Wai ka Gbia Undo Tipa ka Giarogo Ziazia Kekeapai Yo

Mo bingo tiro nga mo ndu ku rogo gu ringara mo aadanga rogoho mbata ya. Mo ki gbiatiro na agu aboro yo du kia, asino mangaapai, riahe, na gu marã mo ainido nga tiro na ni ya. A wa du sino aboro, mo ima rengba kadu na gberãrago.

Pai wa gure ima rengba ka manga ro ti gu bambata regbo mo nagedi Ziazia Kekeapai. Si nadu bangiro wa mo rogo gu kuru zegino mo ainongo pai tipaha ya. Yo nga ni re, mo ki gbiatiro na agu aboro i ayambayo nga aFereseto, mo ki gbiatiro na agu asino mangaapai du kia wa gunga ‘sípo aremu,’ watadu gu riahe i ayambaha nga manu na gu marã nga taranda. (Gate 16:31; Yosua 13:2; 2 Samuere 3:31; Ruka 15:9) Agi apai re dunduko ima rengba ka tudo ro. A wa duhe tipa nduge ku rogo kura ringara, ya mo mo idinga ha boro undoro ka saka kura apai foro te?

WAI KURA ABORO AGBIA UNDO BAKURU KUSAYO

Tona ti gu regbo i atona ke Ziazia Kekeapai rogo 16 kama agarã Mbata fu Batikayo Kristo, i aima digo ni undo aboro i girogo Ziazia Kekeapai yo. Ni kpiapai, Moize nangia gu bambata bangbembatayo fu aYisaraere “atona ka taka pande” gupai i akehe.—Pa Fu Rugute ni Ue he 1:5.

Wene abayugu Ziazia Kekeapai adu kindi kinaho tingbafuo bawe kama agarã kusa. Rogo gu garã nangia 455 Mbata fu Batikayo Kristo, badungu badona nga ga aYudo, kodihe na dungu rukutu agude, adungura tiyo ku rogo gu bavurukporo gu gbata nangia Yerusarema. Abayugu Ziazia Kekeapai adu kina yo kini “gedi pai [rogo gu ziazia] kitabu” re. Ono anga kina gure sa i aamangaha te. “I ki yugu pa ha, si du aboro ki rugu tiyo na gu pai [i] ageda ha.”—Nemaya 8:1-8.

Tingbafuo kama agarã bisue kusa, Yesu amangi kina gu sunge yugopai re a. Nirengo, aboro ainiko gbe ni bayugupai. (Yoane 13:13) Ko anaayugopai fu rimbasa aboro gbiati aboro ni basasa a. Ti gu kura regbo sa, ko afura fu badungu rimbasa aboro, ki mangi gu gumbapai naadu rii bagangara yo, na “gako yugopai airiwo ti arimbasa.” (Matayo 5:1, 2; 7:28) Bara ti Marungu watadu Zerekpe nga ga gu garã nangia 33, Yesu afura fu gako abawiriki ue wa i andu ngbagene ku rogo kura wiri gbaria sa mbembedi na Yerusarema, “ko ayugu Ziazia Kekeapai” fuyo.—Ruka 24:13-15, 27, 32.

Ga Yesu abawiriki angia kina abayugu Fugo Mbori a. Ti gu kura regbo sa, kura banyaki nga ga Etiopia ko aageda kura papara Ziazia Kekeapai sa. Gu bawiriki nangia Firipo aye fuoko na ki sanako nga: “Mo rúgu tiro na gu pai mo ageda?” Gu boro Etiopia re akaragapai nga: “Ka mi wiri pa ina ha wãi? kina boro ka yugu he fere.” Fuani Firipo ki saki rogo yo fuko.—Amokedi 8:27-35.

UNDO KINAHO AREME A

Wakina agu abayugu Ziazia Kekeapai naadu bakuru kusayo, aDezire Yekova namangasunge yugopai areme rogo aringara nga 239 rogo zegino dunduko. (Matayo 28:19, 20) Rogo aposo dunduko i aundo aboro ni basasa bangeyo naima susa amirioni ribua tipa i girogo Ziazia Kekeapai yo. Badungu agi abawiriki Ziazia Kekeapai re naye dagba agu aboro angianga aKristano ya. Gi wirika Ziazia Kekeapai re gbua zanga marã na oni rengbe ka mangaha kina kpuroni yo, watadu rogo gu kura wene ba. Gu kura aboro nagbia ngbarago ti wirikapai rogo terefuni watadu rogo vidio na kompiuta.

Ani nahõpai bero mo sana boro sa dagba aDezire Yekova yo tipa wai rengbe mo ka gbia undo ti gu mbakadapai re. Mo nika bi gupai nga, anga Ziazia Kekeapai nga gu buku ka boro agianga rogoyo ya te, ono si “rengbe tipa yugopai, tipa zapai, tipa ruga aboro, na tipa raba aboro rogo rurupai,” tipa mo du “ziazia, aũ manga wene apai dunduko ki du be” ro.—2 Timoteo 3:16, 17.