“Oni Nizuku Azuka Kindi Zoozoo”
“Ka oni azuka azuka kindi zoozoo, si ka oni du ti ni nigimi abawiriki.”—YOANE 15:8, NW.
1. (a) Ginipai Yesu agumba paha ya si nga gupai i aidaha be agu aboro naida ka duni gako abawiriki? (b) Gini sanahe si aida ani sana tirani nani?
NYEMU du nadu mbata fu kpio Yesu, nga gu regbo ko adihe ka ngarasa gako amokedi kini gumba apai fuyo gbaiga du ngbatunga gu kuari re. Si nawira bebere yuru aima susa ho Yesu aafura ni re, ono mbiko gu nyemuse ko adu nani tipa bawene abakureako, si afõngbadukoyo ko naafura fuyo kindi. Fuo da ko bebere gako fugo na yo, ko atingidi yo na pa gu kurapai berewe si aida i mangihe tipa i ki nye nigako abawiriki. Ko ayaa: ‘Ka oni azuka zoozoo, si ka Buba du ti ni nitaasitaasi ko, si ka oni du ti ni a nigimi abawiriki.’ (Yoane 15:8, NW ) Ya mo agu rani du areme, ani namanga gupai si aidaha be agu aboro naida ka du niga Yesu abawiriki? Gu fugo nga ‘ka zuka zoozoo,’ rogoyo nga gine? Ka ani aida ka ino rogoyo, ani karaga tirani sa gu fugo ko agumbaha rogo gu nyemu re.
2. Gini yugopai na kpiapai tipa rindingua Yesu atangaraha rogo gu nyemu nadu mbata fu kpioko?
2 Gu rugute fu yo ho fu abawiriki tipa i zuku, si nga papara gu yugopai na kpiapai Yesu agumbaha fu gako amokedi. Ko ayaa: ‘Mi nga ndikidi bakakue, Buba nga babanda ati. Agu abebakakue du tire dunduko azukanga ya, ko adiaha adia kusayo. Agu abebakakue dunduko nazuka, ko agirisoho agiriso si zu susi gu nidu mbata. Oni ima du gigirii mbiko gupai gumba mi fu roni. Oni nye rogo re yo, mi ki nye rogo roni yo a. Ka bebakakue zunga nitihe te, kinagu ka si nye ti katakpa bakakue, wo du oni, kinagu ka oni nye rogo re yo. Mi nga bakakue, oni nga abehe. Ka oni azuka zoozoo, si ka Buba du ti ni nitaasitaasi ko, si ka oni du ti ni a nigimi abawiriki. Wa Buba akpinyemu re, mi nakpinyemu roni a, oni nye rogo gi nyemuse. Ka oni kakuti gi rugute, oni nye anye rogo gi nyemuse.’—Yoane 15:1-10, NW.
3. Ginipai du wa ka apefuo Yesu mangihe tipa ka zuka arindingua?
3 Rogo gi yugopai na kpiapai re, Yekova nga Basopo ati bakakue, Yesu nga katakpa bakakue, agu amokedi Yesu aafura fuyo, i tigayo nga abehe. Si adu nga, a wa agu amokedi re nikaa asada tiyo nyanyakii ka “nyé rogo” Yesu yo, si ka sa yo i zuku rindingua. Fuo gure, Yesu asakirogo wai yo ka agu amokedi re arengbe ka duna diabese rogo gi nyanyakipa kodatise re, ko ayaa: “Ka oni ka kuti gi rugute, oni nye anye rogo gi nyemuse.” Kusa, gu mokedi nangia Yoane akepai nadu teketeke wa kina gure fu akurako aKristano ki aya: “Gu ni ka ka kuti gako [ga Kristo] rugute ni nye anye rogo ko yo.”a (1 Yoane 2:24; 3:24) Sidu, nibanda apefuo Kristo gako arugute, si ka sa yo i nye rogo kodatise na ko, na gu kodatise re tigaha, nasa yo i zuku arindingua. Gine nga asino gu rindingua si aida ani zukuhe re?
