Rago Ngba Tiro Mbiko Gamo Sunge
1. Ginipai rengbe ka sa rani ka ani mangingo sunge tungusapai zaaza ya?
1 I ambakadi boro tipa ní nigbia ngbarago ti “gani sunge.” (Batu. 2:24) Ono tie, ka si du nga ani abingo wene surungba gaani sunge tungusapai te, rago rengbe arengba ka gberã tirani na ani ki mbu mangasunge zaaza. Ginipai rengbe ka undo rani ani banda gu bipai du niwenehe?
2. Tipagine si aida ani du ti ni na gu maabangirise rẽarẽ nibipa wai aboro akaragapai kuti gaani sunge tungusapai?
2 Oni Du na gu Maabangirise Rẽarẽ: Oni tingidi gupai nga bete aboro gbua tooni naidi na gupai Yesu atungusihe, ono wa si avura du wo, gako sunge tungusapai adu na wene surungbaha ti ni. (Yo. 17:4) Rogo gu ga Yesu sanza yo nga ga bamitunga, ko agumba gupai yo nga badungu aboro nikaa idanga na gu pangbanga nga ga Kindo nga gu du wa kina tunga ya. (Mt. 13:3-8, 18-22) Wa vura duhe wo, gu bakere asadatise ani amangaha nayeaye na wene surungbaha.
3. Wai rengbe ani ka ‘kusa zuzuhe’ si ki vura du nga bete aboro gbua nakaragapai kuti gaani tungusapai?
3 Wai Ani Akusa Zuzuhe Gbe: Yesu agumba gupai rogo gako sanza yo nga agu aboro nika ida kuti gu pangbanga nga ga Kindo, i ‘azuka azuka.’ (Mt. 13:23) Ho katakpa nganu asona ni ki zara, si akusanga rukutu akatakpa nganu te, ono si nakusa vovo zende nganu. Sidu tie, anga gu wene surungba sunge aKristano agbiaha ti aregbo dunduko nga kina vovo abawiriki te, ono gu tunga i amihe nitungusa yó pai tipa Kindo. Gipai re naye na bakere ‘ngbarago’ ka si vura du nga aboro aidanga nani te. Gu sunge re a nasa gupai nga ani sa rimo Yekova si du niirisiirisihe. (Yes. 43:10-12; Mt. 6:9) Ani na gu momu berani nga kadu niga Mbori abadiasunge. (1 Kor. 3:9) Ngbatunga gu “zuzuhe nga ga ngbarani” re nasa ngbarago ti Yekova.—Eb. 13:15, 16.
4. Ginipai rengbe gaani sunge tungusapai ka mangaha nga gu ka ani ainongo ho ya?
4 Kurigure, gaani sunge tungusapai rengbe ka kusa gu surungbaha ani ainongo pai tipaha ya. Si rengbe arengba kadu nga kura aboro kinaho nagi gu tungusapai nga ga Yesu ono ka i adanga ni abawiriki ya da kinaho ko anyasi gako sunge tungusapai ni auru kpotosende. Teketeke a, gu tunga nga ga Kindo ani arũhe kpoto boro yo arengbanga ka sona nibasa te, ono si rengbe ka sona kusa ní ki ye kurogo rengo zanga ani inihe. Nirengo, gaani sunge tungusapai naye na wene sangbanaapai. Sidu tie, ani ‘zunga azu gbe’ na ki rẽ kadu na ga Yesu abawiriki.—Yo. 15:8.