Yekova Naraba Rani Tipa gi Sunge Re

1. Ho Yekova afu sunge ni fu aboro, ginipai ko amangaha a?

¹ Ho Yekova afu sunge ni fu awiri aboro, Ko naundoyo aundo tipa i mangi gu sunge re wenengai. Nikpiapai, ho Yekova afu gu sunge ni fu Noa nga ga mbakada kurungba, nga gupai Noa aamanganga ha mbata ya, Ko aima pepa wai fuko ko nika mangaha. (Bam. P. 6:14-16) Ho Yekova afu gu sunge ni fu gu bayee bangerefuo akandoro nangia Moize nga ko ndu fuo agu abaakumba nga ga aYisaraere yó na Faro, Yekova akido ko ki yaa: “Mi adú na ngbaro, ki yugu gu pai foro mo ka gumba ha.” (Gate 4:12) Zavura gaani sunge nga ga tungusa wene pangbanga, Yekova naundo rani aundo ani mangihe. Ko naraba rani rogo Gu Sukuru Nga ga Siokrasia na Gu Dunguratise Nga ga Sunge. Wai rengbe gu rabahe re ka undo rani?

2. Wai rengbe ani ka gbia undo be Gu Sukuru Nga ga Siokrasia?

² Gu Sukuru Nga ga Siokrasia: Oni wisigi agu apai i nika sakaha ba dunguratise yo mbata fu ndu oni tipa dunguratise. Ka oni amangaha wo, ho oni ka ndu ni tipa dunguratise ki bi wai agu aboro du rogo sukuru nika manga gayo agumbapai, oni nika wirika wai awirika rengbe oni kadu niwene bayugupai. (Snz. 27:17) Oni yeaye na gu buku nga Ministry School ti regbo adunguratise tipa si undo roni oni ini kura apai. Ho gu babiapai nga ga sukuru ko nika fu arugute ni fu agu aboro namanga gumbapai, oni gbaki he ti gu memeapai oni aida ka mangasunge nani, na ki keke meme apai pangba gaoni buku. Tipa ka gbia undo be gi sukuru re, si naida ani kodi berani akoda kutini. Ya mo oni rimi gu sukuru re? Ho i afu gumbapai ni furoni oni mangihe, oni mbakadihe wenengai na ki mangihe ringbisihe kuti gu rugute fuyo ho furoni. Ho du oni ni gene tungusapai yo, oni mangisunge na gupai oni awirikihe.

3. Gine nika undo rani ani gbia undo be Gu Dunguratise Nga ga Sunge?

³ Gu Dunguratise Nga ga Sunge: Tipa ka tingida agu apai du rogo gi papara dunguratise re, si naida ani gedi agu apai i nika wisigoho mbu regbo koyo kindi na ki mbakadi gaani akaragapai. Ka ani fu gaani akaragapai niguruguruhe, si ka sa gupai nga dungu aboro karagapai. Oni moi berãroni tipa agu akpiapai i amangaha, na ki mangisunge na gupai oni abihe nga si rengbe arengba ka undo roni gene tungusapai yo. Oni banda gu Gaani Sunge Nga ga Kindo duna gu nyanyakipa apai rogoho nika undo roni aundo kumbatayo.

4. Tipagine si aida ani mangisunge ti ni wenengai na gu rabahe ani agbiaha ti regbo gaani adunguratise?

⁴ Wakina gu sunge i afuhe fu Noa na Moize, gaani sunge nga ga tungusa wene pangbanga rogo zegino dunduko, taata sunge ngaha te. (Mt. 24:14) Ani rengbe ka du na diabese kinagu ka si du nga ani nakido kuti Yekova, nga gaani Bakere Bayugupai, na kini mangisunge wenengai na gu rabahe ani agbiaha ti regbo gaani adunguratise.​—Yes. 30:20.