Ka Oni Mbunga Gaoni Nyemuse si Zere Ya

1, 2. (a) Agu afugo Yesu du rogo Matayo 24:12 adu tipa ada ni bambataha? (b) Wai du gu buku nga Amokedi ayugo gupai nga agu aKristano naadu mbata aayugo nyemuse ayugo kindi? (Oni bi gu sura duti tonatonaha.)

GOPAI sa dagba agu agopai Yesu agumbaha nibipa agu apai nikaa yugo “pa digida rago” angia “gu nyemuse du ti agu yo ni dungu yo si azéra azera.” (Mt. 24:​3, 12) Rogo bambata sa kama agarã, agu aYudo naamanga tiyo nga i angia ga Mbori aboro ambu gayo nyemuse tipa Mbori si zere.

² Ono tipa dungu aKristano tigayo, i anaadia regbo kuti “tungusa pa Yesu ya ko nga Kristo” na kini yugu nyemuse tipa Mbori, tipa akurayo aKristano, na tipa agu aboro naangianga ndikidi aidipase ya. (Amo. 2:​44-​47; 5:​42) Ono wa si avura duwo, kura apefuo Kristo adu kinaho rogo bambata kama agarã nga aguyo naambu gayo nyemuse si zere.

3. Ginipai nawira wa si naasa gu nyemuse nga ga kura aKristano si zere?

³ Yesu naima zinga be kpio ape gupai fu agu aKristano naadu rogo bambata sa kama agarã naaraka Efesa yo nga: “Pai ngbare sa ro, nga, mo mbu ga bambata nyemuse.” (Yugo. 2:⁠4) Ginipai si awiraha nga si du nangia gu ndupai ko ape gupai re ti ni? Si ima rengba kadu nga gu nyemuahe nga ga borose du ti aboro rogo zegino du naadu na maapai kurii gu ga Kristo abawiriki naadu ti tonatonaha re. (Ef. 2:​2, 3) Wakina wai du dungu agbata areme, gu Efesa naadu rogo bambata sa kama agarã aima hi be kere mangaapai. Si aima du ni kere kumukokumuko gbata nga gu aboro anaamaa berãyo gbe rogoho tipa kina ahe, ngbarago gbiati wene raka. Nirengo, gbangbati aima dia ba nyemuse. Kurigure, wasiro gbiati wasiwasi mangaapai aima du ni bakerehe.

4. (a) Rogo gini agene nyemuse nazere ti gi gaani regbo re? (b) Gini agene biata rengbe gaani nyemuse kadu ngbaha ni asadiasadihe?

⁴ Ga Yesu sangbanebi nibipa zera nyemuse nabi rani abi areme a. Ga aboro nyemuse tipa Mbori nazera kina kumbatayo areme. Amirioni aboro ima sa giiyo na Mbori kini ngere kina ku bee agu ariigbu nga ga wiri aboro tipa si mangipai kuti gayo akpakarapai. Sidu, nyemuse nazera kina kumbatayo dagba agu aboro airisongo Yekova Mbori ya. Ono a wa agu apai naadu rogo gu dungurati naadu rogo bambata sa kama agarã Efesa yo ayugoho, ndikidi aKristano areme ima rengba kaa bi apai taata na ki mbu gayo nyemuse si zere. Ani nika sakapai awere tipa agene biata nga gu rengbe gaani nyemuse kadu ni asadiasadihe ngbaha: (1) Nyemuse tipa Yekova, (2) nyemuse tipa gu rengo nga ga Ziazia Kekeapai, (3) gbiati nyemuse tipa awirinarani.

NYEMUSE TIPA YEKOVA

5. Tipagine si aida ani du ti ni na nyemuse tipa Mbori?

⁵ Mbata kina rogo gu bangisa uru Yesu afu rugute nibipa zera nyemuse, ko anyakasipa gu nyemuse nyakipaha kisusi. Ko aya: “ ‘Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ.’ Gu rugute nga bakumba ha susi si nga gere.” (Mt. 22:​37, 38) Nirengo, du na dudunguro nyemuse tipa Mbori naundo rani ani irisi ga Yekova arugute, kini hipai, na kini sogo gbegberẽpai. (Oni gedi Atambuahe 97:10.) Ono tie, Satana na gako zegino namanga ome ka gbarasapa gaani nyemuse tipa Mbori.

