Oni Rengbe Arengba Ka Manga Dezirepai Angianga Kuti Asino Mangaha Ya!
1. (a) Ginihe nga manga dezirepai angianga kuti asino mangaha ya? (b) Bange aboro wai dagbarani ane nagi rengo mbiko i amangi dezirepai fuyó angianga kuti asino mangaha ya?
1 Bange aboro wai rogo gaoni dungurati nagi rengo mbiko i amangi dezirepai fuyó angianga kuti asino mangaha ya? Si ima rengba ka iriwo tironi ka bi bange agu aboro re. Manga dezirepai angianga kuti asino mangaha ya nakoda pepa wene pangbanga fu agu aboro ani agbiatirani naayó ho ani andu ni ka bi agumerani watadu gaani amurakporo, ho ani andu ni ka ngbe ahe, basunge yo, sukuru yo, na rogo gu kura aba. Rogo badona nga ga awirina bangeyo adu wa 200, aboro adu dagbayó nga 80 nagi rengo mbiko i amangi dezirepai fuyó angianga kuti asino mangaha ya. Gipai re nayugo gupai nga manga dezirepai angianga kuti asino mangaha ya naye na wene sangbanaha.
2. Gini akpiapai nga ga manga dezirepai angianga kuti asino mangaha ya du rogo Ziazia Kekeapai?
2 Abatungusi wene pangbanga rogo bambata sa kama agarã anaamanga dezirepai amanga angianga kuti asino mangaha ya. Nikpiapai, ho Yesu aandu ni rogo ringara Somorona, ko amangi dezirepai fu dee naye ka tu ime rogo ga Yakoba guga. (Yo. 4:6-26) Firipo atona fugo na gu banyaki nangia boro Etiopia nga gu ko naageda gu buku nga ga Yesaya niyako wee: “Mo rúgu tiro na gu pai mo ageda?” (Amo. 8:26-38) Ho i aba Pauro ni ku bambukiso yo, ko amangi dezirepai fu babanda bambukiso. (Amo. 16:23-34) Kusa, ho Pauro adu ni niziziko ku kporo, ko anaadia “aguyo dunduko nandu koyo du ko ni ku gume, nitungusi pa ga Mbori ngbi, niyugu pai tipa Gbia Yesu Kristo zukazuka.” (Amo. 28:30, 31) Oni ima rengba a ka manga dezirepai angianga kuti asino mangaha ya, ka si vura du vurũ nga zee namanga roni amanga. Ono wai gu rengbe oni ka mangaha?
3. Ginipai rengbe ka dia zee tirani kusayo?
3 Tonaha: Dungu rani si naadunga furani taata tipa ani tona fugo na agu aboro ani ainongo yó ya ya. Zavura agu aboro ani naima ino yó, si naadunga taata tipa ani tona ka fura naayó tipa gupai nga ga rengo te. Ono pa berã ani kurii ga Yekova wene sino, na gu wene inohe nga ga toro fu ko ho fu gako amoyambu, gbiati gu bitimo du aboro rogoho rogo gi zegino re rengbe ka fõngbaduraniyo tipa ani pe wene pangbanga fu aboro. (Yona 4:11; Tam. 40:5; Mt. 13:52) Kurigure, ani ima rengba ka sana Yekova ko undo rani ani fura afura “zukazuka” zanga gunde. (1 Tesa. 2:2) Bawirikipai sa nga ga Girada ayaa: “Mi bi gupai nga kparakpee naundo re gbe tipa mi fura na aboro ho adunga ha ni taata ya.” Ka oni duadu na ndundu tipa ka fura, oni mangi wiri kpee rogo patapata.—Nem. 2:4.
