Sanduki Sanahe

◼ Gini bangua arugute rogo Ziazia Kekeapai rengbe ka undo rani nibipa mangasunge na terefuni ti regbo agu adunguratise nga ga aKristano na ti regbo tungusapai?

“Ahe na Regboho Ti Ni Dunduko.” (Batu. 3:1): Terefuni nga guhe rengbe ka undo boro ní fura watadu ní kepai fu kura boro ti ai regbo. Ono tie, kura aregbo kinaho si aidanga aKristano mbu gayo aterefuni si gbe berãyo kusayo ya. Nikpiapai, gu gaani adunguratise nga ga aKristano, si nga gu regbo ani airiso Yekova ti ni, ani agbia agu arugute nga ga toro ti ni, na si a nga gu regbo ani amongo niwasa ti ni na akuarani wa sa. (Pa Rug. 31:12; Tam. 22:22; Rom. 1:11, 12) Ya mo si adunga niwenepai ka ani kisi gaani terefuni ti gu regbo ani aye tipa adunguratise ki zakihe fuo nyasaha te? Ka si du nga pai kinaho ani aberãpaha nga si nika manga si aida ani mbu gaani terefuni ambu ti ni si nimangisunge zanga kisoho, si naida ani kisi woroho tipa ka si fudinga kura aboro ya.

Oni “Nimangi Apai Dunduko Mbiko Wene Pangbanga.” (1 Kor. 9:23): Kura aregbo kinaho si aida boro mangisunge amanga na terefuni gene tungusapai yo. Nikpiapai, gu wirina nangbembatayo rogo sunge tungusapai rengbe ka mangasunge na terefuni ka yamba agu abatungusipai natungusapai rogo gu kura papara dagbarago ka ino wai sunge andu koyo. Abatungusipai ninaayamba agu aboro ayamba rogo terefuni du na nyemupai watadu agu aboro i awirikapai naayo mbata fu i ndu fuoyo, gbe ho agu aboro re araka ni rogo gu ba turũ aturõ tooni. Ka si du nga ani di terefuni na ani, si naida ani moi bangirani tipa ka si tonanga kaa paa ho ani afura ni na irakporo ya. (2 Kor. 6:3) Ho ani asungudo kura abatungusipai ni, kuba gupai nga ani naayamba abakurearani rogo terefuni watadu kaa kepai fuyo, si angba gbe ka ani moi berãrani sa kina sunge tungusapai na agu aboro ani atungusapai naayo.

Oni Berẽpa Akuaroni. (1 Kor. 10:24; Frp. 2:4): si aidanga ani du ni agu aboro abandanga regbo gu dunguratise nga ga sunge tungusapai ya na kini bere gupai nga ka ani vura da gii regbo yo vurũ, ani ayamba boro ayamba rogo terefuni ka sana ní tipa gu ba i atungusapai rogoho. Ho ani adani kusa tipa gu dunguratise nga ga tungusapai, ani nagbarasa pa gu mbakadapai i nimangihe na ki sa gupai nga i mangihe berewe nivovoho. Kina rengo tigu du nga kura apai kinaho naima susa omerani nga gu rengbe ka sa gupai nga ani da kusa ti kura aregbo. Ono ho ani asaha ni nisino rani kaa da mbata fu regbo, ani nayugo irisa tipa ga Yekova mbakadapai, na ki yugu gupai nga ani naberã pa gu wirina aberã nangbembatayo, gbiati kura abatungusipai.