Mamu Tipa ka Sona
4. Gine rengbe ani ka wirikaha ti gupai nga, Yekova ‘nadewa’ agu abebakakue kusayo azukanga ya?
4 Rogo gu yugopai na kpiapai du tipa bakakue, Yekova ‘nadia’ agu abehe kusayo azukanga ya, watadu ko nadewaha kusayo. Gine gipai re ayugoho fu rani? Anga si nagumba kina gupai fu rani gbua nga abawiriki dunduko si aida i zuku arindingua sa te, ono si nagumba gupai a nga, abawiriki dunduko rengbe arengba ka zuka, ka kina gini apai vura du tipa yo watadu gu ngbatunga adingisoro du yo rogoho vurũ. Nirengo, ka Yekova ‘di ga Yesu bawiriki kusayo’ watadu ka ya ni arẽnga te mbiko ni kpa ti manga gupai ni arengbanga ka mangaha ya, si dunga na ngbanya kuti ga Yekova nyemuse te.—Atambuahe 103:14; AKorosaio 3:23; 1 Yoane 5:3.
5. (a) Wai ga Yesu yugopai na kpiapai ayugo gupai nga, ani rengbe arengba ka kiiso sunge zuka rindingua? (b) Gini ngbatunga arindingua ue ani ka wisigoho?
5 Gu ga Yesu yugopai na kpiapai du tipa bakakue re nayugo gupai a nga, nibipa agu apai du tipa rani, ani du wa ka ani gbata amamu ka kiiso gaani asunge ni abawiriki. Oni kparianga wai Yesu agumbaha, ko ayaa: ‘Agu abebakakue du tire dunduko azukanga ya, ko adiaha adia kusayo. Ono agu abebakakue dunduko nazuka, ko agirisaha agirisa tipa si zuku susi gu nadu mbata.’ (Yoane 15:2, NW ) Nimbedi kuti digido gu yugopai na kpiapai re, Yesu angarasi apefuo ko i ‘naazuko azuka kindi zoozoo.’ (Veresi 8) Rogo gipai yo re nga gine? Ni abawiriki, si aidanga ani bi tirani wa ani ima zuka ki rengbe kuho ka ani aidanga ka berãpa kura sunge berewe ya te. (Yugoti 3:14, 15, 19) Kuba gure, si naida ani gbata agene ka zuka rinde. Gini ngbatunga arindingua si aida ani mangi asadatise nyanyakii ka zukoho zoozoo? Angbatungaha ue, (1) nga, “zuzu Toro,” na (2) nga, zuzu Kindo.—AGaratio 5:22, 23; Matayo 24:14.
Gu Rindingua Nga Sino AKristano
6. Wai Yesu Kristo anyakasi nyakapa gu zuzu toro i agumba paha nibambataha?
6 Gu rindingua moi yo ho nibambataha dagba “zuzu Toro” nga nyemuse. Ga Mbori toro nazuka nyemuse rogo aKristano yo, mbiko i nairisa gu rugute Yesu afuhe ngbutuko mbata fu ko gumba gu sanza du tipa gu bakakue nazuka rindingua. Ko aya fu gako amokedi wee: ‘Vovo rugute fu mi fu roni nga, oni duna nyemuse dagbaroni.’ (Yoane 13:34) Nirengo, rogo gu ga Yesu fugo nabaha ko agumbaha rogo gu yangara yuru nangia ga gako raka auru kpotosende re, ko atingidi gako amokedi bara dunguhe tipa i niyugu gu sino fu aboro nga nyemuse.—Yoane 14:15, 21, 23, 24; 15:12, 13, 17.
7. Wai gu mokedi nangia Petero ayugu gupai nga, pa zuka ani arindingua na pagume dagbaha na pa yugo ani agu asino du wa ga Kristo?
7 Petero, nga guko nadu kinaho rogo gu yuru re, arugutiko na gupai nga, si naida ndikidi apefuo Kristo yugu gu nyemuse du wa ga Kristo na agu asino du fuoho. Fuo susa agarã kusa, Petero angarasi aKristano i sonosi ngbatunga agu asino du wa zatise ti pai, nyemu awirina, na nyemuse. Ko agbia gupai kuti ni a nga, ka ani mangihe wo ani “adunga ni aboro nyomoro, na ni [agu] aboro zanga zu [te].” (2 Petero 1:5-8) Ka kina gini apai vura du tipa rani, pa zuko ani zuzu toro ni gupai rengbe ani arengba ka mangaha. Sidu tie, ani manginga asadatise nyanyakii ka yugo agu asino bakere gbe nga nyemuse, weneringise, zera, na gu kura asino du wa ga Kristo, mbiko “rugute ho tipa gere wa sa te,” watadu ngbanda ho tipa wai si aida boro yuguhe te. (AGaratio 5:23) Nirengo, ani zukunga ‘azuko zoozoo.’
