Oni Yugu Tambuahe Tipa ga Mbori Bakere Gamahe
1. Tipagine si aida ani tambua Yekova ti ni bakere gbe?
1 Dagba gu dungu ‘wene agamahe’ dunduko Yekova agamuhe furani, gu gamahe nyakipaha gbe nga gu motumo ko afuhe furani rogo Wiriko yo. (Yak. 1:17) Gu motumo re aye na badungu amaku kodihe naapa mbupai furani ti gaani ingapai. (Ef. 1:7) Ani na bakere tambuahe tipa giapai re. Ti regbo Tingida Pakpio Yesu, ani naadia regbo tipa ka berãkurii gi gako nyanyakipa gamahe re.
2. Wai rengbe ani ka undo gaani aborokporo tipa i bi motumo tumorii na nyanyakipaha?
2 Oni Bihe na Kikiipaha: Si angba angba ka oni mangisunge na gu regbo oni naamanga Gu irisombori nga ga aborokporo ti ni rogo agu aposo nikadu mbata fu Marungu 30 tipa ka wisigo agu apai du tipa motumo wa ka oni ruho ka undo gaoni aborokporo i bi pa gu motumo re na kikiipaha. Berewe a, oni nigedi Ziazia Kekeapai Kini Tingidi Pakpio Yesu sa na gaoni aborokporo. Oni berẽkurii wai gu motumo re naʹaria gaoni bipai tipa Yekova na ki aundo roni, kura aboro, gbiati gu gaoni raka du kumbatayo. Si nikadu furoni a ni momu tipa oni wiriki gu vovo abia ue ani ka bihe ti regbo Tingida Pakpio Yesu, du nambaha nga 8, na 109.—Tam. 77:12.
3. Wai rengbe ani ka yugo gaani tambuahe?
3 Gu Gene Ani Atambuahe Ngbaha: Padu ani na tambuahe tipa motumo nafõngbaduraniyo ani pepa Yekova fu kura aboro gbiati pa gu gako bakere nyemuse ko ayuguhe furani nga ka keda Wiriko tipa rani. (Tam. 145:2-7) Rogo Marungu, Zerekpe, gbiati Merekoko, kura aborokporo naayugo gayó tambuahe nimanga yó mbakadapai tipa kandara boro sa rogo gayó ngbadimokporo mangisunge nimoundo bazakigene. Kangia gene beroni tipa ka mangaha wo te, ya mo oni rengbe ka “banda gaoni saa” tipa ka kiiso gaoni sunge tungusapai? (Ef. 5:16) Gu tambuahe du ani nani ima rengba ka fõngbaduraniyo ani undo kura aboro tipa i ye kadu na ani pati Tingida Pakpio Yesu. (Yugo. 22:17) Si naida oni tona ka keka rimo agu aboro oni aida ka yamba yó tipa pakio Yesu, aguyo oni atungusipai fuyó, aguyo oni naawirika Ziazia Kekeapai naayó, agumeroni, gaoni abadiasunge, gbiati gaoni amurakporo, na ki tungusipai sirisiri ti regbo gu tua nika manga tipa Tingida Pakpio Yesu re.
4. Rogo gini agene rengbe ani ka mangasunge na gu regbo du tipa Tingida Pakpio Yesu rogo tatamana yo?
4 Regbo Tingida Pakpio Yesu nika fu momu furani tipa ani yugu gaani tambuahe fu Yekova tipa gu gamahe ko agamuhe fu aboro. Ani mangingo sunge amanga na gi regbo re tipa ka kiiso gaani sunge tungusapai na ka yugo gaani tambuahe tipa motumo gbiati gu “gasigasi ũkumuko nga ga Kristo.”—Ef. 3:8.