6. Ginipai ye ni sangbana zera nyemuse tipa Mbori?

⁶ Gi zegino du ani rogoho re na iraira bipai tipa nyemuse. Kuba gupai nga aboro naakpinyemu Bakusiyo, i ‘nakpi kina nyemu tiyo.’ (2 Tim. 3:⁠2) Gi zegino Satana azogaha re nasonosa “gu nyemuhe nga ga borose, na gu nyemuhe nga ga bangirise, na gu ũmosangi enda nga ga unga.” (1 Yo. 2:​16) Gu mokedi nangia Pauro afu zahe fu akurako aKristano nibipa fu ngbarago fu borose ki ya: “Gu berã nga ga borose si nga kpio . . . bambiko gu berã nga ga borose si nga vura Mbori.” (Rom. 8:​6, 7) Nirengo, agu aboro namangasunge na gayo raka kaa merafuo aũzegino watadu kaa mbisa gu nyemuapai nga ga kodaba nagbiatiyo na bakere gberãrago gbiati kere imisiri niyangaraha.​—⁠1 Kor. 6:​18; 1 Tim. 6:​9, 10.

7. Gini kereapai apefuo Kristo agbiatiyo areme na ni?

⁷ Rogo kura aringara, agu aboro naya Mbori ti ni te, na agu aboro naya wẽ boro ho ka ini singia Mbori ti ni watadu ko ti ni te te, gbiati aguyo naya ahe akuru nisaha nasonosa agu aberãpai du tipa ka gbarasa nyemuse tipa Mbori gbiati idapase kutiko. I ima sa dungu aboro i idi kuti gupai nga kina aira mungo sa idi kuti gupai nga Bakusiahe kina ti ni. Ti kina gu bangisa regbo re, aboro na bakere irisa koyo du aboro-birĩ-inohe ni, na gipai re nagbeberã aboro kusayo ti Bakusiahe. (Rom. 1:​25) Ka ani adega turani kuti ngbatunga ayugopai wa gure, si ima rengba ka sarani ani guari ti Yekova kusayo, na gaani nyemuse ki zere.​—⁠Eb. 3:​12.

8. (a) Dungu ga Yekova amoyambu nagbiatiyo na gini akpakarapai? (b) Gini kidohe ani abihe rogo Atambuahe 136?

⁸ Ka ani mbu gberãrago si di berani, si ima rengba ka zeresa gaani idapase na ki sa gaani nyemuse tipa Mbori si zere. Rogo gi gbegberẽ zegino Satana azogaha re, ani dunduko nagbia tirani agbia na agu apai naye na gberãrago ti kura aregbo. (1 Yo. 5:​19) Si rengbe kadu nga ani nagbia tirani na agu akpakarapai naye mbiko gbinza, kaza, watadu zingo marã. Watadu ani rengbe kaa sota na iraira bipai tipa tirani, maabangirise tipa pai, ono ka si amanganga ya, watadu zanga du na diabese rogo agu apai ani amangaha. Ono tie, si aidanga ani mbu agu apai re si sarani ani dakuti gupai nga Yekova ima mburani te. Kuba gure, si naida ani naaberã kurii agu afugo kido du tipa ga Yekova bangabanga nyemuse koyo du ani ni. Ani nabi ngbatunga agu afugo re rogo Atambuahe 136:​23, nga gu naya: “Ko nga gu ko naatingidi pa rani ti rago gaani dungbaapai, bambiko gako weneringise nye anye kindi.” Nirengo, ga Yekova bangabanga nyemuse koyo du gako amoyambu ni adigongo te. Sidu tie, ani ima rengba kadu na kido nga ko nagia gaani “azungoditise” agia na kini mangipai kutini.​—⁠Tam. 116:1; 136:​24-​26.

