Ani Yugu Gaani Tambuahe Tingida Pakpio Yesu Nikadu Rogo Zerekpe 17

1. Gini bipai nga ga bake apapara Atambuahe si aida ani du nani ti regbo Tingida Pakpio Yesu?

¹ Mbiko gu tambuahe bake apapara Atambuahe adu nani, si asako ko sanahe tipa gu ga Yekova dungu mangapai nga ga inopai gbiati bata ki yaa: “Gini he mi ka fu fu Yekova tipa gu gako weneapai dunduko fu ko fere?” (Tam. 116:12) Areme, ga Mbori amoyambu na dungu nduapai beyo tipa ka tambuako. Kama agarã kusa fuo keyo agi afugo ga Mbori toro adu kugii pa kehe re, Yekova afu bakere gamahe fu aboro nga motumo tumorii. Wa ani ambakadatirani tipa ka tingida pakpio Yesu rogo Zerekpe ti rame ru 17, wene ndupai kina berani tipa ka yugo gaani tambuahe.​—Koro. 3:15.

2. Gini bete nduapai nasa rani ani duna tambuahe tipa motumo tumorii?

² Agu Amaku Nga ga Motumo: I ‘navu rani ti gaani ingapai’ mbiko motumo tumorii. (Koro. 1:13, 14) Gipai re naundo rani ani irisi Yekova na gigiri sangbakpotoseyo. (Eb. 9:13, 14) Si naundo rani a ani fura na Yekova zukazuka zanga gunde ti gu regbo ani akpara fuko. (Eb. 4:14-16) Agu aboro duna idapase kuti motumo tumorii, i na bakere maabangirise tipa ka gbia nyenye unga!​—Yo. 3:16.

3. Wai rengbe ani ka yugo gaani tambuahe fu Yekova tipa motumo tumorii?

³ Gu Gene Ani Ayugo Gaani Tambuahe Ngbaha: Gene sa dagba agu agene ani ayugo gaani bakere tambuahe ngbaha nga Geda Ziazia Kekeapai Kini Tingidi Pakpio Yesu na aʹuru dunduko na kini berẽkurii he. Rogo gu Wisigo Ziazia Kekeapai Na Aʹuru Dunduko nga ga 2011 gbiati Waraga-gida-ramediwi nga ga 2011, i ima ringbisapa wai rengbe ani ka Geda Ziazia Kekeapai Kini Tingidi Pakpio Yesu. Ani ima rengbe ka gumbaha fu Yekova rogo kpee yo ka yugo wai ani abi motumo tumorii na nyanyakipaha. (1 Tesa. 5:17, 18) Padu ani pati Tingida Pakpio Yesu ringbisihe kuti ga Yesu zinahe nayugopa gu tambuahe du ani nani. (1 Kor. 11:24, 25) Kurigure, ani rengbe ka wirika ga Yekova bakere nyemuse niyamba ani kura aboro i ye kadu na ani pati Tingida Pakpio Yesu.​—Yes. 55:1-3.

4. Ginihe si aida si du nga gaani diaberã?

⁴ Gu ga Yekova amoyambu duna tambuahe i arengbanga ka bi Tingida Pakpio Yesu wa kina gu kura adunguratise te. Si nga gu nyanyakipa dunguratise namanga vuru garã yo bara sa! Wa Tingida Pakpio Yesu ambeda, gaani diaberã dunga wakina gu nangia ga bake apapara Atambuahe nga guko nayaa: “Ako mbisimore, mo sámbua Yekova, ka bangiro nigó nga ti agu ahe dunduko ko anafuka rengbe arengba ya.”​—Tam. 103:2.