Ya mo Mbori na Nunga Tiko?

GUPAI KUSIKUSIAHE AYUGOHO FURANI

Nunga nga “ka berãpa gupai du kura boro rogoho watadu ka maatise ku rogo gupai du ni rogoho ni berã mo pa wai duhe ka si nidu nga mo du du rogo gu bangiriba du gu boro re rogoho.” Wene bawirikipai tipa padu wenengai berãseyo, nga Dr. Rick Hanson agumba gupai nga, “gu sino nga nunga gudu rogo ameme rani yo.”

MO MAKIANGA GIPAI RE: Tipagine du ani ti ni na rengba ka yugo nunga, nga gu sino adunga ti kura kusikusiahe ya? Ziazia Kekeapai nasakarogo yo nga Mbori akusi aboro rogo kpiako yo. (Bambata Pai 1:26) I akusi rani rogo kpia Mbori yo rogo gu gene yo nga ani ima rengba ka yugopa wai du ko na rogo gi gene re ani kini yugu bete gu wene asino du tiko. Sidu, ho nunga afõngbadu aboro yo ni i undo akurayo, gure nga i nayugo gu nunga du ti Bakusi yo nga Yekova Mbori.—Asanza 14:31.

GUPAI ZIAZIA KEKEAPAI AYUGOHO FURANI TIPA GA MBORI NUNGA

Mbori na kina nunga rani tiko na ko ima soga gupai nga ka bi rani ani rungo. Nibipa agu aboro nangia ga gu ringara aYisaraere naadu mbata, nga aguyo nahi sunge akanga Ezipeta yo gbiati agarã 40 ku ngbakungba yo, Ziazia Kekeapai naya: “I aimisi ko rogo gayo aimisiri dunduko.” (Yesaya 63:9) Mo bi gupai nga Mbori aainongo kina iniini pa gu imisiri i adu rogoho te. Ko aima maa tiko ku rogo gu imisiri i adu rogoho. Ko aya, ‘bambiko gu ni nazadi roni ni azadi kina rindi bangire.’ (Zekaraya 2:8) Ho kura aboro aimisa rani ni, ko naigirã na ani wa sa.

Ziazia Kekeapai nakido rani nga wa vura duhe nga ani ima rengba kaa bi tirani na parani kusende na kini bi tirani nga ani arẽnga na ga Mbori nunga te, “Mbori nga bahe ti kpotorani yo, ini apai dũ.” (1 Yoane 3:19, 20) Mbori ima ino rani kisusi wai ani na ini tirani. Ko ima ino agu apai du tipa rani naabaha dunduko, na gaani aberã. Ko na nunga rani tiko.

Ziazia Kekeapai nafu kidohe furani nga

• “Si du oni ayámba he, mi Yekova akáraga pai; oni akpára, mi ayá, Mi du re.”—YESAYA 58:9.

• “Bambiko mi ini agu aberã du ti re koyo du oni ni, wo poi Yekova, berã pa zereda, pa gbegberẽ pai te, ka fu maabangirise fu roni tipa gaoni apai ku mbata yo. Oni ki yambu re ki ye ka kpara fere, mi ki gi paroni.”—YEREMAYA 29:11, 12.

• “Mo uka aumere ku rogo ga mangu ime! Ati si ni keke he rogo ga kitabu yo, te?”—ATAMBUAHE 56:8.

MBORI NABERÃ PARANI ABERÃ NA KO IMA INO AGU APAI ANI ANDU ROGOHO NA KO IMA RUGA TIKO NA ANI

Ya mo pa ino ani gupai nga Mbori na kina nunga rani tiko rengbe ka undo rani ani sovura kuti arungosiro? Mo makianga gu kpiapai nga ga Maria:

“Tingbafuo mi susi rogo gu imisiri nga ga pakpio wire garãko adu nga 18 be gu kaza nga kansa namangiko tipa agarã ue, mi aberẽhe nga raka angbanga te na si ima kpakara. Ngbadure aima ima kuti Yekova tipa gupai nga ko aaundongo re tipa ka husa ko te!

“Tingbafuo agarã sita kusa, wenesino wirina rogo dungurati adegeturi fere wa mi aasaka gupai du tipa tire ni furi nga Yekova akpingo nyemu re te. Tingbafuo ri degeturi fere tipa asa zanga de fugo ngbare, ri apepa gu veresi fere nga gu nafõngbadureyo. 1 Yoane 3:19, 20 naadu, nga gu naya: ‘Mbori nga bahe ti kpotorani yo, ini apai dũ.’ Ri asaki gupai fere nga Yekova ima rugatiko na gaani aimisiri dunduko.

“Zavura na agi apai re vurũ, si aima du fere ni kpakarakpakaraha ka mbu gu zinga mi adu na ni! Fuoho mi agedi Atambuahe 94:19, nga gu naya: ‘Wa du sakapai ku kpotore yo ni badungu he, gamo wasawasa apai nangarãsa mbisimore.’ Mi aberẽhe nga si wa i ake agu averesi re tipa kina re! Niyangaraha, mi aye ka bihe nipa wasa kadu na rengba ka fura fu Yekova tipa gimi aimisiri, ni ino mi gupai nga ko na degatuko adega na ko ima rugatiko na mi.”

Nairiwo gu pa wasa ngaha ka ino gupai nga Mbori ima rugatiko na ani na ko naberãpa rani aberã! Ono tipagine tie du arungo ti ni ni bakerehe? Ya mo si wo mbiko gupai nga Mbori du nafu ambusa furani tipa manga irairapai? Ya mo Mbori amangapai tipa ka nyasa riipa arungo dunduko? I nika sakapai tipa agi apai re rogo gu kekeapai ngbefuo gere.