Ya Mo Mo Nawirika agu Apai Dunduko Rengbe Mo ka Wirikaha be Yekova?
1. Wai Yekova abipa wirikapai?
1 Yekova nga gaani “Bayugupai,” ko naida ani wirikipai. (Yes. 30:20) Ko atona yugopai ho ko akusi bambata Wiriko ni. (Yo. 8:28) Fuo sa Adamu mungu kuti Yekova, Yekova aambunga yugopai te, ono ko aafu arugute kindi fu kpakpa aboro ninyemuse.—Yes. 48:17, 18; 2 Tim. 3:14, 15.
2. Gini sunge yugopai namanga awere rogo zegino dũ?
2 Areme, Yekova nayugopai bakere gbe susi gu naadu mbata. A wa gu nebi nangia Yesaya agumbaha, dungu amirioni aboro rogo zegino dunduko nagbe kurii “gu bagangara nga ga Yekova bambu.” (Yes. 2:2) I nagbe koyo tipagine? I nagbe koyo Yekova rabayo ngba gako agene, na gure nga Yekova yugupai fuyo! (Yes. 2:3) Rogo gu garã nangia 2010, aDezire Yekova adi asaa susi birioni sa na beberehe kutingba manga dezirepai na yugo rengo fu aboro. Kurigure, rogo aposo dunduko, i nayugo agu apai nga ga toro rogo adungurati susi 105,000 auru kpotosende, na ruru kangara moyambu nakusa agu awaraga nga ga aKristano rogo afugo susi 500.
3. Wai mo nagbia undo be gu yugopai nga ga Yekova?
3 Mo Gbia Undo Wenengai: Ani ima gbia bakere undo mbiko gu yugopai nga ga Mbori! Ani ima wirika gupai nga Mbori na rimoko ti ni na ko naberã parani aberã. (Tam. 83:18; 1 Pet. 5:6, 7) Ani ima ino akaragapai kuti kura nyanyakipa asanahe nga ga raka, wa agu nga: Tipagine aboro arungo ti ni na kini kpiki? Wai rengbe mi ka gbia ndikidi ngbarago? Ndu raka nga gine? Yekova ima fu arugute furani a tipa mangaapai nga gu naundo rani ani duna diabese rogo ‘gaani apai.’—Yos. 1:8.
4. Gini bete amomu nga ga wirikapai du fu ga Yekova amoyambu, na tipagine si aida ani wiriki agu apai dunduko ti ni rengbe ani ka wirikaha be Yekova?
4 Kurigure, Yekova ima manga kura mbakadapai tipa ka undo badungu gako amoyambu i kiisi gayo sunge fuko. Kpewaraga 4-6 duna tangaratangara pa agu amomu rogoho du fu dungu aboro. Ka si vura du nga agu apai du tipa rani ambunga rani ani gbia agu arabahe tangarayo paha re te, ani rengbe arengba ka gbia undo ti gu rengbe ani ka mangaha. Abayugupai nga ga sukuru yo gbiati kura aboro naangarasa agude gbe i merefuo bakere wirikapai nga ga zegino. Ya mo ani nangarasa agude tigaani i moi agu asásá nga ga toro na kini berẽpa gu bakere wirikapai naye be Yekova? Ka ani wiriki agu apai dunduko rengbe ani ka wirikaha be Yekova, si undo rani aundo ani duna ngbarago awere na ki gbia nyenye unga be Yekova.—Tam. 119:105; Yo. 17:3.
Bete agu Amomu Nga ga Wirikapai Du Rogo ga Yekova Riigbu
Yugopai Fu agu Aboro Akenga Pai Watadu Gedapai Ya
• Ndu Mangaha: I namangaha tipa ka yugopai fu aboro i ini gedapai na kepai tipa wa ka i rengbe kaa geda Ziazia Kekeapai nisayo na kini yugu rengo fu kura aboro.
• Bagizo Regboho: Ringbisihe kuti gu zingo duho.
• Gu Ba I Amangaha Rogoho: Bambu Kindo yo.
• Agu Aboro Rengbe Kadu Rogoho: Agu abatungusipai dunduko na agu aboro du na nyemu rengo naida ka wirikapai.
• Wai ka Sanahe Tipaha: Agu abaakumba nga ga dungurati yó namanga mbakadapai tipaha ringbisihe kuti gu zingo duho, na ki gumbaha fu agu aboro rengbe ka gbia undo ti ni tipa i ye tipaha.
Gu Sukuru Nga ga Siokrasia
• Ndu Mangaha: Ka raba abatungusipai i du niwene abatungusi wene pangbanga na wene abayugupai.
