Bakere Adunguratise Naundo Abatungusipai
1. Gini vovo mbakadapai natona rogo gu garã nangia 1938, na tipagine i atona gu vovo mbakadapai re ti ni?
1 Rogo gu garã nangia 1938, ga Yekova riigbu atona kura vovo mbakadapai. I adungura badona nga ga adungurati kurugo ba sa tipa gu bakere dunguratise nga ga aʹuru ue. Tipagine i amangi gipai re ti ni? Gu Gaani Sunge Nga ga Kindo nangia ga Ngi 1939 akaragapai ki yaa: “Gi bakere adunguratise re nga gu mbakadapai nga ga ga Yekova riigbu tipa manga gu sunge nga ga Kindo. Agu arugute i afuhe ba agi adunguratise yo re naundo aboro dunduko tipa i mangi gu sunge i afuhe fuyó wenengai.” Ka ani makia pa wai bange atakipande Kindo naguari ti 58,000 wa gu si adu rogo 1938 ki susi 7,000,000 rogo 2009, ani inihe aino nirengo nga gu bakere adunguratise nga ga aʹuru ue naundo rani aundo ani mangi ‘gu sunge i afuhe furani wenengai.’
2. Gini agumbapai ani ka giaha ti regbo gu bakere dunguratise nga ga aʹuru ue nga gu nika manga rogo gu garã nga ga sunge naye re?
2 Rii gu Bakere Dunguratise Nga ga Aʹuru Ue Nga ga gu Garã Naye: Ani napido gu mbakadapai nga ga bakere dunguratise nga ga aʹuru ue nga gu nika tona rogo Mbirinvuo na gu nyakasaro ani ka gbiaha. Riihe nga, ‘Aboro Zegino Nga Oni Te,’ i dihe rogo Yoane 15:19. Gini bete agumbapai nika undo agu abamangisunge fu Mbori nga aKristano? Rago nzengu, ani nika gia gu gumbapai du riihe nga, “Wai Sunge Tungusapai ti Aregbo Dũ Abanda Rani?” Rogo gu uru re a, ani ka gia zungudizungudi gumbapai du na apaparaha biata nga: “Ka Oni Birikosingo Tironi . . . ” na “Nyarinde,” na “Bakere debari,” gbiati “Ababagiahe” ya. Rago Poso, ani ka gia gu zungudizungudi gumbapai du riihe nga, “Oni Kpinyemu Yekova, Angianga Zegino Ya.” Gu kura agumbapai ani ka giaha nga, “Oni Nye Ninungunungu Aboro, na ni Tata Aboro” gbiati gu kura riipai nga, “Oni Gbia Ngara! Oni Ima Rengba ka Diabe Zegino.”
3. Gini aundo rengbe ani ka gbiaha ka ani du pati gu bakere dunguratise nga ga aʹuru ue naye re?
3 Tifuo manga gu bakere dunguratise nga ga aʹuru ue, wirina sa nga guri naima zera ti mangasunge tungusapai ape gupai nga gu bakere dunguratise re aima sa ri ri wisigi agu apai nadu tipa ri na ki diberã tipa “ka tona tungusapai zanga deka behe.” Zanga kapa, gu bakere dunguratise nga ga aʹuru ue nika manga re, si nika undo rani aundo ani kpinyemu Yekova kuba gupai nga kaa kpi kina nyemu gi zegino re. (1 Yo. 2:15-17) Oni mangi ome kadu pati ni na ki degeturoni wenengai tipa ka gbia undo be gi mbakadapai du fu agu abamangisunge fu Mbori nga aKristano re!