Wai du ani naagbia marã tipa gaani asunge?

Rogo agarã ni basasa, ani nakusa amirioni aZiazia Kekeapai na agu awaraga du mburuhe ri Ziazia Kekeapai na kini kparakaha fu aboro. Ani nameka abe-abasunge kaa mangasunge rogoho na kini ngbeke kikindigi amasini kusa awaraga rogo zegino. Dungu akutu adungurati namanga irisombori rogo wenewene aba-irisombori i ayambaha nga Bambu Kindo. Da du ninaatumo marã tipa agi apai re dũ?

Agu agamahe kina aboro afuhe du nasongoda gaani sunge. (2 AKorindo 9:7) Rogo gu garã nangia 1879, ue kusikusi gi magazini re aya: “Ani idi kuti gupai nga YEKOVA du nga basongodi ‘Zion’s Watch Tower’ [a wa i anaayamba gi magazini re mbata], na wa duhe wo, si ahõngahe watadu ka zungodi aboro tipa i songodihe te.” Gaani bipai aʹarianga tihe te.

Aboro naakeda gayo agamahe ku rogo gaani abe-basunge watadu ka maaha ku rogo gu sanduki gamahe du rogo aBambu Kindo ni basasa. Ono ani naadianga marã be aboro watadu ka roga marã tipa agu apai ani amangaha watadu tipa gaani awaraga te. I atumongo marã furani tipa ani tungusipai, ka yugopai rogo dungurati watadu ka undo sunge dudua abambu irisombori a te. Gu kurapai berewe nga, Yesu aya: “Wa i nafuku ahe fu roni gbe [watadu gbua], oni fúku he tigaoni kinawo.” (Matayo 10:8) Agu aboro dunduko namangasunge rogo gaani abe-basunge, rogo gaani riibasunge nga ga zegino kodihe na agu aboro du rogo Riigbu Bipasunge nga ga aDezire Yekova, i aziongo marã te.

Agu agamahe aboro afuhe, si naaundo a ti regbo agberãngo. Agu aKristano naadu mbata adu na ngbarago ka undo agu awirinayo gberãngo aniti kuriyo. (ARomo 15:26) Wakina gure a, ani naaundo agu aboro gberãngo ati kuriyo ni meka ani gayo abambu na abambu irisombori na kini fu riahe, aroko, na angua husa kaza fuyo.