Zuka Zuzu Kindo
8. (a) Gine nakoda zuzu toro kuti zuzu Kindo? (b) Gini sanahe si aida ani wisigihe?
8 Gu rindingua duna wene rangihe na kpotoho ki du nonono nafonga nguaha. Ono tie, kiopa gu rindingua re ima susa gupai gbua nga ga fonga gu ngua re. Rindingua nasa gupai a nga, agu azendehe du rogoho zugosi tungaha kumbatayo. Teketeke a, zuzu toro namanga gu kura apai susi gu nga ka fonga agu asino rani nga ga aKristano. Agu asino du wa nyemuse na idapase nasa rani ani tungusi gu pangbanga nga ga Kindo du rogo Fugo Mbori. Oni kparianga wai gu mokedi nangia Pauro anyakasipa gupai nakoda idapase kuti tungusapai. Ko ayaa: “Ani idi pai a [watadu ani na idapase, nga papara zuzu toro], si du ani nagumba pai ti ni a.” (2 AKorindo 4:13) Rogo gi gene re, Pauro asakirogoyo berewe ya ani ‘natumo nimotumo tambuahe fu Mbori, nga gu zuzuhe nga ga ngbarani,’ du nigu ue ngbatunga zuzu rindingua si aida ani zukuhe. (AEbere 13:15) Amamu gu duho rogo gaani raka tipa ani zuku susi gu du awere, nga ka ‘zuko zoozoo’ ni atakipande ga Mbori Kindo?
9. Ya mo pa zuka rindingua nayugopa sa aboro ni abawiriki? Oni sakinga rogoyo.
9 Tipa ani rengbe ka karagapai wenengai sa gu sanahe re, si naida ani girogo gine yo mbata nzunzu nga zuzu Kindo. Ya mo ruhe aru ani da kuti gu digisopai nga wee pa zuka ani rindingua nayugopa sa ani aboro ni abawiriki? (Matayo 28:19) Ya mo gu rindingua si aida ani zukuhe, si nibambatapai nayugopa agu aboro ani aundo yo tipa i dani agu airisi Yekova ima zio bapatiza? Oó. Kangia wo duhe, si du ni gupai nazeresa kina kpoto agu aDezire yo duna kikiipayo bangirani nga aguyo naima digo nitungusi pangbanga nga ga Kindo tipa dungu agarã rogo agu arago aboro adianga rengo rogoho kugume wenengai ya. Nirengo, ka singia gu zuzu Kindo ani azukaha, guhe nayugopaha nga kina vovo abawiriki gbua zanga si yugupa kurapai, ngbatunga agu awirina namangasunge nyanyakii rogo agu arago du wa kpatakpari re rengbe ka du wa kina agu abebakakue azukanga ya du rogo gu sanza Yesu agumbaha! Nirengo, anga wo duhe te. Wa duhe tie were, gine nga gu bambata rindingua nga ga Kindo du rogo gaani sunge tungusapai?
Zuka Rindingua Rogo Gbaraga gu Tunga Nga ga Kindo
10. Waigu gu ga Yesu yugopai na kpiapai du tipa bamitunga na ngbatunga asende nibakiakia ayugo gu tunga nga ga Kindo na guhe angianga ha ya?
10 Gu ga Yesu sanza du tipa bamitunga na ngbatunga asende nibakiakia, si nafu karagapai sani, na kingia gu karagapai nangarasa agu awirina namanga dezirepai rogo agu arago aboro adianga rengo rogoho kugume wenengai ya. Yesu aya wee gu tunga re nga gu pangbanga nga ga Kindo du rogo Fugo Mbori, na sende tigaha narukuba ngbadu aboro yo. Bete gu tunga re “[natiwa] ku rogo mbudu sende ki nisono asona, si ki nizuku.” (Ruka 8:8) Gini ngbatunga rindingua ngaha nazuka re? Ho katakpa mapunga akura ni na ki sono, si naakusanga rukutu abe mapunga te, ono si nazuka zuzuhe nga gu duna zende mapunga rogoho. Teketeke a, Kristano nazuka kura arindingua, angianga si du wa ka si du nga kina vovo abawiriki ya, ono si nga gu vovo tunga nga ga Kindo.