9. Ginipai naafu ngarã fu Pauro ko banda gako nyemuse tipa Mbori?

⁹ Awa kina bake papara Atambuahe, Pauro agbia nyakasaro ni berãko kurii wai Yekova aundo aundo kindi. Pauro akepai ki ya: “Gbia nga gimi mounda; mi agúnde nga wa sa te; gini pai boro ka manga re na ni?” (Eb. 13:⁠6) Gu nyanyaki kido kuti ga Yekova undo re aima undo Pauro ko sovura kuti agu akpakarapai ko aagbia tiko na ni rogo raka yo. Ko aambunga akpakarapai si di beko te. Ho Pauro adu ni bambukiso yo, ko akeke dungu awaraga nga gu naima ngarasa aboro. (Ef. 4:1; Frp. 1:​7; Frm. 1) Na zavura ho i aasada Pauro ni ngba kere agene, ko abanda gako nyemuse kindi tipa Mbori. Ginipai nafu ngarã fuko ko mangi gipai re? Ko aakido kindi kuti ‘Mbori wasa dunduko, nga guko nafu wasa fu rani rogo gaani gberãngbi yo dunduko.’ (2 Kor. 1:​3, 4) Wai rengbe ani ka wirika ga Pauro kpiapai na ki banda gaani nyemuse tipa Yekova si du ni nyanyakihe?

10. Wai rengbe ani ka banda gaani nyemuse tipa Yekova si du ni nyanyakihe?

¹⁰ Pauro aima pepa nyanyakipa gene sa nga gu rengbe ani ka banda gaani nyemuse ngbaha tipa Yekova. Ko akepai fu akurako aidipase ki ya: “Ka oni pirigi nga ti kpara kpe ya.” Ko akepai berewe kusa ki ya: “Oni kpatagara kuti kpe kindi.” (1 Tesa. 5:17; Rom. 12:12) Fugo na Mbori rogo kparakpee yo nga mburu mbembedi pagume na Mbori. (Tam. 86:⁠3) Ho ani adia regbo ni ka peka agu apai du berãrani yo gbiati agu du kpotorani yo fu Yekova, ani naye kadu mbembedi gbe na gu Barani du ngbangbaturũ yo, nga Guko “ninagia kpetambuahe.” (Tam. 65:⁠2) Kurigure, ho ani abi gupai ni nga Yekova nakaragapai kuti gaani akparakpee, gaani nyemuse koyo du ko ni nakio kina kumbatayo. Ani naye ka ino gupai nga “Yekova du mbembedi na agu yo dunduko nakpara fu ko.” (Tam. 145:18) Gu ngbatunga kido kuti ga Yekova undo re nika undo rani ani sovura kuti agu aˈasada nga ga idapase nga gu nika ye kumbatayo.

NYEMUSE TIPA GU RENGO NGA GA ZIAZIA KEKEAPAI

11, 12. Wai du rengbe ani ka sonosa dudunguro nyemuse tipa gu rengo nga ga Ziazia Kekeapai?

¹¹ Wadu ani ni aKristano, ani nadia rengo kugume na kini bihe na nyanyakipaha. Fugo Mbori nga tarã rengo. Rogo ga Yesu kparakpee yo fu Bako, ko aya: “Ga pai nga rengo.” (Yo. 17:17) Sidu, nyemuse tipa rengo natona na gbia ndikidi inohe nga ga Fugo Mbori. (Koro. 1:​10) Ono tie, kurapai kinaho berewe kupati gure si aidaha. Oni bingo wai bake Atambuahe 119 aundo rani ani gi rogo gupai yo nga ka kpinyemu gu rengo nga ga Ziazia Kekeapai. (Oni gedi Atambuahe 119:​97-​100.) Ya mo ani naadia regbo naˈauru dũ kaa berãkurii gu kekeapai nga ga Ziazia Kekeapai dedede? Gaani tambuahe tipa gu rengo nga ga Ziazia Kekeapai nakio ho ani aberã ni kurii agu agene ani agbia undo ngbaha ho ani amangasunge ni na ni rogo gaani raka yo.

