Gu Sukuru Nga ga Siokrasia Nga ga 2015 Naundo Rani Ani Mbakadi Gaani Gene Yugopai
1 Gu bake apapara Atambuahe nangia Davide aya: “Mo niídi he ya agu apai du ngbare na gu makia pai du ku kpotore yo si ngba bangiro, Ako Yekova, gi mbia, nga gu ko natumo re.” (Tam. 19:14) Ani naida aida a agu apai ani agumbaha ngba angba ti Yekova, bambiko gu mamu du berãni nga kaa fura tipa rengo rogo dungurati na gene tungusapai yo, ani nabihe na nyanyaki paha gbe. Gene sa Yekova ayugopai furani ngbaha tipa tungusapai nga vurube Gu Sukuru Nga ga Siokrasia. Gi sukuru re namanga rogo zegino dunduko rogo adungurati bangehe naima susa 111,000 rogo aposo dunduko. Si ima undo badungu awirina nga akumba na adee rogo zegino dunduko tipa i da niwene abatungusi wene pangbanga, kini yugupai fu aboro si kini zi ngbaduyo yo, kini yugupai rogo birĩ yo, na ki du na ngara.—Amo. 19:8; Koro. 4:6.
2 Gu ringbisapa sukuru nga ga 2015 nika du na agu apai rogoho furayo tipaha rogo gu wiri buku nga “Agu Apai Fugo Mbori Afura Tipaha.” Kurigure, i ima manga ariapai tipa gu bagizo regbo du tipa kusa gu memeapai du rogo Ziazia Kekeapai gbiati Bambata Sunge. Agu ariapai re gbiati gu kura arugute du tipa wai si aida i mangi apapara sukuru gu duku rogo agu agenewaraga du kusende re.
3 Kusa gu Memeapai Du Rogo Ziazia Kekeapai: Gu wirina nga kumba i nafu gi paparaha re funi nika mangasunge na aminiti ue tipa ka fura tipa memepai sa nga gu rengbe aboro ka wirikapai ti ni rogo gu gedapai nga ga poso. Ka boro mbakada tini wenengai si nika sa gupai nga ni fura tipa kina meme pai nga gu rengbe aboro arengba ka gbia undo ti ni kina vuru gu umba regbo re. Fuo gure, agu aboro du pati dungurati nika dia aminiti sita a wa si nidu mbata tipa ka fu akaragapai tipa asekonde 30 watadu kusende ti ni tipa agu apai i awirikihe rogo gayo geda Ziazia Kekeapai rogo gu poso re. Tipa boro fu karagapai vuru asekonde 30 si naida ni mbakadihe ambakada wenengai na ki banda regbo wenengai, ono mangaha wo nga wene rabahe furani. Mangaha kina vuru gu bete asekonde re nambu regbo fu badungu aboro tipa i fura a tipa gupai i awirikihe.
4 Bambata Sunge: I gbisi gu regbo du tipa geda Ziazia Kekeapai kuti aminiti biata na gupai i nikaa gedaha nika du tooni ti gu nidu mbata. Agu aboro i afu gu sunge fuyo nga ga gedapai si naida i gedihe bara dunguhe na kini moiberãyo tipa agu aba si aida i ru rogoho tipa ho i nikaa gedaha ni si kini kura akura zukazuka na aboro kini gi tiyo agia na ni. Airisi Yekova naabayo si aida i mangi ome kaa gedapai wenengai, bambiko gedapai nga nyanyakipa papara irisombori. Nairiwo gu ngbarago du ani na ni ka bi gupai nga gaani agude nagedapai wenengai. Ani nafu bakere tambuahe fu avungu agude nga aguyo naundo awiriyo tipa i ini gedapai wenengai.
5 Ue Sunge: Gere nikangia gumbapai nga ga aminiti bisue nga gu i nikaa fuhe fu gu wirina nga dee. Si naida ri mangi gi gumbapai re ringbisihe kina kuti gu paparaha i aˈasiaha furi. Ho du mburu gumbapai ni rii gu wiri buku nga Agu Apai Fugo Mbori Afura Tipaha, i mangihe kuti gu gene tungusapai nga gu rẽarẽ tipa gaoni dagbarago. Ri rengbe arengba ka geda kura averesi nga gu nafura tipa gupai re. Gu babiapai nga ga sukuru ko nika sia kurari tipa i mangihe na ri.