4. Gini sásá rengbe ani ka maaha ku berãrani yo, na tipagine?
4 A wa ini ani he, anga si nga ho ani aida ka manga dezirepai ni angianga kuti asino mangaha ya, ani duwa ka ani fu sene, ki yambu rimo rani watadu ani duwa ka ani gedi veresi te. Gu sásá si aida ani moihe ku berã rani yo nga ka tona kungbo fugo na boro tipa si za gene furani tipa ani mangi dezirepai funi. Badungu abatungusipai nabi gupai nga tona kungbo fugo na aboro nasa gupai nga si du taata tipa ka tona tungusa wene pangbanga. Ka si du nga gu boro ani aida ka manga dezirepai funi aidanga ka fura te, ndupai ho ani zi ní kuti fugo gbua mbiko gupai nga ani naida ka manga dezirepai te. Ani digisi fugo ngba wene gene ki guari ho.
5. Ginipai ninaaundo wirina sa nga boro zee ri nimangi dezirepai angianga kuti asino mangaha ya?
5 Gupai wirina sa nga boro zee naamanga ha nga ho ri abi boro ni ba ngbe ahe yo, ri nangera ku kpakpu ní yo ki momu tooni ti ngbari. Ka gu boro re momu ti ngbani koyo du ri ni, ri ki pe gu wiripai kadu. Ka gu boro re fura koyo du ri ni wenengai, si naza gene furi tipa i fura nzunzu. Ho gu boro re afura ni, ri nadega turi wenengai ka gia ní wa ka ri ruho ka ino gu papara wene pangbanga rengbe ri ka gumbaha funi. Pa manga ri gipai re ima undo ri ri kparaka dungu abuku na ki tona wisigo Ziazia Kekeapai na aboro.
6. Wai rengbe ani ka tona fugo tipa ka manga dezirepai angianga kuti asino mangaha ya?
6 Tona Fugo: Ginipai rengbe ani ka gumbaha tipa ka tona fugo na boro? Ho Yesu atona fugo ni na gu dee naye ka tu ime, ko atonaha taata nisana ko ri tipa mbirimbiri ime. (Yo. 4:7) Sidu, ani ima rengba ka tona fugo na kungbo sene watadu sanahe. Wa oni kaa fura, oni ima rengba ka gbia momu tipa ka fura tipa gupai du rogo Ziazia Kekeapai na ki rũ tarã rengo. (Batu. 11:6) Gu kura aboro nagumba gupai nagbeberã boro ki sani ní sanahe. Nikpiapai, ti gu regbo oni apido munganga, oni ima rengba ka ya, “Rago angba angba tire ti gu regbo akakaza nikaa manganga re berewe ya.”
7. Wai padu ani ni agu aboro nakparia apai akparia narengbe ka undo rani ani mangi dezirepai angianga kuti asino mangaha ya?
7 Ka ani du a ni agu aboro nakparia apai akparia, si undo rani aundo ani tona fugo na aboro. Ka ani bi vungugude nga guni du ga awirini mangaapai niwenehe, ani ima rengba ka tambua ní na ki sana ní nga, “Ginihe naundo ro mo rugu agu agude re wenengai?” Wirina sa naadega turi ka gia agu apai aboro afura tipaha basunge yo na ki sakipai naayó ringbisihe kina kuti gupai du yó na nyemu ka fura tipaha. Ti kura regbo sa, tifuo ino ri gupai nga boro sa dagba agu aboro ri amangasunge naayó aaida ka dia kumba, ri afu Awake! furi nga gu nafura tipa wai ka mbakada pumbo diadee. Gipai re asa gupai i fura nigbangaha.
8. Wai gu rengbe ani ka mangasunge na gaani abuku tipa ka tona fugo na aboro?
8 Gu kura gene rengbe ani ka tona fugo ngbaha na boro nga kaa geda awaraga ho rengbe aboro arengba ni ka bi rani ani nigedihe. Wirina sa naazara Ngbaõbambu Sinziri watadu Awake! kini gedi gu kekeapai rengbe ka gbeberã boro. Ka ko bi boro ní ningere ka bi gupai ko agedaha, ko nasana ní na sanahe na ki fura niwiri guruhe tipa gupai ko agedaha. Gipai re naasako ko tona fugo na aboro na ki mangi dezirepai. Gu wiri taatapai nga ka mbu gaani abuku rogo gu ba aboro abihe abi rogoho rengbe arengba ka sa gaani abadiasunge watadu akuarani sukuru yo i sanahe tipaha.