¹² Bake papara Atambuahe andu kumbatayo na gako afugo ki ya: “Na nziri gamo apai ngbare yo! Ii, si nzinziri susi nzeme anyege ngbare yo!” (Tam. 119:103) Wakina gure a, ani ima rengba ka gbia ngbarago ti gu nzinziri rigo nga ga toro du mburuhe rii Ziazia Kekeapai nga gu ani agbiaha be ga Mbori riigbu. Ka pepai ni masaku, ani ima rengba ka saka riahe nga ga toro ngbarani yo tipa ka tingida “agu apai ngba tue yo” nga ga rengo na ki mangisunge na ni ka undo kura aboro.​—⁠Batu. 12:⁠10.

13. Ginipai naundo Yeremaya ko kpinyemu gu rengo nga ga Ziazia Kekeapai, na gini sangbanapai si adu na ni kuriko?

¹³ Gu nebi nangia Yeremaya aima kpinyemu gu rengo nga ga Ziazia Kekeapai. Oni bingo gu sangbanapai afugo Mbori adu na ni ku kpotokoyo. “Mi bi gamo apai, mi ki ri he, ga pai ki sa tihe fere ni ngbarago ni gu pai kpotore yo nangi mbiko ho; bambiko i yambu re ti rimoro, Ako Yekova, Mbori nga ga arimbasa ko.” (Yere. 15:16) Ka pepai ni masaku, Yeremaya ari Fugo Mbori ki sá ha vuko yo ni berãko kuriihe. Rogo gi gene re, ko asonosi tambuahe kpotokoyo tipa gu momu ko adu na ni nga ga i niyambu rimo Mbori kuriko. Ya mo gaani nyemuse tipa gu rengo nga ga Ziazia Kekeapai nafõngbadu rani yo ani ini pa gu nyanyakipa momu du ani na ni nga i nayamba rani ti rimo Mbori na ka tungusapa gako Kindo ti gi digido rago re?

14. Wai rengbe ani ka kiiso gaani nyemuse tipa gu rengo nga ga Ziazia Kekeapai?

¹⁴ Kupati geda ani Ziazia Kekeapai gbiati gu gaani awaraga du mburuhe rii Ziazia Kekeapai, wai du berewe rengbe ani ka sonosa dudunguro nyemuse tipa gu rengo nga ga Ziazia Kekeapai? Ani rengbe ka kiiso gaani nyemuse tipa gu rengo nga ga Ziazia Kekeapai ni du ani pati adunguratise ti aregbo dũ. Gu wisigopai nga ga Ziazia Kekepai nga gu i amangaha rogo Ngbaõbambu Sinziri nga gu bangua gene i ayugopai furani ngbaha. Tipa ka gia tirani na gupai i asakaha, si naida ani mbakadi gaani Ngbaõbambu Sinziri wenengai. Gene sa rengbe ani ka mangaha ngbaha nga kaa geda agu averesi dunduko keyo paha rogoho. Rogo agi aˈuru re, ani ima rengba ka kusa Ngbaõbambu Sinziri rogo gaani bangiriba nga ga internet nga jw.org watadu ani ima rengba ka bihe rogo JW Library app rogo dungu afugo. Ho ani azakaha ni rogo agi ahe re, ani ima rengba ka zaka agu veresi du rogoho ni ipiipihe. Singia gini gene du ani amangasunge na ni, geda agi averesi re wenengai na kini berẽkuriihe nika sonosa gaani nyemuse tipa gu rengo nga ga Ziazia Kekeapai.​—⁠Oni gedi Atambuahe 1:⁠2.