6 Biata Sunge: Gere nikangia gumbapai nga ga aminiti bisue nga gu i narengbe ka fuhe fu gu wirina nga kumba watadu dee. Ho i afuhe ni fu gu wirina nga dee, si naida ri mangihe ringbisihe kuti agu arugute du tipa Ue Sunge. Ho i nafu gu sunge ni du rogo gu wiri buku nga Agu Apai Fugo Mbori Afura Tipaha fu gu wirina nga kumba, si naida ko mangihe wa gu ringbisapai nga ga gu wisigopai nga ga aborokporo watadu ga sunge tungusapai. Si naida ko zakirogo gupai yo fuyo ho fuko, ki sia agu averesi rẽarẽ, na ki yugu gupai rengbe aboro ka wirikaha ti ni.
7 Vovo Papara Biata Sunge fu Agu Awirina Nga Akumba: Ka si du nga mburu gu gumbapai re rogo gu buku nga Agu Apai Fugo Mbori Afura Tipaha si naida i mangihe wa gu ringbisapai nga ga gu wisigopai nga ga aborokporo watadu ga sunge tungusapai. Dedede, gu babiapai nga ga sukuru ko du nika sia gu boro i nika mangaha na ni gbiati gene mangaha. Gu boro i asia ni i mangihe na ni, ni du nga gu boro i araka na ni rogo kporo sa watadu wirina rogo dungurati. I ima rengba ka geda gu kura averesi nga gu nasongoda gu riipai re. Ti kura aregbo i nikaa fu gi paparaha re afu fu abaakumba. Bakumba ima rengba ka sia gu boro ni aida ka mangaha na ni na ki sia gani gene mangaha. Nirengo, si adu nipa wasa fu dungurati ka bi bakumba ko niyugu birĩ yugopai rogo kpiapai yo na gako boro kporo watadu wirina rogo dungurati.
8 Rugute: Gu babiapai nga ga sukuru ko nika mangasunge na aminiti ue fuo agude sukuru nyasi gayo gumbapai nibasasa dunduko ka tambua yo na ki fu wene arugute ringbisihe kuti agu apai du rogo gu buku nga Benefit From Theocratic Ministry School Education. Ho gu babiapai nga ga sukuru ko nikaa gumbapa gu sunge ni gude sukuru aye ka mangaha, ko agumbanga pa gu sino gumbapai gude sukuru aye ka mangasunge kutini te. Fuo gude sukuru nyasi gani gumbapai gu babiapai nga ga sukuru ko nikaa tambua ni wenengai, ki gumba pa gu sino manga gumbapai ni namangisunge na ni, na ki gumba gupai nisa gu gumbapai re si du niwenehe watadu ki gumba ndu gupai ngba wene gene si aida ni mangi asadatise amanga ti ni berewe rogo gu bangiriba ni naamanganga ha wenengai ya.
9 Gu fuomu nga ga rugute si ti kpewaraga 79 kuti 81 rogo gu gani buku nga Benefit From Theocratic Ministry School Education. Fuo gude sukuru mangi gani gumbapai, gu babiapai nga ga sukuru ko gbahe rogo gani buku na ki sana ni kusa singia ni amangi sunge na gu memeapai du rogoho. Ko ima rengba ka tambua ni na ki fu kura arugute funi ti kura regbo. Si naida gude sukuru di agu rugute i nika fuhe funi na ki bihe nga si rengbe ka sani ni sono rogo manga gumbapai yo. —1 Tim. 4:15.
10 Ka gude sukuru kuru ku gii regbo yo, gu babiapai nga ga sukuru ko yuguhe funi rogo birĩ yo nga gani regbo ima nyasa ni nara ko he funi watadu manga ko gupai nika yugoho funi. Si naida gude sukuru re gbe berã ni na ki nyasi gani gumba pai ni ipo ki guari ri tambara yo.—Benefit From Theocratic Ministry School Education, kpe. 282, genewa. 4.
11 Agu aboro dunduko naima re i nangarasa yo tipa i fu rimoyo tipa Gu Sukuru Nga ga Siokrasia. (Oni bi bu buku nga Benefit From Theocratic Ministry School Education, kpe. 282, genewa. 6.) Gu yugopai gi sukuru re afuhe ima undo badungu ga Yekova aboro i nitungusipai na kini yugu wene pangbanga nga ga Kindo rogo nyemuse yo, na kikii, na kini fura tipaha ni gupai i naima ida kutini na kpotoyo yo dunduko. Zanga kapa, Yekova na bakere ngbarago ho ko abi aboro ni nitambua ko nga aguyo nagbia undo ti gu sukuru nga ga siokrasia!—Tam. 148:12, 13; Yes. 50:4.
[Gu sura du ti kpewaraga 5]
Oni mangi sonakumbatayo ni manga oni pai kuti agu arugute gbiati aberãpai i afuhe furoni