11. Wai rengbe ani ka sakarogo gupai gu rindingua nga ga Kindo ayugopaha?
11 Sidu tie, rogo gipai re, anga gu rindingua re nga vovo abawiriki watadu gu wene sino nga ga aKristano te. Wa duhe nga, gu tunga i amihe re si nga gu fugo nga ga Kindo, sidu, gu rindingua re nayugopa zugosi zende gu tunga re kumbatayo. Pa zuka boro arindingua rogo gipai re nayugopa agu afugo ni agumbaha tipa Kindo. (Matayo 24:14) Ya mo pa zuka ani ngbatunga gu rindingua nga ga Kindo re, nga kaa takapande gu wene pangbanga nga ga Kindo, ni gupai rengbe ani arengba kaa mangaha ka gini ngbatunga apai vura du tipa rani vurũ? Ii, wo duhe nirengo! Yesu aima yugo ndugupai duhe ti ni wo kina rogo gu bangisa yugopai na kpiapai re.
Gama gu Gaani Ahe Ngbaki Kisusi Tipa Taasarimo Mbori
12. Ya mo aKristano dunduko rengbe arengba ka zuka gu rindingua nga ga Kindo? Oni sakinga rogoyo.
12 Yesu ayaa: ‘Gu tunga i amihe kurogo mbudu sende nazuka ki nge ange, gu wa 100, gu wa 60, na gu wa 30.’ (Matayo 13:23) Agu atunga rũ yo ho ati yo rengbe ka zuka nibakiakia ringbisihe kuti agu apai du rogo gu rago i arũ gu tunga re rogoho. Teketeke a, gupai rengbe ani ka mangaha rogo takapande wene pangbanga rengbe ka du nibakiakia ringbisihe kuti agu apai du tipa rani, na Yesu ayugu gupai nga, ko ima ino pai tipaha nga wo duhe. Gu kura aboro rengbe ka duna amamu beyo nibakerehe; gu kurayo rengbe ka duna kpotoyo niwasawasaha na ki du ngangaraa. Si ki ta du were, gupai rengbe ani ka mangaha rengbe ka kio ti ga akuarani watadu ka du tooni ti ni, ono ka si du nga gupai mangi ani he re, si nga gu babawene pai kisusi rengbe ani ka mangaha, Yekova na ngbarago tiko behe. (AGaratio 6:4) Ka si vura du nga gbinza watadu gbara ambunga rani ani tungusipai wenengai te, zanga kapa, gu Barani nga Yekova duna nyemu rani tiko, nakoda rani akoda ku dagba agu aboro ‘nazuka azuka kindi zoozoo.’ Tipagine? Bambiko ani nafu ‘agu ahe dunduko du berani fuko,’ nga gu gaani sunge ani amangaha fuko na ngbaduraniyo dunduko.b—Marako 12:43, 44; Ruka 10:27.
13. (a) Gine nga gu bangua ndupai nasa rani ani ‘naazuko’ gu rindingua nga ga Kindo? (b) Gine nika undo rani ani zi tirani kuti zuko rindingua rogo agu arago aboro adianga rengo rogoho kugume wenengai ya? (Oni bi sanduki ti kpewaraga 29.)
