Ya Mo Mo Na Nyemu Ka Ringbisa Gupai Mo Naidi Kuti Ni Na Ga Ziazia Kekeapai?
YA MO mo nabi tiro nga Kristano nga mo? Kangia wo duhe, mo dagba agu aboro niima susa abirioni ue auru kpotosende nga aguyo naya i nga apekefuo Kristo. Areme, dungu akutu apambori du ho naya si nga ga aKristano, ono wa vura duhe wo, si ni kparakakparakaha rogo gaha ayugopai yo na abipai. Sidu, gamo ida ima rengba kadu kia ti ga gu kura aboro naya i nga aKristano. Ya mo gupai mo naidi kuti ni na nyanyakipaha? Ii, si na nyanyakipaha, ka si du nga mo naida ka manga gu pambori nga ga aKristano i nayuguhe rogo Ziazia Kekeapai yo.
Aboro aini bambata apefuo Yesu Kristo ni “aKristano.” (Amokedi 11:26) Ndupai aadunga ho tipa i yambu yo na kura arimo te, mbiko aKristano adu na bangisa ida sa. AKristano nabayo dunduko aapeka kina fuo gu yugopai na agu arugute nangia ga Yesu Kristo nga Basimburu gu pambori nga ga aKristano. Ginipai du tipa gamo kanisa? Ya mo mo idi kuti gupai nga si nayugo agu apai Yesu ayuguhe na kini pekefuo agu apai bambata apefuo Kristo aidi kuti ni? Wai du mo narengbe ka ino boro rengoho? Bangisa gene ho sa nga ka mangasunge na Ziazia Kekeapai tipa ka wisigo gaani pambori.
Ani makianga gipai re: Yesu Kristo aima du na dudunguro iriso tipa Ziazia Kekeapai nga Fugo Mbori. Ko aaidanga na agu aboro naabisirapa gu yugopai nga ga Ziazia Kekeapai kini peresi kina pa sino aboro mbatayo te. (Marako 7:9-13) Ani rengbe ka dakuti gu digisopai nga ndikidi apefuo Yesu namaa mburu gayo ida rii Ziazia Kekeapai. AKristano ni basasa si aida i sana tiyo nga, ‘Ya mo agu ayugopai nga ga gimi kanisa na ngbanya dagbaha na Ziazia Kekeapai?’ Tipa ka karagapai kuti gi sanahe re, si angba gbe ka mo wisigi agu ayugopai nga ga gamo kanisa na gu ndikidi apai Ziazia Kekeapai agumbaha.
Yesu aya si naida mburu gaani irisombori du rii rengo, nga gu rengo du rogo Ziazia Kekeapai yo. (Yoane 4:24; 17:17) Na gu mokedi nangia Pauro aya gaani bata naruriipa ye ani “sa gu inahe nga ga rengo.” (1 Timoteo 2:4) Si ni nyanyakipa pai tie nga, si naida mburu gaani ida ru rii gu rengo nga ga Ziazia Kekeapai. Nirengo, gaani bata ngbapai yo!
WAI KA WISIGO GAANI AIDA NA ZIAZIA KEKEAPAI
Ani nahõpai bero mo gedi agu asanahe du sita re na ki bi wai Ziazia Kekeapai akaragapai kuti ni. Mo gedi agu averesi ageda du yo, na ki berẽkurii gaha akaragapai. Fuani, mo sana tiro nga, ‘Wai du agu ayugopai nga ga gimi kanisa aringbisatihe na gupai Ziazia Kekeapai agumbaha?’
Gi bete asanahe re ima rengba ka undo ro mo berẽkuriipai na ki mangi wene wisigopai. Ya mo mo na nyemu ka wisigo agu ayugopai nga ga gamo kanisa na agu apai Ziazia Kekeapai agumbaha? ADezire Yekova adu na ngbarago ka undo ro mo wisigi gu ndikidi rengo nga ga Ziazia Kekeapai. Si angba gbe ka mo sana boro sa dagba aDezire Yekova yo ni ye ka wisigo Ziazia Kekeapai na mo zanga mo tumo tipaha. Watadu mo rengbe ka bi gaani bangiriba nga, jw.org.