapai aye na gaani aborokporo ku rogo ba sa.”

Karen aya: “Ho mi atona wirika Ziazia Kekeapai ni, mi ambu dia kere angua kuti kpoto re yo, mi ambu bakere mbira buda, na ki wiriki wai ka mbu bakere zizinga. Gimi bambu awere ni gigirihe na ni wene mbakadimbakadihe. Mi nakpinyemu gimi aborokporo na kini mangi agu apai ngbatiyo. Mi na bakere ngbarago awere.”

Viniana aya: “Kura aboro aabisira re tipa wirika Ziazia Kekeapai. Ono kumbami asoganga gimi diaberã te, ko aya: ‘Sunge tire na gupai aboro apehe te. Mi naida ka biro mo nimangi gupai du ni wenehe na si nga gupai ngba tire. Mo ka kuti gamo wirikapai.’ Si ima sa gaani ramukporo si du ni wenehe!”