9, 10. (a) Wai rengbe ani ka gbata amomu tipa ka manga dezirepai angianga kuti asino mangaha ya? (b) Ya mo oni amangingo ho?
9 Gbata Amomu: Wa sunge tungusapai andu ka nyasa, si aidanga ani bi manga dezirepai angianga kuti asino mangaha ya nigupai gbua si aida ani mangihe kinaho momu akura ni te. Kuba gure, si naida ani gbata amomu agbata tipa ka manga dezirepai wa ani kaa manga kura gaani apai na aʹuru dunduko. Oni berẽ tipa agu aboro oni ka gbiayo na ki berẽpa wai rengbe oni ka tona fugo naayó. Oni di Ziazia Kekeapai na oni wa sa gbiati kura abuku tipa ka sakapai rogoho na agu aboro duna nyemupai.—1 Pet. 3:15.
10 Kura abatungusipai namangasunge nibirĩ tipa ka gbia momu manga dezirepai angianga kuti asino mangaha ya. Wirina naraka rogo gu bambu ababanda rago abandaha nyanyakii naandu kurogo gu ba zambuatise nga ga gu kporo re kaa bi wene asura yo nga ga arago. Ri namangasunge na agu asura re tipa ka tona fugo na aboro wa ka ri ruho ka gumba pa gu mokido du rogo Ziazia Kekeapai tipa “vovo ngbangbaturũ na vovo kpotosende.” (Yugo. 21:1-4) Ya mo oni rengbe ka berãpa agu agene rengbe oni ka gbia momu ngbaha ka manga dezirepai angianga kuti asino mangaha ya?
11. Wai rengbe ani ka pekafuo gu boro duna nyemupai tifuo manga ani dezirepai angianga kuti asino mangaha ya?
11 Karagatise Fuo gu Boro Duna Nyemupai: Ka oni bi gu boro nadega tue sa gupai oni agumbaha, oni mangi ome tipa ka karagatironi ka bi ní berewe. Tifuo fura oni na boro ti bambata regbo, oni rengbe ka ya funi wee: “Rago ima ngba tire gbe ka sakapai na mo areme. Wari rengbe mi ka gbia ro ni berewe tipa ani fura nibakerehe?” Agu akurayó nafu gayó adresi watadu gayó namba terefuni ki yaa: “Rago ima ngba tire ka fura na mo. Ka mo aida ka inopai nibakerehe tipa gupai ani nifura tipaha re, gi namba terefuni gere.” Ka si du nga gene beroni wa ka oni karagatironi ka bi gu boro re te, oni hiisi gu fuomu nga Please Follow Up (S-43) ki fuhe fu gu bakeapai nga ga gaoni dungurati.
12. (a) Tipagine si aida ani tingidipa agu aregbo atingida ti ni ani adiaha kuti manga dezirepai angianga kuti asino mangaha ya na kini fuhe ti digido diwi? (b) Gini weneapai nakuru mbiko manga dezirepai angianga kuti asino mangaha ya? (Oni bi gu sanduki nga “Asangbana Manga Dezirepai Angianga Kuti Asino Mangaha Ya!”)
12 Gu regbo ani adiaha kuti manga dezirepai angianga kuti asino mangaha ya, si naida ani tingidipaha atingida rogo gaani ripoti. Sidu, ka bangironi gonga ti kehe ya, ka si vura du nga kungbo aminiti du vurũ. Oni makianga gipai re: Ka si du nga abatungusipai rogo zegino dunduko nadia aminiti bisue rogo aʹuru dunduko ka manga dezirepai angianga kuti asino mangaha ya, agu asaa ka i gasihe rogo diwi sa, bangehe du nga amirioni 17.
