Ani Bi Gaani Sunge na Nyanyakipaha
1. Wai dungu aboro abi gaani sunge tungusapai?
1 Dungu aboro rogo ga Satana zegino nabi gaani sunge tungusapai ‘nipa mumungo.’ (1 Kor. 1:18-21) Ka ani abandanga tirani ti gi gayo iraira bipai re ya, si rengbe arengba ka zeresa kpotoraniyo ani ki mbu tungusapai zaaza. (Snz. 24:10; Yes. 5:20) Padu ani ni aDezire Yekova nga bakere momu. Gini nduapai duho si aida ani inihe si ki undo rani ani naabi gu gaani momu re na kikiipaha?—Yes. 43:10.
2. Tipagine rengbe ani ka ya ti ni ti gaani sunge tungusapai wee si nga “ziazia sunge”?
2 “Ziazia Sunge”: Gu mokedi nangia Pauro afura tipa gaani sunge tungusapai ya si nga “ziazia sunge.” (Rom. 15:15, 16, NW) Gine nasa gaani sunge si du ‘niziazia sunge’? Ho ani amanga gu sunge re ni, gure nga ani nga “ga Mbori abadiasunge.” Mbori “ni ziazia ko,” na gu sunge re naziasi rimoko. (1 Kor. 3:9; 1 Pet. 1:15) Yekova nabi gaani sunge tungusapai “ni motumo tambuahe.” Sidu, sunge tungusapai nga papara gaani irisombori.—Eb. 13:15.
3. Gine nasa sunge tungusa wene pangbanga si du niiriiri sunge?
3 Tungusa wene pangbanga nga iriiri sunge i afuhe fu kina bete aboro gbua. Wa ka i afuhe fu amaraika, ka i amangihe na ngbaduyo yo dũ na niwenehe gbe. (1 Pet. 1:12) Ono tie, ani nga kpakpa aboro nga “agu ahe i ameke he rogo sende yo” Yekova nasia rani tipa gi iiriwo sunge re!—2 Kor. 4:7.
4. Gine ani ayugo gupai nani nga ani nabi gaani sunge tungusapai na kikiipaha?
4 Ani Peresi Paha Mbatayo: Ani nabi gi gaani sunge tungusapai re nipai sa dagba “agu apai duna nyanyakipaha gbe” bambiko pa gu gaani momu re ima kio bangirani. (Frp. 1:10, NW) Fuo duhe were, aposo dunduko du ani na ringbisiringbisi aregbo berani tipa mangaha. Gu bataki woroahe nataka woroahe fu dungu aboro i naagiaha, ní nabi gu gani momu re na kikiipaha. Sidu, gupai ní amangaha mbata fu ní ndu tipaha nga ka mbakada tiní tipaha na ka ino birĩ taha wenengai gbe. Wakina gure a, si naida ani naambakada tirani ambakada mbata fu ani guari ka ndu tipa gi sunge re tipa ani ki rengbe ka ‘yugo rengo nzunzu.’ Na ani ki rengbe a ka ino birĩ ‘yugopai’ fu aboro.—2 Tim. 2:15; 4:2.
5. Gini boro nabi gaani sunge tungusapai na nyanyakipaha?
5 Si aidanga ani mbu gu bipai nga ga dungu aboro tipa gaani sunge tungusapai si zeresi kpotoraniyo te. Dungu aboro kinaho kindi naida aida ani naaye ka biyo. Anga aboro ani agbatagene i idi na ani te, Yekova du ani agbatagene ko idi na ani na ko a nga gu boro nabi gaani sunge na nyanyakipaha.—Yes. 52:7.