AGU APAI NANDU NA GUPAI DU TI KPOTOHO | ADA NGA ADEZIRE YEKOVA?
Tipagine ani atungusapai ti ni?
Si nawira wa gu kurapai ho aboro naini rani ti ni kisusi gu gaani bakere sunge tungusapai ani amangaha kporo na kporo, rogo agu aba du aboro rogoho ni dunguyo, na agu aba rengbe ani ka gbia aboro rogoho te. Tipagine ani amanga gipai re ti ni?
ADezire Yekova natungusapai tipa ka fu taarimo fu Mbori na tipa ka yugo rimoko fu aboro. (AEbere 13:15) Ani a naida ka irisa sangba ga Yesu zinahe naya: “Oni ndú tie, ki sa arikaaboro dunduko ni abawiriki, . . . ki nirugu yo a i niká kuti agu apai dunduko mi arugu roni kuti ni.”—Matayo 28:19, 20.
Kurigure, ani nakpinyemu gaani amurakporo. (Matayo 22:39) Kina rengo du ngaha nga, ani ima ino gupai nga dungu aboro du na gayo apambori ti ni na anga aboro dunduko du na nyemu gupai ani atungusaha te. Wa vura duhe wo, ani nabihe nga gu yugopai nga ga Ziazia Kekeapai nabatasa unga. Si du nga ndu gupai ani “apiriga nga ti yugo pai na tungusa pa Yesu ya ko nga Kristo” wa agu aKristano naadu rogo bambata sa kama agarã ya.—Amokedi 5:41, 42.
Kura kumba sa nga Antonio Cova Maduro akepai nga, ‘aDezire Yekova namanga bakere ome tipa ka fu tiyo wa ka gi ziazia pangbanga re da kina boro digido kpotosende yo.’—El Universal newspaper, Venezuela
Gu badungu aboro nageda gaani awaraga nga aDezire Yekova te. Na agu amirioni aboro nawisigo Ziazia Kekeapai na ani, i rogo gu kura apambori. Wa vura duhe wo, i na ngbarago nga aDezire Yekova naaye ka tungusapai fuyo.
Nirengo, mo ima rengba kadu na kura asanahe tipa aDezire Yekova. Ani adu na ngbarago ka mo asadi ka ino karagapai kutini ni