AGU APAI NANDU NA GUPAI DU TI KPOTOHO | RAKA TINGBAFUO KPIO—SI RENGBE KA MANGA?
Ginipai ni Namanga ho Boro Akpi Ni?
Lionel aya: “Mi anaaberãha nga aba ho biata boro narengbe ka ndu ku rogoho ho ni akpi ni: ngbangbaturũ yo, iferno yo na paragotorio yo. Mi aima inoho nga mi arẽnga ka ndu ku ngbangbaturũ yo te, na mi arẽnga tipa iferno a te. Mi ainongo ginipai nzunzu namanga paragotorio yo te. Na mi abingo pai wa gure a rogo Ziazia Kekeapai te. Gere nga gupai aboro apekaha.”
Fernando aya: “I ayugu gupai fere nga aboro dunduko na ga ku ngbangbaturũ yo tingbafuo kpio yo, ono mi aaidanga kuti gupai re te. Mi aaberãha nga kpio nga digido raka, na kpikpi aboro arakanga ku mbatayo te.”
Ya mo mo abakingo bangiro nga: ‘Ginipai nzunzu ninaamanga ho boro akpi ni? Ya mo i nambusa agu agumerani ambusa nakpiki rogo kura rago? Ya mo ani abiyo berewe? Wai rengbe ani kadu na kido?’ Mo bingo gupai Ziazia Kekeapai ayugoho nzunzu. Ni bambatapai, ani wisigingo gupai Ziazia Kekeapai agumbaha tipa guhe nga kpio. Tingbafuo gure, ani nika sakapai tipa gupai Fugo Mbori agumbaha.
Ginipai ninaamanga ho boro akpi ni?
GUPAI ZIAZIA KEKEAPAI APEHE: “Agu yo du ni ungayo i ini he ya i akpí akpi, ono kpikpi aboro aina nga pai te, kura mosoro du nga fu yo a te; bambiko tingida payo ima go ti aboro. Gu pai bi mo ka manga ha ni bero, mo mángi he na omero; bambiko sunge rogo Baatoro kpikpi aboro yo yo mo andú ku ho ni te, berãpai na inahe na tatamana a te.” a—Batungusipai 9:5, 10.
Gu fugo nga murö, si nga gu ba aboro andu ku rogoho ho i akpi ni; si nayugupa gu ba boro arengbanga ka mangapai ni ya. Ga Eyobo bipai angia gine tipa Murö? Ko azanga gako ahe na awiriko dunduko rogo bangisa uru sa, na abagita watadu pikipiki ahe ki kuru ti kpotoko dunduko. Ko azungodi Mbori nga: Ako, “mo oko re ku Baatoro kpikpi aboro yo ki banda re ni okooko re.” (Eyobo 1:13-19; 2:7; 14:13) Si tie ziazia nga, Eyobo aberãnga pa Murö ni gu ba du na we te, watadu gu ba ka gako arungosiro arengbe ka kio ni berewe kina ku mbatayo te. Kuba gure, ko aaberãpaha ni gu ba ko nika gbia ongoda rogoho.
Gu kura gene kinaho rengbe ani ka wirikapai ngbaha tipa kpikpi aboro. Ani ima rengba ka wisigo gupai Ziazia Kekeapai agumbaha tipa agu aboro muambe nazingi be kpio.—Oni bi gu sanduki nga, “Agu Azinga be Kpio Muambe du Paha Rogo Ziazia Kekeapai.”
Boro ho dagba agu aboro muambe i azingisiyo re naaya ni adu rogo ngbarago watadu rogo mbusa te. Ka si adu nga agu aboro i azingisi yo re andu ku rogo ngbatunga ba wa gure fuo kpio yo, ya mo ka i afuranga tipaha fu kura aboro te? Na ya mo ka i ake nga gipai re rogo Ziazia Kekeapai tipa aboro dunduko inihe te? Pai ho du wa gure rogo Ziazia Kekeapai te. Si tie ziazia nga, pai aadunga ngba agu aboro muambe re ka agumbaha tipa gipai re te. Tipa gine? Bambiko i ainongo gupai naamanga te, si wa ka i ya i adu rogo dudunguro rame. Nirengo, Ziazia Kekeapai namangasunge na rame ka sakapai tipa kpio. Ni kpiapai, gu ruru akumba nangia Davide na Setefano dunduko ‘ati ni rame’ rogo kpio yo.—Amokedi 7:60; 13:36.
Gini maabangirise tie duho tipa kpikpi aboro? Ya mo i rengbe ka zinga be gi rame re?
a Rogo gu Ziazia Kekeapai nga New World Translation of the Holy Scriptures, gu fugo nga “murö” na gu fugo Giriki nga “Adisi,” si dunduko narukuba baatoro kpikpi aboro. Gu kura aZiazia Kekeapai namangasunge na gu fugo nga “iferno,” ono Ziazia Kekeapai ayugongo gupai nga i nazo aboro na we te.