Oni Yugu Nunga fu ‘Aboro Dunduko’

HO YESU ayugupai ni fu gako abawiriki tipa wai ka tungusa wene pangbanga, ko aima ino gupai nga anga aboro dunduko nika dia gu pangbanga nga ga Kindo kugume te. (Rk 10:3, 5, 6) Gene tungusapai yo, ani ima rengba ka bi agu aboro rengbe ka karagapai gbegberẽ watadu na zinga. Nirengo, ho i akaragapai ni wa gure, si ima rengba kadu furani ni kpakarakpakaraha tipa kadu na nunga tipa agu aboro ani atungusapai fuyo.

Boro nunga nabi agu azingo gbiati kpakaraapai nga ga kura aboro, nungayo ki zi ni na ni ki idi ka undo yo. Ono tie, ka gaani nunga tona kaa zera tipa agu aboro ani agbiayo gene tungusapai yo, gaani kakaka nyemuse ima rengba ka tona zera a na ka ani adunga berewe zaaza tipa ka tungusapai na ka undo yo ya. Ono ho ani ayugo nunga ni, si wa ka i ya ani namaa kura anyake kuti we—ani nabanda gaani kakaka nyemuse tipa sunge tungusapai si naaki aki kindi!—1 Tesa. 5:19.

Waigu rengbe ani ka yugo nunga zavura ho duhe ni ni kpakarakpakaraha ka yugoho? Ani wisigingo akpiapai biata rengbe ani ka wirikapai ti ni—nga agu akpiapai nga ga Yekova, Yesu, gbiati gu mokedi nangia Pauro.

ONI WIRIKI GA YEKOVA NUNGA

Tipa akutu agarã, Yekova aima digo nihi gu gbarasarimo aboro naye na ni kuti rimoko. Wa vura duhe wo, “ko naina pai fu aboro gbangbati na aboro ingapai” kindi. (Rk. 6:35) Gako wenesino ni yuguyuguhe ti wai ko ahipai. Yekova nakpinyemu “aboro bati dunduko.” (1 Tim. 2:3, 4) Wa vura duhe nga Mbori ima soga gbegberẽpai, ko nabi aboro na nyanyakipa yo na ko aidanga boro dagbayo kpi wa sa te.—2 Pet. 3:9.

Yekova ima ino wai Satana navurasi bangiri agu aboro ainongo rengo ya. (2 Kor. 4:3, 4) Badungu aboro i aima digo niyugu ziree aida fuyo mbuyo kindi ni agude, na gipai re nasaha fuyo ni kpakarakpakaraha tipa i idi na rengo. Yekova nakpinyemu ka undo ngbatunga agu aboro re. Waigu ani ainoho wo?

Mo bingo gu bipai Yekova adu na ni tipa agu aboro Nineve naadu bakuru kusayo. Wa i avurangia aboro zuu, Yekova aya fu Yona: “Ka mi aini nga pai fu Nineve te? nga gu bakere bakporo re, du aboro rogo ho wa 120,000 nga aguyo aina nga pa kparaka kumbabeyo ti garebeyo ya?” (Yona 4:11) Yekova abi aboro Nineve ni agu aboro adunga gene beyo rogo toroyo ya, na ko ki yugu nunga ni keda ko Yona ko ndu ka zayo.

Wakina Yekova, ani nabi aboro na nyanyakipa yo. Ani rengbe ka wirika ko ni manga ani asadatise ka undo ai gu boro rengbe ka degatuni ka gia rengo, zavura ho duhe ni wa ka i ya i adianga ha kugume te.

ONI WIRIKI GA YESU NUNGA

Yesu wakina Bako, nunga agu aboro naadu na zingo rogo toroyo aima manga ko. “Ho ko abi arimbasa ni, nungayo ki mangi ko, bambiko i arungo, ki nigbandaka, wa kina agu akandoro adu nga na babandara ti ra ya.” (Mt. 9:36) Yesu aima rugatiko wenengai na gupai nga agu aboro naaye kaa gia gako afugo, i aima yugo dungu aziree fuyo na gayo abarumbatayo rogo apambori anaamanga yo amanga gbegberẽ. Wa vura duhe nga Yesu aima ino gupai nga badungu agu aboro re nika mbugene ambu fu akpakarapai si sayo ka i degenga tuyo ya, ko andu kumbatayo kindi “ki yugu dungu apai” fuyo.—Mk. 4:1-9.