13 Ka ani moi ndugupai ku berã rani yo ani amanga gu sunge ti ni nga ga zuka gu rindingua nga ga Kindo, na gu bakio sunge rengbe ani ka mangaha, si ka sa rani ani ‘naazuka azuka kindi.’ (Yoane 15:16, NW ) Yesu agumbapa bangua nduhe ki ya: ‘Ka oni azuka zoozoo, si ka Buba du ti ni nitaasitaasi ko.’ (Yoane 15:8, NW ) Ii, gaani sunge tungusapai naziasi rimo Yekova barabangiri ngbatunga aboro dunduko. (Atambuahe 109:30) Ruru Dezire du rimori nga Honor, garãri nada wa 75, ayaa: “Zavura rogo agu arago aboro adianga rengo rogoho kugume wenengai ya, si nga mamu boro nimangisunge yo kuba guko nga Bahe Kisusi.” Claudio nga gu Dezire du zaaza rogo sunge tungusapai, nga gu sunge ko atonaha rogo gu garã nangia 1974. Ho i asana ko ni tipa ndugupai ko aazi tiko ti ni kuti sunge tungusapai wa vura duhe nga kina bete aboro gbua nadia wene pangbanga kugume rogo gu rago ko atungusapai rogoho, ko agumba agu afugo du rogo Yoane 4:34, nga agu afugo nayaa: “Gi riahe nga manga kina gu pai gu ko akpi nyemu he nakedi re, mi nyasi gako sunge.” Claudio agbia gupai kuti ni nga: “Wa kina Yesu, anga mi aduna kina nyemu ka tona gimi sunge nibatakipande Kindo sa te, ono mi a na nyemu ka nyasaha.” (Yoane 17:4) Agu aDezire nga ga Yekova yo na kina gu bangisa berã re rogo zegino dunduko.—Oni bi gu sanduki du riihe nga, “Gu Gene Rengbe Oni Rogoho ka ‘Zuka Na Hipai,’ ” ti kpewaraga 29.
Ka Tungusapai na ka Yugopai
14. (a) Gini asunge tibaraha ue nadu be Yoane bafu Bapatiza gbiati gu nangia ga Yesu? (b) Wai rengbe oni ka ringbisapa agu asunge nga ga aKristano areme?
14 Gu bambata batungusipa Kindo gumba yo pako rogo abuku Wene Pangbanga angia Yoane bafu Bapatiza. (Matayo 3:1, 2; Ruka 3:18) Gako bambata sunge angia ka du “ni dezire imarago,” na ko amangihe wo na bakere idapase na ki duna gu maabangirise nga ‘aboro dunduko nika idapa’ gu pangbanga re. (Yoane 1:6, 7) Nirengo, bete agu aboro Yoane atungusipai fuyo ada kusa niga Kristo abawiriki. (Yoane 1:35-37) Sidu, Yoane angia batungusipai na kingia gu kumba a nanasa aboro ni abawiriki. Yesu a, angia batungusipai na kingia bayugupai. (Matayo 4:23; 11:1) Si du nga ndugupai Yesu azinahe ti ni fu apefuo ko ya ka i ndunga ka tungusa kina gu pangbanga nga ga Kindo sa ya, ono i ta tungusaha kini undo aboro a i di rengo kugume na ki da nigako abawiriki. (Matayo 28:19, 20) Rogo gi gene re, gaani sunge areme nga tungusapai gbiati yugopai.
15. Gini wiratise duho ti gu karagapai kuti sunge tungusapai nangia ga agu aboro nadu rogo bambata sa kama agarã ti Gaani Regbo na ga aguyo du areme?
15 Tipa agu aboro nadu rogo bambata sa kama agarã ti Gaani Regbo, nga agu aboro nagi Pauro ko nitungusipai na ki bi ko ko niyugupai, ‘aguyo aidi agu apai ko agumba, aguyo ki basa paha.’ (Amokedi 28:24) Areme, kinawo a aboro akaragapai sa gaani tungusapai. Si nafu kina gberarago fu rani nga, dungu gu tunga nga ga Kindo nati kina ku auru kpanangbara sende. Wa vura duhe wo, gu kura atunga kinaho tigaha nati kurogo mbudu sende, tarãha ki rimi ku sende yo, tamaha ki kuru, a wa Yesu agumba paha kumbatayo. Nirengo, rogo zegino dunduko, bange aboro du wa 5,000 rogo aposo nibasasa rogo garã nada nindikidi ga Yesu abawiriki! Gu vovo abawiriki re ‘naida kuti agu apai abatungusipai agumbaha fuyo,’ wa vura duhe nga dungu kura aboro aidanga kuti ni te vurũ. Gine nasa gupai nga ngbaduyo di gu pangbanga nga ga Kindo kugume? Dedede, si ningia gu nyemuse aDezire naayugoho, na ka pepai ni sanza, tuda gu vovo tunga rũ yo ho re, nga nyanyakipa pai tipa si sono. (1 AKorindo 3:6) Ani wisiginga kpiaapai gbua ue dagba gu dunguhe.
Kpinyemu Aboro Ninyanyakipa Pai
16, 17. Tipagine duhe ti ni ninyanyakipa pai ani yugu gaani nyemuse fu agu aboro ani agbia yo gene gaani sunge tungusapai yo?