13. Ginipai si aida si fõngbaduraniyo tipa ani mangi dezirepai angianga kuti asino mangaha ya?
13 Nyemu Mbori na nyemu akuarani nga gu bangua ndupai nasa rani ani mangi dezirepai angianga kuti asino mangaha ya. (Mt. 22:37-39) Padu ani na tambuahe tipa ga Yekova wene asino gbiati gako aringbisapai nafõngbaduraniyo ani fura tipa gu “taarimo nga ga gako zogarago.” (Tam. 145:7, 10-12) Ndikidi bakabangirise tipa akuarani nafõngbaduraniyo ani tungusi wene pangbanga ho momu amanga ni rogo gi bete regbo nye koyo re. (Rom. 10:13, 14) Wene mbakadatise kporoyo na berã kumbatayo kuriipa agu apai rengbe ka manga ima rengba ka sa rani dunduko ani mangi dezirepai angianga kuti asino mangaha ya, na ki gbia gu ngbarago naye be yugo rengo fu boro.
[Gu sura du ti kpewaraga 4]
Gupai rengbe ka undo roni nga ka maa sásá nga ga gbia aboro ki tona fugo naayó
[Gu sura du ti kpewaraga 5]
Kura abatungusipai namangasunge nibirĩ tipa ka gbia momu manga dezirepai angianga kuti asino mangaha ya
[Gu sura du ti kpewaraga 5]
Aberãpai Nga gu Rengbe ka Undo Rani Ani Tona Fugo na Aboro
◼ Oni kpari tipa undo ka tona fugo na aboro
◼ Oni fura na gu boro ka fura afura na oni adunga na dungu apai tiní ti gu regbo re ya
◼ Oni ini wai ka ngera ku kpakpu boro yo, ka moma ti ngbaroni, na ki ini wai ka fura tipa gu wene apai oni abihe ti aboro
◼ Oni degeturoni wenengai
[Gu sura du ti kpewaraga 6]
Asangbana Manga Dezirepai Angianga Kuti Asino Mangaha Ya!
• Wirina sa andu na gako tarambiri i mbakadihe, ho ko aapidoho ni i nyasi mbakadaha, ko amangi dezirepai fu agu aboro nadu pati ko ki fu kpewaraga yamba aboro tipa dunguratise fuyó tipa ka yamba yó tipa gu gumbapai du tipa aboro dũ. Tifuo garã sa ti regbo gu bakere dunguratise nga ga auru biata, wirina aye ka fu sene fuko nga gu ní ko ainongo ní ya. Gu wirina re angia gu boro ko afu kpewaraga yamba aboro tipa dunguratise funi bambakada atarambiri yo! Ko aima ndu tipa ka gia gu gumbapai gu wirina re ayambuko tipaha na ki sanahe tipa wisigo Ziazia Kekeapai. Ko na diako aima zio bapatiza.
• Wirina sa nga guri nagi rengo mbiko i amangi dezirepai furi angianga kuti asino mangaha ya adiberã ka fura na agu aboro dunduko ri anaagbiayo mbiko agu awiiri nadu biata. Agu aboro re nakoda gari amurakporo, agu avunguagude ri agbiayo sukuru yo na aguyo ri agbiayo ba agu adunguratise yo nga ga avunguagude. Ho ri atona fugo ni dagba aboro, gupai ri naapehe dedede nga Ziazia Kekeapai nga guhe naundo ri ri sonosi awiiri ngba wene gene, fuoho, ri ki tona ka fura tipa kura apai. Wa duhe nga ri niima fura mbata tipa Ziazia Kekeapai, si nadu taata furi tipa ka sakapai na aboro riipa Ziazia Kekeapai. Nimanga ri gipai re, ri ima undo aboro 12 i zi bapatiza.