Kumba karagapai na zinga ho awirina ue ni adee naye ni ku kpuko — Ka rago gberẽnga tiro ka si du nga boro ayugongo nyemupai ti gu bambata regbo mo nabi ni ya

ADezire Yekova ye fuo kumba ka ko aazanga ngbadimo fuyo ya, ono ko na gberãrago mbiko gupai nga apai ima ariatihe rogo gako raka yo — Apai naʹariatihe aʹaria rogo raka yo, na kina gu bangisapai re rengbe ka manga a tipa gu bipai du boro na ni tipa rengo

Ho aboro adeganga tuyo ni wenengai kuti gu wene pangbanga ani atungusaha ya, si naida ani asadi ka ino ndu ginipai i adeganga tuyo ti ni ya. Agu akurayo ima rengba kadu na gbegberẽ bipai tipa Ziazia Kekeapai watadu tipa gu pambori nga ga aKristano mbiko gu gbegberẽ akpiapai nga ga agu aboro naya aKristano nga yo. Isoke si rengbe kadu nga i aima gumba aziree fu aguyo tipa gaani aida. Berewe a, si rengbe kadu nga agu akurayo nagunde be agumeyo watadu aboro rogo gayo dagbarago i andu ka sawia yo ka i degetuyo furani.

Si rengbe kadu nga kura aboro ani agbiayo gene tungusapai yo aima susa rogo kere akpakarapai na si ki ima du na maapai kuriyo ni kerehe. Mokedi ni dee du rimori nga Kim aya: “Rogo kura papara gaani dagbarago, badungu aboro aima susa rogo vura yo na i ki zanga gayo ahe dunduko. I na ndikidi maabangirise tipa kumbatayo te. I na bakere gberãrago na i akidongo kuti ai boro te. Ani ninaagbia agu aboro agbia ni naabisira pa gaani wene pangbanga rogo gi dagbarago re. Kura regbo adu kinaho sa i azubo re gene tungusapai yo.”

Wai du Kim naaka kindi kuti gu sino nga ga nunga, aboro ki vura kaa manga ri vurũ gbegberẽ wa gure? Ri aya: “Ho aboro naamanga re ni gbegberẽ, mi naasada ka banda Asanza 19:11 berãre yo, nga gu naya: ‘Wene berã namanga boro ni du ni bayee ni tipa zinga.’ Tingidapa agu apai du tipa agu aboro du rogo gaani dagbarago ninaaundo re mi yugu nunga fuyo. Na anga agu aboro dunduko ani agbiayo gene tungusapai yo du ni zingizingi yo te. Kina rogo gu bangisa rago re, wene aboro kina yo ani naakaraga tirani fuoyo.”

Ani rengbe ka sana tirani nga, ‘Ka apai nidu tipa re wa agu aboro ani atungusapai fuyo, wai du ka mi nimangipai kuti gu pangbanga nga ga Kindo?’ Ni kpiapai, na ka si nidu nga i aima peka dungu azire furani tipa aDezire Yekova? Isoke, ka ani ká aká a ka degaturani kuti wene pangbanga si kini idi i yugu nunga furani. Ho ani atingida gu ga Yesu zinahe ni du tipa mangapai na akuarani kina wai ani aida i mangipai na ani, si nafõngbaduraniyo ani yugu nunga fu aboro zavura ho adunga ha ni furani taata ka mangaha wo ya.—Mt. 7:12.

ONI WIRIKI GA PAURO NUNGA

Gu mokedi nangia Pauro aima yugo nunga zavura fu agu aboro naabisirapa gako pangbanga ni zuu. Tipagine? Bangiriko aagonga ti wai ko adu mbata te. Ko aya: ‘Mi adu mbata ni iragberãngba yo ni irarungosi boro, ni iragbarasapai, ono mi abi inapai, bambiko mi amangi he ni mungo ni zanga idapase.’ (1 Tim. 1:13) Ko aima rugatiko na gupai nga aYekova na Yesu aima yugo bakere inapai fuko. Si nawira gupai nga, ko aima rengba ka bi agu aboro ko aatungusapai fuyo kina wai ko adu mbata.