NYEMUSE TIPA AWIRINARANI

15, 16. (a) Ringbisihe kuti Yoane 13:​34, 35, gini tindiro du kurirani? (b) Wai du du gu nyemuse du ani na ni tipa awirinarani na ngbanya dagbaha na gaani nyemuse tipa Mbori gbiati Ziazia Kekeapai?

¹⁵ Ti regbo ga Yesu yangara yuru auru kpotosende, ko aya fu gako abawiriki wẽ: “Vovo rugute fu mi fu roni nga, oni kpi nyemu akuaroni akpi; a wa mi akpi nyemu roni, oni kpi nyemu akuaroni a wo. Ka oni akpi nyemu akuaroni, si ka aboro ini ti ni dunduko ya gimi abawiriki nga oni.”​—⁠Yo. 13:​34, 35.

¹⁶ Du na nyemuse tipa awirinarani nandu sa na gu nyemuse du ani na ni tipa Yekova. Ka ani dunga na gu ki zanga gu te. Gu mokedi nangia Pauro akepai ki ya: “Gu ni adu nga nyemu gu wirinani ti ni bi ni ni ya, ka nyemu Mbori du nga ti ni ni abi nga ko ya te.” (1 Yo. 4:​20) Kurigure, gaani nyemuse tipa Yekova gbiati awirinarani na ngbanya dagbaha na gaani nyemuse tipa Ziazia Kekeapai. Tipagine duhe ti ni wo? Bambiko nyemuse tipa gu rengo nga ga Ziazia Kekeapai nafõngbadu rani yo ani irisi agu arugute ngbadurani yo nga ga Ziazia Kekeapai du tipa ka kpinyemu Mbori gbiati awirinarani.​—⁠1 Pet. 1:​22; 1 Yo. 4:​21.

17. Gini bete agene rengbe ani ka yugo nyemuse ngbaha?

¹⁷ Oni gedi 1 ATesaroniko 4:​9, 10. Gini bete agene rengbe ani ka yugo nyemuse ngbaha rogo gaani dungurati? Sosono wirina ima rengba ka ida i tindi ni na aũnduge kupati agu adunguratise nga ga aKristano. Dekurugbo ima rengba ka ida i undo ri ka mbakada gari bambu ho si nagberẽ ni. (Yak. 1:​27) Si ngia paranga aboro watadu sosono aboro, awirina ni akumba watadu awirina ni adee nga aguyo du rogo gberãrago watadu nagbiatiyo na akpakarapai, si naida aida ani naaberãpa yo, kini ngarasiyo na kini fu wasa fuyo. (Snz. 12:25; Koro. 4:​11) Ani nayugo gupai nga ani ima kpinyemu awirinarani nzunzu ho ani ayugo gupai ni rogo fugorani yo gbiati rogo mangaapai yo nga ani naberã pa agu aboro du ani na yo rogo “idapase yo.”​—⁠Gara. 6:​10.

18. Ginipai nika undo rani ani mbakadi gaani rukutu azanga giatise dagbarani na akuarani aidipase?

¹⁸ Ziazia Kekeapai aima fura kumbatayo ya gu toro nga ga gbangbati gbiati ngbaduse nikaa yugopa “kusa rago” nga ga gi sino raka re. (2 Tim. 3:​1, 2) Wadu ani ni aKristano, si naida ani mangisunge nyanyaki tipa ka sonosa gaani nyemuse tipa Mbori, tipa gu rengo nga ga Ziazia Kekeapai na tipa akuarani. Rengo ngaha nga, aregbo kinaho rengbe zanga giatise ka kura dagbarani na akuarani aidipase. Ono tie, nairiwo gu pa maku ngaha fu aboro dunduko rogo dungurati ho nyemuse afõngbadu rani yo ni ani mbakadi agu azanga giatise rengbe ka kura dagbarani rogo nyemuse yo! (Ef. 4:​32; Koro. 3:​14) Sidu, ka ani yambunga gaani nyemuse si zere ya! Kuba gure, ani ndunga andu kindi kumbatayo kaa kpinyemu Yekova, Fugoko gbiati awirinarani.