• Bamangisunge ro gu basunge-igo-marã nga gu nangerafuo boro ti regbo kerepai aye ka bi wirina sa, ri ki di gu momu re ka manga dezirepai. Ri asanako singia ko naida gu basunge nika sa kpotoko si du zanga kaza, ki fu ngbarago fuko, na nyenye unga. Ko aya ii, ki sanari tipa gu ngbatunga basunge ri afura tipaha re. Ri ayugu agu amokido fuko du rogo Ziazia Kekeapai na ki fu buku nga gu ko agedihe rogo nyemu sa. I amangi mbakadapai tipa wisigo Ziazia Kekeapai. Ko atona ka ye tipa adunguratise na ki zi bapatiza kusa.
• Wirina sa naandu rogo tiyara atona fugo na gu dee nasungu pati ri ki mangi dezirepai furi. Tifuo da yó rogo gu ba i aandu kurogoho, gu wirina re afu gari adresi na namba terefuni fu gu dee re ki ya furi wee, ri sanahe tipa wisigo Ziazia Kekeapai ho aDezire Yekova nika ye ni berewe ku kpuriyo. Tifuo susa uru sa, aDezire Yekova anari gari ngbadimo. Gu dee re atona wisigo Ziazia Kekeapai, ki mangi sonakumbatayo niipo, ki zi bapatiza. Fuo bete regbo, ri atona ka wisigo Ziazia Kekeapai na aboro biata.
• Wirina sa du garãko nga 100 nga iravurari naraka rogo gu kporo nga ga agu aboro-wokote watadu gbinza aboro riigbu-fu-undo angerafuoyo. Ko naape gupai dedede nga, “Ani naida ga Mbori Kindo.” Gipai re sa gupai nga aborokaza gbiati agu aboro nangera fuo aborokaza naasanako na asanahe tipa ga Mbori Kindo. Dee sa dagba agu adee namangasunge rogo gu ba re asanako nga ginihe ko nika mangaha Paradizo yo. Ko akaragapai ki yaa, “Mi angera ki ndu berewe ngba ndure na ki zo gi ngbagida gbarigbari aboro kusayo.” Wa du ko ni iravurari, ko nayamba gu namangisunge re ri nigedi magazini fuko. Ho wiri gu wirina re ayeni, gu namangisunge re asana ri tipa ka ga na gu magazini re ka gedaha kporoyo. Dee sa rogo gu basunge re aya fu gu wiriko re wee, “Rogo gi kporo re, gu vovopai aboro dunduko afura tipaha nga: ‘Ani naida ga Mbori Kindo.’”
• Wirina sa nidee naru ti gene tenge rogo bambu ririahe ti marã agi fugo sosono akumba i nifura tipa agu apai nga ga birĩ zogarago. Gu ko sa aya gi zogarago du awere re, si arengbanga ka dia gu fudifudiapai namanga rani kusayo te. Gu wirina re aya ku kpotoriyo wee, ‘Momu du du re mi mangi dezirepai.’ Ri amangi tooni kparakpee ki ndu fuo agu akumba re. Tifuo yamba ri rimori fuyó, ri agumba pa ga Mbori Kindo fuyó nga gu nika nyasa riipa gu fudifudiapai namanga aboro na ki fu gu burosua fuyó nadu beri. Ho ri aafura ni kindi na agu akumba re, bangerekurii gu ba re aye fuori. Gu wirina re aberẽ gupai tigari nga ko naye ka do ri kusayo rogo gu ba re. Ono tie, ko aya furi ko naagia gupai agia ri naagumbaha na ki sana ri tipa burosua a. Kura dee a naadegaturi aye fuori nikpari niʹaume. Ri angia kuru nawiriki Ziazia Kekeapai. Fuo bi ri gu wirina re ri nitungusipai, nyemu wisigo Ziazia Kekeapai azi ri berewe ri ki idi ka tonaha berewe.