Mo Nibanda Sangbakpotoroyo
1. Rii gu bakere dunguratise nga ga uru sa du tipa gu garã nga ga sunge nga 2013 nga gine, na ndu mangaha nga gine?
1 Aʹuru dunduko ani agbiatirani na agu apai rengbe ka gberesa sangbakpotoraniyo. Si du nga ndu gupai gu gaani bakere dunguratise nga ga uru sa nikadu rogo gu garã nga ga sunge nga 2013 nikadu ti ni na riihe nga “Mo Nibanda Sangbakpotoroyo.” (1 Tim. 1:19) Gu bakere dunguratise re nika tona ka manga rogo Mbirinvuo 1, 2012. I mangi gu mbakadapai re tipa si undo rani ani berẽ wenengai kuriipa wai rengbe ani ka mangasunge na gi bawene gamahe Bakusirani afuhe furani nga sangbakpotoseyo re.
2. Gini nyanyakipa asanahe i nika karagapai sani ti regbo gu bakere dunguratise re?
2 Oni Ngere Tipa gi Memeapai Re: Gu bakere dunguratise re nika karagapai sa nyanyakipa asanahe saba nibipa sangbakpotoseyo:
• Gine rengbe ka gberesa sangbakpotoseyo?
• Wai rengbe ani ka raba sangbakpotoraniyo?
• Wai rengbe ani ka bandatirani ti dia bapekure aboro?
• Ginipai gaani berã na mangapai kuti agu arugute nga ga Ziazia Kekeapai ayugoho tipa rani?
• Wai rengbe ani ka he ogã akuarani rogo agu apai nabipa sangbakpotoseyo?
• Paranga aboro, wai rengbe oni ka hipai ho i asosoda roni ni oni mangi gupai arunga ya?
• Gini amaku naye fu agu aboro napeka fuo gu gayo sangbakpotoseyo toro anungusaha?
3. Wai rengbe gu bakere dunguratise re ka undo rani?
3 Mbiko gu undohe nga ga Yekova, ani rengbe arengba ka diabe gu asadatise Satana amangaha ka gberesa sangbakpotoraniyo. Gu barani du ngbangbaturũ yo naya furani rogo Ziazia Kekeapai yo na rogo gako riigbu wee: “Gene du re, oni ndú ngba ha.” (Yes. 30:21) Gi bakere dunguratise re nga gene sa Yekova aruga rani ngbaha. Sidu tie, oni mangi mbakadapai tipa kadu pati ni. Oni moi berãroni wenengai, na ki berẽpa wai rengbe oni ka mangasunge na agu apai oni ka giaha. Oni fura tipa gu bakere dunguratise re kporoyo na gaoni aborokporo. Pa manga ani agu apai ani ka giaha yo nika undo rani ani “du na wene sangba kpoto yo” na ki undo rani ani he mera ka ndu ngba agu agene nga ga Satana.—1 Pet. 3:16.