Ya mo Maabangirise ho Tipa Kpikpi Aboro?

Ya mo kpikpi aboro rengbe ka raka berewe?

GUPAI ZIAZIA KEKEAPAI APEHE: “Ragoho nada, ho agu yo ka gia fugo [Yesu] ni dunduko du rogo amurã yo, ki kuru.”​—Yoane 5:​28, 29.

Rogo gi gene re, Yesu afura ku mbatayo tipa gu regbo amurö nika du ni kungboho tii gako Kindo. Fernando i nifura tipa ko rogo gu kekeapai susi kusayo aya, “Kina ngbare nazere ti gu bambata regbo mi agedi Yoane 5:​28, 29, si afu ndikidi maabangirise fere, na mi ki tona ka berãpa raka ku mbatayo na kido.”

Bakuru kusayo, gu ruru kumba nangia Eyobo aidi kuti gupai nga, tingbafuo kpioko Mbori azingisa ko azingisa. Eyobo asanahe nga: “Ka boro kpi, ni adú ni ungani berewe?” Fuani ko akaragapai nakido nga: “Pa gimi arame mangapai dunduko [arame ko ku Murö yo] mi akasunguda, daho pa kusa re ka da ni. Ka mo ayamba he, mi akaraga pai foro.”​—Eyobo 14:14, 15.

Pa zingabekpio aangianga vovopai fu dawiri Razaro nangia Marata te. Tingbafuo kpio Razaro Yesu aya fu ri wẽ: “Kawiro azínga azinga berewe.” Marata akaragapai nga: “Mi ini aina ya ko azínga azinga berewe rago zingabekpio ti yangara rame.” Fuani Yesu ki ya fu ri: “Mi nga zingabekpio, nga unga. Gu ni ka idi pa re, ka ni vura kpi akpi ni du adu ni ungani.” (Yoane 11:23-​25) Fuani Yesu ki zingisi Razaro nibasa be kpio! Gu wene pangbanga re nayugo gupai nika manga ni bakerehe ku mbatayo. Mo berẽnga pa wai gu ngbatunga zingabekpio re nika manga rogo zegino dunduko!

Ya mo i azingisa kura aboro be kpio i ga ku ngbangbaturũ yo?

GUPAI ZIAZIA KEKEAPAI APEHE: Fugo Mbori nayugo gupai nga ga Yesu zingabekpio adu kia ti agu azingabekpio muambe du paha rogo Ziazia Kekeapai. Agu aboro muambe i azingisi yo re araki kina auru kpotosende ane. Ono ani nagedapai tipa ga Yesu zingabekpio nga: “Yesu Kristo tigako du pati kumbabe Mbori wa ko andu ku ngbangbaturũ yo.” (1 Petero 3:​21, 22) Ya mo si adu nga kina Yesu sa i nika zingisako ko ga ku ngbangbaturũ yo? Mbata kusayo, Yesu aima pehe fu gako amokedi nga: “Mi ndu ka mbakada ba fu roni, mi ayé berewe, ki rogo roni fuo re; ho du mi ni, oni du a ho.”​—Yoane 14:3.

Kristo aga ku ngbangbaturũ yo na ki mbakadi ba tipa bete gako abawiriki. Agu aboro i nika zingisa yo i ga ku ngbangbaturũ yo bangeyo nika du nga 144,000. (Yugoti 14:1, 3) Ono ginihe du gu mbembedi apefuo Yesu re nikaa mangaha yo?

I nikaa mangasunge yo! Ziazia Kekeapai naya furani: “Boro maku du ni ziazia ni, nga gu ni i akpara ni sa bambata zingabekpio! Ue kpio adu nga na tandu ku ri agu yo te re, ono i adú ni aboromotumo nga ga Mbori yo, na ga Kristo yo, i azóga rago na ko agarã ki du 1000.” (Yugoti 20:6) Agu aboro nika ga ku ngbangbaturũ yo, i nika zogarago na Yesu ku auru kpotosende ni agu abakindo nga aboro-motumo.

Ada du i nika zingisayo kusa?

GUPAI ZIAZIA KEKEAPAI APEHE: Ziazia Kekeapai ga Mbori toro adu kugii pa kehe nape agi afugo Pauro re nga: “Ni maa bangire koyo du Mbori ni ya ruru aboro azinga be kpio na iraira yo a, a wa agi yo namaa bangiriyo re a tigayo.”​—Amokedi 24:15.

Ada nika du rogo gu badona Pauro aya tipaha “ruru aboro”? Ani bingo gi kpiapai re. Ho Daniere aambeda ni ka kpi, i aya fuko wẽ: “Mo aóngoda, ti digida agu arame re mo ki ru rogo kina gu ga ba i aringbisi he foro.” (Daniere 12:13) Wari du Daniere nika zingabekpio ka raka ni? “Ruru aboro adía kumbo ringara, ki nye anye kindi.” (Atambuahe 37:29) Na Yesu afura ku mbatayo nga: “Aboro maku nga bayee aboro, bambiko i adú ni adikumbo zegino.” (Matayo 5:5) Daniere na gu kura ruru akumba na adee nika zinga ka raka auru kpotosende nyeanye kindi.

Ada nika du rogo gu badona Pauro aya tipaha “iraira yo”? I nga agu abirioni aboro naraki na ki kpiki zanga i gbia momu ka giarogo gu rengo du rogo Ziazia Kekeapai na ki mangipai kuti ni. Tingbafuo i zingi be kpio, i nika du na rengba ka ino Yekovaa na Yesu na kini biyo na nyanyakipa yo. (Yoane 17:3) Agu aboro dunduko sia ka mangasunge fu Mbori, i nika du na maabangirise ka raka nyeanye kindi kina wai Yekova araka.

Wai du apai nika du auru kpotosende?

GUPAI ZIAZIA KEKEAPAI APEHE: Mbori “awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.” (Yugoti 21:4) “I adúdua abambu ki niraki rogo; i arũka bakakue aati yo ki niri zuzuhe.”​—Yesaya 65:21.

Mo bingo tiro mo ni raki rogo ngbatunga ba wa gure na gu gamo aboro i nika zingisa yo! Ono gu sanahe duho nga, Wai du rengbe mo ka inoho nzunzu nga zingabekpio nika manga amanga?