Ya Mo Ruru Aboro Dunduko Naga ku Ngbangbaturũ Yo?

ROGO gu nyemu Yesu ari yangara riahe na gako amokedi mbata fu i saringbangako sa kpio, ko akido yó nga ko nandu ka mbakada ba fuyó ngbangbaturũ yo. Ko ayaa: ‘Rogo ga Buba bambu dungu abanye du yo; ka si naadunga wo ya, ka mi aima gumbaha furoni; bambiko mi nandu ka mbakada ba furoni.’ (Yoane 14:2) Tipagine si adu ti ni nga Yesu nika mbakada ba fuyó ngbangbaturũ yo? Gini apai i nikaa mangaha ngbangbaturũ yo?

Yesu aima duna pa sunge berãko yo ko aaida ka fuhe fu gako abawiriki. Rogo kina gu bangisa nyemu re, ko aya berewe wee: “Oni nga agu yo naadu na mi ho i aasadi re ni. Mi nafu ngbi fu roni a wa Buba afu he fere.” (Ruka 22:28, 29) Mbori aima kido Yesu nga ko nikangia gu Bakindo nika manga agu apai aboro akpinyemuhe wa gu nga ka ye na wene zogarago. Yesu nika batasa aboro be arungosiro na ki gbarasi agu aboro namanga akurayó rogo pa zuũ. Wa vura duhe nga Yesu nikadu na azogo beko rogo gako kindo “dati digida kpotosende,” gako mbata bakindo nikadu ngbangbaturũ yo.​—Atambuahe 72:4, 8; Daniere 7:13, 14.

Ono tie, Yesu azoganga rago nisako te. Sidu, ko akido gako amokedi nga ko nika fu ba afu fuyó ngbangbaturũ yo. I nangia gu bambata aboro ko asiayo tipa ‘zogarago [naayó ku] auru kpotosende.’​—Yugoti 5:10.

Bange agu aboro wai nika ga ku ngbangbaturũ yo? A wa duhe rogo gu zogarago nga ga aboro, agu abazogo nika zogarago rogo ga Mbori Kindo ngbangbaturũ yo, i nikina wiri beteyo ka ani ringbisiyo na agu aboro nikangia azogo tiibe gu zogarago re. Yesu aya fu agu aboro nika zogarago naako wee: “Oni nga umba rika aboro, ka oni gúnde nga ya; bambiko si ngba ti Baroni ka fu ngbi fu roni.” (Ruka 12:32) Bange gu “umba rika aboro” re nga 144,000. (Yugoti 14:1) Bangeyo nikina wiri umbaha ka i ringbisiyo na agu amirioni aboro nika gbia nyenye unga auru kpotosende niruru azogo nga ga gu Kindo re.​—Yugoti 21:4.

Nirengo, anga ruru aboro dunduko naga ku ngbangbaturũ yo te. Petero afura tipa gu wene Bakindo nangia Davide watadu Dawidi ki yaa: “Dawidi andu nga ku angbangbaturũ yo te.” (Amokedi 2:34) Yoane Bafu Bapatiza angia ruru kumba. Wa si avura duwo, Yesu ape gupai tipa ko nga, ko azoganga rago nibakindo ngbangbaturũ yo te. Yesu ayaa: “Dagba agu yo ade avunga yo, a nga gu ni sa susi Yoane Babapatiza te. Ono gu ni du ni umba pa aboro rogo gu ngbi nga ga ngbangbaturũ ni susi ko.”​—Matayo 11:11.

Oni Adia gu Mosoro Nga ga Ruru Aboro?

Ginipai si aida boro mangihe tipa ka dia gu mosoro nga ka raka nyeanye kindi auru kpotosende ane? Yesu ayaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yoane 3:16) Oni ini gupai nga, gu nyemu aboro duti Mbori, si nasa gupai nga ko pepa fu nyenye unga fuyó dunduko, ono kina aguyo “idi pa” Yesu nagbia gu mosoro re.

Si naida ga boro idapase du riimburu ndikidi inohe. (Yoane 17:3) Oni rengbe ka yugo nani nga, wene boro nga oni niwirika oni pai bakere gbe tipa ga Yekova ringbisapai tipa aboro. Oni mangipai niʹidapase kuti agu apai oni nawirikihe. Oni inihe ya ngbadimo nyenye unga nizakizakihe furoni.

[Gu kpiahe du ti kpewaraga 7]

Ginipai Ziazia Kekeapai Agumbaha?

Sanahe:

Ginipai ninaamanga ho ruru boro akpi ni?

Karagapai:

“Kpikpi aboro aina nga pai te.”​—BATUNGUSIPAI 9:5.

Sanahe:

Gini maabangirise du ruru aboro nani tipa raka kumbatayo?

Karagapai:

“Ragoho nada, ho agu yo ka gia [fugo Yesu] ni dunduko du rogo amurã yo, ki kuru.”​—YOANE 5:28, 29.

Sanahe:

Wari dungu ruru aboro nika raka ni?

Karagapai:

“Ruru aboro adía kumbo ringara, ki nye anye kindi.”​—ATAMBUAHE 37:29.