• Bagizo Regboho: Si adigongo te.
• Gu Ba I Amangaha Rogoho: Bambu Kindo yo.
• Agu Aboro Rengbe ka Rimoho: Abatungusipai dunduko na agu aboro ni nayeaye tipa adunguratise wenengai, i ki ima ida na agu ayugopai nga ga Ziazia Kekeapai, na i kini raki ringbisihe kuti agu arugute nga ga aKristano.
• Wai ka Sanahe Tipaha: Mo fura na gu babiapai nga ga gu Sukuru Nga ga Siokrasia.
Yugo Kura Fugo fu Aboro
• Ndu Mangaha: Ka undo abatungusipai i nitungusi wene pangbanga rogo kura fugo.
• Bagizo Regboho: Adiwi biama watadu bisue. Aboro nadunguratiyo tipa gi wirikapai re gbe Rago aNzengu wiso tipa saa sa watadu ue.
• Gu Ba I Amangaha Rogoho: I naamangaha gbe Bambu Kindo yo.
• Agu Aboro Rengbe ka Rimoho: Agu abatungusipai adunga pai ti rimoyo ya nga aguyo nakpinyemu kaa tungusapai rogo kura fugo.
• Wai ka Sanahe Tipaha: Be-basunge du namanga mbakadapai tipaha ringbisihe kuti gu zingo duho.
Sunge Dudua ABambu Kindo
• Ndu Mangaha: Ka dudua aBambu Kindo na kini mbakadi agu akuruhe. Sukuru nga gere te, ono agu aboro nafutiyo ka mangaha, i nagbia rabahe agbia nga gu rengbe ka undoyo i naaundo sunge meka abambu.
• Bagizo Regboho: Ringbisihe kuti agu apai du tipa gu boro fuu tiní ka mangaha.
• Gu Ba I Amangaha Rogoho: Ai ba nga gu i aida ka me bambu rogoho rogo gu ringara du boro rogoho watadu rogo kura ringara. Ti kura aregbo, i naasana kura aboro asana i ndu ka undo sunge meka abambu rogo tuturũ arago nga gu gberãngbi namangi rogoho.
• Gu Ngbatunga Aboro I Aida Yó: Agu aboro naima zio bapatiza na abaakumba ki idi payo tipa gu sunge re. I rengbe kadu ni agu aboro naima ino me bambu watadu aguyo ainongo ho ya.
• Wai ka Sanahe Tipaha: Mo sana gamo abaakumba tipa ka hiiso gu fuomu nga Kingdom Hall Volunteer Worker Questionnaire (S-82) watadu gu nga Application for Kingdom Hall Construction Volunteer Program (A-25).
Gu Sukuru Du Tipa Yugopai fu Abazakigene
• Ndu Mangaha: Ka undo abazakigene i mangi gayo sunge wenengai gbe.—2 Tim. 4:5.
• Bagizo Regboho: Aposo ue.
• Gu Ba I Amangaha Rogoho: Be-basunge nasia gu ba i amangaha rogoho; i naamangaha gbe rogo gu Bambu Kindo mbedi ambeda.
• Gu Ngbatunga Aboro I Aida Yó: Agu aboro naima du ni abazakigene tipa kandara agarã ue.
• Wai ka Rimo gu Sukuru Re: Babi adungurati du narimiso abazakigene kurogoho na ki gumbaha fuyo nga i ima siayo tipa gu sukuru re.
Gu Sukuru Du Tipa Vovo Aboro Betere
• Ndu Mangaha: Gi sukuru re tipa ka undo gu vovo aboro naye ku Betere yo i nimangi gayo sunge wenengai.
• Bagizo Regboho: Saa sa rogo poso sa tipa aposo bawe-na-sita.
• Gu Ba I Amangaha Rogoho: Betere.
• Gu Ngbatunga Aboro I Aida Yó: Agu aboro andunga ka mangasunge Betere yo tipa bete regbo gbua ya watadu aguyo ndu ka mangasunge tipa ringbisiringbisi regbo (garã sa watadu susihe).
• Wai ka Rimo gu Sukuru Re: Be-basunge du narimiso agu aboro Betere kurogoho rẽ tipaha.
Gu Sukuru Nga ga Sunge Kindo
• Ndu Mangaha: Si tipa ka raba abaakumba na amoundo abaakumba i naamanga gayo asunge wenengai na kini ngerefuo akandoro wenengai. (Amo. 20:28) Riigbu Bipasunge du ninaamanga mbakadapai tipaha fuo bete agarã.