16 Karolien nga paranga degude ni Dezire Belgium yo, andu fuo sosono dee nga guri naya nyemu gu pangbanga nga ga Kindo adunga tiri te. Wa si adu nga be gi dee re adu nikaikaihe na rokoo mbiko gu kaza nadu ti ni, Karolien gbiati nakureari asana gi dee re tipa ka fu undo furi, ono gi dee re akaha aka. Fuo susa arame ue kusa, agi aDezire re andu berewe fuo gi dee re ku kpuri yo na ki sana ri tipa wai kpotori adu. Karolien nayaa: “Kpinyemu aboro ninyanyakipa pai. . . . Pa ye ani ka bi gi sosono dee re airiwo tiri mbiko ri abi gupai nga, ani adu nirengo na ndikidi nyemuri tirani. Ri ayambu rani ku dimo kpuri yo, na ani ki tona ka wisigo Ziazia Kekeapai na ri.”
17 Sandi, nga Dezire Amerika yo, nayugo nyemuse a fu agu aboro ri atungusapai fuyo. Rogo awaraga pangbanga, ri nawisigopa takapande agu agude i avunga yo, fuo gure ri kini di gu buku na ri du rimoho nga, My Book of Bible Stories (Gimi Buku Apangbanga Nga ga Ziazia Kekeapai ) ka ndu nani fu avungu agu agude re.c Wa duhe nga na-gude nidu dedede kina kporo na ki duna ngbarago ka yugo wiiri fu agu ageno naye ku kpuri, dedede, fugo naatona dagbayo na ageno nibasa. Sandi nayaa: “Mi naafura na avunguagude tipa nyakapa zio ngbanya na fogo gude rogo gedapai funi, . . . Kusa mi nifura tipa gu kpakarakpakarapai du ti sonosa gude rogo zegino areme.” Bambeda kusayo, dee sa gbiati awiiri sita atona ka mangasunge fu Yekova nisangbana ngbatunga gu nduge nga ga Sandi ka biko ana-agude re. Pa yugo ani gaani nyemuse rengbe ka ye na gu sangbanaha nafu ngbarago wa kina gure rogo gaani sunge tungusapai.
18. (a) Wai duhe ti ni nga, gupai i akpinyemuhe be rani nga ka ‘zuka zoozoo,’ ani dunduko rengbe arengba ka mangaha? (b) Gini nyanyakipa apai biata nga gu i akpinyemuhe be agu aboro naida ka dani ga Yesu abawiriki nga gu gumba yo paha rogo gu buku Wene Pangbanga nga ga Yoane di oni berã ka mangaha?
18 Nangbaa rugatise na gupai nga, ani rengbe arengba ka manga agu apai i akpinyemuhe tipa ani ‘naazuka azuka kindi zoozoo’! Singia ani nga aparanga watadu ani nga gbinza aboro, singia ani na kpoto rani niwasawasaha watadu ani naakakaza akakaza, singia ani natungusapai rogo agu arago aboro adia rengo rogoho kugume wenengai ya watadu ani natungusaha rogo agu arago aboro akpinga nyemu rengo rogoho gbe ya, ani dunduko rengbe arengba ka zuka rindingua zoozoo. Rogo gini gene? Niyugo ani zuzu toro bakere gbe na nigbaraga ani gu tunga nga pangbanga ga Mbori Kindo a wa rengbe ome rani nani. Ti kina gu bangisa regbo re, ani na’asada tirani nyanyakii ka ‘nye kuti fugo Yesu’ na ka ‘duna nyemuse dagbarani.’ Ii, nimanga ani gi nyanyakipa apai biata nga gu i akpinyemuhe be agu aboro naida ka dani ga Yesu abawiriki nga gu gumba yo paha rogo gu buku Wene Pangbanga nga ga Yoane re, ani nayugo gu gopai nani nga, ani “ni [ga Kristo] abawiriki ni rengo.”—Yoane 8:31; 13:35.