Ti kura aregbo, Pauro aima gbiatiko na aboro nga aguyo naadu na ida kuti ziree ayugopai. Gipai re asako ko du wai? Amokedi 17:16 nape gupai nga ho Pauro adu ni Atenai yo, “toroko ki zingi kpotoko yo, wa ko abi bakporo si nahi be kpiaahe.” Ono wa si avura duwo, Pauro amangisunge na kina boro gupai naaba gberãrago tiko re ka manga wene dezirepai. (Amo. 17:22, 23) Ko aʹaria gako agene tungusapai kuti wai apai adu tipa aboro dunduko ni basasa rogo gu rago re tipa wa ka ko “batasi agu yo.”—1 Kor. 9:20-23.

Ani rengbe ka wirika Pauro ni ruga ani tirani na gu iraira aberãpai watadu ziree aida du agu aboro na ni ani agbiayo gene tungusapai na fuani ani ki mangipai ni tatamana ka tungusa “wene pangbanga wene ahe” fuyo. (Yes. 52:7) Wirina du rimori nga Dorothy aya: “Rogo gaani dagbarago, badungu aboro i aima yugo gupai fuyo nga Mbori nga kere boro kidu ni gu boro nasapangbanga aboro ni kina boro ipo. Mi naatambua ngbatunga agu aboro re tipa gayo nyanyaki ida tipa Mbori na fuani mi kini gbeberã yo kuti gupai Ziazia Kekeapai apehe tipa wai du Yekova na nyemuse na agu akidohe ko nakidopaha kumbatayo.”

“ONI DI ADIA BE GBEGBERẼPAI NI WENEPAI”

Wa ani ambeda gbe kuti digido gi zegino re, gu bipai nga ga gu kura aboro ani atungusapai fuyo nika ‘gberã kisusi.’ (2 Tim. 3:1, 13) Ono si aidanga ani mbu gu gayo gbegberẽ bipai re si gberesipa gaani nunga watadu si sarani ani zanga gaani ngbarago te. Yekova ima rengba ka fu gu ome furani si aidaha tipa ani ‘di be gbegberẽpai ni wenepai.’ (Rom. 12:21) Nazakigene du rimori nga Jessica aya: “Mi naagbia tire dedede na agu aboro adunga na umbasitise tiyo ya na nga aguyo nabi rani na parani kusende gbiati gu pangbanga ani atungusaha. Gipai re ima rengba ka imisa boro. Ho mi naatona fugo ni na boro, mi naamanga kparakpee kukiri fu Yekova ki sanako tipa ko undo re mi bi gu boro re kina wai ko abi ni. Mangaha wo ninaaundo re mi di berãre kusayo ti gupai rengbe ka imisa re na ki gbeberã re kuti wai rengbe mi ka undo gu boro re.”

ADezire Yekova ye fuo kumba ka ko azakanga ngbadimo fuyo ya — Ani naandu kindi kumbatayo kaa gbata agu aboro i aima ringbisa yo sa nyenye unga

Kumba nazaka ngbadimo wa aDezire Yekova naye fuoko na ko karagapai wenengai — Ka ani aandu kindi kumbatayo kaa tungusapai, kura aboro ima rengba ka dia rengo kugume kusa

Si naida aida ani berãpa wai a rengbe ani ka ngarasa awirinarani nga aguyo ani atungusapai na yo. Jessica aya: “Ho ani naatungusapai ni na awirina, guni dagbarani yo kini gbia tiní na gbegberẽpai, mi naasada ka zanga nye kaa berã kina kuriihe. Kuba gure, mi naaʹaria fugo kuti fura tipa agu apai du ni wenehe, wa gunga fugo tipa gu wenepai gaani sunge tungusapai amangaha si ki vura du vurũ nga kura aboro nasogaha asoga.”

Yekova ima rugatiko na agu akpakarapai ani agbia tirani na ni gene tungusapai yo. Nairiwo wai du ko na ngbarago ho ani awirika gako inapai ni! (Rk. 6:36) Rengo ngaha nga, Yekova anyenga anye kaa yugo gako nunga kindi te. Ani ima rengba kadu na gu kido nga ko ima ino gu ndikidi regbo nzunzu ko nika digiso gi sino raka re ti ni. Ono wadu rago re tie, si naida ani mangisunge tungusapai ni ipiʹipihe. (2 Tim. 4:2) Ani naandunga andu kindi kumbatayo kaa manga gaani sunge tungusapai na kakaka nyemuse gbiati nunga fu ‘aboro dunduko.’