• Bagizo Regboho: Vuru agu agarã susi kusayo bambeda, i naamangaha tipa uru sa na beberehe tipa abaakumba na uru sa tipa amoundo abaakumba.
• Gu Ba I Amangaha Rogoho: I naamangaha gbe rogo gu Bambu Kindo du mbembedii watadu Bambu Bakere Dunguratise.
• Gu Ngbatunga Aboro I Aida Yó: Abaakumba watadu amoundo abaakumba.
• Wai ka Rimo gu Sukuru Re: Babi adungurati nayamba agu abaakumba na amoundo abaakumba rẽ tipaha.
Gu Sukuru Du Tipa Abaakumba
• Ndu Mangaha: Si tipa ka undo abaakumba i naamanga gayo asunge wenengai rogo dungurati.
• Bagizo Regboho: Arame bisue.
• Gu Ba I Amangaha Rogoho: Be-basunge nasia gu ba i amangaha rogoho; i naamangaha gbe rogo gu Bambu Kindo mbedi ambeda watadu Bambu Bakere Dunguratise. Gi sukuru re awere rogo aringara dunduko te.
• Gu Ngbatunga Aboro I Aida Yó: Kina abaakumba sa.
• Wai ka Rimo gu Sukuru Re: Be-basunge du nasia abaakumba tipaha.
Gu Sukuru Du Tipa Raba agu Ababiapai Ninaata Ata Gbiati Adiayo
• Ndu Mangaha: Ka undo ababi adungurati (circuit overseers) na ababi rimbasa adungurati (district overseers) i niundo adungurati wenengai na kini ‘mangisunge gbe rogo tungusapai na yugopai’ na kini mbuti agu aboro du tiibeyo.—1 Tim. 5:17; 1 Pet. 5:2, 3.
• Bagizo Regboho: Adiwi ue.
• Gu Ba I Amangaha Rogoho: Be-basunge nasia ba tipaha. Gi sukuru re awere rogo aringara dunduko te.
• Gu Ngbatunga Aboro I Aida Yó: Kina ababi adungurati na ababi rimbasa adungurati.
• Wai ka Rimo gu Sukuru Re: Be-basunge du nasia agu ababi adungurati na ababi rimbasa adungurati na adiayo rẽ tipaha.
Gu Sukuru Du Tipa Raba Abakuparanga na Ziazia Kekeapai
• Ndu Mangaha: Ka mbakada agu abaakumba na amoundo abaakumba nga abakuparanga tipa kura asunge. Dungu agu aboro namanga gu sukuru re i akeda yó i ndu ka mangasunge rogo gu rago du na zingo rogoho rogo gayo ringara. I rengbe arengba ka keda beteyo a kurogo kura aringara ka i tingidihe wo fu be-basunge nga i rengbe arengba ka ndu kurogo kura ringara.
• Bagizo Regboho: Adiwi ue.
• Gu Ba I Amangaha Rogoho: Be-basunge nasia gu ba i amangaha rogoho; i naamangaha gbe Bambu Bakere Dunguratise yo watadu Bambu Kindo yo. Gi sukuru re awere rogo aringara dunduko te.
• Gu Ngbatunga Aboro I Aida Yó: Agu awirina nga abakuparanga du garãyo bangbanda 23 na 62 na kpotoyo kidu adu wenengai nga aguyo naida ka mangasunge ka undo awirina na ka kiiso sunge Kindo rogo ai gu ba du zingo rogoho. (Mk. 10:29, 30) Si naida i du ni agu aboro naima mangasunge ni abaakumba watadu amoundo abaakumba tipa kandara agarã ue zanga rugusaha gene.
• Wai ka Rimo gu Sukuru Re: Ka si du nga gi sukuru re namanga rogo gu rago du tiibe gaoni be-basunge, i namanga dunguratise amanga na agu aboro naida ka ndu sani ti regbo gu bakere dunguratise nga ga aʹuru ue. Dungu apai i agumbaha tipa gu sukuru re ti regbo gu dunguratise re.
Gu Sukuru Du Tipa Raba Arogotise na Ziazia Kekeapai
• Ndu Mangaha: Ka raba arogotise wenengai tipa wa ka i mangi bakere asunge fu Yekova rogo gako riigbu. Dungu agu aboro namanga gu sukuru re i akeda yó i ndu ka mangasunge rogo gu rago du na zingo rogoho rogo gayo ringara. I rengbe arengba ka keda beteyo a kurogo kura aringara ka i tingidihe wo fu be-basunge nga i rengbe arengba ka ndu kurogo kura ringara.