[Gu rukutu kekeapai du bandu kpewaraga yo]
a Wa vura duhe nga, agu abebakakue du rogo ga Yesu yugopai na kpiapai re narukuba ga Yesu amokedi gbiati gu kura aKristano nga aguyo nika du na aba beyo rogo ga Mbori Kindo ngbangbaturũ yo, gu yugopai re na agu arengo rogoho rengbe agu apefuo Kristo arengba dunduko du areme ka gbia undo behe.—Yoane 3:16; 10:16.
b Agu awirina nye kina ku bayo kporo mbiko gbinza watadu akaza, i rengbe arengba ka manga dezirepai rogo keka awaraga, watadu rogo terefuni ka si du nga i rengbe arengba ka mangaha wo, watadu i rengbe ka pe wene pangbanga fu agu aboro naye ka bi yo.
c Si nga gu buku aDezire Yekova akusihe.
Asanahe Tipa Fugöpai
• Gini ngbatunga rindingua si aida ani zukuhe zoozoo?
• Tipagine du gu sásá ti ni nga ga ‘zuko zoozoo’ ni gupai rengbe ani arengba ka mangaha?
• Gini nyanyakipa apai biata wisigi ani he nga gu i akpinyemuhe be agu aboro naida ka da niga Yesu abawiriki nga gu gumba yo paha rogo gu buku Wene Pangbanga nga Yoane?
[Sanduki/kpiahe ti kpewaraga 29]
GU GENE RENGBE ONI ROGOHO KA ‘ZUKA NA HIPAI’
GINE naundo roni oni kakuti tungusa gu pangbanga nga ga Kindo kindi rogo agu arago aboro adianga ha kugume wenengai ya? Bete wene akaragapai gi du re kuti gu sanahe re.
“Pa ino mi gupai nga, Yesu nasongoda rani asongoda wenengai nangarasa re mi zi tire kuti rengo ki duna gu maabangirise nga, apai angba angba kumbatayo, ka aboro vura karagapai sani wai vurũ.”—Harry, garãko 72; azi bapatiza rogo 1946.
“Gu veresi nga 2 AKorindo 2:17, si ninaangarasa re dedede. Si naya wee ani namangasunge tungusapai ‘na Kristo, Mbori kini bi rani nani.’ Sidu, ho du mi ni tingba sunge tungusapai, mi nagbia ngbarago mbiko gu kodatise du mi nani na agu abakureami ngba sino kisusi.”—Claudio, garãko 43; azi bapatiza rogo 1974.
“Ka pe rengo, sunge tungusapai nga gupai mi asota asota nani. Wa vura duhe wo, mi nabi agu afugo du rogo Atambuahe 18:29 ni parengo, nga gu nayaa: ‘Mi nagu ri ngapa mbiko gi Mbori.’ ”—Gerard, garãko 79; azi bapatiza rogo 1955.
“Ka mi rengbe ka geda veresi gbua kandara sa fu boro ti ngba sunge tungusapai, si nafu ngbarago fere mbiko mi ima gbia boro ni ki wisigi ngbaduniyo na Ziazia Kekeapai.”—Eleanor, garãri 26; azi bapatiza rogo 1989.
“Mi naa’asada ka fura fu aboro rogo dungu agene nibakiakia. Dunguhe gu du kinaho mi ka manganga sunge nani rogo gu gimi yangara areme nye ya.”—Paul, garãko 79; azi bapatiza rogo 1940.
“Mi naambunga gu gbegbere afugo aboro naagumbaha si fu gberarago fere te. Mi naa’asada tire ka fura na aboro rogo sino pabakure, kita fura na yo kini degeture kuti gayo bipai.”—Daniel, garãko 75; azi bapatiza rogo 1946.
“Mi agbia agu aboro nazi bapatiza bambeda kusayo, nga agu aboro naya fere wee gimi sunge tungusapai afu bee tipa i da ni aDezire. Zanga mi inihe, kura boro kia awisigi Ziazia Kekeapai na yo na ki undo yo i sono kumbatayo. Si nafu ngbarago fere wa mi aini gupai nga, gaani sunge tungusapai nigu sunge dungu aboro nakodi beyo kurogoho.—Joan, garãri 66; azi bapatiza rogo 1954.
Gine naundo roni oni ‘zuku na hipai’?—Ruka 8:15.
[Gu kpiahe du ti kpewaraga 28]
Niyugo ani zuzu toro na nigbaraga ani gu pangbanga nga ga ga Kindo, ani nazuka rindingua zoozoo
[Gu kpiahe du ti kpewaraga 31]
Ginipai Yesu aberẽhe ho ko ayani fu gako amokedi: ‘Oni nizuku azuko kindi zoozoo’?