Bakabangirise Tipa Aborokporo

Janet aya, “Ngbutuko fuo buba kpi, kumbami aya fere ko bi kura dee berewe. Fũoho aturõngo te ko ki rogodi gako aroko na ki mbu re na agude ue zanga pe gupai fere nga ko ima mbu rani.” Janet agbia sunge, ono gu marã ri azioho adu ni kina wiri umbaha. Na ri ima gbia tiri na dungu akpakarapai kisusi gu nga ga marã. Ri aya, “Gu bakere bakabangirise du mi na ni tipa gu bakere tindiro du awere kurire ima fu ri ome re. Mi na gberãrago ka bi gupai nga mi arengbanga ka ngerafuo awire wa gu kura avunguagude amangaha te. Na zavura awere, mi nabaka kina bangire nga kura aboro nabi re wai na awire. Ya mo i nabihe nga mi du nagbarasipa gimi rogatise?”

Kparakpee naaundo Janet tipa ri ni za tiri na ki mbakadi gari pagume na Mbori. “Raka ima kpakara fere yuru ho rago aonga ni kii na mi kini berẽ nyanyaki kurii gimi bakabangirise. Kparakpee gbiati geda Ziazia Kekeapai naundo re. Gu veresi ngbaangba tire gbe nga AFiripoio 4:6, 7 naya: ‘Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe. Na gu zereda nga ga Mbori nagasi rugatinapai dunduko, si abánda kpotoroni yo na gaoni berã.’ Mi ima kpara fu Mbori tipa dungu ayuru na kini bi gupai nga Mbori nafu wasa afu fere.”

Agu afugo Yesu du tipa gu kparakpee du rogo gu gako Tungusapai Naadu Rii Bagangara yo rẽarẽ tipa ngbatunga abakabangirise naabaha, si naya: “Baroni ini agu apai zingo ho amanga roni, mbata oni nikasana ko ti ni.” (Matayo 6:8) Na si naida ani sanako asana. Kparakpee nga gu bambata gene rengbe ani ka ‘mbéda na Mbori’ ngbaha. Sangbana manga ani he wo nika ngia gine? ‘Ko ki mbedi na ani’ a.—Yakoba 4:8.

Nirengo, kparakpee namanga dungu apai furani tipa ani du wenengai zanga bakere bakabangirise. Yekova nga gu “ko ninagia kpetambuahe,” namangaapai a tipa agu aboro dunduko nagbata ko rogo idapase yo. (Atambuahe 65:2) Gere nga gupai Yesu ayuguhe fu apefuoko nga i ni ‘kpari dedede, ka i mbu nga be he ya.’ (Ruka 18:1) Si naida ani naasana Mbori asana kindi tipa gako rugapai na undo, na kidu na kido nga ko nika fu maku afu furani. Si aidanga ani tiko kuti gu tandu du ko na ni te. Ka ani ‘apirigo nga ti kparakpee ya,’ gure nika yugo gupai nga ani na ndikidi idapase.—1 ATesaroniko 5:17.

GUHE NDIKIDI IDAPASE AYUGUHO

Ono ginihe nga ndikidi idapase? Idapase nga ‘ino’ Mbori. (Yoane 17:3) Ani nayugoho ho ani awisigo ga Mbori aberãpai ni rogo Ziazia Kekeapai. Ani ima ino gupai nga ko nabi rani ni basasa na ko naida ka undo rani. Wa vura duhe wo, ndikidi idapase ima susa ino kina pai gbua tipa Mbori. Si nakoda du na wene pagume na ko. Kina wai si nidu tipa ndikidi bakure, ani arengbanga ka zio bakure kina rogo uru sa te. Gaani idapase “namaa pai” wa ani nikaa wirikapai ni bakerehe tipa ko, na wa ani kaa manga kina “agu apai ngba ti ko,” na wa ani kaa gbia gako undo. (2 AKorindo 10:15; Yoane 8:29) Gere nga ngbatunga gu idapase naundo Janet ri sovura kuti gari bakabangirise.

Janet aya, “Guhe nyakasi gimi idapase nga bi wai Yekova naundo re rogo agi apai re naabaha dunduko. Dungu aregbo kinaho ani anaagbia tirani na agu akpakarapai gene aadunga tipaha ya. Mbiko bakere kparakpee, Yekova dedede anaazaka gene furani ngba gu gene nga gu ka mi aarengbanga ka mangaha ya. Ho mi naatambua ko ni, si naatingida re na gu dungu apai ko amangihe fere. Ko dedede naaundo rani ti kina boro gu regbo ani aida na undo nzunzu. Na ko ima fu ndikidi abakure fere nga agu aKristano nga akumba na adee. Wo i naaundo re dedede na i nga wene kpiapai fu awire.”a

“Mi ima ino ndu gupai Yekova aya ti ni rogo Maraki 2:16 nga: Ko ‘nasogo mbutise.’ Si nga gu riko gbegberẽpai boro amanga gani badiarogatise na ni. Dungu agarã ima susa wa kumbami aguari, ono ti kura aregbo gupai re naimisa re aimisa. Ho ngbadure aima ni, mi naasada ka manga gupai rengbe ka undo kura boro, si nga gupai ni naaundo re dedede.” Sidu, pa manga Janet sunge na gu bangua arugute nga ga Ziazia Kekeapai tipa ka zanga kpara tiri ti kura aboro aundo ri ri sovura kuti bakabangirise.b—Asanza 18:1.

Janet aya, “Gu bakere wasa mi agbiaha naye be ino gupai nga Mbori nga ‘ba fu awirianyaure, ni basapungbanga fu adekurugbo.’ Ko ambunga rani wa gu kumbami amangihe te.” (Atambuahe 68:5) Janet ima inoho nga Mbori aʹasadanga rani “na gbegberẽpai te.” Kuba gure, ko nafu tatamana fu gu ni “zingo tatamana amanga” ni na kini fu “gu bakere tandu susi” furani tipa ani sovura kuti gaani abakabangirise.—Yakoba 1:5, 13; 2 AKorindo 4:7.

Ono ginipai rengbe ka manga ka si du nga ani na bakabangirise mbiko gaani raka ngbapai?