• Bagizo Regboho: Adiwi ue.
• Gu Ba I Amangaha Rogoho: I namanga abambataha awere Amerika yo rogo gu ba yugopai du Patterson, New York yo (Watchtower Educational Center). Fuo gure, i nikaa mangaha rogo agu aba be-basunge nasiaha, gbe, Bambu Bakere Dunguratise yo watadu Bambu Kindo yo.
• Gu Ngbatunga Aboro I Aida Yó: Agu awirina nga arogotise du garãyo bangbanda 25 na 50 na kpotoyo kidu adu wenengai nga aguyo rengbe arengba ka mangasunge rogo gu ba duna zingo rogoho na i kidu na gu berã nangia ga Yesaya nga guko nayaa: “Mi du re! Mo kédi re.” (Yes. 6:8) Kurigure, si naida i du ni agu aboro naima manga kandara agarã ue kurogo rogatise yo na i ki ima manga sunge Kindo ti aregbo dũ tipa kandara agarã ue zanga rugusaha gene.
• Wai ka Rimo gu Sukuru Re: Ka si du nga gi sukuru re namanga rogo gu rago du tiibe gaoni be-basunge, i namanga dunguratise amanga na agu aboro naida ka ndu sani ti regbo gu bakere dunguratise nga ga aʹuru ue. Dungu apai i agumbaha tipa gu sukuru re ti regbo gu dunguratise re.
Gu Sukuru Nga Girada
• Ndu Mangaha: Ka raba abazakigene na kura aboro namanga sunge Kindo ti aregbo dũ tipa sunge amokedi.
• Bagizo Regboho: Adiwi bisue.
• Gu Ba I Amangaha Rogoho: I namangaha Amerika yo rogo gu ba yugopai du Patterson, New York yo.
• Gu Ngbatunga Aboro I Aida Yó: Agu arogotise naima manga agarã biata fuo zioyo bapatiza na garãyo kidu bangbanda 21 na 38 ti gu regbo i asanahe tipaha. Si naida i du ni agu aboro nape pa-Ngirisi ape, na i kidu ni agu aboro naima manga agarã kandara ue kurogo rogatise yo, na i kidu ni agu aboro naima manga kandara agarã ue kutingba sunge Kindo ti aregbo dũ zanga rugusaha gene. Si naida kpotoyo du wenengai. Agu abazakigene namangasunge rogo kura aringara; na agu ababiapai ninaata ata; aboro Betere; na agu aboro namangi gu Sukuru Du Tipa Yugopai fu Amoyambu, Gu Sukuru Du Tipa Raba Abakuparanga na Ziazia Kekeapai, na Gu Sukuru Du Tipa Raba Arogotise na Ziazia Kekeapai, i rengbe arengba ka sanahe tipaha ka i rẽ tipaha.
• Wai ka Rimo gu Sukuru Re: Rogo siakasiaka abe-basunge, i namanga dunguratise na agu aboro duna nyemu ka manga gu sukuru re ti regbo gu bakere dunguratise nga ga aʹuru biata. I nagumba dungu kura apai tipa gi sukuru re ti regbo gu dunguratise re. Ka si du nga ngbatunga gu dunguratise re amanganga ti regbo gu kikindigi adunguratise du rogo gaoni ringara te na oni kini kpinyemu ka sanahe tipa gu sukuru re, oni ke waraga fu be-basunge ki sungudi gupai i nika gumbaha.
Gu Sukuru Du Tipa agu Awirina Du Rogo gu Rondo Nga ga Be-basunge na Adiayo
• Ndu Mangaha: Ka undo agu aboro namangasunge rogo Gu Rondo Nga ga Be-basunge i naangerakurii Betere wenengai, na gu sunge tungusapai nga ga adungurati, kini ngerekurii adungurati na rimbasa adungurati nga gu du tiibeyo, na sunge sapai, kusa awaraga, keda awaraga kurogo adungurati, na ngerakurii kura asunge nga ga Betere.—Rk. 12:48.
• Bagizo Regboho: Adiwi ue.
• Gu Ba I Amangaha Rogoho: I namangaha Amerika yo rogo gu ba yugopai du Patterson, New York yo.
• Gu Ngbatunga Aboro I Aida Yó: Agu aboro du rogo Gu Rondo Nga ga Be-basunge watadu Gu Rondo Nga ga Ringara watadu aguyo i aida ka maayo koyo.
• Wai ka Rimo gu Sukuru Re: Riigbu Bipasunge du nayamba aboro tipaha.